Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa

AKOOSÜTOʼU 7-​13

KOROLO KOJUTUSÜ SULUʼUKA TÜ WIWÜLIAKAT EZEQUIEL 28-​31

«Naapüin Jeʼwaa kasa anasü namüin na chajanakana Babilonia»

(Ezequiel 29:18). «Anasü jülüjale paaʼin taneeküin chi aluwataashikai saaʼu Babilonia süpüla nütkaainjachin namaa na chajanakana Tiro. Moireʼesia nekii na surulaatkana jee ajaʼttüsü natünakii sünainjee naʼyataain maʼin. Nnojotpajaʼa kasain awalaajünüin namüin, nnojotsü kasain saamüin namüin nashutuin saaʼu Tiro.

it-2-S süp. 1136 püt. 9

Tiro

Ajaʼttinnüsü tia mmakat. Suʼunnaa nushutuin Nabucodonosor saaʼu tü mmakat Tiro, moireʼesia nekii na surulaatkana sünainjee waneepiain nanain wanee uwon otta ajaʼttüsü nütünakii süka naʼyataain maʼin sünain ashaʼwaleʼera tü kasa süpülajatkalü ashutaa saaʼu Tiro. Süka nnojoluin kasain niyuʼlüin Nabucodonosor sünainjee ashutaa saaʼu Tiro, naapüin Jeʼwaa nünüiki sünain naapüinjatüin nümüin tü suwashirüinkat tü mmakat Egipto (Eze 29:17-20). Naashin Josefo, wanee wayuu ashajüi süchiki kasa eekai sülatüin, poloo apünüinmüin juya na Babiloniajeʼewaliikana sünain ashutaa saaʼu Tiro (Contra Apión, libro I, sec. 21) otta watta saaliin nneerü nükataajaka sünain. Nnojotsü ashajünüin süpüshuaʼa tü kasa alatakat sünain tia atkawaakat, wainmapajaʼa maʼin na wayuu noʼutakana aaʼin na babiloniajeʼewaliikana otta amülouisü nakorolo na chajanakana Tiro (Eze 26:7-12).

(Ezequiel 29:19). »Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Taapeerü tü mmakat Egipto nümüin chi aluwataaikai saaʼu Babilonia, nülüʼüjüinjatü tü nawashirüinkat otta nnojoleerü kasain nüpütüin suluʼu tia mmakat, nawalaajiasü tia napüshuaʼa na nusurulaatsekana›.

it-1-S süp. 777 püt. 7

Egipto, Egipciokana

Waneesia neʼe tü pütchi antünakalü anain chaa Babilonia kaluʼuka süchiki natkaain namaa na chajanakana Tiro. Ashajünüsü tia pütchikat wanaa sümaa 37 juya Nabucodonosor sünain aluwatawaa (588 Sü. W.). Mayaainjeʼe nnojolin süküjünüin shiain maʼin wanaa sümaa sajaʼttinnüin Tiro, watüjaa aaʼu naapüin Jeʼwaa nümüin Nabucodonosor tü suwashirüinkat Egipto saaʼujee nushutuin saaʼu Tiro, wanee mma peʼipaaka sümaa nupueulose Jeʼwaa (Eze 29:18-20; 30:10-12).

(Ezequiel 29:20). »Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Saaʼu niain chia taneekajalakai süpüla ashutaa saaʼu, taapeerü nümüin suwashirüin tü mmakat Egipto, süka tayain naʼyataain amüin›.

g86-S 8/11 süp. 27 püt. 4, 5

¿Wawalaajüinjatche süpüshuaʼale tü nachekajakat na sülaülashiikana Mma?

Süpüla wasoutüin shiʼipajee pütchikat tüü, anasü jülüjale waaʼin tü naaʼinrakat Jeʼwaa wanaa sümaa nüneeküin Nabucodonosor süpüla niainjachin ashutüin saaʼu mmakat Tiro, mayaainjeʼe nakanajuuin na tirokana natuma, watta saalii nneerü nükataajaka sünain ashutaa saaʼu, makalaka anain nümüin Jeʼwaa nuwalaajüin Nabucodonosor saaʼu tü kasa naaʼinrakat. Tü nünüikikat Jeʼwaa suluʼusü shia Ezequiel 29:​18, 19: «Anasü jülüjale paaʼin taneeküin chi aluwataashikai saaʼu Babilonia süpüla nütkaainjachin namaa na chajanakana Tiro. [...] Nnojotpajaʼa kasain awalaajünüin namüin, nnojotsü kasain saamüin namüin nashutuin saaʼu Tiro. Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Taapeerü tü mmakat Egipto nümüin chi aluwataaikai saaʼu Babilonia, nülüʼüjüinjatü tü nawashirüinkat otta nnojoleerü kasain nüpütüin suluʼu tia mmakat, nawalaajiasü tia napüshuaʼa na nusurulaatsekana›».

Na ekirajaakana sünain tü Wiwüliakat, natüjaa aaʼu nnojoluin nuʼwaajüin Jeʼwaa Nabucodonosor otta mojulaain maʼin na nusurulaatsekana, müliashii maʼin natuma na wayuu nalaülakana. Niyoutuin Jeʼwaa tia. Mayaainjeʼe müin shia, awalaajüinnüshi Nabucodonosor nutuma Jeʼwaa saaʼu nushutuin saaʼu tü mmakat Tiro.

Püchajaa süchiki kaaʼürüi suluʼu tü Wiwüliakat

(Ezequiel 28:12-19). «Piiʼiraja wanee jayeechi süchikimaajatü mojuu aaʼin nüchiki chi aluwataakai saaʼu Tiro. Maa pünüiki nümüin: ‹Anuu tü nümakat Jeʼwaa chi Miyoʼushikai saaʼu kasa süpüshuaʼa: »›«Anataʼaleesüjaʼa maʼin pukuwaʼipa süka kekiin maʼin pia otta süka mamojulain pia. ¹³ Chajachi pia suluʼu naʼapainse Jeʼwaa, tü kanüliakat Edén. Eejatü pünain tü ipa anachonsükalüirua maʼin maʼaka saaʼin rubí, topacio sümaa jaspe; eejatü pünain crisólito, ónice, jade; zafiro, turquesa otta esmeralda, jee sotpünaa tü püsheʼinkat aainjuushi süka ooro. Majatüjülia shia pukumajünaiwaʼaya. ¹⁴ Pia chi querubín taneekajalakai, chi ounjulakai wanee kasa, teʼitaain pia saaʼu tü nuʼuuchisekat Maleiwa, tü uuchi wulesükat maʼin. Waraittapuʼushi pia saʼakapünaa ipa eekai chuwatüin. ¹⁵ Maainjalasai pia, lotoshaatasü pukuwaʼipa pukumajünaiwaʼaya, waneʼereʼeya pujutuuin saʼaka kaainjalaa. ¹⁶ »›»Süka wattain maʼin saalii tü kasa pukakat, kooʼomüinsü maʼin tü kasa mojusü jee puʼttakalaka sünain kaainjalaa. Tayoutaka pia sünainjee tia jee tojuʼitirüin pia suluʼujee tü nuʼuuchisekat chi Maleiwakai, tajaʼttireechi pia, chi querubín ounjulaakai wanee kasa, chi waraittapuʼukai saʼakapünaa ipa chuwatüsü. ¹⁷ »›»Yaletajaasü paaʼin süka anain maʼin paala pukuwaʼipa, amülouisü putuma tü kekiiwaakat saaʼujee paʼanasia. Tojuteechi pia mmapaʼamüin, shiʼrüinjachi pia tü wayuu aluwataasükalüirua saaʼu mmakat. ¹⁸ Süka jouluin maʼin tü kasa mojusü paaʼinrakat mojutsat putuma eere puʼwaajapuʼuin chi Maleiwakai. Sünainjee tia, eejeerü tatuma wanee siki süpüla tajaʼttirüin pia. Apütaajeerü neʼe paliʼi püchikanain suʼupala wayuu. ¹⁹ Otta müshia joo na wayuu eʼraajakana pia, poneerü maʼin naaʼin neirakaapa pümüin. Keemaleejeeria maʼin tü pukuwaʼipakat jee müichia pia nnojoluin»›».

