Outkajawaa süpüla ojuʼitaa sünain aküjaa pütchi
1. ¿Kasapülajatü tü outkajawaakat süpüla ojuʼitaa sünain aküjaa pütchi?
1 Süpülapünaa nüküjüin pütchi Jesuu namaa 70 nikirajüin, outkajaashi nia namaa (Luc. 10:1-11). Nüküjüin namüin nnojoliin namüiwaʼain naya otta eein Jeʼwaa namaa. Nikirajüin naya sünain tü naaʼinrajatkat otta «nüjütüin naya [...] sünain piamawalin naya nütüma». Maaʼulu yaa, outkajaashii waya süpüla wojuʼitüinjanain sünain aküjaa pütchi. Tia outkajawaakat, süpülajatü sütütüleʼennüin waaʼin, wekirajünüin otta watüjaainjatüin saaʼu tü waaʼinrajatkat.
2. ¿Jamüinjatü joo sukuwaʼipa tü outkajawaakat süpüla ojuʼitaa sünain aküjaa pütchi?
2 Maaʼulu yaa, aainjünawaisü tia outkajawaakat soʼu poloo jee shiale soʼu poloo jaʼralimüin minuuto. Soʼu tia minuutokot, aküjünüsü namüin na wawalayuukana jaraliinjanain naküjüin amaa pütchi, jalainjanain naküjüin pütchi otta oʼuraajüshii naya. Shiasaʼa müin jooluʼu, nnojotsü müinjatüin sukuwaʼipa. Soʼujee kashika aaʼuriiroʼu, aainjünajatü tia outkajawaakat soʼu jaʼrai jee shiale akaratshi minuuto. Saainjünüle süchikijeechon wanee outkajawaa, motsoʼoleeinjatia sümaʼa süka nekirajünüinnapain na wawalayuukana. Motsoʼowaire sümaʼa tia outkajawaakat, oʼttamaateena na wawalayuukana sünain aküjaa pütchi. Eeshii na wawalayuu oʼttawaikana sünain aküjaa pütchi süpülapünaa tia outkajawaakat, makalaka nnojoleerüin amüloulin natuma wainma minuuto.
3. ¿Jamüinjatü sukuwaʼipa sukumajia tü outkajawaakat süpüla ojuʼitaa sünain aküjaa pütchi?
3 Anainjatü sukuwaʼipa sukumajia tü outkajawaakat. Anashiinjatü shia namüin napüshuaʼa na wawalayuukana. Na laülaashiikana, ojuʼitüinjana namaa na wawalayuu eʼitanaakana najapuluʼu süpüla aküjaa pütchi. Aainjünajatü tia süpüla nantamaatüinjanain na wawalayuukana eeinjanale naküjüin pütchi. Mapüleejeerü namüin na laülaashiikana akaaliinjaa na wawalayuu eʼitaanakana najapuluʼu. Naneekeerü na laülaashiikana kasain anain napüleerua na anoujashiikana. Nayainnajaʼa atüjaaka saaʼu nakuwaʼipa na wawalayuukana. Süpülapünaa sujutaain tü outkajawaakat süpüla ojuʼitaa sünain aküjaa pütchi, natüjaainjatü aaʼu na wawalayuukana jalainjanain naküjüin pütchi otta jaraliinjanain naküjüin amaa pütchi.
4. ¿Jamüsü kojutüinjatka wamüin tü outkajawaakat süpüla ojuʼitaa sünain aküjaa pütchi?
4 Kojutüinjatü wamüin. Nayainjana neʼe yalaka sünain tia outkajawaakat na wawalayuu aküjüinjanakana pütchi. Kojutüinjatpejeʼe wamüin tia outkajawaakat. Müsia aka saaʼin tü wanee outkajawaakalüirua, nüsülajala wamüin Jeʼwaa süpüla aijiraain waya otta wakaaliinjiraain (Heb. 10:24, 25). Na wawalayuu shikiipüʼüinjanakana, yapainjatü natuma tü nekirajüinjatkalü anain süpüla nuʼwaajünüin Jeʼwaa otta kamalain shia namüin na wawalayuukana. Anasü nnojorüle amüloulin tia outkajawaakat natuma na wawalayuu ojuʼitüinjanakana sünain aküjaa pütchi.
