Eeinjanale waküjüin pütchi

1. ¿Kasa eeka süpüla waaʼinrüin miyoʼule maʼin tü mmakat eere waküjüin pütchi?

¹ Miyoʼule maʼin tü mmakat eere süküjünüin pütchi eere puutkajaain, eesü süpüla süküjünüin pümüin eere anain süpüla püküjüin pütchi, maʼaka saaʼin pejepünaa sünain pipia. Saashin tü karalouktakat Organizados suluʼu süpana 103, aneerü maʼin pukuwaʼipa sünain aküjaa pütchi, jalouijeerü pümüin süküjünüle pümüin eere püküjüinjachin pütchi jee eesü süpüla puunejüin wanee wawala sünain aküjaa pütchi pümaa.

2. ¿Jamüinjatü sukuwaʼipa watuma aküjaa pütchi namaa na wawalayuukana otta aküjaa pütchi eere süküjünüin wamüin?

² Waküja pütchi eere süküjünüin wamüin otta wojuʼitaa namaa na wawalayuukana. Süküjünüle pümüin püküjüinjachin pütchi eere piʼyataain, eesü süpüla paaʼinrüin shia peemeraapa suulia tü piʼyataainkat jee shiale keraapa tü piʼyataakat anain. Niʼyataale wanee wawala süʼütpaʼa eere piʼyataain, eeshi süpüla puunejaain nia sünain aküjaa pütchi. Aneerü namüin na wayuu kachonniikana nojuʼitüle sünain aküjaa pütchi aliikaluʼu süküjünüle namüin naküjüinjanain pütchi pejepünaa sünain nepia. Süka nnojoluin jaralüin wekiipüʼüin sünain aküjaa pütchi anasü wachuntüle nümüin Jeʼwaa nükaaliinjaiwa waya sünain aküjaa pütchi (Filip. 4:⁠6). Jülüjüinjatpajaʼa waaʼin choʼujaain wojuʼitüinjanain sünain aküjaa pütchi namaa na wawalayuu waküjakana amaa pütchi. Shialeekajaʼa saawanoʼu otta rimiinkoʼu süka wainmain na wawalayuu ojuʼitakana sünain aküjaa pütchi soʼu tia.

3. ¿Kasa anasü eeka sünainjee aküjaa pütchi eere süküjünüin wamüin?

³ Kasa anasü eeka sünainjee. Aneerü pümüin aküjaa pütchi süka eejeerüin na wayuu püküjeenakana amüin pütchi otta püneekeere tü oora anakat süpüla püküjüinjatüin oʼu pütchi. Wainmeerü oora püküjüinjatka anain pütchi soʼu kashikat jee aneerüin pümüin püsaʼwatüin pürekutsoolüin aaʼusiliaat jee rekulaaluin pia. Nnojoleechi wattakuwalin pia sünain aküjaa pütchi namüin na wayuukana. Süka pejein pipia nanain, eʼraajüneechi pia sutuma wayuu sünain püküjülin pütchi, mapüleejeerü pümüin puuyantüin nanainmüin na wayuu ekirajaweekana otta puʼttüin sünain ekirajaa sünain tü Wiwüliakat namaa. Motsojeerü pümaa sünain aküjaa pütchi namüin na wayuukana, kojuyatuwerü pukua nanainmüin, jee eejeena süpüla naʼyataain wanee wawala wachikumüin sünain aküjaa pütchi yalapünaa. ¿Aneetchejeʼe wamüin jee namüin na wapüshikana waküjüin pütchi eere süküjünüin wamüin?