it-2-S süp. 640 püt. 4, 5

Mamojulawaa

Chi oʼttakai sünain kaainjalaa otta chi aluwataakai saaʼu Tiro. Tü nümakat Jesuu suluʼu Juan 8:​44, wanaapünaasü sümaa tü suluʼukat Génesis kapiitulo 3. Tü kaainjalaakat otta tü kasa mojusü naaʼinraka na wayuukana, müsia aka neʼe saaʼin tü kasa mojusü naaʼinraka noʼutku na aapieekana. Tü pütchi süchikimaajatka mojuu aaʼin suluʼusü shia Ezequiel 28:12-19, mayaainjeʼe müin shia, nümüinjatü shia chi aluwataakai saaʼu Tiro, saashin yala yaletüsü maʼin naaʼin chi aluwataakai saaʼu Tiro, maleiwayaashi nia nümüinjiraa jee «querubín» münüshi, aküjünüsü joo yala süchiki tü apainkat Edén. Wanaawasü maʼin tü aküjünakat nüchiki chi aluwataaikai saaʼu Tiro sümaa tü nukuwaʼipakat Satanaa, jamüshijaʼa Satanaa, yaletajaasü naaʼin, kanüikiyaasü wanee wüi nutuma chaa Edén otta nia «chi aluwataakai saʼaka wayuu» (1Ti 3:6; Gé 3:1-5, 14, 15; Alat 12:9; 2Co 4:4).

Chi aluwataakai saaʼu Tiro chi nnojoikai eʼraajünüin anülia, kepiapuʼushi nia suluʼu wanee pueulo anashaataka maʼin münüsü, nia ‹chi anakai maʼin akuwaʼipa, chi kekiikai maʼin otta chi mamojulakai [adjetivo sünainjeejatü heb. ka·lál] otta maainjalasai nia [heb. ta·mím], lotoshaatasü nukuwaʼipa nukumajünaiwaʼaya, waneʼereʼeya nujutuuin saʼaka kaainjalaa› (Eze 27:3; 28:​12, 15, TNM). Pütchikat tüü, sünainpünaasü shia nakuwaʼipa noʼutku na aluwataaliikana saaʼu Tiro. Nnojoishi waneeshin neʼe chi aashajaanakai achiki yala (Anasü paashajeʼerüle tü suluʼukat Isa 14:4-20, tü aküjünakat nüchiki chi aluwataakai saaʼu Babilonia). Mülejeʼe shia, eesüjaʼa süpüla shiain saashajaanüin achiki anajiraain paala na aluwataaliikana saaʼu Tiro nümaa chi aluwataaikai David otta Salomón, wanaa sümaa nakaaliinjünüin sünain akumajaa tü aʼwaajüleekat chaa saaʼu tü uuchikat Moria. Makalaka anain maʼin nakuwaʼipa noʼutku na aluwataalii chajanakana Tiro süka anajiraain naya sümaa tü nupueulosekat Jeʼwaa (1Re 5:1-18; 9:​10, 11, 14; 2Cr 2:3-16). Shiasaʼa mapa, mojulaashii maʼin na aikalaakana sünain aluwatawaa saaʼu Tiro. Nayasaʼa na nünüikimaajanakana Maleiwa Joel, Amós otta Ezequiel naküjüin sajaʼttinnajatüin Tiro (Joe 3:4-8; Am 1:​9, 10). Süka suwanajeʼennüin nukuwaʼipa Satanaa sümaa nakuwaʼipa na aluwataaliikana saaʼu Tiro, wayaawata aaʼu eesü naatale tü aküjüneekalü achiki wanaa sümaa süshajünüin suluʼu tü Wiwüliakat tü pütchikat mamojulawaa otta maainjalawaa.

(Ezequiel 30:​13, 14). »Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Tajaʼttireerü süpüshuaʼa tü maleiwayaasükalüirua nnojotka kasain anain apüla chaa Nof, otta nnojoleechi jaraliin nekiipüʼüin na chakana Egipto, keemoijeerü maʼin tü mmakat Egipto. ¹⁴ jee tü mmakat Patrós yüütalejeʼeria shia tatuma otta taʼajeerü wanee siki suluʼu Zoan, jee kasalajaneerü naainjala tatuma na wayuu chakana suluʼu tü mmakat No.

w03-S 1/7 süp. 32 püt. 1-3

NOF otta No sünülia sutuma tü Wiwüliaka tü mmakat Menfis otta Tebas, tia mmakalüirua shiapuʼusü tü mma shikiisükat tü pueulokalüirua chajatkat Egipto. Tü kanüliakat Nof (Menfis) chajatü 23 kiloometüro uuchijeeruʼu sünain tü kanüliakat Cairo, sotpünaa tü süchikat Nilo. Watta kaʼi mapa nnojoluitpa maʼin eʼnnaajünüin tü mmakat Menfis maʼaka saaʼin shikii tü mmakat Egipto. Suʼttaiwaʼaya tü juyakat 1.500 Sü.W., aneekünüsü wanee mma süpüla shiainjatüin tü mma shikiisükat Egipto, tia shia tü mmakat No (Tebas). Tia, chajatü 500 kiloometüro uuchimüin sünain Menfis. Chaa eere süchikanain tü aʼwaajüleekalüirua eejatkat chaa Tebas, chasü tü aʼwaajülee kanüliakat Karnak, müloʼushaata maʼin süsaʼa tia piichikat, nnojotsü wanee müin aka saaʼin. Chaa Tebas otta suluʼu tü piichi aʼwaajülee kanüliakat Karnak, nia aʼwaajünaka Amón, chi Maleiwa aʼwaajünakai maʼin Egipto.

¿Kasa alatajatka sümüin Menfis otta sümüin Tebas saashin tü Wiwüliakat? Aküjünüsü suluʼu tü Wiwüliakat outajachin chi aluwataakai saaʼu Egipto otta najaʼttirüinjanain namaleiwase na wayuu suluʼukana tü mmakat Tebas, maʼaka naaʼin chi maleiwayaashikai Amón (Jeremías 46:​25, 26). Outajana napüshuaʼa na wayuu aʼwaajakana tü maleiwayaasükalüirua chaa Tebas (Ezequiel 30:​14, 15). Ekeraajüsü tia pütchikat, nnojoliinnapa eein na wayuu aʼwaajapuʼukana Amón, apütaasü neʼe süchikanain tü naʼwaajüleepuʼukat. Maaʼutpünaa, mayaainjeʼe anain maʼin tü pueulokot Luxor saʼakapünaasü neʼe süchikanain tü pueulokot Tebas eepuʼukat sümaiwa. Eesü waneirua pueulocheein pejepünaa sünain tia mmakat.

Müsia joo tü makat Menfis shia neʼe eekat tü amuuyuukat. Naashin Louis Golding wanee wayuu atüjakai süpüleerua tü Wiwüliakat, naapaain na árabe chejeʼewaliikana Egipto tü ipakalüirua süchikanainkat tü pueulokot Menfis süpüla nakumajüin tü pueulo kanüliakat Cairo, tü chakat wanee saʼata tü süchikat Nilo. Nnojorüleesia apütaain wanee ipa natuma na akumajülii árabekana. Ekeraajüsü tü sümakat tü Wiwüliakat, moʼoosü neʼe wayuu sutuma tia mmakat otta malujunasat shia wayuu (Jeremías 46:19).

