Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
Eneeroʼu 2-8
KOROLO KOJUTÜSÜ SULUʼUKA TÜ WIWÜLIAKAT ISAÍAS 24-28
«Naaʼinmajüin Jeʼwaa tü nupueulosekat»
(Isaías 25:4, 5). Süka müin pia maʼaka saaʼin wanee ounjulaaya namüin na wayuu nnojoliikana yaletüin aaʼin, namüin na wayuu maʼletsekana. Müin pia maʼaka saaʼin wanee ounjulaaya suulia wawai otta müin pia maʼaka saaʼin seemioushi wanee kasa suulia kaʼi. Tü kasa naaʼinrakat na mojulaashiikana müsü aka saaʼin wawai sümüin süsepü wanee piichi. 5 Müsü aka saaʼin nuwarala chi kaʼikai isashiipaʼa; puuka achikit wanee kasa eeka waneejatüin maʼaka saaʼin wanee siruma oukaka süchiki nuwarala chi kaʼikai suulia jaʼin maʼin shia. Nuuka achikit neimata na mojulaashiikana.
ip-1-S süp. 272 püt. 5
Yaletüsü iipünaa najapü Jeʼwaa
5 Mayaapejeʼe keemain maʼin Jeʼwaa namüin na nüʼünüükana, müshi nia maʼaka saaʼin wanee ounjulaaya namüin na wayuu anamiakana otta na nnojoliikana yaletüin aaʼin sümaa naʼyataweein nümüin. Na shikiipüʼükana tü iküleesiakalüirua otta na poliitikokana, nachajaain maʼin sukuwaʼipa süpüla namojujeʼerüin nanoula na anoujashii shiimainshiikana, nnojotpejeʼe nountüin tia. Süka jamüin, eein Jeʼwaa namaa na anoujashii shiimainshiikana. Shiasaʼa mapa, müsü nuukakai aaʼin Jeʼwaa neimata na nüʼünüükana, maʼaka saaʼin wanee siruma oukaka süchiki nuwarala chi kaʼikai suulia jaʼin maʼin shia isashiipaʼa otta maʼaka saaʼin wanee süsepü piichi oukaka süchiki wanee wawai (paashajeʼera Isaías 25:4, 5).
(Isaías 25:6). Yaʼayaa saaʼu tü uuchikat, eejeerü wanee emiraa süpüla wayuu süpüshuaʼa nutuma Jeʼwaa, chi wainmakai asurulaatse, eejeerü eküülü jemetüsü, wiino jemetüsü, iita piratüsü süsholoin otta wiino anajüsü maʼin.
ip-1-S süp. 273 püt. 6, 7
Yaletüsü iipünaa najapü Jeʼwaa
«Wanee emiraa süpülajatü wayuu süpüshuaʼa»
6 Nnojoishii naaʼinmajüin neʼe Jeʼwaa na nüchonniikana, naapüin eküülü namüin, tü naapakat maʼin namüin shia tü anainjatkalü atuma nanoula. Süchikijee nujuʼitirüin na aʼyataashiikana nümüin soʼu 1919, eesü wanee emiraa nutuma napüleerua, naapüin namüin wainma maʼin kasa anainjatkalü atuma nanoula. «Yaʼayaa saaʼu tü uuchikat, eejeerü wanee emiraa süpüla wayuu süpüshuaʼa nutuma Jeʼwaa, chi wainmakai asurulaatse, eejeerü eküülü jemetüsü, wiino jemetüsü, iita piratüsü süsholoin otta wiino anajüsü maʼin» (Isaías 25:6, TNM).
7 Chasü saaʼu wanee «uuchi» tü ekawaakat. ¿Kasa uuchi tia? Shia «tü uuchi kaaʼukat nipia Jeʼwaa», eere suʼunüin wayuu sainküinjeejatü mmakat süpüshuaʼa. Shia «tü nuʼuuchise Maleiwa» noʼunaka aaʼumüin na anoujashiikana nünain otta eere nnojoluin jamajüin wayuu natuma (Isaías 2:2; 11:9). Chaa eere naʼwaajüin Jeʼwaa, eesü wanee emiraa nutuma Jeʼwaa napüleerua. Tü kasa naapakat Jeʼwaa maaʼulu süpüla anainjatüin nanoula na anoujashiikana nünain, meeria shia nutuma Suluwataapa saaʼu wayuu süpüshuaʼa tü Nuluwataayakat Maleiwa. Nnojoleerü müliain wayuu sutuma jamü. «Jouleerü maʼin emiraa saaʼu tü mmakat; otta wainmaleejeeria saaʼupünaa tü uuchikalüirua» (Salmo 72:8, 16, TNM).
(Isaías 25:7, 8). Saaʼu uuchikat tüü, nüsünneʼereerü tü kuluulu saaʼukat wayuu süpüshuaʼa, tü ichekat saaʼu wayuu sainküinjeejatü mmakat süpüshuaʼa. 8 Müiria nnojoluin eein nutuma tü ouktaakat. Müiria nnojoluin eein aʼyalajaa nutuma Jeʼwaa, chi Laülaakai saaʼu kasakat süpüshuaʼa. Nüsünneʼereerü sainküinjee mmakat süpüshuaʼa tü kasa mojutkalü atuma tü nupueulosekat, süka jamüin, nüküjatüjülüin Jeʼwaa tia pütchikat.
ip-1-S süp. 273, 274 püt. 8, 9
Yaletüsü iipünaa najapü Jeʼwaa
8 Aneerü maʼin nakuwaʼipa mapa na wayuu sünainpünaakana tü emiraa eekat nutuma Jeʼwaa. Jülüja waaʼin tü nümakat Isaías. Tü kaainjalaakat otta tü ouktaakat naashin Isaías müsü aka saaʼin wanee «kuluulu icheka saaʼu wayuu». Anuu nünüiki Isaías: «Saaʼu uuchikat tüü, nüsünneʼereerü tü kuluulu saaʼukat wayuu süpüshuaʼa, tü ichekat saaʼu wayuu sainküinjeejatü mmakat süpüshuaʼa. Müiria nnojoluin eein nutuma tü ouktaakat. Müiria nnojoluin eein aʼyalajaa nutuma Jeʼwaa, chi Laülaakai saaʼu kasakat süpüshuaʼa. Nüsünneʼereerü sainküinjee mmakat süpüshuaʼa tü kasa mojutkalü atuma tü nupueulosekat, süka jamüin, nüküjatüjülüin Jeʼwaa tia pütchikat» (Isaías 25:7, 81, TNM).
9 Shiimainya tia, müiria nnojoluin eein tü ouktaakat (Alateetkat Mapeena 21:3, 4). Jee müsia tü kasa mojutkalü atuma tü nupueulosekat Jeʼwaa, müiria nnojoluin eein. «Nüsünneʼereerü sainküinjee mmakat süpüshuaʼa tü kasa mojutkalü atuma tü nupueulosekat, süka jamüin, nüküjatüjülüin Jeʼwaa tia pütchikat» (Isaías 25:82, TNM). ¿Jameerü sukuwaʼipa nutuma Jeʼwaa? Nuʼuteechi aaʼin chi kanainjeejachikai tü kasa mojutkalü atuma nupueulose, Satanaa otta na nümaajanakana (Alateetkat Mapeena 20:1-3). Makalaka sümüin tü nupueulosekat Maleiwa mayaa: «¡Kaatei! Anii chi Wamaleiwasekai. Kakaliainna waya aʼatapajüin nünain, nuʼtteʼereena waya. Niaʼaya Jeʼwaakai chii. Kakaliainna waya aʼatapajüin nünain. Talata waaʼin süka nuʼtteʼerüin waya» (Isaías 25:9, TNM).
Püchajaa süchiki kaaʼürüi suluʼu tü Wiwüliakat
(Isaías 26:15). Piakai Jeʼwaa, awainmalaashii putuma na wayuukana; pia neʼe piakai wainmaka atuma naya; kojutüichipa pia sümüin wayuu. Emiyoʼulaaitpa putuma tü pueulokot.
(Isaías 26:20). »Piakat tapueulosekat, pikerota paülüʼümüin suluʼu sütaüjia pipia, püsürüla tü miichoʼukot pikerotopa. Puunjulaa motsomüin sujuuna sülatüin tü atkawaakat.
