Yapa waya süpüla ekirajaa
1. ¿Jamüshii wakaaliinjüinjanaka na wayuukana süpüla kojutüin namüin tü shiimain suluʼukat tü Wiwüliakat?
1 Wekirajapa sünain tü Wiwüliakat, choʼujaasü yapainjanain waya süpüla niʼyataweein chi wekirajüinkai nümüin Jeowa. Keeʼireere waaʼin anain tü waʼyataainkat, wakaaliinjüinjachi chi wekirajüinkai süpüla kojutüin nümüin tü shiimain suluʼukat tü Wiwüliakat. Sutuma tia, keeʼireejeerü naaʼin naainjüin tü sümakat (Mat. 22:37; Pro. 4:23; 1 Cor. 9:26). ¿Jamüsü süpüla wainküin tia?
2. ¿Jamüshii woʼuraajüinjanaka süpülapünaa wekeraajüin wanee pütchi?
2 Puʼuraaja süpüla pikeraajüin wanee pütchi. Süka niain Jeowa miyoʼuka atuma tü waüyeekat, anashii woʼuraajüle süpülapünaa wekeraajüin tü pütchi wekirajüinjatkat anain sümaa wachuntüin naaʼu chi wekirajüinkai otta saaʼu tü choʼujaakat nümüin (1 Cor. 3:6; Sant. 1:5). Müle shia, watüjaweerü aaʼu tü waaʼinrajatkat süpüla süntüinjatüin suluʼumüin naaʼin chi wekirajüinkai tü shiimainkat nüchiki Jeowa otta tü nüchekakat nüpüleerua (Col. 1:9, 10).
3. ¿Jamüshi jülüjüinjachika waaʼin chi wekirajüinkai wekeraajapa wanee pütchi?
3 Jülüja paaʼin chi pikirajüinkai. Süpüla anainjatüin maʼin nikirajia wanee wayuu jülüjüinjana naaʼin na aapajakana nünüiki, naainjüin shia Jesús. Weʼra wanee shiyaawase, piantua nüsakinnüin Jesús sünain asakiraakat tüü: «¿Kasa taaʼinrüinjatka süpüla eeinjachin taya nümaa Maleiwa waneepia?» Naatajatsü sukuwaʼipa süsouktia waneʼewai sukua (Luc. 10:25-28, NM; 18:18-20). Tia shikirajüin waya sünain jülüjüinjachin waaʼin chi wekirajüinkai wanaa sümaa wekeraajüin tü pütchi wekirajüinjatkat anain. ¿Jarat tü pütchi taashajeʼerüinjatkat nümüin suluʼujee tü Wiwüliakat? ¿Jeʼrainjatü pütchi tekirajaaka anain nümaa? ¿Jarat tü pütchi kapüleejeetkat nümüin süpüla nücheküin otta niyaawatüin aaʼu? Jülüjüle waaʼin tü eekat süpüla nüsakirüin anain yapeena waya süpüla wasouktüin shia.
4. ¿Kasa sünainpünaaka ekeraajaa wanee pütchi?
4 Pikeraaja tü pütchikat. Jaʼitairü kojuyatuain wekirajaain anain wanee ekirajaaya, eiwaʼalia nikirajaain anain chi wekirajüinkai. Keeʼireere waaʼin wantüin suluʼumüin naaʼin, choʼujaasü maʼin wekeraajüin tü pütchi wekirajaainjatkat anain. Waaʼinrüinjatü tü waluwataakat anain nia. Ekirajawaa sünain tü pütchi ekirajaanajatkat anain otta tü pütchi suluʼujeejatkat tü Wiwüliakat. Choʼujaasü waainjüin shia sümaa jülüjüin waaʼin chi wekirajüinkai otta eesü süpüla wejeettüin tü pütchi jaʼyakat maʼin sünainjee wanee ekirajaaya (Rom. 2:21, 22).
5. ¿Jamüsü süpüla washatüin nukuwaʼipa Jeowa?
5 Keeʼireesü naaʼin Jeowa kooʼomüinjatüin nanoula waneʼewai nakua na ekirajaakana sünain tü Wiwüliakat (2 Ped. 3:9). Wakatarüle kaʼi süpüla wekeraajüin tü pütchi wekirajaainjatkat anain washatüin nukuwaʼipa Jeowa.