Atüjüinjana waya aküjaa pütchi: kapüla waaʼin nakuwaʼipa na wayuukana

¿Jamüsü waaʼinrajatka shia? Kapülasü naaʼin Jesuu nakuwaʼipa na wayuukana. Soʼu tü kaʼi niiyajakalü oʼu wanee wayuu macheʼesai, najattüin nia saʼakajee tü wayuukalüirua. Naainjüin eera Jesuu tia süka niʼrüin shapaain naaʼin chia wayuukai (Mar. 7:​31-​35). Nnojotsü müliain naaʼin na nikirajüinkana nutuma. Nnojoishii naya nikirajüin uatuwoʼushi sünain wainma pütchi (Juan 16:12). Jaʼitakajeʼe maaʼulu, nükaaliinjüin na wayuukana chejee iipünaajee (2 Tim. 4:​17). Müshiʼiya wayakana, kapülainjatü waaʼin nakuwaʼipa na wayuukana maʼaka naainjüin shia Jesuu (1 Ped. 2:​21; 1 Juan 3:​16, 18). Süpüla kamalainjatüin namüin na wayuukana tü pütchikat, kapülainjatü waaʼin nakuwaʼipa, jülüjüinjatü waaʼin tü kasa alatakat namüin, tü keeʼireekat naaʼin otta tü kasa shapaakalü atuma naaʼin. Neʼrüle na wayuukana kapülain waaʼin nakuwaʼipa, keeʼireejeerü naaʼin naapajüin wanüiki.