Wetsiikulo aashajeʼennajatka
(Isaías 28:1-13). ¡Mojeerü maʼin sukuwaʼipa tü kotse anakat maʼin nanain na epeʼrülii chejeʼewaliikana Efraín, otta tü süsii wunuʼu jutsü anakat maʼin saaʼu tü patajatshii wüittakat maʼin, na epeʼrakana maʼin sutuma tü wiinokot! 2 ¡Kaatei! Nüntireechi Jeʼwaa wanee wayuu katchinka maʼin jee yalayalaka maʼin aaʼin sünain atkawaa. Müshi nia maʼaka saaʼin wanee juya keʼichiisesü. Maʼaka saaʼin wanee juya wawaimaajatü, maʼaka saaʼin wanee juya miyoʼushaata maʼin, emetuleena maʼin naya nujuttirüin mmoluʼumüin. 3 Aliikajüneerü aaʼu tü kotse anakat maʼin nanain na epeʼrülii chejeʼewaliikana Efraín. 4 Otta tü süsii wunuʼu jutsü anakat maʼin saaʼu tü patajatshii wüittakat maʼin, meerü aka saaʼin wanee higo süpülapünaa jouktaleʼuluin. Shiʼnnapa nutuma wanee wayuu, nnojoleerü kamaʼain najapuluʼu, nikajaweerü shia. 5 Soʼu kaʼikat tia, meechi Jeʼwaa, chi wainmakai asurulaatse maʼaka saaʼin wanee kotse anashaatasü maʼin namüin na waneepiakana nümaa. 6 Otta loteerü nutuma sukuwaʼipa tü kasa naaʼinrüinjatkat chi süsalainjachikai atuma saainjala wayuu otta yalayaleerü naaʼin nutuma na akatalaakana suulia tü atkawaakat. 7 Akaʼaya joo naya... maaʼawashii sutuma tü wiinokot otta unatain müshii sutuma. Na sacerdootekana otta na nünüikimaajanakana Maleiwa, maaʼawashii sutuma nepeʼrüin otta nnojotsü kasain nayaawatüin aaʼu, unatain müshii naya sutuma tü wiinokot, nnojotsü nayaawatüin saaʼu tü neʼrakat otta notchejaa amaalü tü kasa naneekakat. 8 Yarüttüsü maʼin tü meesakat sümaa tü neenainkat, nnojotsü eeyaain eekai wulein. 9 ¿Jaraleenaka joo ekirajünüin? ¿Jaraleenaka joo aküjünüin amüin jamaluʼuluin tü pütchikat? ¿Na joʼuu apütüinnakana? ¿Nayataajeenapa na eiwaʼaliikana apütüin? 10 «Süka shiain tü nuluwataakalü anain, süka shiain tü nuluwataakalü anain, emeriijia sümaa emeriijia, yaʼayaa sümaa saʼayaa». 11 Aashajaweechi nia namüin na wayuukana nakajee na kajakana anüiki otta sükajee anüikii naatajatü. 12 Müshi nia namüin nüchikuaʼa: «Eemeraalee tüü, anashi neemeraai chi mapüsashikai», saamatuuisü yaʼayaa, akanasaʼa macheʼein neʼe naya nuulia. 13 Meerü neʼe namüin tü nünüikikat Jeʼwaa mayaa: «Süka shiain tü nuluwataakalü anain, süka shiain tü nuluwataakalü anain, emeriijia sümaa emeriijia, yaʼayaa sümaa saʼayaa». Tia süpülajatü nashanaain noʼunapa jee nojuttüin süka nanainruʼu, eewaajeena naya, ojutuujeena suluʼu tü meeyakat jee ataʼüneena naya.
Eneeroʼu 9-15
KOROLO KOJUTÜSÜ SULUʼUKA TÜ WIWÜLIAKAT ISAÍAS 29-33
«Loteerü sukuwaʼipa tü naaʼinrajatkat chi aluwataaikai»
(Isaías 32:1). ¡Kaatei! Aluwataainjachi wanee aluwataai lotuinjachika akuwaʼipa; eejeena waneeinnua laülaashii nümaa lotuinjanakana akuwaʼipa.
(Isaías 32:2). Otta nayakana waneʼewai nakua, müinjana naya maʼaka saaʼin wanee ounjulaaya suulia jouktai otta suulia juya wawaimaajatü, müinjana naya maʼaka saaʼin wüin palatüsü suluʼu wanee mma jososhiisü, maʼaka saaʼin seemioushi wanee ipa miyoʼu suluʼu wanee mma mainyasat.
ip-1-S süp. 332-334 püt. 7, 8
Chi Aluwataaikai namaa waneeinnua laülaashii
7 Anuu nünüiki Jesuu süchiki tü alatajatkat sülüʼütpa sükalia süpüla sajaʼlajaain kasakat süpüshuaʼa: «Nnojo jainkuuin aaʼin sütüma» (Mateo 24:3-8). ¿Jamüshii nnojoliika nainkuuin aaʼin na nikirajüinkana Jesuu sutuma tü alatakat maaʼulu sainküin tü mmakat? Shia süka naaʼinmajünüin nutuma chi achepchieekai otta waneeinnua «laülaashii» saʼakajeejanakana tü wanee anneetkalüirua (Juan 10:16). Naaʼinmajüin na nawalayuukana suulia jamajüin naya sutuma kasachiki jee suulia noʼutünüin aaʼin. Mayaainjeʼe wainmain wayuu manoujainka maaʼulu, atütüleʼennüsü naaʼin na wayuu mojukana aaʼin, naaʼinrüin tia na laülaashiikana sükajee tü pütchi sümakat tü Wiwüliakat.
8 Suʼunnaa tü 50 juya alatüitpakat, ayaawatüna aaʼu jaraliin na «laülaashii» sümaka tü Wiwüliakat. Noʼutku na saʼakakana tü wanee anneetkalüirua, ekirajünüshii naya süpüla naaʼinmajüin sukuwaʼipa tü kasa aainjünajatkat suluʼu «tü mma jeketüinjatkat», naainjeerü tia süchikijee tü müliaa miyoʼusükat (Ezequiel 44:2, 3; 2 Pedro 3:13). Nekirajüin na nawalayuukana süpüla anainjatüin nanoula, natütüleʼerüin naaʼin, aküjüshii pütchi palajana. Müshii naya «maʼaka saaʼin seemioushi wanee ipa miyoʼu», süka natütüleʼerüin naaʼin na nawalayuukana sünain aʼwaajaa Maleiwa.
(Isaías 32:3, 4). Nnojoleerü asülajaain noʼu na wayuu koʼukana, otta na wayuu kacheʼekana jülüjeerü naaʼin tü pütchikat. 4 Chi eekai kashapajaaralin jülüjeerü naaʼin palajana tü nüküjüinjatkat, akaʼaya na kajakana anüiki, kajaalapeerü nanüiki otta ayaawatüneerü aaʼu tü namakat.
ip-1-S süp. 334, 335 püt. 10, 11
Chi Aluwataaikai namaa waneeinnua laülaashii
Jülüja waaʼin tü münakat wamüin süka woʼu, wacheʼe otta waaʼin
10 ¿Kasa naaʼinraka na wattakana naalii wayuu süka tü naapakat Jeʼwaa namüin? Anuu nünüiki Isaías: «Nnojoleerü asülajaain noʼu na wayuu koʼukana, otta na wayuu kacheʼekana jülüjeerü naaʼin tü pütchikat» (Isaías 32:3, TNM). Süpüla anainjatüin nanoula otta laülaainjatüin naaʼin na aʼyataashiikana nümüin Jeʼwaa, naapüin namüin tü kasa choʼujaakat namüin. Katchinsü nanoula na wawalayuukana sainküin tü mmakat namaa waneeinnua wayuu sutuma tü Ekirajawaa süpülajatkat aküjaa pütchi, tü outkajawaakat, tü outkajawaa apünüinkat kaʼi, tü outkajawaa miyoʼu eere nantüin wawalayuu naataka oumain otta tü ekirajünakalü anain na laülaashiikana süpüla alinjanain napüla na nawalayuukana. Jaʼitainna jalain kepiain na laülaashiikana, jülüjasü maʼin naaʼin tü pütchi apansaajinnakat sünainjee tü shiimainkat. Süka nekirajünüin sünain tü Wiwüliakat, jülüjasü naaʼin waneepia otta oonooshii sümaa tü münakat namüin (Salmo 25:10).
11 Sümaka joo tü pütchikat: «Chi eekai kashapajaaralin jülüjeerü naaʼin palajana tü nüküjüinjatkat, akaʼaya na kajakana anüiki, kajaalapeerü nanüiki otta ayaawatüneerü aaʼu tü namakat» (Isaías 32:4, TNM). Nnojoishi ashapajaainjachin wanee wayuu süpülapünaa «anasü tüü jee mojusü tüü» nümüin süchiki wanee kasa. Anuu tü sümakat tü Wiwüliakat: «¿Piʼrüichi wanee wayuu eekai kashapajaaralin sümaa nünüiki? Anaʼleesia nukuwaʼipa wanee wayuu eekai malakai nuulia niakai» (Proverbios 29:20, TNM; Eclesiastés 5:2). Süpülapünaa 1919, shikirajüin tü nupueulosekat Jeʼwaa tü shikirajakalü anain Babilonia. Shiasaʼa soʼujee juyakat tia, nükaaliinjain Jeʼwaa naya süpüla nayaawatüinjatüin saaʼu tü keeʼireekat naaʼin. Nayaawata aaʼu nnojoluin nüküjalain Jeʼwaa sümaa ashapajawaa aaʼin tü nümakat namüin, yootushii naya maaʼulu süchiki tü nanoujakalü anain sümaa nnojoluin mmoluin naaʼin otta nnojotsü kajakuʼu müin nanüiki sünain aküjaa tü shiimainkat.