Wetsiikulo aashajeʼennajatka

(Ezequiel 29:​1-​12). Soʼu tü juyakat poloo soʼu tü kashikat poloo wanaa nümaa chi kaʼikai poloo piamamüin, antüsü tü nünüikikat Jeʼwaa tanainmüin, nümakalaka tamüin: ² «Piiraka nümüin chi aluwataakai saaʼu Egipto, püküja tü alatajatkat nümüin otta tü shiʼrüinjatkat wayuu süpüshuaʼa suluʼu tü mmakat Egipto. ³ Maa pünüiki nümüin: ‹Anuu tü nümakat Jeʼwaa chi Miyoʼushikai saaʼu kasa süpüshuaʼa: «Anii taya pooʼomüin piakai chi Faraón aluwataakai saaʼu Egipto, chi wüchii miyoʼushikai maʼin shirokukai tü süchikat Nilo, chi makai anüiki: ‹taya kakoroloko tü süchikat Nilo, taya tayakai chi kakumajalakai shia tapüla neʼe›. ⁴ Teʼitaajeerü wanee garfio püwaraluʼu otta achenraajeerü tü jimekalüirua shirokukat tü süchikat Nilo sünain noikat jee tojuʼitireechi pia shirokujee tü süchikat Nilo sümaʼaleʼeya tü jimekalüirua ichekat sünain poikat. ⁵ Jee teʼipünaweechi pia isashiipaʼa sümaʼaleʼeya tü jimekalüirua suluʼujeejatkat tü süchikat Nilo. Nnojoleechi jaʼralin ojoitüin pia. Tojuteechi pia sümüin tü mürütkalüirua jashichikat otta shikeerü pia tü wüchii waawatakat iipünaa. ⁶ Sütüjaweerü aaʼu wayuu süpüshuaʼa suluʼu tü mmakat Egipto sünain tayain Jeʼwaa, müshii aka neʼe saaʼin jia wanee kainyaruushi suuʼuipalajanasü Israel, nnojotsü kasain anain apüla. ⁷ Wanaa sümaa saapaanüin pajapü ashataasü shia jee ajuʼttaasü tü natünakiikat putuma otta wanaa sümaa nayeʼinraain pünain, ojuttusü pia, eewaasü nasapü putuma». ⁸ »›Sükajee tia anuu nünüiki Jeʼwaa, chi Miyoʼushikai saaʼu kasa süpüshuaʼa: «Kaatei, tantireerü pünainmüin wanee chajaruuta, toʼuteena aaʼin napüshuaʼa na wayuukana sümaʼaleʼeya tü namüʼlüinkat. ⁹ Yüütaleejeeria tü mmakat Egipto, natüjaweerü aaʼu tayain Jeʼwaa. Sünainjee tü nünüikikat paala wanaa sümaa nümüin: ‹Taya kakoroloko tü süchikat Nilo, taya tayakai chi kakumajalakai shia tapüla neʼe›. ¹⁰ Anii joo taya pooʼomüin piakai otta sooʼomüin tü süchikat Nilo, shiimüin sünain tajaʼttireerüin tü mmakat Egipto, meerü aka neʼe saaʼin isashiipaʼa, nnojoleerü kasain apütaain suluʼu tü mmakat Migdol otta tü mmakat Siene sünainmüinreʼeya eere sujutaain tü mmakat Etiopía. ¹¹ Nnojoleechi awaraijaain yalapünaa wanee wayuu jee nnojoleerü antüin mürüt suluʼumüin tia mmakat. Müiria shia soʼutpünaa 40 juya. ¹² Shiimain sünain tajaʼttirüinjatüin mmaka Egipto, yüütaleejeeria shia tatuma saʼakapünaa isashiipaʼa. Otta müsia tü pueulokalüirua chakat Egipto tajaʼttireerü shiairua süpüshuaʼa yüütaleejeeria soʼu 40 juya, jee müshia joo na egipciokana, taʼwalakajeena naya saʼakapünaa tü wayuu suluʼujeejanaka tü wanee pueulokalüirua».

AKOOSÜTOʼU 14-​20

KOROLO KOJUTUSÜ SULUʼUKA TÜ WIWÜLIAKAT EZEQUIEL 32-​34

«Tü aʼyatawaa aapünakat nümüin chi aapirüikai wayuu»

(Ezequiel 33:7). »Otta müshia jooluʼu anakajaʼa müleka piale wanee aapirüi wayuu yaa suluʼu Israel, paapüinjatü [tü] pütchikat otta paapirüinjana naya tamüin.

it-1-S süp. 246 püt. 6

Aapirüi wayuu

Kasa ayaawaseeka. Nüneeküin Jeʼwaa na nünüikimaajanakana süpüla müinjana aka naaʼin wanee aapirüi wayuu chaa Israel (Jer 6:17), jee müshia na nünüikimaajanakana Maleiwa eeshi naashajaale nüchiki wanee aapirüin wayuu, shiyaawaseyaashi neʼe wanee kasa natuma (Isa 21:​6, 8; 52:8; 62:6; Os 9:8). Nüneeküin Maleiwa na nünüikimaajanakana süpüla naapirüin na wayuukana suulia tü kasa mojusü naaʼinrakat, müleka amülouire wanee wayuu saaliijee nnojoluin naapinnüin asoutajana naaʼu na nünüikimaajanakana Maleiwa. Aluʼuinjaʼa macheʼere chi wayuukai naapinnapa süsalashi nia naainjala, nnojotsü nüsirüin shia chi nünüikimaajachikai Maleiwa (Eze 3:17-21; 33:1-9). Müleka eere wanee nünüikimaajachi Maleiwa eekai nnojooluin noonooin sümaa nünüiki Maleiwa, müshi aka neʼe naaʼin wanee aapirüi wayuu eekai moʼuin otta müshia aka naaʼin wanee erü eekai mootuin. Nnojoishi kasain anain apüla (Isa 56:10).

(Ezequiel 33:​8, 9). Müleka ‹outajachi wanee wayuu eekai kaainjalain› tamüle. Piasaʼa joo piakai nnojoishi paapirüin chia wayuukai süpüla niyaawajaain suulia naainjala, mülejeʼe pukuwaʼipa mayaa, pieechi asouktaka naaʼu outule nia. ⁹ Aluʼusaʼa müleka paapirüle wanee wayuu süpüla niyaawajaainjachin suulia naainjala, jee müleka nnojorüle niyaawajaain suulia naainjala outeechi nia saaliijee naainjala, nnojoleechi pia asoutüin naaʼin süka paapirüin paala nia.

w88-S 1/1 süp. 28 püt. 13

Ayataa pia sünain aküjaa pütchi süchiki nuluwataaya Maleiwa

Asouktajana waya naaʼu

¹³ Chi nünüikimaajachikai Maleiwa Ezequiel, naapirüinjana na wayuukana süpüla nayaawajaainjanain suulia naainjala süpüla katüinjatüin noʼu, müinjachi aka naaʼin wanee aapirüi wayuu chaa Israel. Müsia neʼe nakuwaʼipa na Aküjaliikana pütchi maaʼulu. Jamüshijaʼa Ezequiel nnojoire naapirüin tü wayuukalüirua jee outule naya saaliijee naainjala, niainjachi asoutaka naaʼu nuʼupala Maleiwa. Müshijeseʼe müin joo Jeʼwaa wamüin: «Nnojotsü anain taaʼin sükajee outuin wanee wayuu kaainjarai, shia anaka atuma taaʼin niyaawajaale wanee wayuu suulia naainjala otta ayatüle katüin noʼu. Jia wayuu chakana Israel, anashii jiyaawajaale suulia jaainjala suulia outuin jia». (Ezequiel 33:1-11.)

(Ezequiel 33:11). Maa pünüiki namüin: Anuu nünüiki Jeʼwaa chi Miyoʼushikai saaʼu kasa süpüshuaʼa, ‹«shiimainshaata tü tamakat jümüin, nnojotsü anain taaʼin sükajee ouktüin wanee wayuu kaainjarai, shia anaka atuma taaʼin niyaawajaale wanee wayuu suulia naainjala otta ayatüle katüin noʼu. Jia wayuu chakana Israel, anashii jiyaawajaale suulia jaainjala suulia outuin jia»›.

