Outkajawaa süpülajatka ojuʼitaa sünain aküjaa pütchi
1. ¿Jamüsü lotuinjatka maʼin sukuwaʼipa tü ojuʼitaakat sünain aküjaa pütchi?
1 Wanaa sümaa nüküjüin pütchi Jesús, lotusü sümaa anain maʼin sukuwaʼipa nutuma. Shia tü akuwaʼipaa nashateekat maaʼulu na wawalayuu shikiipüʼükana tü ekirajaakat wayuu sainküin mma süpüshuaʼa. Müsüjeseʼe noutkajaain na wawalayuukana süpüla nojuʼitüin sünain aküjaa pütchi eere süküjünüin tü naaʼinrajatkat süpüla lotuin sukuwaʼipa natuma (Mat. 24:45-47; 25:21; Luc. 10:1-7).
2. ¿Kasa aainjünaka sünain tü outkajawaa süpülajatkat ojuʼitaa sünain aküjaa pütchi?
2 Wanee outkajawaa anasü maʼin. Tü outkajawaa süpülajatkat ojuʼitaa sünain aküjaa pütchi süpülajatü atütüleʼeraa naaʼin otta ekirajaa na aküjüinjanakana pütchi. Eesü shikirajaanüle anain tü karaloukta aashajeʼennakat weinshi sünainpünaale shia tü aküjaakat pütchi. Otta müsia aküjünawaisü tü aainjünajatkat saashin tü karalouktakat Waʼyataain Nümüin Maleiwa, Razonamiento otta Benefíciese. Eesü shiiʼiyatünüle jamüinjatüin süküjia pütchi sükajee wanee karaloukta. Süpülapünaa oʼuraajaa, natüjaainjatü aaʼu na wawalayuukana jalainjanain naküjüin pütchi otta jaraliin nojuʼitüinjanain amaa. Outkajawaakat tia, aainjünajatü soʼu poloo jee poloo jaʼralimüin minuuto, keraapa shia oʼunüinjana eeinjanale naküjüin pütchi.
3. ¿Jaralii shikiipüʼüka tü outkajawaa süpülajatkat ojuʼitaa sünain aküjaa pütchi?
3 ¿Jaralii shikiipüʼüka? Chi wawala jülüjakai aaʼin tü aküjaakat pütchi nia akumajaka sukuwaʼipa tü outkajawaa süpülajatkat ojuʼitaa sünain aküjaa pütchi. Chi nekiipüʼükai na wawalayuukana otta chi akaaliinjakai nia ojuʼitajana saawanoʼu jee rimiinkoʼu namaa na wawalayuukana otta nachajaainjatü eeinjanale naküjüin pütchi sümaa naainjüin tü namakat chi jülüjakai aaʼin tü aküjaakat pütchi. Akatsaʼa soʼu tü semaanakat nüneeküin chi jülüjakai aaʼin tü aküjaakat pütchi wanee laülaashi jee niale chi aʼyataaikai niʼipajee süpüla nekiipüʼüin na aküjüinjanakana pütchi otta eeinjatüle süküjünüin pütchi.
4-6. (1) ¿Kasapülajatü süneekünaka wanee piichi süpüla tü outkajawaa süpülajatkat ojuʼitaa sünain aküjaa pütchi? (2) ¿Kasa jülüjüinjatka aaʼinyüü süneekünapa jalainjatüin otta joujainjatüin saainjünüin outkajawaakat tia?
4 Jalainjatü otta joujainjatü saainjünaka. Süpüla süküjünüin pütchi namüin napüshuaʼa na wayuukana, na laülaashiikana nachajaainjatü sukuwaʼipa süpüla saainjünüin outkajawaakat tia nepialuʼu wanee wawalayuu pejeka sünain eeinjatüle süküjüin pütchi, suulialeʼeya noutkajaainjanain napüshuaʼa suluʼu wanee piichi. Eeshii süpüla noutkajaain suluʼu tü Piichi Outkajaaleekat. Eeshii na wawalayuu aainjakana outkajawaakat tia süchikijee tü pütchi süpülajatkat wayuu süpüshuaʼa otta Ekirajawaa sünain La Atalaya. Tü piichi aainjünajatkat aluʼu tü outkajawaakat nnojotsü wattainjatüin maʼin suulia eeinjatüle süküjünüin pütchi. Süpüla süküjünüin pütchi namüin napüshuaʼa na wayuukana jülüjüinjatü aaʼinyüü ayatüle anain ojuʼitaa suluʼujee tü piichi aneekünakat süpüla ojuʼitaa sünain aküjaa pütchi.
5 Jülüjüinjatü aaʼinyüü eeinjatüle süküjünüin pütchi süpüla süneekünüin tü kaʼi otta oora aainjünajatkat oʼu tü outkajawaa süpülajatkat ojuʼitaa sünain aküjaa pütchi. Tü asakiraairua aainjünakat sünain pütchi aipirua anasü süpüla aneekaa jalainjatüin otta joujain anain saainjünüin outkajawaakat tia.
6 ¿Jalasü choʼujaain maʼin aküjünaa pütchi? ¿Jarat tü kaʼi otta oora anakat süpüla aküjaa pütchi sainküin piichi? ¿Aneekünüinjatü wanee oora aliika süpüla aküjaa pütchi jee ouyantaa wachikuaʼa? Süneekünapa tü kaʼi otta oora süpülajatkat aküjaa pütchi eʼitaanajatü sünain tü taapüla süpülajatkat karaloukta suluʼu tü outkajaaleekat. Maʼaka nümüin Pablo: ‹Kettaaitpa taʼyataain suluʼu tü mmakat eere taya›. Wapüshuaʼa wayakana na aküjüliikana pütchi wekeraajeein tü aküjaakat pütchi eeinjatüle waainjüin shia, ¿aashimüin? (Rom. 15:22-24.)