Püchajaa süchiki kaaʼürüi suluʼu tü Wiwüliakat
(Isaías 30:21). Paapeerü wanee pütchi püchiiruajee sünain maa: «Shiaʼaya wopukot tüü, juʼuna suluʼupünaa». Süküjeerü jümüin jalapünaainjanain juʼunüin, jikialuʼujee jee shiale jipeʼeruʼujee
(Isaías 33:22). Jeʼwaa nia chi Süsalakai atuma saainjala wayuu, Jeʼwaa nia chi Aküjakai tü waaʼinrüinjatkat, Jeʼwaa nia chi Aluwataakai waaʼu; nuʼtteʼereena waya.
Wetsiikulo aashajeʼennajatka
(Isaías 30:22-33). Otta mojuteerü pümüin tü ayaakuaa pümaʼanakat, tü oʼoojiruushikat süka pülaata otta süka ooro. Pujuteerü shia maʼaka sujutünüin wanee kuluulu sükashiainmaajatü jieyuu otta meerü pünüiki: «¡Kuluulu yarüttüsü!». 23 Aʼiteerü juya nutuma saaʼu püpünajüin, wainmeerü maʼin süchon püpünajüin otta aneerü maʼin shia. Soʼu kaʼikat tia, miyoʼujeerü mma süpüla nümüʼlüin. 24 Aneerü maʼin shiküin tü paaʼakat otta tü püliiki aawajakat tü mmakat, shieerü nekaka tü kanüliakat forraje, awaajuushi süka paara otta süka rastrillo. 25 Ouktapa wainma wayuu otta sujuttapa tü piichi miyoʼuyuukat, eejeerü luwopu otta palateerü wüin saaʼupünaa tü uuchi miyoʼuyuukat otta saaʼupünaa tü wutaikalüirua. 26 Siraapa chi kashikai, meerü nuwarala maʼaka saaʼin nuwarala chi kaʼikai; otta nuwarala chi [kaʼikai], chuwateerü maʼin maʼaka saaʼin akaratshitua sukua, meerü aka saaʼin nuwarala chi kaʼikai soʼu akaratshi [kaʼi], shieerü tü kaʼi nukoʼoyoloko oʼu Jeʼwaa sülioʼu tü nupueulosekat otta aneerü nutuma tü sülioʼukat. 27 ¡Kaatei! Iseeirü nünülia Jeʼwaa wattajee, jashichishaatashi maʼin nia, iseeichi saaʼu wanee siruma, süsalainjatü saainjala wayuu nutuma, tü nünüikikat müsü aka saaʼin siki eekai chuwatüin maʼin. 28 Tü nujuulakat müsü aka saaʼin wanee wüin miyoʼushaata antaleeka nümülapünaa wanee wayuu, yalejewaain meerü nutuma tü pueulokalüirua süpüla najaʼttirüin shiairua; eʼitaaneerü juleena suwaraluʼupünaa süpüla sajaʼttinnüinjatüin. 29 Meerü tü jiiʼirainkat maʼaka saaʼin tü jiiʼirajakat saʼwai süpülapünaa juʼunüin sünain wanee miʼiraa, talateerü maʼin jaaʼin, meena jia maʼaka naaʼin wanee wayuu alüʼüjaka maasi saaʼumüin nuʼuuchise Jeʼwaa, chi makai aka saaʼin wanee ipa miyoʼu chaa Israel. 30 Jaʼyeerü emetuluin maʼin nünüiki Jeʼwaa, eʼnneerü najapü Jeʼwaa, ashakateechi nia sümaa jashichin maʼin nia, eʼnneerü wanee siki chuwatüin maʼin, meerü aka saaʼin juya miyoʼu kayaasü sümaa keʼichiisein shia. 31 Ayoʼujaajeerü saaʼin Asiria sutuma nünüiki Jeʼwaa; niʼyaateerü shia süka tü waraarat nümaʼanakat. 32 Niʼyaatapa Jeʼwaa [Asiria], naaʼinreerü suʼunnaa shiiʼira wanee pandereta otta arpa; atkaajeechi nia namaa süka nütüna. 33 Kettaaitpa napüla tü Tófet münakat otta kettaaitpa shia nüpüla chi aluwataaikai. Chamünatüsü nutuma tü sikikat, wainmashaata maʼin tü sikikat süpüla jotuinjatüin maʼin shia. Joteena naya sutuma nujuula Jeʼwaa. Wainma nutuma tü sikikat süpüla chuwatüin maʼin shia. Sutuma nujuula Jeʼwaa, joteechi maʼaka saaʼin wanee azufre.
Eneeroʼu 16-22
KOROLO KOJUTÜSÜ SULUʼUKA TÜ WIWÜLIAKAT ISAÍAS 34-37
«Eʼrüshi Ezequías kasa anasü sutuma kanoulain maʼin nia»
(Isaías 36:1). Soʼu tü juyakat 14 soʼu nuluwataain Ezequías, ashutüshi Senaquerib saaʼu tü pueuloirua miyoʼuyuukat süsepü chaa Judá jee nimeʼraaka saaʼu.
(Isaías 36:4-10). Nusouktakalaka Rabsaqué: «Maa maa nümüin Ezequías: ‹Anuu nünüiki chi aluwataakai saaʼu tü mmakat Asiria: «Jarai chi piʼitaakai maʼin anain paaʼin? 5 ‹Takanajeerü tü atkawaakat otta atüjashi taya atkawaa›, müshi pia, alawaa neʼe tia. ¿Jamüshi piʼraka wayumüin tamüin? ¿Jarai chi piʼitaakai maʼin anain paaʼin? 6 ¡Kaatei! Piʼitaain neʼe paaʼin sünain Egipto, tü makat aka saaʼin kainyaruushi eekai yülüin. Nülainraale wanee wayuu sünain, susoteerü najapü sümaa sülataleejeerüin. Müsia neʼe nukuwaʼipa Faraón, chi aluwataakai saaʼu Egipto, namüin na eʼitaakana naaʼin nünain. 7 Müleka pümüle tamüin: ‹Nia Jeʼwaa weʼitaaka anain waaʼin›, ¿jamakaʼa nüsünneʼeraka Ezequías tü ayaakuaa eʼitaanakat saaʼu namüna otta tü ipa apaaʼuwajuushi aʼwaajüleekat? Mataashi nümakai sümüin Judá otta Jerusalén: ‹Juʼwaajüinjachi neʼe taya yaʼayaa›»›. 8 Püshantanajiraa maa nümaa chi aluwataakai saaʼu Asiria, taapeerü pümüin 2.000 ama, kamaʼa eere süpüla puusütüin nanain na wayuu keʼejenainjanakana shiairua. 9 Piʼitaalejeʼe paaʼin sünain Egipto shiiʼiree kemion otta wayuu amaajuna, nnojoishijaʼa süpüla «nnojo» müinjachin tamüin, jaʼitaichi niain neʼe wanee nüchepchia chi talaamainkai. 10 Nnojoishi taya antüshin yaamüin süpaʼa mma, nuluwataala taya Jeʼwaa, anuu nünüiki tamüin: ‹Pushuta saaʼu tia pueulokot jee pajaʼttiraleein›».
(Isaías 36:15). Nnojo joonooin sümaa nünüiki Ezequías wanaa sümaa nümüin: «Nuʼtteʼereena waya Jeʼwaa. Nnojoleechi ashutüin saaʼu pueulokot tüü chi aluwataakai saaʼu Asiria».
(Isaías 36:18-20). Nnojo talatüin jaaʼin sümaa tü nümakat Ezequías jümüin wanaa sümaa nümüin: ‹nuʼtteʼereena waya Jeʼwaa›. ¿Eeichiche wanee maleiwa akaaliinjaka nupueulose nuulia chi aluwataakai saaʼu Asiria? 19 ¿Jalakaʼa joo na namaleiwasekana Hamat nümaa Arpad? ¿Jalakaʼa joo na namaleiwasekana Sefarvaim? ¿Naaʼinmajüinche Samaria suulia tashutüin saaʼu? 20 Nnojoishi eeichin wanee maleiwa akaaliinjakai nupueulose suulia tashutüin saaʼu, jaʼitakajaʼa Jerusalén, nnojoleerü naaʼinmajüin Jeʼwaa suulia tashutüin saaʼu»›».
(Isaías 37:1, 2). Naapaiwaʼaya tia chi aluwataaikai Ezequías, nüchatajaain nüsheʼin jee naʼataka nünain wanee kuluulu shiyaawase mojuu aaʼin jee nuʼunaka nipialuʼumüin Jeʼwaa. 2 Nuluwataakalaka Eliaquim, chi sülaülashikai tü miichikat otta müshia Sebná, chi seküretaariokai otta na laülaashiikana naʼakajee na sacerdootekana, naʼatüinjatü nanain wanee kuluulu shiyaawase mojuu aaʼin, chainjana eemüin Isaías, nüchonkai Amós, chi nünüikimaajachikai Maleiwa.