(Ezequiel 33:14-​16). »›Müleʼe joo tanüiki nümüin wanee wayuu mojulaashi: «Shiimain sünain outajachin pia», müleka niyaawajaale chi wayuukai suulia naainjala jee naaʼinrüle tü kasa lotusükat, ¹⁵ nuwalaajüle tü kasa naapakalü ojuunaa tü kasa nuʼluwajaka otta shiale naaʼinrüin jooluʼu tü kasa anasükat. Ayateeria katüin noʼu. Nnojoleechi nia outuin. ¹⁶ Nnojoleerü sotokuʼu aaʼin tü naainjalakat süchikuaʼa. Ayateeria katüin noʼu süka naaʼinrüin kasa anasü otta lotuin nukuwaʼipa›.

w12-S 15/3 süp. 15 püt. 3

Ayataʼaya eejüin waaʼin

¿Jamüsü choʼujaaka waküjainjanain pütchi?

³ Müleka wayaawatüle sujutü tü aküjaakat pütchi, keeʼireejeerü waaʼin waküjain maʼin tü pütchi sümüin wayuukalüirua süpüshuaʼa (Rom. 10:​13, 14). Naapüin Jeʼwaa nünüiki namüin na wayuu ayaawajaakana suulia naainjala: «Müleʼe joo tanüiki nümüin wanee wayuu mojulaashi: ‹Shiimain sünain outajachin pia›, müleka niyaawajaale chi wayuukai suulia naainjala jee naaʼinrüle tü kasa lotusükat, [...] Ayateeria katüin noʼu. Nnojoleechi nia outüin. Nnojoleerü sotokuʼu aaʼin tü naainjalakat süchikuaʼa. Ayateeria katüin noʼu süka naaʼinrüin kasa anasü otta lotuin nukuwaʼipa» (Eze. 33:14-16, TNM). Müsü nünüiki Jeʼwaa namüin napüshuaʼa na wayuu aʼyataakana sünain aküjaa süchiki Nuluwataaya Maleiwa: «Paainjüle shia kateerü poʼu otta müshiʼiya na aapajakana pünüiki» (1 Tim. 4:16; Eze. 3:17-21).

Püchajaa süchiki kaaʼürüi suluʼu tü Wiwüliakat

(Ezequiel 33:​32, 33). ¡Kaatei!, meerü tü pünüikikat namüin maʼaka shiiʼirain wayuu eekai saʼalaajaain, aneerü maʼin tü pümüraluʼukat namüin, nnojoliinjanapajaʼa naya eitaain suluʼu nakuwaʼipa tü kasa püküjakalü achiki namüin. ³³ Shiasaʼa shikeraajapa tü tanüikikat ¡kaatei!, ekeraajeʼeria neʼe tü tanüikikat, natüjaweetka saaʼu eejachin wanee nünüikimaajachi Maleiwa naʼaka.

w91-S 15/3 süp. 17 püt. 16, 17

Puʼuna sümaa tü neʼejenakat Jeʼwaa

Nnojoishi amalajaain mayaainjeʼe meeʼerapalain nia

¹⁶ Anasü tü nukuwaʼipakat Ezequiel süpüla washatüin. Jamüshijaʼa nia oonooshi sümaa tü nünüikikat Jeʼwaa mayaainjeʼe meeʼerapalain nia, meeria neʼe wakuwaʼipa müleka woʼunule sümaa tü neʼejenakat Jeʼwaa otta woonoole sümaa tü nuluwataakat anain waya. Müle wakuwaʼipa mayaa yapeena waya süpüla wasoutuin saaʼu wanoula namüin na kemeʼerainpalaka waya saaʼujee waküjain süchiki tü naaʼinrüinjatkat chi Maleiwakai mapeena. Nüküjain Jeʼwaa nümüin Ezequiel eeinjatüin wayuu ayoutaka tü pütchikat otta nnojoleenain kacheʼein sümüin süka manoulain naya nünain Jeʼwaa (Ezequiel 3:7-9). Eeinjatü wayuu piamaka oʼupünaa, saashin Ezequiel 33:​31, 32 «Antaa antaa meerü wayuu pünainmüin, aikkalaainjana pümülatuʼu, meena aka saaʼin tü tapueulosekat, naapajeerü neʼe pünüiki sümaa nnojoluin noonooin sümaa. Aküjashii maʼin naya süchiki tü kasa yarüttüsü naaʼinreekalü amüin, shia suchuntaaka maʼin naaʼin kooʼomüin nawashirüin sünainjee kasa mojusü. ¡Kaatei!, meerü tü pünüikikat namüin maʼaka shiiʼirain wayuu eekai saʼalaajaain, aneerü maʼin tü pümüraluʼukat namüin, nnojoliinjanapajaʼa naya eitaain suluʼu nakuwaʼipa tü kasa püküjakalü achiki namüin».

¹⁷ ¿Jamüsü nukuwaʼipa Ezequiel sutuma tia? Müsü sünüiki Ezequiel kapiitulo 33 wetsiikulo 33: «Shiasaʼa shikeraajapa tü tanüikikat ¡kaatei!, ekeraajeʼeria neʼe tü tanüikikat, natüjaweetka saaʼu eejachin wanee nünüikimaajachi Maleiwa naʼaka». Nnojotsü amalajaain nunoula Ezequiel, mayaainjeʼe macheʼein wayuu sümüin tü pütchi nüküjakalü achiki, ayatüshi nia oonooin sümaa tü nünüikikat Jeʼwaa otta nnojotsü nüshatüin nakuwaʼipa na wayuukana.

(Ezequiel 34:23). Teʼitaainjachi wanee nekiipüʼü, müinjachi aka naaʼin wanee arüleejüi namüin, chia niainjachi David chi aʼyataaikai tamüin. Niainjachi chi arüleejüinjachikai naya.

w07-S 1/4 süp. 26 püt. 3

Nnojo yaletüin waaʼin otta jüüjüü waya nümüin chi arüleejüi anamiakai.

³ Tü pütchi aküjünakalü suluʼu Isaías 40:​10, 11 shiiʼiyatüin wamüin kachipünaain waya naaʼin Jeʼwaa otta nuʼunirüin tü wakuwaʼipakat waya suluʼukana nupueulose (Salmo 23:1-6). Wanaa sümaa yaajachin Jesuu mmapaʼa jaʼyasü saaʼu nukuwaʼipa alin maʼin nüpüla na nikirajüinkana otta tü wayuukalüirua (Mateo 11:28-30; Marcos 6:34). Achiaanüshii nutuma Jeʼwaa nümaa Jesuu na wayuu nekiipüʼükana na israeliitakana, naya wayuukana maaliinsalii napüla na israeliitakana otta müliashii maʼin naya natuma (Ezequiel 34:2-10; Mateo 23:​3, 4, 15). Müshi Jeʼwaa wamüin: «toʼtteʼereena na taʼanneetsekana, nnojoleerü jaralüin aainjaain kasa mojusü namüin, asoutajana naya tamüin waneʼewai nakua. Teʼitaainjachi wanee nekiipüʼü, müinjachi aka naaʼin wanee arüleejüin namüin, chia niainjachi David chi aʼyataaikai tamüin. Niainjachi chi arüleejakai naya» (Ezequiel 34:​22, 23). Chi wekiipüʼükai maaʼulu yaa nia Jesuu, chi arüleejakai waya. Niʼitaain nia Jeʼwaa süpüla jülüjain naaʼin na anoujashiikana maaʼulu maʼaka naaʼin na yaainjanakana kepiain mmapaʼa otta na chainjanakana kepiain iipünaa (Juan 10:16).

