Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
MAATSOʼU 4-10
KOROLO KOJUTUSÜ SULUʼUKA TÜ WIWÜLIAKAT | ROMA 12-14
«¿Kasa waaʼinrajatka süpüla aipüraliin waya wayuu maʼaka naaʼin Kürisüto?»
it-1-S 429
Aijirawaa
1Aijiraainjana maʼin napüshuaʼa na wawalayuukana (süka griego fi·la·del·fí·a, «alin wapüla chi wawalakai» maluʼulu). (Ro 12:10; Heb 13:1; paashajeʼera 1Pe 3:8). Tü wakuwaʼipainjatkat namaa na wawalayuukana shia aishaatainjanain naya wapüla, kapülainjatüin waaʼin nakuwaʼipa otta nnojoluinjatüin waküjain süchiki nakuwaʼipa sümüin wayuu, müinjana maʼaka saaʼin wapüshi wamüin. Mayaapejeʼe aijiraain maʼin na wawalayuukana, choʼujaasia kooʼomüinjatüin tia natuma (1Te 4:9, 10).
Tü pütchikat griego fi·ló·stor·gos, «aisü nüpüla wayuu» maluʼulu shia, sükajee tü pütchikat aküjünüsü süchiki nukuwaʼipa wanee wayuu eekai aleewain otta alin maʼin wayuu nüpüla. Aküjünüsü sükajee tü pütchikat stér·gō süchiki nukuwaʼipa wanee wayuu aika maʼin apüla wayuu, maʼaka tü nukuwaʼipakat wanee wayuu sümaa nüpüshi. Nüküjain Pablo namüin na anoujashiikana müinjatüin nakuwaʼipa (Ro 12:10). Otta müsia nüküjain sünain eejeerüin wainma wayuu maalinka apüla wayuu (gr. á·stor·goi) soʼunnaa tü kaʼi sajaʼlajaainjatkalü oʼu kasa süpüshuaʼa, jee ajaʼttajana naya (2Ti 3:3; Ro 1:31, 32).
(Roma 12:17-19, TNM) Nnojo mojulaain jia niʼipajee chi wayuu aaʼinrakai jümüin kasa mojusü. Anasü anale jukuwaʼipa noʼupala na wayuukana. 18 Kamanee maʼin jia namüin napüshuaʼa na wayuukana. 19 Nnojo pasalaweein jaaʼin, shia anaka juuʼulaale suulia jashiee, süka sümüin tü ashajuushikat: «Tayainjachi chi süsalakai atuma saainjala wayuu sümüin, müshi Jeʼwaa».
w09-S 15/10 8 püt. 3
«Kamanee maʼin jia namüin napüshuaʼa na wayuukana»
3 (Paashajeʼera Roma 12:17). Naashin Pablo, nnojoliinjana waya aaʼinrüin kasa mojusü niʼipajee chi wayuu aaʼinrakai wamüin kasa mojusü. Anasü maʼin tia pütchikat napüla na wawalayuu nnojoliikana anoujain aʼwayuuse. Nüchecherüinjatü naaʼin chi anoujashikai suulia mojuin nusoutia nümüin chi wayuu mojukai anüiki jee aaʼinrakai kasa mojusü nümüin. Nnojotsü kasain anain apüla mojulaale waya niʼipajee chi wayuu aaʼinrakai kasa mojusü wamüin, shia neʼe eejeetka mojujiraa sutuma.
w07-S 1/7 24 püt. 12, 13
«Nnojo mojulaain jia niʼipajee chi wayuu aaʼinrakai jümüin kasa mojusü»
12 Nütütüleʼerüin waaʼin Pablo süpüla kamaneeinjanain waya sümüin wayuu süpüshuaʼa, jaʼitaina manoujain naya. «Nnojo mojulaain jia niʼipajee chi wayuu aaʼinrakai jümüin kasa mojusü», müshi nia. Tia pütchikat sünainjeejatü wanee pütchi nüküjaka paala, müsü mayaa: «Jiyoukta tü mojusükat». Nnojotsü anain wamüle «tayottüin tü mojusükat», sümaa pasalaweein waya. Waaʼinrüle tia, meerü aiyaakai neʼe wapüla wayuu. Anuu tü waaʼinrajatkat naashin Pablo: «Anasü anale jukuwaʼipa noʼupala na wayuukana» (Roma 12:9; 12:17, TNM). ¿Kasa sünainpünaaka tia pütchikat?