(Isaías 37:14-20). Naapaaka Ezequías tü karaloukta pütchimaajatkat, naashajeʼeraka shia jee süchikijee nuʼunaka eemüin tü aʼwaajüleekat Maleiwa sümaa nujutalüin shia nuʼupala Jeʼwaa. 15 Nuʼraajaka Ezequías nümüin Jeʼwaa sümaa müin nünüiki: 16 «Jeʼwaa, piakai wainmakai asurulaatse, chi Sümaleiwasekai Israel, chi aluwataakai chaa iipünaa, chi Maleiwa [shiimainshikai] saaʼu mmakat süpüshuaʼa, chi joyotokoi nooʼopünaa na querubinekana. Pukumajala tü mmakat sümaa tü sirumakat. 17 Paapaja tü pütchikat Jeʼwaa, jülüja paaʼin shia. Pujutala tü poʼukot, jülüjaa paaʼin tü nümakat Senaquerib pümüin, sünain nuchuntüin atkawaa pümaa. 18 Shiimainya tia Jeʼwaa, na aluwataaliikana saaʼu Asiria, najaʼttirüin süpüshuaʼa tü pueuloirua eekat saaʼu mmakat. 19 Najaʼlajeʼerüin süpüshuaʼa tü namaleiwasekalüirua, naʼajüin shiairua, tü kasa nakumajalakat na wayuukana ajaʼttüsü natuma. 20 Jeʼwaa, piakai Wamaleiwasekai, puʼtteʼera waya noulia süpüla sütüjaainjatüin aaʼu wayuu süpüshuaʼa sünain piain neʼe pümüiwaʼa, Maleiwain, Jeʼwaa».
ip-1-S süp. 389-391 püt. 15-17
Wanee aluwataai anakai akuwaʼipa süka kanoulain nia
Nüneeküin Ezequías tü naaʼinrajatka
15 Chi aluwataaikai Ezequías nüneeküinjatü müleka naapüinjatüle shikii Jerusalén namüin na asiriokana jee nuchuntüinjatüle kaaliinwaa namüin na egipciokana. Otta eejiraainjachire nia sümaa nütkaain namaa. Shapaasü maʼin naaʼin. Nuʼunaka eemüin tü aʼwaajüleekat Jeʼwaa, nuluwataaka Eliaquim nümaa Sebná jee müshiʼiya na laülaashiikana, süpüla nasakirüinjachin Isaías jamüin nünüiki Jeʼwaa (Isaías 37:1, 2). Anuu nanüiki nümüin Isaías sümaa naʼatüin nanain wanee kuluulu shiyaawase mojuu aaʼin: «Soʼukai, sükalia mojuu aaʼin. Eesü aijeerüle nümüin Jeʼwaa nünüiki Rabsaqué, chi wayuu nünüikimaajachikai Senaquerib shiiʼiree nujuyaajeein chi Maleiwakai. Kasataalejeseʼe nuwalaajüin niʼrala wayumüin nümüin Jeʼwaa. Anashi müleka puchuntüle jooluʼu wapüleerua nümüin Jeʼwaa» (Isaías 37:3-5, TNM). Nojuyaajüin Maleiwa na asiriokana. ¿Jameetche nünüiki Jeʼwaa süchiki tia? Nümüliajüin Jeʼwaa naaʼin na judíokana nükajee Isaías, anuu nünüiki: «Mmolujayaa pia sutuma tü pütchi mojuluʼut paapajakat, tü airuʼutkat natuma na aʼyataashiikana nümüin sülaüla Asiria. Teʼitaain wanee pütchi nikiiruʼu eejeerü tü kasa naapakat, eitaweechi nuumainpaʼamüin jee oʼutüneechi aaʼin chamüin» (Isaías 37:6, 7, TNM).
16 Chajachi Senaquerib atkaain Libná, nuunejaka Rabsaqué süpüla niʼipajachin nia. Chakualinjachi nia Jerusalénmüin mapa (Isaías 37:8). Mayaapejeʼe nuʼunüin Rabsaqué, ayatüsia shapaain naaʼin Ezequías. Nuluwataaka nünüiki Senaquerib namüin na chajanakana Jerusalén süpüla natüjaain saaʼu tü alatajatkat namüin, anuu nünüiki: «Jee soto paaʼin sajaʼttinnüin tü wanee pueulokalüirua sutuma Asiria. ¿Iseeiche pia saaʼin pümüin? ¿Jalakaʼa sükaaliinjünüin tü wanee pueulokalüirua natuma na namaleiwasekana? ¿Jalakaʼa joo tü pueulokalüirua, Gozán, Harán, Rézef, nüchonnii Edén chajanaka Tel-asar, chi sülaülakai Hamat, chi sülaülakai Arpad, otta na sülaülakana Sefarvaim, Hená, otta Ivá?» (Isaías 37:9-13, TNM). Müshi nümakai aaʼin Senaquerib amülain neʼe eejiraain naya nümaa süka mojeerüin nakuwaʼipa.
17 Süka shapaain maʼin naaʼin Ezequías niʼitaain tü karaloukta aluwataanakat nümüin suluʼu tü aʼwaajüleekat (Isaías 37:14). Nuʼuraajaka maʼin Ezequías nümüin Jeʼwaa süpüla naapüinjatüin nünüiki Senaquerib otta nümaka: «Jeʼwaa, piakai Wamaleiwasekai, puʼtteʼera waya noulia süpüla sütüjaainjatüin aaʼu wayuu süpüshuaʼa piain neʼe pümüiwaʼa, Maleiwain, Jeʼwaa» (Isaías 37:15-20, TNM). Jaʼyasü naaʼu Ezequías shiain kojuteein nutuma nünülia Jeʼwaa suulialeʼeya anain nia, müleka sajaʼttinnüle Jerusalén.
(Isaías 37:33-38). »› Anuu nünüiki Jeʼwaa nüchiki chi sülaülakai Asiria: «Nnojoleechi ekeroluin suluʼumüin tü pueulokot, nnojoleechi ojutüin jatü, nnojoleechi antirüin ounjulaaya, nnojoleerü nuutkajüin shia»›. 34 »‹Ouyanteechi nia suluʼu tü wopu eepünaajachire nüntüin, nnojoleechi ekerotuin suluʼu tü pueulokot, müsü nünüiki Jeʼwaa. 35 Atkaweechi taya saaʼujee tü pueulokot süpüla anain pütchi tachiki otta nüchiki David, chi aʼyataakai tamüin›». 36 Nüntakalaka chi aapiee nüjünalakai Jeʼwaa, nuʼutaka naaʼin siento ochentaisinko miit [tooloyuu] naʼakajee na asiriokana. Natamaapa na wayuukana wattaʼa maalü, eejatü wayuu ouktüsü napüla. 37 Sutuma tia, nuʼunaka Asiriamüin Senaquerib, chi aluwataaikai, chajachika nia kepiain Nínive. 38 Shiasaʼa wanaa sümaa nüsapainkain nia nipialuʼu Nisroc chi nümaleiwasekai, Adramélec otta Sarézer, oʼutüna aaʼinchi nia süka chajaruuta natuma na nüchonniikana, süchikijee, naʼluwataaka chamüin Ararat. Niaka aluwataain nüchikumüin Esar-hadón, chi nüchonkai.
Püchajaa süchiki kaaʼürüi suluʼu tü Wiwüliakat
(Isaías 35:8). Otta yala, eejeerü wanee karateet, wanee wopu; tü Wopu Wulesükat, müneerü shia. Nnojoleechi alatüin suluʼupünaa chi yarüttakai akuwaʼipa. Nüpülajatü chi wulekai akuwaʼipa otta nnojoleechi waraittüin [suluʼupünaa] chi eekai malain.
w08-S 15/5 süp. 26 püt. 4
Wule wakuwaʼipa sümaa mmoluwaain waya neema Maleiwa
‹Eejeerü wanee wopu wulesü›
Nüküjatüjülia Jeʼwaa naleʼejüinjanain na judíokana noumainpaʼamüin. Anuu nünüiki: «Otta yala, eejeerü wanee karateet, wanee wopu; tü Wopu Wulesükat, müneerü shia» (Isa. 35:81, TNM). Nüchajaain Jeʼwaa sukuwaʼipa süpüla naleʼejüin na judíokana otta naaʼinmajüinjana naya wopuluʼu, maluʼulu tia pütchikat.
w08-S 15/5 süp. 27 püt. 1
Wule wakuwaʼipa sümaa mmoluwaain waya neema Maleiwa
«Nnojoleechi alatüin suluʼupünaa chi yarüttakai akuwaʼipa»
Soʼu juyaka 537, eesü wanee kasa naaʼinrüinjatka na judío ouyantakana noumainpaʼamüin. Wanaawainjatü nakuwaʼipa namaa na oʼunakana suluʼu «tü Wopu Wulesükat», anuu sünüiki Isaías 35:82: «Nnojoleechi alatüin suluʼupünaa chi yarüttakai akuwaʼipa. Nüpülajatü chi wulekai akuwaʼipa otta nnojoleechi waraittüin [suluʼupünaa] chi eekai malain». Süka naleʼejüin na judíokana Jerusalénmüin süpüla naʼwaajüin Jeʼwaa, nnojoishi eeinjachin naʼaka wanee wayuu eekai kapülain naaʼin nukuwaʼipa nümüiwaʼa otta eekai mojutüin amüin tü nümaʼanajeejatkat Maleiwa jee eekai yarüttüin anoula. Wuleinjatü nakuwaʼipa na aleʼejakana wanaapünaa sümaa tü nuchuntakat Jeʼwaa. Müinjatia wakuwaʼipa maaʼulu yaa süpüla talatüin naaʼin Jeʼwaa wamaa. Wuleinjatü wakuwaʼipa sümaa mmoluwaain waya neema Maleiwa (2 Cor. 7:1). ¿Kasa wayouktajatka?
