Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
MAAYOʼU 6-12
KOROLO KOJUTUSÜ SULUʼUKA TÜ WIWÜLIAKAT | 2 CORINTO 4-6
«Nnojoleena waya ooʼulaain suulia aʼyatawaa nümüin chi Senyotkai»
w04-S 15/8 25 püt. 16, 17
Nnojotsü wooʼulaain waʼyataain mayaapejeʼe mapüsain waya
16 Choʼujaasü maʼin waaʼinmajüin tü wanoulakat. Wachajaale sukuwaʼipa süpüla aleewain waya nümaa Jeʼwaa eeshii süpüla mapüsain waya sutuma, nnojoleenapejeʼe waya akulajaain suulia waʼwaajüin nia. Nia neʼe Jeʼwaa aapakai «sütsüin naaʼin chi wayuu mapüsakai otta katsüinshi nutuma chi eekai matsüin aaʼin» (Isaías 40:28, 29). Nütüjaa aaʼulu Pablo tia süka sülatüin nümüin, müsü nünüiki: «Nnojoleechi taya ooʼulaain suulia aʼyatawaa nümüin chi Senyotkai. Jaʼitairü ashakajüin sütsüin teʼiruku, shieerü kooʼomüinka tamüin sütsüin taaʼin» (2 Corinto 4:16).
17 Tü pütchi «shieerü kooʼomüinka tamüin» makat, shiiʼiyatüin wajayatüinjatüin kaʼiwai tü kasa naapakat Jeʼwaa wamüin. Saashin wanee wawala misioneeraka soʼu 43 juya, eesü kaʼi mapüsaka oʼu shia jee mojuka oʼu saaʼin. Nnojotpejeʼe ayüülajaain shia suulia anoujaa. Müsü sünüiki: «Kiʼrasü taya sünain achijirawaa wattachon maalü süpüla toʼuraajüin nümüin Jeʼwaa jee taashajeʼerüin tü Wiwüliakat süpülapünaa taainjain waneirua kasa. Sutuma taainjain tia waneepia, ayatayülia taya sünain anoujaa». Nükaalinjeena waya Jeʼwaa süka tü nütchinkat wachuntule shia nümüin jee jülüjale waaʼin tü nukuwaʼipakat otta tü naainjüinjatkat mapeena.
it-1-S 70
Achecheraa aaʼin
Anasü jülüjale waaʼin waneepia tü kata oʼu aapüneetkat wamüin, tia nnojotsü süpüla nasütüin shia woulia na waʼünüükana (Ro 5:4, 5; 1Te 1:2, 3; Alat 2:10). Tü müliaa weʼraka maaʼulu, nnojotsü antapünaain sünain tü kasa anasü eejeetkat mapeena nutuma Maleiwa (Ro 8:18-25). Jaʼitairü müin kapüleekai saaʼin wamüin tü mülia weʼrakat maaʼulu, watüjaa aaʼu motsomüinjeerüin neʼe shia süka aneerüin wakuwaʼipa waneepia nutuma Maleiwa mapeena (2Co 4:16-18). Watüjaale saaʼu nnojoluin soʼukaijatüin tü müliaa alatakat wamüin otta aneerüin wakuwaʼipa mapeena nutuma Jeʼwaa, sükalinjeena waya süpüla nnojoluin süshapajaain waaʼin jee wakayalaain nuulia Jeʼwaa.
Püchajaa süchiki kaaʼürüi suluʼu tü Wiwüliakat
(2 Corinto 4:7, TNM) Aapünüsü wamüin tia korolokot kojutusü suluʼu wanee iita aainjuushika süka pootshi, süpüla niainjachin chi Maleiwakai aapaka wamüin yalayala aaʼin jee nnojoluin yalayalain waaʼin wamüiwaʼa.
w12-S 1/2 28
«Talata naaʼin Jeʼwaa jutuma»
Nüküjain David Splane pütchikat tüü, niakai nia wanee Laülaashi Jülüjaka Aaʼin na Aküjaliikana Pütchi (2 Corinto 4:7, TNM). ¿Kasa wayu tü korolo kojutusü naashajaakalü achiki? ¿Shiache tü weʼraajakat maʼin? ¿Shiache tü kekiwaakat? Müsü nünüiki Splane: «Nnojotsü shiain tia. Tü nüküjeekalü achiki Pablo shia tü waʼyataainkat sünain aküjakat pütchi» (2 Corinto 4:1, 2, 5). Nüküjain chi wawalakai kasapülajanain nekirajünaka soʼu jarai kashi na ekirajaashiikana: süpülajatü yapain naya süpüla naküjain pütchi otta kojutuinjatüin namüin tia.