13 Soʼu tia, nüshajüin Pablo tü karaloʼutakat Corinto, eere nüküjain tü kasa alatakat namüin na aluwataaushiikana: «[Niʼitaain waya Maleiwa suʼupala wayuu süpüla oʼutunaa aaʼin, süka jülüjain waya naaʼin na wayuukana müshiʼiya na aapieekana, TNM]. Müleka shiʼrüle wayumüin wayuu wamüin, achuntüshii waya wane anaa nümüin chi Maleiwakai saaʼu. Müleka jashichuukale wamüin sünainjee waküjain nüchiki Cristo, wachecherüin waaʼin süpüla. Je müleka mojule sünüiki wamüin wojuuna, anashii waya sümüin» (1 Corinto 4:9-13). Jülüjasü maʼin naaʼin na manoujainsaliikana tü wakuwaʼipakat eepünaale waya. Eesü süpüla kamalain namüin na wayuu kepiakana waʼütpünaa tü pütchi waküjakat suluʼujee tü Wiwüliakat sutuma neʼrüin anain wakuwaʼipa, jaʼitaina müliain waya atumawaa (1 Pedro 2:12).
w12-S 15/11 29 püt. 13
Moto jaaʼin jaainjala waneʼewai jukua
13 Eesüjaʼa süpüla kamalain nümüin wanee wayuu tü pütchi suluʼujeejatkat tü Wiwüliakat mayaapejeʼe airuʼuluin nünüiki paala pümüin. Müsü nünüiki Pablo: «Müleka aire jamü sümüin wane jüʼünüü, anakaja jikirüle shia. Je münyaasüle nia, anakaja jüsülajüle wüin nüsüin süpüla japülinjachin nia saaliijee tü mojusü naaʼinrakat jüka. Jalia jia suulia shiyamülaa tü mojusükat. Shia anaka aluʼu müleka jüyamürüle tü mojusükat süka tü anasü jaaʼinrakat waneepia» (Roma 12:20, 21). Kamaneere waya nümüin wanee wayuu mojulaakai wamüin, eeshijaʼa süpüla kamaneein nia wamüin. Jamüshijaʼa piiʼiyatüle nümüin chi wayuu mojulaashikai kapülain paaʼin nia otta piyaawatüin saaʼu tü nukuwaʼipakat, eeshijaʼa süpüla nikirajaweechin mapa sünain tü sümakat tü Wiwüliakat. Soteerü naaʼin na wayuukana tü kasa anasü waaʼinrakat noʼupala anale wasoutia namüin (1 Ped. 2:12; 3:16).
Püchajaa süchiki kaaʼürüi suluʼu tü Wiwüliakat
w08-S 15/6 31 püt. 4
Pütchi anaka maʼin sünainjee tü karaloʼutakat Roma
13:1. ¿Jamaluʼulu neʼitaaushiin nutuma Maleiwa na sülaülashiikana mma? Shia süka nuuʼulaain naya Maleiwa süpüla naluwataainjanain saaʼu tü mmakat. Süka nütüjaatüjülin aaʼu eejeenain waneinnua aluwataalii, nüshajirüin jooluʼu nachiki noʼutku suluʼu tü Wiwüliakat, sükajee tia, müshi niakai aaʼin Maleiwa eʼitaain naya sünain aluwatawaa.