(Isaías 36:2, 3). Nuluwataanaka Rabsaqué nutuma chi aluwataaikai Asiria chejee Lakís Jerusalénmüin nümaʼanamüin Ezequías, otta watta saalii surulaat nümaajatü, nüntaka eemüin süpüna tü wüinkat, suluʼu napüna na ashijaaliikana. 3 Niaka ojuʼitüin nünainmüin Eliaquim, nüchon Hilquías, chi aaʼinmajakai nipia chi aluwataaikai, otta Sebná chi seküretaariokai, otta Joah, nüchon Asaf chi ashajüikai.
(Isaías 36:22). Otta Eliaquim nüchon Hilquías, nia aaʼinmajakai nipia chi aluwataaikai, otta Sebná chi seküretaariokai, otta Joah nüchon Asaf chi ashajüikai, nantaka eemüin Ezequías sümaa süchatajaain nasheʼin jee naküjaka namüin nünüiki Rabsaqué.
w07-S 15/1 süp. 8 püt. 6
Pütchi anaka maʼin sünainjee tü karalouktakat Isaías (shiʼipa 2)
Watüjaka sünainjee:
36:2, 3, 22. Mayaapejeʼe süsütünüin nuulia Sebná aaʼinmajaa nuwashirüin chi aluwataashikai, aneekünüshi nia süpüla nüsecretariosein chi niiʼirakakai (Isaías 22:15, 19). Nnojoliinnapale waʼyataain nümüin Jeʼwaa sünain wanee kasa aneekünaka apüla waya, ayatajana waya sünain aʼyatawaa nümüin sünain wanee kasa eekai wanaapünaain sümaa wakuwaʼipa.
Wetsiikulo aashajeʼennajatka
(Isaías 36:1-12). Wanaa sümaa polooin pienchimüin juya Ezequías sünain aluwatawaa, atkaashi Senaquerib chi aluwataakai saaʼu Asiria sümaa tü pueulo eejatkat Judá sümaa nülaülaajaain saaʼu. 2 Nuluwataanaka Rabsaqué nutuma chi aluwataakai saaʼu Asiria chejee Lakís Jerusalénmüin nümaʼanamüin Ezequías, otta watta saalii surulaat nümaajatü, nüntaka eemüin süpüna tü wüinkat, suluʼu napüna na ashijaaliikana. 3 Niaka ojuʼitüin nünainmüin Eliaquim nüchon Hilquías, chi aaʼinmajakai nipia chi aluwataaikai, otta Sebná chi seküretaariokai, otta Joah nüchon Asaf chi ashajüikai. 4 Nusouktakalaka Rabsaqué: «Maa maa nümüin Ezequías: ‹Anuu nünüiki chi aluwataakai saaʼu tü mmakat Asiria: «Jarai chi piʼitaakai maʼin anain paaʼin? 5 ‹Takanajeerü tü atkawaakat otta atüjashi taya atkawaa›, müshi pia, alawaa neʼe tia. ¿Jamüshi piʼraka wayumüin tamüin? ¿Jarai chi piʼitaakai maʼin anain paaʼin? 6 ¡Kaatei! Piʼitaain neʼe paaʼin sünain Egipto, tü makat aka saaʼin kainyaruushi eekai yülüin. Nülainraale wanee wayuu sünain, susoteerü najapü sümaa sülataleejeerüin. Müsia neʼe nukuwaʼipa Faraón, chi aluwataakai saaʼu Egipto, namüin na eʼitaakana naaʼin nünain. 7 Müleka pümüle tamüin: ‹Nia Jeʼwaa weʼitaaka anain waaʼin›, ¿jamakaʼa nüsünneʼeraka Ezequías tü ayaakuaa eʼitaanakat saaʼu namüna otta tü ipa apaaʼuwajuushi aʼwaajüleekat? Mataashi nümakai sümüin Judá otta Jerusalén: ‹Juʼwaajüinjachi neʼe taya yaʼayaa›»›. 8 Püshantanajiraa maa nümaa chi aluwataakai saaʼu Asiria, taapeerü pümüin 2.000 ama, kamaʼa eere süpüla puusütüin nanain na wayuu keʼejenainjanakana shiairua. 9 Piʼitaalejeʼe paaʼin sünain Egipto shiiʼiree kemion otta wayuu amaajuna, nnojoishijaʼa süpüla «nnojo» müinjachin tamüin, jaʼitaichi niain neʼe wanee nüchepchia chi talaamainkai. 10 Nnojoishi taya antüshin yaamüin süpaʼa mma, nuluwataala taya Jeʼwaa, anuu nünüiki tamüin: ‹Pushuta saaʼu tia pueulokot jee pajaʼttiraleein›». 11 Nusouktaka Eliaquim otta Sebná otta Joah nümüin Rabsaqué: «Paashajaa wamüin suluʼu anüikii arameo, kacheʼeshii waya suluʼu; nnojo paashajaain suluʼu nanüiki na wayuu judíokana süka naapeerüin pünüiki na wayuu yaakana saaʼu süsepü tü pueulokot». 12 Nümaka Rabsaqué: «Nnojoishi piain tantüin anainmüin otta nünainmüin chi pülaamainkai. Aluwataaushi taya nanainmüin napüshuaʼa nala wayuu shaʼwatakana saaʼu süsepü tü pueulokot. Nekeerü tü nachaʼakat otta naseerü tü nashiirakat wanaa jümaa».
Eneeroʼu 23-29
KOROLO KOJUTÜSÜ SULUʼUKA TÜ WIWÜLIAKAT ISAÍAS 38-42
«Nia Jeʼwaa aapakai sütsüin naaʼin nümüin chi wayuu mapüsakai»
(Isaías 40:25, 26). «¿Jarai makai aka taaʼin süpüla wanaawain nia tamaa?, müsü nünüiki chi Wuleshikai. 26 Jiirakaa iipünaamüin. ¿Jarai kakumalaka kasakalüirua tüü? Nia chi Eweetirakai shiairua sümaa yaawain nutuma. Kanüliajüsü shiairua nutuma süpüshuaʼaleʼeya. Sutuma pülashaatain maʼin nia, kottüsü shia nutuma süpüshuaʼaleʼeya.
ip-1-S süp. 410 püt. 23-25
«Jümüliala saaʼin tapueulose»
«¿Jarai kakumalaka kasakalüirua tüü?»
23 Eesü wanee kasa yalayalaka atuma naaʼin na judíokana. Nia aküjaka namüin chi Kakumalakai kasa süpüshuaʼa jee chi pülashikai maʼin, taasheenain naya nachikuaʼa. Süpüla niiʼiyatüin Jeʼwaa pülashin maʼin nia, aashajaashi nia süchiki tü kasa nukumajakat, anuu nünüiki: «¿Jarai makai aka taaʼin süpüla wanaawain nia tamaa?, müsü nünüiki chi Wuleshikai. Jiirakaa iipünaamüin. ¿Jarai kakumalaka kasakalüirua tüü? Nia chi Eweetirakai shiairua sümaa yaawain nutuma. Kanüliajüsü shia nutuma süpüshuaʼaleʼeya. Sutuma pülashaatain maʼin nia, kottüsü shia süpüshuaʼaleʼeya nutuma» (Isaías 40:25, 26, TNM).