Nüküjain chi wawalakai shiain tü «iita aainjuushika süka pootshi» kayaawaseka tü weʼirukukat. Nüküjaka süchikijee tia jamüin sukuwaʼipa wanee iita aainjuushikat süka pootshi otta wanee aainjuushikat süka ooro. Tü iita aainjuushikat süka ooro nnojotsü aapaanüin waneepia maʼaka tü iita aainjuushikat süka pootshi. Wanaajaale wanee kasa kojutusü suluʼu tü iita aainjuushikat süka ooro, kojuteerü wamüin tü iitakat maʼaka kojutuin wamüin tü suluʼukat. Müshijeseʼe nümüin chi wawalakai Splane namüin na ekirajaashiikana: «Nnojo jüchajaain jiain kojutuinjanain sutuma wayuu. Niainjachi Jeʼwaa kojutuka sutuma wayuu, shia tü jaaʼinrajatkat jia misioneerokana. Nnojotsü yaletüinjatüin jaaʼin maʼaka wanee iita aainjuushikat süka pootshi».
(2 Corinto 6:13, TNM) Süka müin jia maʼaka saaʼin tachonnii, taküjain jümüin tüü: anashii müleka jaʼaleewajaale namaa na juwalayuukana.
w09-S 15/11 21 püt. 7
Anasü kooʼomüinre naalin na wawalayuukana wapüla
7 ¿Jamüsü wakuwaʼipa namüin na waneinnua? ¿Kasache waaʼinrüinjatka süpüla waʼaleewajaain namaa na wawalayuukana jee weeʼiyatüin alin naya wapüla? Anasü wamüin namaain waya na wayuu wanaawakana akuwaʼipa wamaa jee wanaawakana ouyase wamaa otta walatirüin kaʼi namaa na wayuu kamalainkana amüin tü kamalainkat wamüin, aleʼeya tia. Wakatalaale sutuma tia noulia na waneinnua anashii waʼaleewajaale namaa na nnojoliikana waʼaleewain. Püsakira paaʼin sünain tüü: «¿Aküjashiche neʼe taya pütchi namaa na taʼaleewainkana? ¿Nayache neʼe tounejaaka waneepia na taʼaleewainkana süpüla nashaittüin, nanajüin jee naaʼinrüin waneirua kasa tamaa? ¿Kaaʼinshiche taya noulia na jekenakana anoujain süka jülüjain taaʼin nnojoluin anain naya süpüla naʼaleewajaain tamaa? ¿Tasaküinche na wawalayuukana jaʼitaina laülaain jee jimaʼaliin naya?».
MAAYOʼU 13-19
KOROLO KOJUTUSÜ SULUʼUKA TÜ WIWÜLIAKAT | 2 CORINTO 7-10
«Tü waʼyataainkat sünain akaalinjaa na wawalayuukana»
w98-S 1/11 25 püt. 1
Talatüsü naaʼin chi Maleiwakai nümaa chi wayuu asülajakai süka naaʼin
Nüküjain Pablo namüin na anoujashi chejeʼewaliikana Corinto, nakaaliijülin na anoujashii chejeʼewaliikana Macedonia. Müshi Pablo nachiki: «Mayaasüje eein jaʼijawaa, eein müliaa, nasülajüin süpüshi tü nantakat anain sümaa talatüin naaʼin». Nnojotsü choʼujaain süküjünüin namüin na chejeʼewaliikana Macedonia tü naaʼinrüinjatkat. Aashajaashii naya süpüla nasülajüinjatüin namüin na anoujashiikana tü choʼujaakat namüin. Asülajülii maʼin naya anoujashiikana eerejeʼe maʼletsein naya (2 Corinto 8:1-3; 8:4, TNM).
kr-S 209 püt. 1
Tü waʼyataainkat sünain akaalinjaa na wawalayuukana
Soʼunnaa tü juyakat 46 soʼu wakalia, aishaatasü jamü chaa Judea. Na anoujashii kepiakana chayaa, kapüleesü namüin nawalaajüin wanee palitchon eküülü süka kojutuin maʼin shia. Neʼrüin maʼin tü outaka nooʼomüin. Neʼrapajeʼe mapa naya anoujashiikana naaʼinmajüin naya Jeʼwaa sükajee nükaalinjain naya. ¿Kaseerü naainjaka Maleiwa napüleerua?