Wetsiikulo aashajeʼennajatka

(Ezequiel 32:​ 1-​16). Shiasaʼa joo soʼu tü juyakat poloo piamamüin soʼu tü kashikat poloo piamamüin wanaa nümaa chi palajachikai kaʼi soʼu kashikai, antüsü tü nünüikikat Jeʼwaa tanainmüin, nümaka tamüin: ² «Püshaja wanee pütchi süchikimaajatka mojuu aaʼin nümüinjatü chi Faraón aluwataakai saaʼu Egipto, maa pünüiki nümüin: ‹kaseesü, mününüshi pia, müshi aka naaʼin pia wanee wasashi eekai jimaʼalin»›. Müshi aka naaʼin pia chi wüchii miyoʼushikai maʼin shirokukai tü palaakat, ayatüshi shirokuin tü süchikat, taʼlasü neʼe tü wüinkat püchiirua piʼyarülajaain shia süka puuʼui›. ³ »Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Tataʼüleechi pia süka wanee kusu, tajüteena pooʼomüin watta naalii wayuu, nalüʼjeechi pia tanainmüin süka tü takusuinkat. ⁴ Teʼipünaweechi pia saaʼu tü mmakat, tojuteechi pia saʼakapünaa tü mojuuikat. Anteerü tü wüchiikalüirua pooʼomüin, shikeerü pia tü mürüt sainküinka mmaka süpüshuaʼa. ⁵ Teʼitaweerü tü piʼirukukat saaʼu tü uuchikat, yaleerü jachitüin saaʼu patajattshii. ⁶ Itteerü tü piʼirukukat saaʼu tü mmakat jee shotteerü tü pirakat saaʼu tü mmakat otta shiroku tü süchikat epirajaʼajeerü shiairua putuma›. ⁷ »‹Shiasaʼa süchikijee tajaʼttirüin pia, asirumajaʼajeerü mmapaʼakat tatuma jee müsia tü jolotsükalüirua tayokojoweerü, kojoshaateerü maʼin tü sirumatuʼukat tatuma jee müshia chi kaʼikai tounjuleechi sutuʼupaʼa tü sirumakat. Akaataajaʼa tü kashikat nnojoleerü shia chuwatüin. ⁸ Tayokojooweerü süpüshuaʼa tü jolotsükalüirua paaʼujee neʼe piakai, piyuushinjatü mmaka süpüshuaʼa tatuma, müsü nünüiki Jeʼwaa chi Miyoʼushikai saaʼu kasakat süpüshuaʼa. ⁹ «‹Mojeerü namüin watta naalii wayuu saʼakajee tü pueulokalüirua, tantiraapa naʼakamüin na wayuu amaanakana paala putuma, tantireena naya suluʼumüin wanee mma nnojoyütkalia piʼraajüin. ¹⁰ Piʼreerü mmoluukain taya eema, mmoleerü maʼin wayuu taliantapa tü tachajaruutsekat noʼupala. Kutkutta meerü wayuu waneʼewai nakua soʼu tü kaʼi tajaʼttirüinjachikai oʼu pia. ¹¹ «Anuu tü nümakat Jeʼwaa chi Miyoʼushikai saaʼu kasa süpüshuaʼa: Anteerü nüchajaruutse chi aluwataakai saaʼu Babilonia pünainmüin. ¹² Outeerü watta saalii wayuu natuma na wayuu katchinkana maʼin, na mojulaashiikana suluʼujeejanaka mmakat süpüshuaʼa, nasüteerü noulia na egipciokana tü naʼanasiakat. Outajana napüshuaʼa na wayuu suluʼukana tü mmakat Egipto. ¹³ Tajaʼttireerü wayuu süpüshuaʼa tü mürütkalüirua na pejekana sünain miyoʼu wüin, nnojoleerü talaain tü wüinkat nutuma wanee wayuu eekai nuʼunüin shirokupünaa jee müsia sutuma suwaraijaain mürüt shirokupünaa›. ¹⁴ »›Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Soʼu kaʼikat tia, jorotteerü maʼin tü wüinkat tatuma, shotteerü tü wüinkat maʼaka saaʼin seita. ¹⁵ «‹Tajaʼttirapa süpüshuaʼale tü mmakat Egipto yüütaleepa shia tatuma, jee tajaʼttirapa tü wayuukalüirua süpüshuaʼa na wayuu suluʼukana tia mmakat, soʼu kaʼikat tia natüjaweerü aaʼu sünain tayain Jeʼwaa. ¹⁶ «Anuu tü nümakat Jeʼwaa, chi Miyoʼushikai saaʼu kasakat süpüshuaʼa: ‹Pütchikat tüü, süchikimaajatü mojuu aaʼin, shiiʼirajeerü shia wayuu. Jaʼitakajaʼa tü majayünnüükalüirua saʼakajee tü pueulokalüirua neeʼirajeerü shia suʼupalaya Egipto otta noʼupala na wayuu yalakana kepiain›».

AKOOSÜTOʼU 21-27

KOROLO KOJUTUSÜ SULUʼUKA TÜ WIWÜLIAKAT EZEQUIEL 35-38

«Alüʼütsü süpüla najaʼttinnüin Gog chi chejeʼewaikai Magog»

(Ezequiel 38:2). Peʼipaa pia nümaa chi Gog chi chejeʼewaikai Magog, chi nekiipüʼükai na chakana Mesec otta Tubal, püküja tü alatajatkat nümüin.

(Ezequiel 38:14-16). »Püküja süchiki tü kasa alatajatkat, maa pünüiki nümüin Gog: Anuu tü nümakat Jeʼwaa chi Miyoʼushikai saaʼu kasa süpüshuaʼa: «¿Aashimüin pütüjaweerüin saaʼu aneerüin sukuwaʼipa tapueulose? ¹⁵ Antaa meechia pia palaajee namaa watta naalii wayuu otta surulaat amaajuna otta watta naalii surulaat. ¹⁶ Anteechi pia sooʼomüin tü tapueulosekat süpüla pushutuin saaʼu tü mmakat maʼaka saaʼin sukuwaʼipa siruma wanaa sümaa kojojaain iipünaa saaʼu wanee mma. Alateerü tia sülüʼütpa süpüla sajaʼttüin kasa süpüshuaʼa, tantireechi pia sooʼomüin tapueulose süpüla shiʼraajüinjachin taya wayuu wulepa tatuma tü tanüliakat puʼupala piakai Gog.

w12-S 15/9 süp. 5 püt. 8, 9

¿Jameerü sukuwaʼipa süpüla sajaʼttüin kasaka süpüshuaʼa?

⁸ Süchikijee sajaʼttinnüin tü iküleesia nnojotkat shiimain, shiʼrüinjatü wayuu ayatüin paaʼinwajiraain tü nupueulosekat Jeʼwaa mayaainjeʼe müin namüiwaʼakai naaʼin (Ezeq. 38:​11, 14). ¿Kaseerü alataka sümüin tü nupueulosekat Jeʼwaa? Watteerü saalii wayuu ashutaka saaʼu. Saashin tü Wiwüliakat chi shikiishikai tia nia Satanaa, chi Gog chejeʼewaikai Magog (paashajeʼera Ezequiel 38:​2, 15, 16). ¿Shapaainjatche maʼin waaʼin sutuma tia kasa alatajatkat?