24 Aashajaashi Jeʼwaa nüchiki niakai süpüla niiʼiyatüin nnojoluin jaralüin müin aka naaʼin. Jiirakaa sümüin tü jolotsü chakat iipünaa, müshi nia wamüin. Nia Jeʼwaa sülaülajanaka tü jolotsükalüirua, maʼaka naaʼin wanee shikiipüʼü surulaat. Nükotchojüle shia süpüshuaʼa, nnojoleerü eein wanee choʼujaaka. Mayaapejeʼe wattain maʼin saalii, kanüliajüsü shia nutuma süpüshuaʼaleʼeya, eesü shiale tü sünülia shiimainsükat jee shiale wanee naatajatü. Ayatüsia tü jolotsükalüirua, eere niʼitaain shia Jeʼwaa, ayatüsü nakuwaʼipa na surulaatkana sutuma tü jolotsükalüirua, süka Pülashin maʼin chi kakumalakai shiairua. Müsüjeseʼe eein süpüla neʼitaain naaʼin na judíokana nünain Jeʼwaa. Pülashi maʼin Jeʼwaa süka sülaülain nia tü jolotsükalüirua otta nüinküin nükaaliinjain na aʼyataashiikana nümüin.
25 Eirakaashii waya wapüshuaʼa iipünaamüin süka kamalain wamüin tü sümakat Isaías 40:26: «Jiirakaa iipünaamüin». Watüjaa aaʼu sükajee tü nekirajaakat anain na cientiificokana, anashaatain maʼin tü jolotsükalüirua suulialeʼeya nükalioʼu Isaías. Nanaʼlüin na astronomokana chaa iipünaapünaa süka telescopio miyoʼuyuu, eesü neʼrüin 125.000 miyoone galaxia. Otta naashin waneeinnua eesü 100.000 miyoone jolotsü suluʼu tü Vía Láctea münakat. Sutuma watüjaain saaʼu tia, niainjachi neʼe waʼwaajakai süka waaʼin chi Kakumalakai waya otta weʼitaain waaʼin sünain nikeraajeerüin tü nümakat.
(Isaías 40:27, 28). »¿Jamüsü maka pünüiki Jacob otta piakai Israel: ‹ounjunnüsü tapüna nuulia Jeʼwaa otta nnojoishi jamajachin taya nümüin chi Tamaleiwasekai›? 28 ¿Nnojotsüjasaʼa paapüirüin nüchiki Jeʼwaa chi Kakumainkai tü mmakat? Eejeechi nia suluʼu kaʼika süpüshuaʼa. Matüjüinsai mapüsaa jee akulajawaa aaʼin. Nnojotsü süpüla sütüjaanüin aaʼu tü nütüjaakalü aaʼu.
ip-1-S süp. 413 püt. 27
«Jümüliala saaʼin tapueulose»
27 Nüshajüin Isaías nünüiki Jeʼwaa sükajee pütchi eeʼiyataka mojuin naaʼin saaliijee püreesain na judíokana chaa Babilonia. Wattasü tia suulia noumain. Eeshii eekai namüin nnojoluin jamajanain naya nümüin Jeʼwaa, müsü suunjunnakai aaʼin napüna nuulia. Eeshii namüle nnojoluin kachipünaain naya naaʼin Jeʼwaa. Nüsoʼirüin Maleiwa naaʼin sünain waneeirua kasa natüjaainjatka aaʼu süka süküjünüin paala namüin. Taasheeshii naya nutuma Jeʼwaa otta nüinküin tia. Matüjüinsai nia oukta otta Nukumajala süpüshuaʼa tü Mmakat. Eeyülia nünain tü nüpülain nukumajakalü aka tü mmakat otta nuuntüin najaʼttirüin Babilonia. Matüjüinsai nia mapüsaa otta nnojotsü niyüülajüin nupueulose. Otta müsia, nnojotsü süpüla watüjaain aaʼu tü nütüjaakat aaʼu Jeʼwaa, kekiishi maʼin nia otta niyaawata aaʼu wanee kasa. Isasü tia wachiki.
(Isaías 40:29-31). Naapüin sütsüin naaʼin chi wayuu mapüsakai otta katsüinshi nutuma chi eekai matsüin aaʼin. 30 Mapüsashii na jimaʼaliikana, akulajaasü naaʼin otta wototushii naya, 31 akanasaʼa na aʼatapajakana tü naaʼinrajatkat Jeʼwaa, katsüinjeerü naaʼin nutuma. Ayaleraweena maʼaka naaʼin wanee warulapai miyoʼuka atüna. Awataweena otta nnojoleena akulajaain aaʼin; waraitteena otta nnojoleena mapüsain».
ip-1-S süp. 414, 415 püt. 29-31
«Jümüliala saaʼin tapueulose»
29 Wanaa sümaa naashajaain Jeʼwaa süchiki naapüin sütsüin naaʼin chi wayuu mapüsakai, shia jülüjaka naaʼin kapüleein namüin na judíokana naleʼejüin noumainpaʼamüin. Nüsoʼirüin naaʼin Jeʼwaa na judíokana sünain Niʼraajünüin sünainjee nükaaliinjain na mapüsashiikana nachuntüle nümüin. Jaʼitakajeʼe na jimaʼalii katchinkana aaʼin, akulajaasü naaʼin otta eeshii süpüla wototuin naya sutuma mapüsaa. Nüküjapejeʼe Jeʼwaa naapeerüin sütsüin naaʼin chi eekai eʼitaain naaʼin nünain, eejeechika süpüla nuwataain otta waraittüin nia. Katsüinsü naaʼin na aʼyataashiikana nümüin Jeʼwaa, müshii aka naaʼin wanee warulapai nnojoikai kapüleein amüin awataa otta leeyatüshi kamaʼa chaa iipünaa sümaa nnojoluin neemeraain. Sükajee müin nünüiki Jeʼwaa namüin na judíokana, eeshii süpüla naʼatapajüin nükaaliinjain naya Jeʼwaa.
30 Atütülaasü naaʼin na anoujashii shiimainshiikana sutuma tü pütchi suluʼukat tü wetsiikulokalüirua sajaʼlajaayamüinka kapiitulo 40 sünainjee karalouktaka Isaías. Mayaapejeʼe wattain saalii tü apüleeruaakat waaʼin otta mojuin waaʼin sutuma, anasü maʼin tü naainjakat Jeʼwaa, nnojoishii motuin waya naaʼin jaʼitasü kasain alatüin wamüin. Shiimainjatü wamüin shiain alanaʼaleein tü nütüjaakat aaʼu chi Kakumalakai kasakat süpüshuaʼa otta nunoukteerü tü kasa mojusükat anashiipa shia nümüin (Salmo 147:5, 6). Nnojoishii eejiraainjanain neʼe waya wamüiwaʼa sümaa tü alatakat wamüin. Süka matüjüin ajaʼttaa tü nüpülainkat Jeʼwaa, katsüinjeerü waaʼin nutuma wooʼulakünüle aaʼin (2 Corinto 4:7).
31 Jülüjataa waaʼin na judío püreesakana Babilonia soʼu juyaka 607 Sü.W. Wattajana naya suulia Jerusalén, eere süchikanain nepia. Anasü naaʼin sutuma tü nüshajakat Isaías süka naʼatapajüin kasa anasü, naapajatü Jeʼwaa namüin süchikuaʼa tü noumainkat. Nüleʼejirüin naya nachikuaʼa noumainpaʼamüin soʼu juyakat 537 Sü.W., niiʼiyatüin sükajee Niain ekeraajüin tü nümakat. Müshiʼiya wayakana, eesü süpüla weʼitaain waaʼin sünain nikeraajeerüin Jeʼwaa tü nüküjakat wamüin süchiki Nuluwataaya, tü nüküjakat achiki Isaías. Pütchi anasü tü nüküjakat Jeʼwaa: Anainjatüin sukuwaʼipa wayuu maʼleekalia.
Püchajaa süchiki kaaʼürüi suluʼu tü Wiwüliakat
(Isaías 38:17). ¡Kaatei! Müsü aka saaʼin kasa ishisü tü alatakat tamüin, nnojotsü jimatüin taaʼin. Eeshi pia tamaa otta [paaʼinmajüin taya] suulia ajaʼttinnaa. Pujutüin püchiiruajee süpüshuaʼa tü taainjalakat.
w03-S 1/7 süp. 17 püt. 17
«Aipürai maʼin wayuu Maleiwa»
17 Eeʼirajüshi Ezequías nümüin Jeʼwaa süpüla naapüin analuʼut nümüin saaʼu naawalaain nutuma sünainjee wanee ayuulii aisü, müshi nia nümüin: «Pujutüin püchiiruajee süpüshuaʼa tü taainjalakat» (Isaías 38:17, TNM). Müshi nülüʼüjakai saaʼin Jeʼwaa naainjala wanee wayuu otta nujutüin shia nüchiiruajee, suulia niʼrüin shia süchikuaʼa otta nnojoleerü jülüjain naaʼin. Saashin wanee karaloukta, müshi aka nümüle wanee wayuu: «Müshi maainjalakai taaʼin puulia». Anasü waaʼin sutuma tia, ¿aashimüin?
(Isaías 42:3). Nnojoleerü nüshateʼerüin wanee kainyaruushi eekai yülüin; otta nnojoleerü niokojooin wanee mechuuria aainjuushi süka liino. Loteerü sukuwaʼipa wanee kasa nutuma süka kamalain nümüin tü shiimainkat.
