Yapa waya palajana süpüla watüjain ekirajaa

Piantua nüsakinnüin Jesuu süchiki tü naaʼinrüinjatkat wanee wayuu süpüla katüinjatüin noʼu. Asouktüshi Jesuu shiʼipajee tia wanaapünaa sümaa tü natüjaakalü aaʼu na asakitkana nia (Luc. 10:25-28; 18:18-20). Müinjatia sukuwaʼipa watuma. Jaʼitairü watüjaain saaʼu tü wekirajüinjatkalü anain, wekirajaainjatü anain palajana wanaapünaa sümaa tü nütüjaakalü aaʼu chi wekirajüinkai. Jülüja waaʼin tüü: ¿Kasache tü nnojotkat niyaawatüin aaʼu? ¿Jaratche tü wetsiikulo waashajeʼerüinjatkat nümüin? ¿Jeʼrasüche pütchi wekirajüinjachika anain nia? Eesüjaʼa süpüla kayaawasein watuma tü pütchikat jee wasakirüin nia süpüla niyaawatüinjatüin saaʼu. Soteesü waaʼin niain Jeʼwaa miyoʼuin atuma tü shiimainkat suluʼu naaʼin wanee wayuu. Makalaka choʼujaain maʼin wachuntüin nümüin süpüla nükaaliinjain chi wekirajüinkai otta nükaaliinjain waya süpüla anainjatüin sukuwaʼipa tü waaʼinrakat sünain ekirajaa (1 Cor. 3:6; Sant. 1:5).