⁹ Nnojotsü shapaain maʼin naaʼin na aʼyataashiikana nümüin Jeʼwaa sutuma nashutuinjanain waaʼu na sülaülashiikana mma. Nnojotsü shiain waaʼinmaain katüinjatüin woʼu, shia kojutuka wamüin wuleinjatüin tü nünüliakat Jeʼwaa otta sütüjaainjatüin saaʼu wayuu niain chi Miyoʼushikai saaʼu kasa süpüshuaʼa. Kojuyatua müin nünüiki niakai maʼaka soʼu aipirua shikii: «Sütüjaainjatü aaʼu wayuu tayain Jeʼwaa» (Ezeq. 6:7; noota). Makalaka keeʼireein maʼin waaʼin shikeraajüinjatüin tü nünüikikat Nümakat Jeʼwaa suluʼu tü karalouktakat Ezequiel otta weʼitaain waaʼin sünain «nuuntüin Maleiwa niyuʼlüin waya saʼakajee ooʼulakünaa aaʼin, waya aaʼinrakana tü anasükat» (2 Ped. 2:9). Sümaʼinruʼu waʼatapajüin tia, shia anaka aluʼu müleka katsüinre tü wanoulakat süpüla wachecherüin waaʼin jaʼitairü kasain wayuu sülatüin mapeena. ¿Kasa eekat süpüla waaʼinrüin? Woʼuraaja waneepia, ekirajaainjana waya sünain tü Wiwüliakat otta wasakireʼerüinjatü waaʼin sünain tü wekirajaakalü anain otta aküjainjana waya pütchi süchiki Nuluwataaya Maleiwa. Müle shia watuma kaʼatapaleena waya otta icheerü maʼin tü wanoulakat (Heb. 6:19; Sal. 25:21).

(Ezequiel 38:21-23). »Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Tantireerü wanee chajaruuta nooʼomüin saaʼujee süpüshuaʼa tü uuchi eekat tamaʼana. Aapaweechi chajaruuta wanee wayuu nooʼomüin nuwala. ²² Anii taya nooʼomüin, antireechi taya ayuulii sümaa isha nünainmüin, otta eejeerü juya miyoʼu kayeeloinka sümaa siki otta azufre, aʼiteerü naaʼu jee naaʼu na nümaajanakana otta saaʼu watta saalii pueulo eejeetka nümaa. ²³ Jee kojuteechi taya otta wuleerü tanülia, wainmeerü wayuu eʼraajaka taya jee natüjaweerü aaʼu tayain chi kanüliakai Jeʼwaa.›

Püchajaa süchiki kaaʼürüi suluʼu tü Wiwüliakat

(Ezequiel 36:​20, 21). Jee nantaka saʼakamüin tü pueulokalüirua, otta mojutuka tanülia natuma na wayuu nantaka aʼakamüin, jee namakalaka naya wayuukana nachiki: ‹Nupueulose naya Jeʼwaa, sejena naya nümaʼanajee suluʼujee noumain›. ²¹ Amülialaajeerü taaʼin saaʼu tanülia tü mojutkat natuma na israeliitakana suluʼu tü pueulo nantakalü aluʼumüin».

w02-S 15/6 süp. 20 püt. 12

Wekirajaa sünain wulein wakuwaʼipa jee wekirajaa wayuu sünain

¹² Nüküjain Pablo wanee kasa wuleinjatka anainjee wakuwaʼipa wanaapünaa sümaa tü sümakat tü Wiwüliakat jee weʼitaainjatüin shia sünain wakuwaʼipa. Mojutusai Jeʼwaa sutuma mojuin nakuwaʼipa na judíokana, anuu nünüiki Pablo: «Jia aʼwaataakana suluʼu aapünaa amüin tü nüshajakat Moisés, ¿jamakaʼa mojutka chi Maleiwakai jutuma sünain nnojoluin jaaʼinrüin tü nuluwataakat anain? Ashajünüsü jüchiki suluʼu tü karaloʼuta nüchikimaajatkat chi Maleiwakai, müsü yaa: ‹Na gentilekana, mojutsai chi Maleiwakai natüma süka neʼrüin tü kasa mojusü naaʼinrakat na judíokana noʼupala›» (Roma 2:​23, 24). Akaʼaya maaʼulu yaa, mojuteechi wamüin Jeʼwaa nnojorüle wulein wakuwaʼipa. Kojuteechi Jeʼwaa watuma weʼitaale maʼin sünain wakuwaʼipa tü nümakat wamüin (Isaías 52:5; Ezequiel 36:20). Jülüjale waaʼin tia, wachechereerü waaʼin suulia waainjain tü kasa mojusü ooʼulakünakalü aka waaʼin. Eesü wanee kasaʼaya watüjaka sünainjee tü nümakat Pablo. Wayaawatüinjatü aaʼu kojutuinjachin Jeʼwaa watuma jee wekirajüinjana na wayuukana süpüla kojutuin Maleiwa sükajee wulein nakuwaʼipa. Kojutushi Jeʼwaa sutuma wulein nakuwaʼipa na anoujashiikana, süka niain keʼinaajalain shia. Nnojotsü shiain neʼe talatüin waya sutuma jee anain waya sutuma (Salmo 74:10; Santiago 3:17).

(Ezequiel 36:33-​36). Anuu nünüiki Jeʼwaa chi Miyoʼushikai saaʼu kasa süpüshuaʼa: ‹Wanaa sümaa wulein jia tatuma suulia tü jaainjalakat, kepieena jia suluʼu tü pueulokalüirua jee akumajüneerü tü pueulokalüirua süchikuaʼa. ³⁴ Apünajüneerü aluʼu tü mmakat süchikuaʼa süchikijee nnojotpuʼuin kasain eein suluʼu noʼupala na alatapuʼukana süpaʼa. ³⁵ Jee meerü sünüiki wayuu: «Türa mma sümüiwaʼapuʼukat paala, müitpa aka saaʼin tü apain kanüliakat Edén, otta müsia tü pueulo makat aka saaʼin anoouishii otta ajuichijaanaka paala, akumajünüsü süchikuaʼa jee kepiasü wayuu suluʼu». ³⁶ Otta tü pueuloirua eekat jüʼütpünaa, sütüjaweerü aaʼu tayain tayakai Jeʼwaa chi akumajakai tü ajuichijaanakat paala, taya apünajaka suluʼu tü mma anooushiikat paala. Taya tayakai Jeʼwaa kanüikika tia jee tekeraajüin shia›.

w88-S 15/9 süp. 24 püt. 11

«Natüjaweerü aaʼu tayain chi kanüliakai Jeʼwaa»

¹¹ Anachonsü maʼin Judá süchikijee naleʼejüin na judíokana noumainpaʼamüin, müsü aka saaʼin «tü apain kanüliakat Edén» süchikijee müin aka saaʼin anoouishii shia (Paashajeʼera Ezequiel 36:33-36). Akaʼaya neʼe soʼujee 1919, müsü aka saaʼin paʼaraiisü nutuma Jeʼwaa tü kaluʼukat na anoujashii chainjanakana iipünaa otta eeshii naya namaa na kepiainjanakana yaa mmapaʼa. Wuleinjatü tia paʼaraiisükat natuma na anoujashiikana waneʼewai nakua süka wulein na wayuu suluʼukana (Ezequiel 36:​37, 38).