Wetsiikulo aashajeʼennajatka
(Isaías 40:6-17). ¡Kaatei! Eeshi wanee wayuu makai: «¡Puʼwaata!». Nümaka wanee: «¿Kasa taʼwaatajatka?». «Müshii aka saaʼin alama na wayuukana, otta tü namaneekat müsü aka saaʼin süsii wunuʼu. 7 Jutsü tü alama wüittüsükat, jutsü tü süsiikat wunuʼu, süka nujuʼulüin shia Jeʼwaa. Na wayuukana müshii aka saaʼin alama wüittüsü. 8 Jutsü tü alama wüittüsükat, jutsü tü süsiikat wunuʼu; akaajasaʼa nünüiki chi Wamaleiwasekai, süpülajatü kaʼi süpüshuaʼa». 9 Pia jietkat sümaajatkat pütchi anasü sümüin Sión, puʼuna saaʼu tü uuchi miyoʼukat. Emetut maʼin pünüiki, piakat jierü antiraka pütchi anasü sümüin Jerusalén. Emetut pünüiki. Nnojo mmoluin pia. Püma sümüin tü pueulo chakat Judá: «Anii chi Jümaleiwasekai». 10 ¡Kaatei! Anteechi chi Senyotkai Jeʼwaa sümaa katchin nia, nieechi aluwataaka. ¡Kaatei! Eesü nümaa tü nüsülajüinjatkat, otta eesü tü nüwalaajüinjatkalü aka. 11 Nürüleejeerü naʼanneetse maʼaka naaʼin wanee anneetpüʼü. Kotteerü nutuma tü anneetcheinkalüirua; nüpataajeerü süpüla nutuʼuin shiairua. Naʼataleerü jiattaʼaya tü eekai sutujeʼerüin süchon. 12 ¿Jarai chi atüjaakai saaʼu jetsüin tü wüinkat sükajee niʼitaain shia suluʼu najapü? ¿Jarai chi atüjaakai saaʼu sajaʼapüin tü sirumatuʼukat sükajee wanee najapü? Otta ¿jarai chi atüjaakai saaʼu jeʼrain tü sümamülakat mma? ¿Otta atüjaakai saaʼu saawain tü uuchikalüirua? 13 ¿Jarai chi atüjaakai saaʼu tü nüinkakat Jeʼwaa sükajee tü nütsüinkat? ¿Jarai chi eekai süpüla achiaain nia süpüla nütüjaain saaʼu wanee kasa? 14 ¿Jarai chi nüsakirakai Jeʼwaa süpüla niyaawatüin saaʼu wanee kasa? ¿Jarai chi lotokoi atuma nukuwaʼipa? ¿Jarai chi ekirajakai nia sünain wanee kasa? 15 ¡Kaatei! Na wayuukana müshii aka saaʼin wanee wüin yootchon maʼin suluʼu wanee waatte, müshii aka saaʼin sümamüla mma suluʼu wanee pesa. ¡Kaatei! Niyalerüin Jeʼwaa tü mma pasanainkat sünain palaa maʼaka saaʼin sümamüla mma. 16 Nnojotsü süpüla eejiraain tü wunuʼulia chakat Líbano sümaa wanee siki, otta tü mürüt chakat chayaa, nnojotsü keraain süpüla saʼajünüin nümüin. 17 Müsü nnojotkai saaʼin eein tü pueulokalüirua nümüin, müsü nnojotkai shiimain saaʼin nümüin.
Eneeroʼu 30–Peʼureeroʼu 5
KOROLO KOJUTÜSÜ SULUʼUKA TÜ WIWÜLIAKAT ISAÍAS 43-46
«Ekeraajüsü süpüshuaʼa tü nümakat Jeʼwaa»
(Isaías 44:26-28). Chi ekeraajakai atuma nünüiki chi aʼyataaikai nümüin, otta Chi ekeraajakai atuma nanüiki na nünüikimaajanakana; Chi makai süchiki Jerusalén: ‹Kepieerü wayuu suluʼu süchikuaʼa›, otta müshi nia süchiki tü pueulo chakat Judá: ‹Akumajüneerü süchikuaʼa otta tatameʼereerü süchikuaʼa wanee kasa eeka sujuichijaain›; 27 Chi makai sümüin tü wüinkat: ‹Joseerü tü süchikalüirua›; 28 Chi makai nüchiki Ciro: ‹Chi taneekakai süpüla arüleejaa, naainjeerü süpüshuaʼa tü anakat saaʼin tamüin›; naainjeerü tü tamakat süchiki Jerusalén: ‹Akumajüneerü süchikuaʼa› otta tü aʼwaajüleekat: ‹Eʼitaaneerü tü suuʼuikat›».
ip-2-S süp. 71, 72 püt. 22, 23
Taashinjana na judíokana naashin Jeʼwaa
22 Nnojoishi eein Maleiwa namaa na ooʼulaküliikana, müsüjeseʼe nnojoluin pansaain tü namakat suulia «alawaa tia» namünüin amüin. Nüküjüin Jeʼwaa nükajee Isaías kasaichin nünülia chi taashinjachikai atuma na judíokana süpüla nouyantüin noumainpaʼamüin jee nakumajüin Jerusalén sümaa tü aʼwaajüleekat. Ciro nünülia otta eʼraajünüshi sükajee Ciro chi Miyoʼushikai sünainjee Persia nümünüin. Nüküjaleʼeinya Jeʼwaa tü naaʼinrajatkat süpüla nikerotüin suluʼu Babilonia, mayaapejeʼe kapüleein tia. Piamasü süsepü Babilonia, otta eesü süchi pasanainpünaa sünain jee süpüchoupünaa. Eesü wanee kasa naaʼinrüinjatka Ciro süka tü süchikat Éufrates. Naashin Heródoto otta Jenofonte, na ashajakana tü kasa alatakat sümaiwa: Nujunujeʼerüin Ciro tü süchi alatakat Babilonia, shiasaʼa shiyoolujapa, nalataka na surulaatkana shirokupünaa tü wüinkat. Jososü tü süchikat Éufrates, tü anapuʼukat atuma Babilonia.
23 ¿Ekeraajüche tü nümakat Maleiwa, taashinjanain na judíokana nutuma Ciro? ¿Akumajünüsüche Jerusalén süchikuaʼa sümaa tü aʼwaajüleekat? Ashajünüsü wanee nünüiki Ciro suluʼu tü Wiwüliakat: «Anuu nünüiki Ciro chi aluwataakai saaʼu Persia: ‹Jeʼwaa, chi Maleiwa sirumatuʼujeʼewaikai, naapüin tamüin suluwataaya wayuu süpüshuaʼa, nuluwataain taya süpüla takumajüin nipia chaa Jerusalén, tü chakat Judá. Anashi eere Maleiwa jümaa jiakana nupueulosekana. Anashii juʼunüle Jerusalénmüin, tü chakat Judá, otta jukumaja nipia Jeʼwaa, chi Sümaleiwasekai Israel —nia chi Maleiwa shiimainshikai— tü chakat Jerusalén›» (Esdras 1:2, 3, TNM). Ekeraajüsü mayaa süpüshuaʼa tü nümakat Jeʼwaa nükajee Isaías.
(Isaías 45:1, 2). Anuu nünüiki Jeʼwaa nümüin Ciro, chi nüneekalakai, tajattüin nia süka tü najapü nikiakat, süpüla tajaʼttirüin pueulo nüpüleerua, süpüla taakatüin nayatapünaajatü na aluwataashiikana, süpüla tojutalüin nüpüleerua soʼu tü pueulokot suulia süttüin soʼu: 2 «Tayeechi püpüleeruaka otta aneerü tatuma tü mmakat püpüleerua. Yüleerü tatuma tü puettoʼu aainjuushikat süka cobre otta tachotoweerü tü kasa aainjuushikat süka kachueera.
ip-2-S süp. 77, 78 püt. 4-6
Lotusü nukuwaʼipa Jeʼwaa jee oʼttaasü wayuu nutuma
4 Aashajaashi Jeʼwaa nükajee Isaías nümüin Ciro, müshi eejachikai naaʼin Ciro soʼu nükalia Isaías, nnojoipejeʼe jemein nia soʼu tia (Roma 4:17). Sutuma nüneeküin nia Jeʼwaa paala süpüla naainjain wanee kasa, «nüneekala Maleiwa», eeshi süpüla nümünüin. Sutuma eeinjachin Jeʼwaa nümaa Ciro, najaʼttireerü pueuloirua otta nnojoleerü eejiraain na aluwataashiikana nümaa. Nushutapa Ciro saaʼu Babilonia, jutateerü nutuma Jeʼwaa soʼu tü pueulokot, nnojoleetka kasain saamüin, meerü yütkai saaʼin. Eejeechi Maleiwa nümaa Ciro, nnojoleerü jaralüin eejiraain nümaa. Najaʼttireerü Babilonia na surulaat nümaajanakana Ciro, otta naapajeerü tü süwashirüin ounjunnakat paala. ¿Ekeraajüsüche süpüshuaʼa tü nümakat Isaías?