5. (1) ¿Kasa naainjüinjatka chi wawala shikiipüʼükai tü aküjaakat pütchi? (2) ¿Jamüinjatü sukuwaʼipa suʼuniria tü aküjaakat pütchi sutuma wanee wawala?
5 Yapainjana waya süpüla woʼunirüin sukuwaʼipa. Pikirajüinjachire suluʼu tü outkajaaleekat, aapinnüshi pia kojuya kaʼi süpülapünaa. Müinjatia shia puʼunirüinjachire sukuwaʼipa tü outkajawaakat süpüla ojuʼitaa sünain aküjaa pütchi. Na laülaashii nekiipüʼükana na wawalayuukana sünain aküjaa pütchi, nayainjana oʼuniraka sukuwaʼipa tü outkajawaakat süpüla ojuʼitaa sünain aküjaa pütchi. Shiasaʼa müin noutkajaale napüshuaʼa na wawalayuukana süpüla aküjaa pütchi, aneeküneechi wanee wawala süpüla nuʼunirüin sukuwaʼipa tü outkajawaakat. Niainjachi aneekaka chi wawala jülüjakai aaʼin tü aküjaakat pütchi. Eesü süpüla saapünüin namüin na wawalayuukana wanee karaloukta sümaajatka tü kaʼi noʼunirüinjatkalü oʼu sukuwaʼipa tü aküjaakat pütchi. Jee eesü shiʼitaanüle sünain tü karalouktapüleekat chaa suluʼu tü outkajaaleekat. Nayainjana aneekünaka na wawalayuu atüjakana ekirajaa otta oʼuniraa sukuwaʼipa wanee kasa. Nnojoire eein wanee laülaashi jee niale wanee aʼyataakai neʼipajee na laülaashiikana jee nnojoire eein wanee wawala eekai anain süpüla oʼuniraa sukuwaʼipa tia outkajawaakat, aneeküneerü wanee wawala laülaaka aaʼin sünain anoujaa. (Paashajeʼera tü pütchikat «Shiainjatüle ekirajüin wanee wawala», suluʼu süpana 6.)
6. ¿Jamüsü yapainjatka watuma tü wanüikinjatkat sünain tü outkajawaakat süpüla ojuʼitaa sünain aküjaa pütchi?
6 Jamüshiijaʼa wekirajüinjanale sünain tü Ekirajawaakat süpüla Aküjaa Pütchi jee shiale sünain tü Outkajawaakat süpüla Aʼyatawaa nümüin Maleiwa, yapasü shia watuma otta kojutüsü shia wamüin. Nnojotsü yapain watuma wopuluʼu tü wanüikinjatkat. Müinjatia watuma müleka waneekünüle süpüla oʼuniraa sukuwaʼipa tü aküjaakat pütchi. Süka paliʼirüitpain tü minuuto eʼitaanakat süpüla, choʼujaasü maʼin yapain watuma tü wanüikinjatkat süpüla anain shia otta sajaʼttüin soʼu tü minuuto eʼitaanakat. Watüjaatüjülüinjatia aaʼu palajana jalainjanain waküjüin pütchi.
7. ¿Kasa eeka süpüla saashajaanüin achiki sünain tü outkajawaakat süpüla ojuʼitaa sünain aküjaa pütchi?
7 ¿Kasa aashajaanüinjatka achiki? Naatawaisü sukuwaʼipa tü aküjaakat pütchi sainküin tü mmakat makalaka nnojoluin naapüin chi achepchieekai wanee pütchi ekirajünajatkalü anain sünain tü outkajawaakat süpüla ojuʼitaa sünain aküjaa pütchi. Sünain tü pütchi suluʼukat süpüna 6, aküjünüsü tü kasa eekat süpüla saashajaanüin achiki. Achuntüneerü namüin na aküjüinjanakana pütchi nayalerüinjanain najapü sünain tia outkajawaakat. Eesü süpüla shiiʼiyatünüin wanee video suluʼuka jw.org jee shiale wanee sukuwaʼipa süküjia pütchi natuma na wawalayuukana. Piainjachire oʼunirüin sukuwaʼipa tü outkajawaakat, püküjüinjatü namüin na wawalayuukana wanee pütchi atütüleʼerajatka naaʼin jee jaloulinjatka namüin sünain aküjaa pütchi.