Wetsiikulo aashajeʼennajatka

(Ezequiel 35:​1-​15). Jee ayatakaʼaya naashajaain Jeʼwaa tamüin sünain maa: ² «Anashi piirakaale sümüin uuchiirua chakat Seír jee püküja tü alatajatkat sümüin. ³ Otta müinjachi pia sümüin: ‹Anuu nünüiki Jeʼwaa, chi Miyoʼushikai saaʼu kasa süpüshuaʼa: «Anii taya pooʼomüin, pia uuchiirua chaka Seír, tajaʼttireerü pia jee meerü aka saaʼin anoouishii pia tatuma, nnojoleerü kasain apütaain püpaʼa. ⁴ Tajaʼttireerü tü pupueulosekalüirua otta meerü aka pia saaʼin wanee anoouishii eekai sümüiwaʼain jee pütüjaweerü aaʼin tayain chi kanüliakai Jeʼwaa, ⁵ alateerü tia pümüin saaʼujee mojujiraain pia waneepia namaa na israeliitakana jee paapüin nekii süpüla najaʼttinnüin wanaa sümaa müliain naya atumawaa»›. ⁶ »Anuu tü nümakat Jeʼwaa chi Miyoʼushikai saaʼu kasa süpüshuaʼa: ‹Yapatüjülia pia tatuma süpüla oʼutünaa aaʼin, meerü piipijünakai aaʼin sutuma isha. Üttüsü paaʼin sünain isha jee meerü piipijünakai aaʼin sutuma. ⁷ Meerü aka saaʼin anoouishii tü uuchiirua chakat Seír, outeechi tatuma chi eekai alatüin süpaʼapünaa jee outeechi chi eekai nüleʼejüin. ⁸ Jee wainmeerü tatuma tü wayuu outusükalüirua saaʼupünaa tü uuchikalüirua otta na oʼutünakana aaʼin saaʼu tü utaikat ojutuneena shirokumüin tü süchikat. ⁹ Meerü aka saaʼin pia anoouishii eekai yüütüülin sümüiwaʼain, nnojoleerü jaralüin kepiain suluʼu tü pupueulosekalüirua jee jütüjaweerü aaʼu tayain chi kanüliakai Jeʼwaa.› ¹⁰ »Müsü pünüiki mayaa: ‹Aluwataweena waya saaʼu tü piamasükat pueulo, wayeena alaülaajaaka saaʼu tia mmakat waneʼewai sukua›, müsü pünüiki sümaa eejachin Jeʼwaa yala. ¹¹ Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹Shiimainshaata puwalaajeerüin wanaapünaa sümaa tü paaʼinrakat saaʼujee jashichin pia jee saaʼujee puchunjaain naaʼu jee neʼraajeechi taya süsalapa pia paainjala tatuma. ¹² Jee pütüjaweerü aaʼu tayain tayakai Jeʼwaa chi aapakai süchiki mojuin pünüiki süchiki tü uuchiirua chakat Israel, maʼwaisü pünüiki: «Müitpa saaʼin anoouishii. Aapünüsü wamüin süpüla weküinjatüin shiairua». ¹³ Jee mojusü maʼin jünüiki tachiki, watta neʼe saalii tü jümakat. Taapüin süpüshuaʼa tü jüküjakat›. ¹⁴ »Anuu nünüiki Jeʼwaa, chi Miyoʼushikai saaʼu kasa süpüshuaʼa: ‹Meerü aka saaʼin anoouishii pia tatuma sümaʼinruʼu talatüin wayuu sainküin tü mmakat. ¹⁵ Maʼakaapuʼu talatüin pia saaʼujee sajaʼttinnüin Israel, meeria pukuwaʼipa tatuma. Meerü aka saaʼin pia anoouishii, piakat uuchiirua chaka Seír, napüshuaʼa na chakana Edom jee natüjaweerü aaʼu tayain chi Jeʼwaakai anülia›».

AKOOSÜTOʼU 28–SETTIENPÜROʼU 3

KOROLO KOJUTUSÜ SULUʼUKA TÜ WIWÜLIAKAT EZEQUIEL 39-​41

«¿Kasa kayaawaseka tü aʼwaajülee niʼrakat Ezequiel?»

(Ezequiel 40:2). Niiʼiyataka tamüin Maleiwa wanee kasa, nümaashi taya suluʼumüin tü mmakat Israel jee niʼitaaka taya saaʼu wanee uuchi miyoʼu maʼin, eejatü saaʼu wanee müsü aka saaʼin wanee pueulo chaa uuchimüin.

w99-S 1/3 süp. 11 püt. 16

Jülüjataa paaʼin tü aʼwaajüleekat Maleiwa

¹⁶ Süpüla wasoutuin shiʼipajee tia, wekirajaa sünain tü niiʼiyatakat Jeʼwaa nümüin Ezequiel. Müsü tü nüshajakat Ezequiel: «Niiʼiyataka tamüin Maleiwa wanee kasa, nümaashi taya suluʼumüin tü mmakat Israel jee niʼitaaka taya saaʼu wanee uuchi miyoʼu maʼin, eejatü saaʼu wanee müsü aka saaʼin wanee pueulo chaa uuchimüin» (Ezequiel 40:​2, TNM). Saaʼujee tü niʼrakat Ezequiel, sotusü waaʼin tü sümakat Miqueas 4:​1, TNM: «Sajaʼttiamüin tü kasakalüirua, yaleteerü maʼin tü uuchi kaaʼukat tü aʼwaajüleekat Jeʼwaa suulia tü wanee uuchikalüirua, ayalenneerü sooʼopünaa tü wutaikalüirua jee antayaa meerü wayuu sainküinjeejatü mma sünainmüin». ¿Joujeerü shikeraajaka tia pütchikat? Saashin Miqueas 4:5 aʼwaajüsü maleiwayaasü tü pueulokalüirua. Ekeraajüsü maaʼulu yaa tia pütchikat, aʼwaajünüshi maʼin Jeʼwaa maaʼulu yaa natuma na aʼyataashiikana nümüin.

(Ezequiel 40:3). Nümaaka taya chamüin, teʼrakalaka wanee wayuu shaʼwatüshi, müshi aainjuushikai naaʼin süka bronce. Eejatü nümaʼana wanee cinta emeriijia aainjuushi süka lino otta eejatü nümaʼana wanee wunuʼu emeriijia.

(Ezequiel 40:5). Teʼrakalaka kasepüin süpüshuaʼa tü aʼwaajüleekat. Eejatü nümaa chi wayuukai wanee wunuʼu emeriijia apünüin meetüro sajaʼapüin. Nimeriijiaka süsepükat tü aʼwaajüleekat süka, apünüin meetüro seeruluin otta apünüin meetüro sajaʼapüin iipünaamüin.

w07-S 1/8 süp. 10 püt. 2

Pütchi anaka maʼin sünainjee tü karaloʼutakat Ezequiel (shiʼipa 2)

40:3–​43:17 ¿Kasa kayaawaseka wamüin shimeriijünüin tü aʼwaajüleekat? Süka shimeriijinnüin tü aʼwaajüleekat watüjaa aaʼu shikeraajeerüin tü keeʼireekat naaʼin Jeʼwaa süpüleerua tü aʼwaajaa wulesükat.

(Ezequiel 40:10). Apünüinsü sütaüjia tü miichikat wüinpejeeruʼu otta apünüinsü yaajeeruʼu. Wanaawasü sajaʼapüin, otta müsia suuʼui tü miichikat wanaawasü sajaʼapüin eejatü wanee yaajeeruʼu otta wanee chejeeruʼu.

(Ezequiel 40:14). Nukumajaka suuʼui tü aʼwaajüleekat, 60 codos sajaʼapüin, süʼütpünaajatü miichikat süpüshuaʼa, tü chajatkat suluʼu tü paatiakat.

(Ezequiel 40:16). Otta eejatü wentaanairua mouisü sünain eeka napülee na waariakana, eejatü tia, süʼütpünaa chamüinreeya eemüin tü soʼukot. Eejatü wentaanairua chamüinreʼeya paülüʼü otta müsia sünain tü süsaʼakat eejatü shiyaakua palmera.

w07-S 1/8 süp. 11 püt. 5

Pütchi anaka maʼin sünainjee tü karaloʼutakat Ezequiel (shiʼipa 2)

40:​14, 16, 22, 26. Eejatü shiyaakua palmera sünain suuʼuikat tü aʼwaajüleekat, tia shiyaawasesü ekerotuinjatü neʼe wayuu eekai lotuin akuwaʼipa süsaʼa tü awaajüleekat (Salmo 92:12). Sünainjee tüü watüjaa aaʼu anain nümüin Jeʼwaa waʼwaajüin nia süka lotokat akuwaʼipa.