(2 Corinto 8:4, TNM) Achuntashaatashii maʼin naya wamüin süpüla wooʼulaain naya sünain asülajaa kasa, süpüla nakaalinjain na anoujashiikana.
kr-S 209, 210 püt. 4-6
Tü waʼyataainkat sünain akaalinjaa na wawalayuukana
4 Sünain tü chiiruaajatkat karaloʼuta nüshajaka Pablo namüin na chejeʼewaliikana Corinto, aashajaashi nia süchiki tü naʼyataainkat na anoujashiikana. Mayaapejeʼe namüinjatü na anoujashii chainjanakana iipünaa tia pütchikat, tü aküjünakat sünain jalouisü shia wamüin maaʼulu (Juan 10:16). Nüküjain Pablo piamain sukuwaʼipa tü waʼyataainkat. Tü palajatkat shia waküjain sümüin wayuu «anajiraainjanain naya nümaa» Maleiwa, tia shia tü waʼyataainkat sünain aküjaa pütchi otta ekirajaa wayuu (2 Cor. 5:18-20; 1 Tim. 2:3-6). Otta tü wane shia tü waʼyataainkat napüleerua na wawalayuukana, tia sünainpünaasü wakaalinjain na wawalayuukana sülatapa kasa mojusü namüin (2 Cor. 8:4, TNM). Tü pütchi waʼyataain makat, sünainjeejatü tü pütchikat griego diakonía. ¿Jamüsü suchuntunaka maʼin piantua tia pütchikat?
5 Nüküjain Pablo piantua tia pütchikat süka shialeeinya süpüshi tü naʼyataainjatka anain na anoujashiikana. Müsü paala nünüiki Pablo: «Mayaasüje nnojolüin wanaawain tü waʼyataakat anain nümüin chi Maleiwakai, waneeshia chi Senyotkai aluwataakai waya. Je mayaasüje nnojolüin wanaawain tü naaʼinrakat chi Maleiwakai waka, waneeshia [...] chi atüjakai atüma waya anoujashiikana wapüshua, nia chi Naaʼinkai Maleiwa» (1 Cor. 12:4-6, 11). Naashin Pablo tia aʼyatawaakalüirua shiale süpüshi tü waʼyataainkat nümüin Jeʼwaa (Roma 12:1, 6-8). Wayaawata aaʼu jooluʼu jamüin kamalainka maʼin nümüin Pablo nükaalinjain na anoujashiikana (Roma 15:25, 26).
6 Nüküjain Pablo namüin na Corintojeʼewaliikana, akaalinjünüinjachin natuma na anoujashiikana wanee anoujashi alatakai amüin kasa mojusü. Naaʼinrüinjatü tia süka jüüjüüin naya nümüin Kürisüto jee noonooin sümaa nünüiki. Nüküjain Pablo tia süpüla nayaawatüin naya anoujashiikana shialeein süpüshi tü naʼyataainkat nümüin Jeʼwaa jee naʼwaajüin nia müle shia natuma (2 Cor. 9:13). Süka noonooweein sümüin tü nümakat Kürisüto, nakaalinjüin na nawalayuukana sünain anoujaa. Naashin Pablo nakaalinjiraale na anoujashiikana sülatapa kasa mojusü namüin shia wanee sukuwaʼipa nutuma Maleiwa süpüla niiʼiyatüin «anamiain nia sümüin wayuu süpüshua» (2 Cor. 9:14; 1 Ped. 4:10). Aashajaasü tü rewiisütakat Aapiria Wayuu, ojuʼitaka juunioʼu 1 soʼu 1976 süchiki wakaalinjainjanain na wawalayuu maʼletsekana otta na alatakana namüin kasa mojusü, müsü sünüiki: «Nnojotsü antapünaainjatüin suluʼu wekii nnojoluin jülüjain naaʼin Jeʼwaa otta Jesuu tü waaʼinrakat sünain aʼyatawaakat tüü». Sünainpünaasü maʼin tü waʼyataainkat nümüin Jeʼwaa wakaalinjale na wawalayuu müliakana sutuma wanee kasa (Roma 12:1, 7; 2 Cor. 8:7; Heb. 13:16, TNM).