5 200 juya süchikijee nüküjüin Isaías tü alatajatkat, antüshi Ciro soʼu juyaka 539 Sü.W. shiiʼiree nushuteein saaʼu Babilonia (Jeremías 51:11, 12). Nnojotpejeʼe shapaain naaʼin na chajanakana Babilonia süka nnojoluin süpüla sajaʼttinnüin naaʼinruʼu. Akumajuushi süsepü Babilonia suluʼupünaa süpüna wanee wüin oʼttüsü akumajuushi sünainjee tü süchikat Éufrates, Tia süsepükat shia anaka atuma tü pueulokot. 100 juya Babilonia sümaa nnojoluin jamajüin shia atumaa. Naaʼinruʼu Belsasar, chia aluwataashikai, nnojoleechi nia jamajüin, eeka wanee ekawaa nutuma namaa na nuluwataakana amaa (Daniel 5:1). Oʼutuupüroʼu 5 sünainmüin 6 soʼu juyaka 539, eesü wanee kasa anaka maʼin saainjia nutuma Ciro.
6 Na ingeniero nümaajanakana Ciro, nujunujeʼerüin tü süchikat Éufrates nnojoliiwaʼaya süntüin Babiloniamüin. Süshakajaka tü süchikat otta tü alatakat eepünaa tü süsepükat Babiloniamüin, eekalaka süpüla nalatüin na surulaat nümaajanakana Ciro otta nekerotoko suluʼumüin Babilonia (Isaías 44:27; Jeremías 50:38). Otta jutatsü soʼu tü pueulokot maʼaka nüküjüin shia Isaías paala. Nashutaka na surulaatkana eere nuluwataain Belsasar otta noʼutaka naaʼin (Daniel 5:30). Alatüsü tia soʼu wanee saʼwai. Ajaʼttinnüsü Babilonia otta ekeraajüsü tü nüküjatüjütkalia Jeʼwaa.
(Isaías 45:3-6). Taapeerü pümüin tü korolo saʼakakat piyuushi otta tü korolo ounjunnakat, süpüla pütüjaainjachin saaʼu tayain Jeʼwaa, chi ounejakai pia süka pünülia, chi Sümaleiwasekai Israel. 4 Tounejüin pia süka pünülia, kojutüsü pünülia tatuma mayaapejeʼe nnojolin piʼraajüin taya, taainjain tia naaʼujee Jacob, chi aʼyataakai tamüin otta naaʼujee Israel chi taneekalakai. 5 Nnojoishi eein wanee eekai müin aka taaʼin, tayakai Jeʼwaa. Taya neʼe waneeshikai Maleiwain. Icheerü tatuma tü piatapünaajanakat mayaapejeʼe nnojolin piʼraajüin taya, 6 süpüla sütüjaain saaʼu wayuu nnojoluin eein wanee eekai müin aka taaʼin tayakai Jeʼwaa. Atüjaanajatü aaʼu tia eejeere nujuʼitüin chi kaʼikai eemüinreʼeya nikerotüin.
Püchajaa süchiki kaaʼürüi suluʼu tü Wiwüliakat
(Isaías 43:10-12). «Aküjülii jia pütchi tachiki —müsü nünüiki Jeʼwaa—, chi tachepchia taneekajalakai, süpüla jütüjaainjatüin saaʼu otta junoujainjanain tanain otta süpüla jütüjaainjatüin saaʼu tayainya neʼe Tayakai. Tapülapünaa otta tachikijee nnojoishi eein wanee Maleiwa naatajachi toulia. 11 Tayakai... taya chi Jeʼwaakai, tayaʼaya chi oʼtteʼerüinjachikai wayuu». 12 «Taya chi aküjakai pütchi, chi oʼtteʼerakai wayuu otta taya chi aküjakai pütchi nnojoliiwaʼaya eein wanee [maleiwa] jaʼaka jiakana. Makalaka jiain na aküjüliikana pütchi tachiki —müsü nünüiki Jeʼwaa—, taya chi Maleiwakai.
(Isaías 43:25) »Tayakai... Taya chi motokai aaʼin paainjala taaʼujeʼeya neʼe tayakai, otta nnojoleerü sotuin taaʼin paainjala.
ip-2-S süp. 60 püt. 24
«Aküjülii jia pütchi tachiki»
24 Jülüjataa waaʼin nümüliajüin Jeʼwaa na israeliitakana naaʼujeʼeya neʼe niakai, nnojotsü shiain neʼe sutuma nayaawajaain suulia naainjala. Shia süpüla anainjatüin pütchi nüchiki Jeʼwaa. Niyüülajüle na israeliitakana chaa Babilonia, nnojotsüjeʼe kojutüin Nünülia atumawaa (Salmo 79:9; Ezequiel 20:8-10). Müsia maaʼulu yaa, shia kojutüleeka wuleinjatüin nünülia Jeʼwaa otta niainjachin aluwataain suulialeʼeya katüin soʼu wayuu. Aipejeʼe nüpüla Jeʼwaa na achekakana nüchiaain naya otta naʼwaajüin nia süka tü shiimainkat otta süka naaʼin. Aishii nüpüla Jeʼwaa naya wayuukana sükajee motuin naaʼin naainjala saaʼujee ouktüin Jesuu, naainjain tia jaʼitainna kepiainjanain naya mmapaʼa jee shiale chaa iipünaa (Juan 3:16; 4:23, 24).
Wetsiikulo aashajeʼennajatka
(Isaías 46:1-13). Ejepülaashi Bel, jepütüshi Nebo; aapünüsü sümüin wüchii jashichi tü namaleiwasekalüirua otta aapünüsü sümüin mürüt tü nachisekat otta tü nachise jawatüsükat aapünüsü sümüin tü mürüt mapüsasükat. 2 Ejepülaainjana waneʼewai nakua, nnojotsü süpüla taashin tü nachisekat natuma, püreesainjana neʼe naya. 3 «Jaapaja tanüiki, jiakana nüpüshikana Jacob, jüpüshuaʼa jiakana apütaakana naʼakajee na nüpüshikana Israel, jia joʼuukana tatuma süleʼeruʼujee jii. 4 Jaʼitaichi laülaain wanee wayuu, tayaʼaya neʼe Maleiwakai waneepia, jaʼitairü kasuuin nuʼwala, ayateechi takaaliinjain nia. Eejeechi taya, süpüla talüʼüjüin jia, süpüla eejiraain taya otta süpüla juʼttaain tatuma. 5 »¿Jarai chi makai aka taaʼin jaashin, süpüla wanaawain taya nümaa? 6 Eeshii na ayuʼlakana ooro suluʼujee wotsa otta nepesajüin pülaata saaʼu tü pesakat. Nasakajüin wanee aʼyataai süka ooro süpüla nukumajüin wanee namaleiwase. Nasapainkashii sümülatuʼu tü ayaakuaakat. 7 nanüloʼusü, nalüʼüjüin otta neʼitaain eeinjatüle jimatüin shia. Nnojotsü oʼunüin eejeere shiʼitaanüin. Jaʼitairü suchuntünüin amüin nnojotsü asouktüin, nnojoishii sümüliajüin waya kasale alatüin wamüin. 8 »Soto jaaʼin tia, süpüla yalayalain jaaʼin. Jiʼitaa suluʼu jaaʼin jiakana kaainjaraliikana. 9 Soto jaaʼin tü kasa sümaiwajatkat, tayain Maleiwain, nnojoishi eein wanee Maleiwa, nnojoishi eein wanee eekai müin aka taaʼin; 10 Taya neʼe tayakai aküjakai jamüinjatüin sukuwaʼipa suʼttia wanee kasa süpüla shikeraajüinjatüin. Tayaʼala neʼe chi aküjakai süpüshuaʼa tü kasa nnojoyütkalia alatüin. Chi makai anüiki: ‹süpüshuaʼa tü pütchi teweetirakat, eejeerü shia süpüla kaʼika süpüshuaʼa otta ayateeria ekeraajüin süpüshuaʼa tü keeʼireekat taaʼin›; 11 Taya chi ounejakai wanee warulapai eejeere nujuʼitüin chi kaʼikai; suluʼujee wanee mma wattajatü süpüla naainjain tü tamakat. Taküjüitpa achiki jümüin otta tekeraajeerü shia; takumajüin sukuwaʼipa otta taaʼinreerü shia. 12 »Jaapaja tanüiki jiakana yalayalakana aaʼin, jiakana wattaluʼukana suulia lotoo akuwaʼipaa. 13 Arütkaashi taya sümaa lotoo akuwaʼipa. Nnojoishi wattain taya, nnojotsü wattain tü kaʼi juʼttaainjatkalü oʼu. Oʼttaweena tatuma na chajanakana Sión; aneerü maʼin sukuwaʼipa Israel».