MAATSOʼU 11-17
KOROLO KOJUTUSÜ SULUʼUKA TÜ WIWÜLIAKAT | ROMA 15, 16
«Wachunta nümüin Jeʼwaa süpüla nüchecherüin waaʼin otta nükatsüinrüin wanoula»
Püchajaa süchiki kaaʼürüi suluʼu tü Wiwüliakat
(Roma 15:27, TNM) Naaʼinrüin tia sümaa talatüin naaʼin, mapajeʼe kojuyaalatüjüliikai naaʼin noulia. Naküjain na anoujashii judíokana tü kasa anasükat nüchiki chi Maleiwakai namüin na nnojoliikana judíoin, sükajee müin shia, asülajüinjana naya kasa namüin na anoujashii judíokana.
w89-S 1/12 24 püt. 3
Shiimain alin nüpüla wayuu mayaapejeʼe müliain nia
Nacheküin na gentiilekana nakaalinjain na nawalayuukana süka müin kojuyaalakai naaʼin noulia na anoujashii chajanakana Jerusalén. ¿Nnojotsüsaʼa naapajalain tü pütchi anasükat natuma na judíokana? Müsü nünüiki Pablo: «Maʼaka naküjain na anoujashii judíokana tü kasa anasükat nüchiki chi Maleiwakai namüin na nnojoliikana judíoin [gentiilekana], müinjana nayakana, choʼujaasü nasülajiraain kasa anasü namüin na anoujashii judíokana» (Roma 15:27, Versión Popular).
it-2-S 708 püt. 5
Atüjawaa saaʼu tü alatüinjatkat otta ekeraajaa tü alatajatkat mapa
Niainjachi Kürisüto chi Mesíaskai,chi suuʼuliwoʼukai tü jietkat, anainjachikai anainjee na wayuu lotokana akuwaʼipa, yaakana kepiain mmapaʼa (Gal 3:8, 14). Tü palajatkat süküjünüin nüchiki chi suuʼuliwoʼukai tü jietkat, süchikijeejatü niʼrüijaain wayumüin Adán sümaa Eva otta süpülapünaa jemelin Abel (Gé 3:15). Alatüsü suulia 4.000 juya süküjünüin paala nüchiki chi suuʼuliwoʼukai tü jietkat süpülapünaa shiyaawatünüin aaʼu niainya Kürisüto chi aküjünakai achiki paala. Sükajee tüü, wayaawatüitpa aaʼu sülatüin wainma juya süpülapünaa nütüjaanüin aaʼu chi Mesíaskai (Ro 16:25, 26; 16:27, TNM; Éf 1:8-10; 3:4-11).
MAATSOʼU 18-24
KOROLO KOJUTUSÜ SULUʼUKA TÜ WIWÜLIAKAT | 1 CORINTO 1-3
«¿Shiache paaʼinraka tü kasa mojusü suchuntaakat paaʼin jüüjüütaapa pia nümüin chi naaʼinkai Maleiwa?»
(1 Corinto 2:14, TNM) Chi wayuu aaʼinrakai tü kasa mojusü suchuntaakat naaʼin, nnojotsü kasajatüin nümüin tü kasa nünainpünaakat chi naaʼinkai Maleiwa, nnojotsü kasain anain apüla tia naashin jee nnojotsü niyaawatüin saaʼu tia kasakalüirua süka nnojolin chi naaʼinkai Maleiwa suluʼu naaʼin.
(1 Corinto 2:15, 16, TNM) Aluʼujasaʼa chi wayuu jüüjüükai nümüin chi naaʼinkai Maleiwa, nikirajaa anainrü süpüshuaʼa tü kasakalüirua jee nnojoishi eein wayuu aküjakai nümüin tü naainjüinjatkat. 16 «¿Jarai chi atüjaakai saaʼu tü kasa jülüjakat naaʼin Jeʼwaa süpüla nikirajüin nia?». Watüjaainjaʼa saaʼu tü jülüjakat naaʼin Kürisüto.
