Atüjüinjana waya ekirajaa
1. ¿Kasa tü wachajaainjatkalü akuwaʼipa?
1 Na wayuu anoujakana nünain Jeʼwaa eenakuushi naya nutuma (Juan 6:44). Shiasaʼa müin wachajaainjatüin sukuwaʼipa süpüla narütkaainjanain na wayuukana nünainmüin Maleiwa (Sant. 4:8). Müleka waashajeʼerüle neʼe wanee pütchi jee wasakirüle neʼe na wayuukana, nnojoleerü nayaawatüin saaʼu tü shiimainkat otta nnojoleena anoujain naya. Wekirajaainjatü anain palajana tü pütchi waashajaainjatkalü achiki namaa na wayuukana.
2. ¿Kasa wakaaliinjüinjanaka anain na wekirajüinkana?
2 Süpüla nanoujüinjanain na wekirajüinkana, wakaaliinjüinjana naya sünain (1) nayaawatüin saaʼu tü shikirajakalü anain tü Wiwüliakat, (2) nanoujüin tü sümakat tü Wiwüliakat, otta (3) naainjüin tü sümakat tü Wiwüliakat (Juan 3:16, TNM; 17:3, TNM; Sant. 2:26). Nnojoleerü naainjüin tia uatuwoʼushi. Choʼujaapejeʼe naainjüin tia süpüla aleewain naya nümaa Jeʼwaa otta süpüla woutiisainjanain naya.
3. ¿Kasa wasakirüinjatka anain süpüla watüjüin ekirajaa? ¿Jamüsü waaʼinrajatka tia?
3 ¿Nayaawatüinche aaʼu tü nekirajaakalü anain? Süpüla watüjaainjatüin saaʼu müleka nayaawatüle saaʼu tü nekirajaakalü anain otta nanoujüle sünain, nnojoliinjana yootuin maʼin waya; nayainjana yootoka nayakana (Sant. 1:19). ¿Nayaawatüinche aaʼu na wekirajüinkana tü sümakat tü Wiwüliakat süchiki tü wekirajaakalü anain? ¿Eesüche süpüla naküjüin jamaluʼuluin tü nekirajaakalü anain? ¿Jamüsü nanüiki süchiki tü nekirajaakalü anain? ¿Shiimainsüche namüin tü shikirajakalü anain tü Wiwüliakat? (1 Tes. 2:13.) ¿Nayaawatüinche aaʼu sünainpünaain nakuwaʼipa tü nekirajaakalü anain? (Col. 3:10) Süpüla watüjaain saaʼu tia, wasakirüinjana na wekirajüinkana süpüla naküjüinjatüin wamüin tü suluʼukat naaʼin otta jülüjüinjatü waaʼin tü namakat wamüin (Mat. 16:13-16).
4. ¿Kasache waaʼinrajatka nnojoliire neeʼiratüin nakuwaʼipa na wekirajüinkana?
4 Eeshii na wayuu nnojoliikana eeʼiratüin nakuwaʼipa uatuwoʼushi (2 Cor. 10:5). ¿Kasache waaʼinrajatka nnojoliire neeʼiratüin nakuwaʼipa na wekirajüinkana? Waʼatapajüinjatü sujutuuin suluʼumüin naaʼin tü shikirajakalü anain tü Wiwüliakat otta sunouktaain nakuwaʼipa nutuma chi naaʼinkai Maleiwa (1 Cor. 3:6, 7; Heb. 4:12). Nnojo wapüleeruain naaʼin nnojorüle neeʼiratüin nakuwaʼipa, anashii waashajaale namaa süchiki wanee pütchi naata. Nnojoliire washapajaain aaʼin otta weeʼiyatüle alin wapüla na wekirajüinkana, eesü süpüla neeʼiratüin nakuwaʼipa mapa.