8. ¿Kasa eeka süpüla saashajaanüin achiki sünain tü outkajawaakat süpüla ojuʼitaa sünain aküjaa pütchi saawanoʼu otta rimiinkoʼu?
8 Aküjüshii pütchi na wawalayuukana saawanoʼuluwai süka tü rewiisütakat Aapiria Wayuu otta ¡Despertad! otta eesü isale nachiki naküjüin pütchi semaanawai. Jaʼitainna nekirajaain paala sünain tü nanüikinjatkat soʼu tü Ai naʼwaajakalü oʼu Maleiwa, motusü shia naaʼin. Müshijeseʼe yootuinjachin chi wawala oʼunirüinjachikai sukuwaʼipa tü aküjaakat pütchi süchiki waneeirua pütchi sajaʼttiamüinka Waʼyataain Nümüin Maleiwa. Naashajaapa chi wawalakai süchiki aküjaa pütchi süka tü rewiisütakalüirua, eesü süpüla nüküjüin süchiki waneeirua kasa alataka jee shiale wanee miʼiraa eeka süpüla yootuukain achiki namaa na wayuukana. Eeshi süpüla yootuin nia süchiki tü waküjüinjatkat namüin na wayuu waapakana amüin tü rewiisütakalüirua. Eere wanee wawala aküjakai pütchi süka tü rewiisütakat soʼu tü kashikat, eeshi süpüla nüsakinnüin sünain jamüin nüküjia pütchi süka tü rewiisütakalüirua jee süpüla nüküjüin süchiki wanee kasa anasü alataka nümüin sünain aküjaa pütchi. Eesü süpüla saainjünüin tia süka tü karaloukta aküjünakalü aka pütchi rimiinkoʼuluwai. Sünain tü outkajawaakat süpüla ojuʼitaa sünain aküjaa pütchi, eesü süpüla shiiʼiyatünüin jamüinjatüin sukuwaʼipa aküjaa pütchi otta ekirajaa wayuu süka tü karalouktakat Pütchi anasü, Poonoo nümaa Maleiwa otta Kasa shikirajaka.
9. Shiitajünüle wanee karaloukta jeketü soʼu wanee kashi, ¿kasa eeka süpüla naashajaain achiki chi oʼunirakai sukuwaʼipa aküjaa pütchi saawanoʼu otta rimiinkoʼu?
9 Shiitajünüle wanee karaloukta jeketü soʼu wanee kashi, eesü süpüla niiʼiyatüin chi wawala oʼunirakai sukuwaʼipa tü aküjaakat pütchi jamüinjatüin shiitajia tü rewiisütakalüirua saawanoʼu otta rimiinkoʼu sümaʼaleʼeya tü karaloukta jeketkat. Eesü süpüla nüküjüin kasain aainjünajatüin eere wanee wayuu achekakai tü pütchikat. Wanee kasa eeka süpüla naainjüin shia nüküjüle tü kasa anasü eekat sutuma aʼyatawaa sünain eitajaa tü karaloukta jeketkat.
10, 11. ¿Jamüshii yapainjanaka waya süpülapünaa tü outkajawaakat süpüla ojuʼitaa sünain aküjaa pütchi?
10 Yapatüjüliinjana na aküjüliikana pütchi. Süpüla anainjatüin sukuwaʼipa tü outkajawaakat süpüla ojuʼitaa sünain aküjaa pütchi, yapainjatü natuma na wawalayuukana tü nanüikinjatkat sünain aküjaa pütchi. Naainjüle tia, nayalereerü najapü sünain tü outkajawaakat. Süpüla yapainjanain waya süpüla aküjaa, eetüjülüinjatia wamaʼana tü karaloukta waküjüinjatkalü aka pütchi. Waainjüle tia, oʼttamaateena waya sünain aküjaa pütchi.