Püchajaa süchiki kaaʼürüi suluʼu tü Wiwüliakat
(1 Corinto 1:20, TNM) ¿Jalashi chi wayuu kekiikai maʼin? ¿Jalashi chi wayuu atüjakai ashajaa? ¿Jalashi chi wayuu atüjakai akumajaa sukuwaʼipa kasa yaa mmapaʼa? ¿Nnojotsüsaʼa niiʼiyatüin Maleiwa malaain neʼe tü kekiiwaa namaʼanajeejatkat na manoujainsaliikana?
it-2-S 886 püt. 5
Kekiiwaa maʼin
Sutuma naʼwaataain na manoujainsaliikana suluʼu kekiin maʼin naya naashin, nayoutuin tü kasa nümaʼanajeejatkat Maleiwa nükajee Kürisüto, müsü malaakai saaʼin namüin. Eesüjaʼa anale natuma naluwataaya na sülaülashiikana mma soʼu tia, akanasaʼa nayakana nakacherirüin Jesuu sünain wanee wunuʼu (1Co 1:18, TNM; 2:7, 8, TNM). Niiʼiyatapejeʼe Jeʼwaa malaain neʼe tü kekiiwaa namaʼanajeejatkat na manoujainsaliikana jee naapülijain na wayuu kekiikana maʼin naashin. Müsü tia süka naaʼinrüin Maleiwa tü keeʼireekat naaʼin sükajee tü «malaa nüchiki Cristo» namakat otta nakajee na wayuu nnojoliika kasain neʼraajüin aaʼu naashin, «na wayuu malayaakana aaʼin jee na wayuu nnojoliikana jamajanain amüinyüü» (1Co 1:19-29). Nüsoʼirüin Pablo naaʼin na anoujashii chajanakana Corinto sünain najaʼlajeʼereerüin Maleiwa tü kasairua nekiiruʼujeejatkat neʼe na manoujainsaliikana jee na sülaülashiikana mma kekiikana maʼin naashin. Nnojotpejeʼe shiain nikirajüin anain Pablo tü nekiiruʼujeejatkat na manoujainsaliikana (1Co 2:6, 13). Naapirüin Pablo na anoujashiikana suulia kamalainjüin namüin nanüiki na ekirajakana sünain kasa nekiiruʼujeejatka neʼe [fi·lo·so·fí·as, «kachiirua aaʼin kekiiwaa maʼin» maluʼulu] otta tü nekirajakalü anain, «pütchi alawaa neʼe, naleʼeruʼujeejatü neʼe, shia tü shikirajapüʼukat anain tü natuushi manoujainsatkalüirua» (Col 2:8; anasü paashajeʼerüle tü wetsiikulokot 20-23).
w08-S 15/7 27 püt. 6
Pütchi anaka maʼin sünainjee tü piamasükat karaloʼuta Corinto
1 Corinto 2:3-5 Nuʼunapa Pablo sünain aküjaa pütchi chaa Corintomüin, eesüjaʼa nüsakirüle naaʼin eejeechire wanee wayuu aapaakai sümaa nünüiki, süka shiain jaʼyain maʼin nakuwaʼipa na griegokana chayaa otta shikirajünüin tü natüjakalü apüleerua. Nnojoipejeʼe eimmolojooin Pablo jee nnojotsü jülüjain naaʼin iseerüin shia nüchiki. Shia naainjaka maʼin tü nuluwataakalü anain nia Maleiwa. Müshiʼiya wayakana, nnojoliinjana «isasü wachiki» müin sülatüle wamüin kasa nnojotkat alatüin wamüin waneepia. Choʼujaasü wachuntüin kaalinwaa nümüin Jeʼwaa jee ayatüin waya aküjain pütchi süchiki tü Nuluwataayakat Maleiwa maʼaka naainjain shia Pablo.
MAATSOʼU 25-31
KOROLO KOJUTUSÜ SULUʼUKA TÜ WIWÜLIAKAT | 1 CORINTO 4-6
«Shijitünüle palitchon oolojia pan saʼaka tü ariinakat, oolojoojeerü shia sutuma»
(1 Corinto 5:5-8, TNM) Jaapa chia wayuukai najapuluʼu Satanaa süpüla sajaʼttüinjatüin jaʼakajee tü kasa suchuntaakat shiʼiruku wayuu jee süpüla anainjatüin jukuwaʼipa nuʼupala chi Wasenyotsekai Jesucristo soʼu tü kaʼi nüleʼejeechikalü oʼu. 6 Nnojotsü anain juʼwaataale suluʼu jukuwaʼipa sükajee tia. ¿Nnojotsüsaʼa jütüjain aaʼu soolojoojeerüin tü ariinakat sutuma shijitünüin palitchon soolojia pan saʼaka? 7 Süpüla anain tü ariina jeketkat, jüsünneʼera suulia tü soolojiakat pan eeka laülaain, suulia jashüʼüin shia jutuma. Süka jamüin, wanaawain nukuwaʼipa Jesuu nümaa chi anneetchon oʼutunakai aaʼin sünain tü Pascuakat. 8 Müsüjeseʼe anasü waaʼinrüle tia miʼiraakat, nnojotpejeʼe eeinjatü watuma tü makalü aka saaʼin soolojia pan eeka laülaain maka aka saaʼin aaʼinraa kasa mojusü jee mojulawaa, shia eeinjatka watuma tü makalü aka saaʼin pan maʼakakat soolojia shiyaawaseka lotoo akuwaʼipa jee aküjaa tü shiimainkat.