kr-S 196 püt. 10
Jalejeekuwat tü nneerü akataajünakat sünain tü aʼyatawaa saainjakat nupueulose Jeʼwaa
10 Asülajüshii waya kasa süka waaʼin sutuma alin wapüla Jeʼwaa otta waaʼinreein tü kasa «talatakat atüma naaʼin» (1 Juan 3:22). Talatüshi maʼin Jeʼwaa wama wasülajüle wanee kasa süka waaʼin. Aashajaashi Pablo süchiki jamüin sukuwaʼipa tia (paashajeʼera 2 Corinto 9:7). Chi shiimainshikai anoujain nnojoishi asülajüin mojusheeka jee süka münajalain maʼin nümüin, naaʼinrüin tia süka naaʼin nümüiwaʼa. Niʼrüin tü kasa choʼujaakat namüin na waneinnua, jülüjasü naaʼin tü naapüinjatkat otta naainjain shia. Anashi nümüin Jeʼwaa chi wayuu makai akuwaʼipa, süka talatüin naaʼin «nümaa chi wayuu asülajakai süka naaʼin», maʼaka süküjain wanee Wiwülia, «aishi nüpüla Maleiwa chi wayuu asülajüikai».
Püchajaa süchiki kaaʼürüi suluʼu tü Wiwüliakat
g99-S 8/7 20, 21
¿Mojusüche waʼwaataale saaʼu wanee kasa?
Suluʼu tü Wiwüliakat tü pütchikat griego kau·kjá·o·mai makat, «aʼwaajünüshi saaʼu, talataa sümaa, aʼwaatawaa saaʼu» maluʼulu shia. Tia pütchikat, eesü shiʼitaanüle süpüla saashajaanüin achiki wanee kasa anakat jee nnojotka anain. Nüküjain Pablo eein süpüla talatüin waaʼin sümaa «tü kasa anasü nüchekakat Maleiwa wapüleerua» otta müsia nüküjain wamüin tüü: «Nnojo juʼwaataain suluʼu jukuaippa. Aluʼusa shiale juʼwaataain aluʼu tü naaʼinrakat chi Maleiwakai jümüin» (Roma 5:2; 2 Corinto 10:17). Wayaawatüin sükajee tia, nnojoluin mojuin waʼwaataale saaʼu niain Jeʼwaa chi Wamaleiwasekai otta talatüsü waaʼin süka anamiain maʼin nia sümüin wayuu.
MAAYOʼU 20-26
KOROLO KOJUTUSÜ SULUʼUKA TÜ WIWÜLIAKAT | 2 CORINTO 11-13
«Eejatü nünain Pablo wanee müsü aka saaʼin keipüse asaʼijaka niʼiruku»
(2 Corinto 12:7, TNM) sutuma niiʼiyatüin tamüin Maleiwa wainma kasa nnojotka sütüjaain aaʼu wayuu. Müsüjeseʼe süpüla nnojoluin yaletüin taaʼin, aapünüsü tamüin wanee müsü aka saaʼin keipüse asaʼijaka teʼiruku, wanee aapiee nümaʼanajeejachi Satanaa süpüla müliainjatüin taaʼin nutuma suulia pülayaain taaʼin.
w08-S 15/6 3 püt. 3
Katchinsü naaʼin mayaapejeʼe müliain nia
Pablo nia wanee anoujashi nümaiwajachi, apünüintua nuchuntuin nümüin Jeʼwaa süpüla naawalüin nia suulia wanee kasa mojusü niʼraka otta müliasü maʼin naaʼin sutuma waneepia. Tia müsü aka saaʼin keipüse asaʼijaka niʼiruku Pablo. Nnojotsü watüjaain aaʼu kasain wayuu tia, wayaawatapejeʼe saaʼu müliain naaʼin Pablo sutuma maʼaka alin wamüin wanee keipüse asaʼijaka weʼiruku. Tia alatakat nümüin, eesü süpüla sümalajeʼerüin tü niʼyataainkat nümüin Jeʼwaa sümaa talatüin nia. Nümaka Jeʼwaa nümüin: «Süka anamiain maʼi taya sümüin wayuu, tachechereerü paaʼin suʼutpünaa tü müliaa piʼrakat. Süka pütüjaain saaʼu sünain cheʼojaain pümüin akaalinjünaa tatüma, alanaʼaleejeechia maʼi pia sünain katsüin paaʼin tatüma». Mayaapejeʼe nnojoluin naawalüin Jeʼwaa tia nuulia Pablo otta ayatüin nia eejiraain sümaa, müshi nia mapa: «Süka tayaawatüin saaʼu sünain cheʼojaain tamüin akaalinjünaa nütüma Cristo, shiimüin sünain nüchechereerüin taaʼin» (2 Cor. 12:7, TNM; 12:8-10). ¿Jamaluʼulu tü nümakat?