11 Antüinjana waya süpülapünaa suʼttüin tü outkajawaakat süpüla ojuʼitaa sünain aküjaa pütchi maʼayaka sünain tü wanee outkajawaakalüirua. Wantüle süchikijee tü outkajawaakat, shapawaʼain meerü naaʼin chi wawala oʼunirakai sukuwaʼipa tü aküjaakat pütchi. Nnojotsü mapüleein akumajaa nakuwaʼipa na wawalayuukana sünain aküjaa pütchi. Palitchonle na wawalayuukana, eeshii süpüla najütünüin sünain aküjaa pütchi suluʼumüin wanee mma nnojoyütka kettaain atumaa. Kaʼyatüle eemüinjanale naküjüin pütchi, eeshii süpüla nüjütüin na wawalayuu meʼejenakana namaa na keʼejenaka. Naküjüinjanale pütchi eere jouluin tü mojulaasükalüirua, eeshi süpüla makatüin nutuma waneeinnua wawalayuu tooloyuu sümaa tü jieyuukalüirua. Eere wanee wawala ayuuikai, aluwataaneechi suluʼupünaa wanee kaaye eekai anashiin otta sainküin piichi eekai nnojoluin miyoʼuin iipünaamüin. Eeshii süpüla naluwataanüin na wawalayuu kakaliainnakana anoujain namaa na jekennuukana. Wantüle süchipünaa tü outkajawaakat, nüchajaainjatü joo sukuwaʼipa chi wawalakai jamüinjatüin nakuwaʼipa na wawalayuukana otta jalainjanain najütüin sünain aküjaa pütchi. Eesüjaʼa sülatalaa sümüle wanee kasa wamüin wantaka atuma süchipünaa tü outkajawaakat. Shiasaʼa müin kiʼrale waya sünain antaa süchipünaa tü outkajawaakat, eesüjaʼa süpüla shiain süka mojutüin shia wamüin jee choʼujaale wanoukteʼerüin sukuwaʼipa waneeirua kasa.
12. ¿Kasa waaʼinrajatka wacheküle maʼin aküjaa pütchi weinshi nümaa wanee wawala?
12 Eeshii süpüla yootiraain jia nümaa wanee wawala süpüla ojuʼitaa sünain aküjaa pütchi. Jee eesü süpüla jaʼatapajüin juluwataanüin nümaa wanee wawala nutuma chi oʼunirakai sukuwaʼipa tü aküjaakat pütchi. Wacheküle maʼin aküjaa pütchi weinshi nümaa wanee wawala, anasü müleka wojuʼitüle nümaa wanee wawala naata (2 Cor. 6:11-13). Wojuʼita nümaa chi eekai jekechin sünain aküjaa pütchi süpüla wekirajüin nia (1 Cor. 10:24; 1 Tim. 4:13, 15). Süchikijee tia outkajawaakat, eejüinjatü waaʼin sünain tü nümakat chi wawalakai otta jalainjanain waküjüin pütchi. Woʼunamaata maalü eemüinjanale waküjüin pütchi.
13. ¿Jamüsü wakuwaʼipa sutuma woutkajaain süpülapünaa wojuʼitüin sünain aküjaa pütchi?
13 Na 70 nikirajüinkana Jesuu, «aleʼejüshii naya [...] sümaa talatüin maʼi naaʼin» (Luc. 10:17). Anasü maʼin nakuwaʼipa na nikirajüinkana Jesuu sükajee noutkajaain nümaa süpülapünaa naküjüin pütchi. Müsia wakuwaʼipa sutuma woutkajaain süpülapünaa wojuʼitüin sünain aküjaa pütchi. Kapürale waaʼin wapüshuaʼa tia outkajawaakat, atütülaajeerü waaʼin, atüjeena waya otta watüjaajeerü aaʼu tü waaʼinrajatkat süpüla waküjüin pütchi «sainküin mmakat süpüshua» (Mat. 24:14).
Kojutüinjatü wamüin tia outkajawaakat. Müsia aka saaʼin tü wanee outkajawaakalüirua
Piainjachire oʼunirüin sukuwaʼipa tü outkajawaakat, püküjüinjatü namüin na wawalayuukana wanee pütchi atütüleʼerajatka naaʼin jee jaloulinjatka namüin sünain aküjaa pütchi