it-2-S 212
Soolojia pan
Shiyaawasesü tia nünüiki Pablo wanaa sümaa nüküjain namüin na anoujashii chakana Corinto nojuʼitirüinjachin naʼakajee wanee anoujashi kaainjalakai. Müsü nünüiki: «¿Nnojotsüsaʼa jütüjaain aaʼu soolojoojeerüin tü ariinakat sutuma shijitünüin palitchon soolojia pan saʼaka? Süpüla anain tü ariina jeketkat, jüsünneʼera suulia tü soolojiakat pan eeka laülaain, suulia jashüʼüin shia jutuma. Süka jamüin, wanaawain nukuwaʼipa Jesuu nümaa chi anneetchon oʼutunakai aaʼin sünain tü Pascuakat». Nüküjain Pablo jamaluʼuluin tü nümakat süchiki tü soolojiakat pan: «Müsüjeseʼe anain waaʼinrüle tia miʼiraakat, nnojotpejeʼe eeinjatüin watuma tü makalü aka saaʼin soolojia pan eeka laülaain maka aka saaʼin aaʼinraa kasa mojusü jee mojulawaa, shia eeinjatka watuma tü makalü aka saaʼin pan maʼakakat soolojia shiyaawaseka lotoo akuwaʼipa jee aküjaa tü shiimainkat» (1Co 5:6-8, TNM). Nüküjain Pablo süchiki tia miʼiraa naaʼinrapuʼukat na judíokana eere shikünapuʼuin tü pan maʼakakat soolojia, aainjünüsü tia waneemüin kaʼi süchikijee tü Pascuakat. Maʼaka soolojooin tü ariinakat sutuma shijitünüin palitchon soolojia pan saʼaka, meeria neʼe nakuwaʼipa na anoujashiikana, mojeerü nakuwaʼipa nuʼupala Jeʼwaa nnojoire nujuʼitinnüin chi kaainjaraikai naʼakajee. Nnojoluinjatü soolojia pan nepialuʼu na israeliitakana soʼunnaa tü miʼiraakat, müinjatia neʼe natuma na anoujashiikana, nojuʼitirüinjachi chi kaainjaraikai naʼakajee.
it-2-S 972
Satanaa
¿Jamaluʼulu naapünüinjachin «chia wayuukai najapuluʼu Satanaa süpüla sajaʼttüinjatüin jaʼakajee tü kasa suchuntaakat shiʼiruku wayuu»?
Nüküjain Pablo namüin na anoujashii chajanakana Corinto tü naaʼinrajatkat nüka chi wayuu aʼluwajiraakai nukuwaʼipa sümaa nuʼwayuuse chi nüshikai, müshi nia: «Jaapa chia wayuukai najapuluʼu Satanaa süpüla sajaʼttüinjatüin jaʼakajee tü kasa suchuntaakat shiʼiruku wayuu» (1Co 5:5, TNM). Ojuʼitinnüinjachi chia wayuukai naʼakajee na anoujashiikana jee nnojoliinjana naya nünainpünaain (1Co 5:12, 13). Süküjapa yala süchiki naapünüinjachin nümüin Satanaa chi wayuukai, shia saashajaaka achiki nujuʼitajachin naʼakajee na anoujashiikana jee naʼakeechin nia na nuluwataakana aaʼu Satanaa. Chia wayuukai müshi aka saaʼin tü soolojiakat pan saʼakaka tü ariinakat, süka jamüin, nnojoluin anain tü nukuwaʼipakat napüleerua na anoujashiikana. Nujuʼitinnapa chia wayuukai naʼakajee na anoujashiikana, wuleshii naya suulia tia akuwaʼipaa yarüttüsü eejatkat naʼaka paala (1Co 5:6, 7, TNM). Müsia neʼe tü naainjakat Pablo nüka Himeneo otta Alejandro, naapüin naya nümüin Satanaa süka nayoutuin tü ekirajünakalü anain naya otta wulein nakuwaʼipa otta sutuma sümalajaain tü nanoulakat (1Ti 1:20).