Püchajaa süchiki kaaʼürüi suluʼu tü Wiwüliakat

(Ezequiel 39:7). Meerü sukuwaʼipa tatuma süpüla shiʼraajüinjatün tü tanüliakat tü tapueulosekat Israel. Nnojotsü shiʼyarülajüinjatüin wayuu süchikuaʼa tü tanüliakat. Sütüjaaweerü aaʼu tü wayuukalüirua suluʼujeejanakana mma süpüshuaʼa tayain chi Senyotkai Jeʼwaa, chi Wulekai akuwaʼipa saaʼu Israel.

w12-S 1/9 süp. 21 püt. 2

«Sütüjaaweerü aaʼu tü wayuukalüirua suluʼujeejanakana mma süpüshuaʼa tayain chi Senyotkai Jeʼwaa»

Anuu nünüiki Jeʼwaa: «Nnojotsü shiʼyarülajüinjatüin wayuu süchikuaʼa tü tanüliakat». Yarüttüsü nünülia Jeʼwaa natuma na wayuukana wanaa sümaa neʼitaain sünain niain kasirüin tü kasa mojusü alatakat maaʼulu. Yaʼrütüsü atumawaa tü nünüliakat Jeʼwaa maaʼutpünaa. Wanaa sümaa saashajaain tü Wiwüliakat süchiki nünülia wanee wayuu süküjaleein anale jee mojule nukuwaʼipa. Müsü pütchi süchiki tü nünüliakat Jeʼwaa suluʼu wanee karaloʼuta. «Saapapa wayuu tü nünüliakat Maleiwa antüsü suluʼumüin shikii tü natüjaakalü aaʼu nüchiki, maʼaka saaʼin tü nüküjakalü achiki Jeʼwaa süchiki tü nünüliakat, eʼnnaajünajatü tü nünüliakat otta kojutüinjatü shia atumawaa». Kojutashaataasü maʼin tü nünüliakat Jeʼwaa, sünainpünaasü shia anainjatüin pütchi nüchiki. ¿Kasakaʼa watüjaain aaʼu süchiki tü jülüjakat naaʼin süchiki tü kasa mojusü aainjünakat maaʼulu? Watüjaa aaʼu nüʼürülain tia jee müsia sümülialaain naaʼin naalii na eʼrakana müliaa (Éxodo 22:22-24). Wanaa sümaa shiʼitaain wanee wayuu naaʼu niain kasirüin tü kasa mojusü nüʼürülakat shiʼyarülajüin tü nünüliakat jee mojutsai nia sümüin (Salmo 74:10).

(Ezequiel 39:9). »Ojuʼiteena na Israeliitakana süpaʼamüin tü mma süpülajatka atkawaa, naʼajeerü tü natkaayaka otta naʼajeerü tü kachueera nounjulaayakat otta tü nasheʼin natkaayaka, tü wunuʼu natkaayakat otta tü najatüinkat, chuwateerü maʼin tü sikikat soʼutpünaa akaratshi kaʼi, naʼajeerü tü natkaayakat paala.

w89-S 15/8 süp. 14 püt. 20

Alüʼütsü süpüla weʼrüinjatüin tü paʼaraiisükat

²⁰ ¿Kasa aainjüneetka süka tü saʼapülakat wayuu süchikijee Armagedón? Müleka saainjünüle tü aküjünakat suluʼu Ezequiel watteerü maʼin saalii kaʼi süpüla saʼajünüin tü saʼapülakat wayuu (Ezequiel 39:8-10). Na wayuu kateenaka oʼu süchikijee Armagedón, eesüjaʼa süpüla naʼyataayeerüin tü kasa sütkaaka aka wayuu maaʼutpünaa (Isaías 2:2-4).

Wetsiikulo aashajeʼennajatka

(Ezequiel 40:32-​47). Ekerotoo ekerotoo müshi taya nutuma suluʼu tü paatia suluʼukat tü miichikat, ekerotushi taya wüinpejeeruʼu, otta nimeriijüin tü puettoʼukot, wanaawasü sajaʼapüin tü puettoʼukot. ³³ otta tü paü napüleekat na waariakana otta süsaʼa tü miichikat sümaa tü soʼukot, wanaawasü sajaʼapüin sümaa tü puettoʼukot. Eejatü wentaana süʼütpünaa tü puettoʼukot otta süʼütpünaa soʼu tü miichikat. 25 meetüro shiatapünaa sajaʼapüin otta 12 meetüro shiatapünaa seerulia. ³⁴ Antüsü soʼu tü miichikat sünainmüinreʼeya tü puettoʼu chaʼawatka pejepünaa sünain tü paatiakat anooipaʼa, eejatü shiyaakua palmera süʼütpünaa. ³⁵ Nümaashi joo taya mapa eemüin soʼukot tü miichikat palaajeeruʼu sünain, müsia aka neʼe saaʼin sajaʼapüin tü wanee soʼukolüirua. ³⁶ Müsia aka neʼe saaʼin tü wanee, eejatü paü napülee na waariakana, süsaʼa tü miichikat otta tü soʼukot. Eejatü wentaana süʼütpünaa, 50 codos sajaʼapüin otta 25 codos seerulia. ³⁷ Eejatü süsaʼa tü miichikat suluʼu tü paatia anooipaʼakat otta eejatü shiyaakua palmera süʼütpünaa tü süsaʼakalüirua. Mekiisalü tü kaleerakat süpüla ekerotoo suluʼumüin tü miichikat. ³⁸ Eejatü joo wanee ekülee süʼütpaʼa süsaʼa tü miichikat. Oʼlojunawaisü yala tü mürüt aʼajünakat nümüin chi Maleiwakai. ³⁹ Sünain soʼukot tü miichikat eere tü puettoʼukot eejatü piamasü meesa yaajeeruʼu otta piamasü meesa chejeeruʼu, aüjaanüsü yala tü mürüt aʼajünakat nümüin chi Maleiwakai otta tü asülajünaka saaʼu kaainjalaa. ⁴⁰ Jee chaa anooipaʼa nikerotoʼiwaʼaya wayuu soʼuluʼumüin tü puettoʼu palaajeeruʼukat eesü piamasü meesa. Eejatü piamasü meesayaʼa wanee suluʼu saʼata soʼukot tü miichikat. ⁴¹ Eejatü pienchisü meesa yaʼayaa otta pienchisü meesa chaʼayaa süʼütpaʼa tü puettoʼukot... mekiisatsü tü meesa aʼüjaaleekat. ⁴² Otta tü pienchisükat meesa eere saüjünüin tü mürüt asülajünaka nümüin chi Maleiwakai, aainjuushi süka ipa. Wanee codo shiatapünaa sajaʼapüin otta wanee codo shiatapünaa seerülia jee wanee codo sajaʼapüin iipünaamüin. Eʼitaanawaisü saaʼu tü kasa aüjünakalü aka tü mürüt aʼajünakat nümüin chi Maleiwa. ⁴³ Kakachejiasü wanee kasa tü meesakat, süʼütpünaasü tia, wanee palmo menor sajaʼapüin, otta saaʼu tü meesakat eʼitaanüsü tü asalaa aʼajünakat nümüin chi Maleiwakai. ⁴⁴ Süchikijee tü puettoʼu paüluʼujatkat eejatü nekülee na eeʼirajüliikana, eejatü tia suluʼu tü paatia saʼatoʼukat tü puettoʼu palaajeeruʼukat. Chasü shiʼipapaʼa tia uuchimüin. Eejatü wanee saʼatoʼu tü puettoʼu wüinpümüinkat, chasü shiʼipapaʼa palaamüin. ⁴⁵ Nümakalaka joo tamüin: «Eküleekat tüü, chawatkat shiʼipapaʼa uuchimüin namüinjatü shia na sacerdoote sülaülashiikana miichikat. ⁴⁶ Otta müsia joo tü ekülee chawatka shiʼipapaʼa palaajeeruʼu napülajatü na sacerdoote laülaashiikana saaʼu tü aʼajüleekat mürüt. Naya na nüchonniikana Sadoc, napüshi naya na nüchonniikana Leví naya na antakana nünainmüin Jeʼwaa süpüla naʼyataainjanain nümüin». ⁴⁷ Nimeriijüin nümüsia tü paatia paülüʼüjatkat. 100 codos sajaʼapüin otta 100 codos seerülia. Otta tü aʼajüleekat shiʼipoʼujeejatü tü miichikat.