Waʼyataa süchiirua watüjüinjanain maʼin aküjaa pütchi
1. Püküja süchiki tü naaʼinrakat na anoujashiikana namaiwa eeʼiyataka wamüin watüjüinjanain maʼin aküjaa pütchi.
1 Wayakana anoujashiikana, aʼyataainjana waya süchiirua watüjüinjanain maʼin aküjaa pütchi. Müshiijeseʼe nikirajüin Jesuu na nikirajüinkana otta nükaaliinjain naya süpüla natüjüinjanain maʼin aküjaa pütchi (Luc. 9:1-5; 10:1-11). Akaʼaya Áquila sümaa Priscila, nekirajüin Apolos süpüla nütüjaain saaʼu «tü wopu niʼitaakat Maleiwa süpüleerua wayuu» (Aluw. 18:24-26). Mayaapejeʼe kakaliaichin Timoteo sünain aküjaa pütchi, nüküjüin Pablo nümüin tütüinjachin nia sünain ekirajaa wayuu süpüla niyaawatünüin aaʼu «laülaain [n]aaʼin sünain anoujaa» (1 Tim. 4:13-15). Jaʼitainna jekenain jee kakaliainnain waya sünain aküjaa pütchi, aʼyataainjana waya süchiirua watüjüinjanain maʼin aküjaa pütchi.
2. ¿Kasa waaʼinrajatka süpüla watüjüin nanainjee na wawalayuukana?
2 Watüja nanainjee na wawalayuukana. Atüjeena waya nanainjee na wawalayuukana jülüjüle waaʼin jamüin süküjia tü pütchikat natuma (Prov. 27:17). Wojuʼitapa sünain aküjaa pütchi nümaa wanee wawala, jülüja maʼin waaʼin jamüin süküjia nutuma. Waashajaa namaa na wawalayuu atüjakana maʼin aküjaa pütchi otta jülüja waaʼin tü namakat wamüin (Prov. 1:5). Kapüleere wamüin wouyantüin wachikuaʼa eemüin na ekirajaweekana, woʼttüin sünain ekirajaa jee shiale waneeirua kasa, waashajaa nümaa chi nekiipüʼükai na wawalayuukana jee niale wanee wawala atüjakai maʼin ekirajaa. Atüjeena maʼin waya nutuma chi naaʼinkai Maleiwa, makalaka wachuntajachin nia waneepia nümüin Maleiwa (Luc. 11:13).
3. ¿Kasa waaʼinrajatka süküjünüle wamüin tü anakat süpüla waaʼinrüin?
3 Nnojo waashichijaain süküjünüle wamüin tü anakat süpüla waaʼinrüin, jaʼitairü nnojoluin wachuntüin shia (Ecl. 7:9). Anainjatü wamüin wakaaliinjünüin. Washata nukuwaʼipa Apolos, waapa analuʼut jee nnojo yaletüin waaʼin (Prov. 12:15).
4. ¿Kasa weʼreetka waʼyataale süchiirua watüjüinjanain maʼin aküjaa pütchi?
4 Waʼwaajüin Maleiwa watüjüle maʼin aküjaa pütchi. Kayaawasesü nutuma Jesuu tü pütchikat süpüla natüjüinjanain maʼin aküjaa pütchi na nikirajüinkana. Nüküjüin müin nia maʼaka saaʼin tü wunuʼulia kanüliakat vid otta na nümaajanakana müshii aka saaʼin tü sütüna kachonkat. Anaatünüsü tü sütünakalüirua nutuma Maleiwa süpüla ayatüinjatüin «kachoin [maʼin] shia» (Juan 15:2). Keeʼireesü naaʼin Jeʼwaa watüjüinjanain maʼin aküjaa pütchi maʼaka keeʼireein naaʼin wanee wayuu anainjatüin otta kachoinjatüin maʼin nüpünajüin (Heb. 13:15, TNM). ¿Kasa weʼreetka waʼyataale süchiirua watüjüinjanain maʼin aküjaa pütchi? «Müleka jaaʼinrüle maʼi wainma kasa anasü, aʼwaajüneechi chi Tashikai sünainjee tia», müshi Jesuu (Juan 15:8).