Püchajaa süchiki kaaʼürüi suluʼu tü Wiwüliakat
(1 Corinto 4:9, TNM) Saaʼin tamüin, wayakana aluwataaushiikana niʼitaain waya Maleiwa suʼupala wayuu süpüla oʼutunaa aaʼin, süka jülüjain waya naaʼin na wayuukana müshiʼiya na aapieekana.
w09-S 15/5 24 püt. 16
Na aapieekana: aʼyataashii naya waneepia sünain akaaliijaa wayuu
16 Süküjain tü Wiwüliakat jülüjain naaʼin na aapieekana na anoujashii alatakana amüin kasa mojusü (1 Cor. 4:9, TNM). Jülüjasü naaʼin na aapieekana tü waaʼinrakat otta talatüshii naya neʼrapa ayatüin waaʼinrüin tü nuluwataakalü anain Jeʼwaa. Otta müsia talatüshii naya neʼrapa nuuʼulaain wanee wayuu suulia naainjala (Luc. 15:10) Jülüjasia maʼin naaʼin na aapieekana tü naaʼinrakat na wawalayuu jieyuukana. Müsü sünüiki tü Wiwüliakat: «Müleka kekiaalajale tü jietkat wanaa sümaa süchuntüin nümüin chi Maleiwakai suluʼu tü outkajaaleekat, natüjaweerü aaʼu na aapieekana chakana iipünaa sünain jüüjüüin shia nümüin chi suʼwayuusekai wanaa sümaa süchuntüin» (1 Cor. 11:3, 10). Talatüshii maʼin na aapieekana sutuma neʼrüin kojutuin namüin na jieyuukana otta namüin napüshuaʼa na anoujashiikana na wayuu niʼitaakana Jeʼwaa süpüla laülaain napüleerua. Woonoole waneepia, nashateerü tia wachiirua na nüchonniikana Jeʼwaa.
it-2-S 216
Tü aluwataanakalü anain
Tü pütchi aluwataanakalü anain na aapieekana. Na aapieekana pülashii naya noulia na wayuukana, nayakana naainjain waneepia tü nuluwataakalü anain naya Maleiwa jee tü nümakat namüin (Heb 1:7, 14; Sl 104:4). Otta müshia Jeʼwaa nuluwataakainka Satanaa sünain tü naaʼinrajatkat jee tü nnojoluinjatkat naaʼinrüin (Job 1:12; 2:6). Wanaa sümaa nüʼülüjaain Miguel, chi sülaülakai aapiee nümaa Satanaa, niiʼiyatüin niain Jeʼwaa chi eekai süpüla kasalajanain atuma wanee kasa, müshi nia: «Nüchiajaajeechi pia Maleiwa» (Jud 9; anasü paashajeʼerüle Zac 3:2). Laülaashi Jesuu nutuma Jeʼwaa naaʼu na aapieekana (Heb 1:6; 1Pe 3:22; Mt 13:41; 25:31; Flp 2:9-11). Aluwataanüshi wanee aapiee nünainmüin Juan nutuma Jesuu (Alat 1:1). Nüküjain Pablo suluʼu 1 Corinto 6:3 sünain saapüneerüin namüin na nuwalayuukana Kürisüto, na aluwataainjanaka nümaa, nekii na yolujaakana süpüla süsalain naya naainjala natuma.