7. ¿Kasa naaʼinrajatka chi shikiipüʼükai tü outkajawaa süpülajatkat ojuʼitaa sünain aküjaa pütchi?
7 ¿Jamüinjatü suʼuniria? Yapale waya süpüla oʼuniraa tü outkajawaa süpülajatkat ojuʼitaa sünain aküjaa pütchi weeʼiyatüin kojutüin wamüin tü nuluwataakat anain Maleiwa. Süpülapünaa nuʼttüin chi ekiipüʼükai sünain ekirajaa nütüjaainjatü aaʼu jalainjanain naküjüin pütchi. Oʼttajatü maalü outkajawaakat tia, anainjatü shikirajia otta aainjünajatü soʼu poloo jee poloo jaʼralimüin minuuto. Sajaʼttapa oʼunüinjana napüshuaʼa eeinjanale naküjüin pütchi. Nnojotsü choʼujaain aʼatapajaa eeka mantüin maalü, akatsaʼa anasü wapütüle wanüiki jalainjanain waküjüin pütchi. Natüjaweerü aaʼu napüshuaʼa tü naaʼinrajatkat sünain aküjaa pütchi lotule jee anale sukuwaʼipa tü ekirajaanakat anain (Pro. 11:14).
8. ¿Kasa eeka süpüla wakaaliinjüin anain chi wawala oʼunirakai tü outkajawaa süpülajatkat ojuʼitaa sünain aküjaa pütchi?
8 Choʼujaasü eein waya sünain. Shiimain, choʼujaasü tü akaaliinjirawaakat (Heb. 13:17). Müleka eere süpüla, chi shikiipüʼükai tü aküjaakat pütchi eeshi süpüla niʼitaain niʼipajana chi eekai choʼujaain amüin. Nojuʼitüle na wawalayuu atüjakana maʼin aküjaa pütchi eeshii süpüla nakaaliinjüin na jekennuukana otta na nnojoliikana maʼin atüjüin. Wacheküle ojuʼitaa namaa napüshuaʼa na wawalayuukana eejeerü wainma kasa anasü sutuma (Heb. 10:24; Rom. 15:1, 2). Akatsaʼa choʼujaasü wantüinjanain maalü. Süka kojutüin wamüin tü nuluwataakat anain Maleiwa otta tü naaʼinrakat na wawalayuukana wapüleerua choʼujaasü wanoukteʼerüin wakuwaʼipa sünain tia (2 Cor. 6:3, 4; Fili. 2:4, 5).
9. ¿Kasa anasü eeka natuma na pürekutsootkana sünain tü outkajawaa süpülajatkat ojuʼitaa sünain aküjaa pütchi?
9 Akaaliinjüshii na pürekutsootkana. Kojutüsü namüin na waneeinnua otta sütütüleʼerüin naaʼin noʼunüle na pürekutsootkana sünain outkajawaakat tia. Akatsaʼa wainma kasa naainjaka na pürekutsootkana ekirajüshii sünain tü Wiwüliakat, ouyantüshii nachikuaʼa, aaʼinmajüshii napüshi otta aʼyataashii. Müsüjeseʼe nnojoluinjatüin süchuntünüin namüin noʼunüinjanain weinshi sünain outkajawaakat tia saainjünüle weinshi soʼu semaanaka. Jaʼitairü müin nakuwaʼipa eeshii süpüla noʼunüin sünain soʼutku outkajawaakat tia. Tü outkajawaa süpülajatkat ojuʼitaa sünain aküjaa pütchi müsü aka saaʼin wanee koleejia eere anain nanoula na waneeinnua sutuma tü ekirajünakat anain otta tü natüjaakat aaʼu na pürekutsootkana. Wainma kasa natüjaaka aaʼu na pürekutsootkana süka naʼyataain maʼin nümüin Maleiwa. Eesü süpüla naküjüin tü natüjaakat aaʼu. Otta müsia sutuma talatüin naaʼin sünain aküjaa pütchi otta sünain tü outkajawaa süpülajatkat tia eesü süpüla süshatünüin tü nakuwaʼipakat. Müsüjeseʼe waapüin tü analuʼutkat namüin sükajee tia.
10. ¿Jamüshii woʼunajanaka maʼin süka waaʼin sünain tü outkajawaa süpülajatkat ojuʼitaa sünain aküjaa pütchi?
10 Maʼaka naaʼinrüin shia Jesús otta na nikirajüinkana tü aʼyatawaa waaʼinrakat maʼin shia aküjaa pütchi sainküin piichi. Tü outkajawaa süpülajatkat ojuʼitaa sünain aküjaa pütchi sükaaliinjüin waya süpüla watütüleʼerüin waaʼin namaa na waneeinnua otta anain süküjia pütchi watuma. Wapüshuaʼa wayakana na aküjüliikana pütchi oʼunajana maʼin sünain outkajawaakat tia (Aluw. 5:42; 20:20). Waainja süka süpüshuaʼa waaʼin tü waaʼinrajatkat süpüla wainküin tia. ¿Kaseerü eeka sünainjee? Aneerü sukuwaʼipa tü aküjaakat pütchi nutuma Jeowa otta talateerü naaʼin Jesucristo chi Wekiipüʼükai (Mat. 25:34-40; 28:19, 20).