w06-S 15/12 24 püt. 17, 18
Naapüin Jeʼwaa chi nütchinkat namüin na achuntakana shia
17 Müshi Maleiwa nümüin Pablo: «Süka anamiain maʼi taya sümüin wayuu, tachechereerü paaʼin suʼutpünaa tü müliaa piʼrakat. Süka pütüjaain saaʼu sünain cheʼojaain pümüin akaalinjünaa tatüma, alanaʼaleejeechia maʼi pia sünain katsüin paaʼin tatüma». Anuu sooʼomüin nünüiki Pablo: «Aʼwaataajeechi taya suluʼu cheʼojaain tamüin akaalinjünaa nütüma. Shiimüin sünain nükaalinjeechin Cristo taya süka pülashin maʼi nia» (2 Corinto 12:9; Salmo 147:5). ¿Kasa nüküjeekalü achiki Pablo? Shia naaʼinmajüin nia Maleiwa nükajee Kürisüto, müsü aka saaʼin wanee piichi aaʼinmajaka nia suulia wanee kasa. Müsia neʼe sukuwaʼipa nutuma Jeʼwaa maaʼulu, nusoutapa wamüin shiʼipajee tü wachuntakat, süka nüʼinmajüin na aʼyataakana nümüin.
18 Wanee piichi saaʼinmajüin waya suulia juyasirüin waya jee suulia tü joutaikat, nnojotpejeʼe suuʼuleʼerüin shia. Akaʼaya neʼe tü nütchinkat Kürisüto, nnojotsü sütaʼülüüin woulia sülatüin kasa wamüin. Saaʼinmajapejeʼe tü wanoulakat suulia sumojujaain sutuma tü nakuwaʼipakat na manoujainsaliikana otta nutuma Satanaa (Alateetkat Mapeena 7:9, 15, 16). Nnojorüle sülatüin puulia tü müliaa piʼrakat, soto paaʼin nütüjaain saaʼu Jeʼwaa tia jee nusouteechin pümüin (Isaías 30:19; 2 Corinto 1:3, 4). Müsü nünüiki Pablo: «Wanaa sümaa juuʼulakünüin aaʼin, pansaasü nünüiki chi Maleiwakai jümüin süpüla nükaaliijeenain jia. Juunteerü jüchecheruin jaaʼin suʼunnaa tia, süka niiʼiyateerüin jümüin sünain jamüinjatüin jujuittia saʼakajee» (1 Corinto 10:13; Filipos 4:6, 7).
Püchajaa süchiki kaaʼürüi suluʼu tü Wiwüliakat
(2 Corinto 12:2-4, TNM) Eeshi wanee wayuu teʼraajüin, anoujashi nünain Kürisüto, eeirü maʼaka poloo pienchimüin juya süchikijee nüsaajünüin süpüla chain nia eemüin tü apünüinkat sirumatuʼu, nnojotsü tatüjaain aaʼu nuʼunüle suluʼu wayuuin nia, jee shiale suluʼu meʼrujuin nia, nia neʼe Maleiwa atüjaakai saaʼu tia. 3 Teʼraajüin chia wayuukai, nnojotpejeʼe tatüjaain aaʼu nuʼunüle suluʼu wayuuin nia, jee shiale suluʼu meʼrujuin nia, nia neʼe Maleiwa atüjaakai saaʼu tia. 4 Amaanüshi nia suluʼumüin tü paʼaraiisükat jee naapaka yala wanee pütchi nnojotka anain süpüla naashajaain achiki wanee wayuu.
w18.12-S 8 püt. 10-12
Süsakiraka anain wayuu
Tü apünüinkat sirumatuʼu achuntunakat suluʼu 2 Corinto 12:2, eesü shiale saashajaain achiki tü Nuluwataayakat Maleiwa sünain niain Jesuu aluwataain saaʼu otta na 144.000 anoujashii aluwataainjanaka nümaa (2 Ped. 3:13, TNM).
«Apünüinkat sirumatuʼu» münüsü tü Nuluwataayakat Maleiwa süka anaʼleein maʼin shia.
Tü paʼaraiisü nüküjakalü achiki Pablo, eesü süpüla shiain tüü: 1) tü mmakat paʼaraiisüpa shia, 2) na wayuukana napüshuaʼa sünain anajiraain jee paaʼinwajiraain naya mapeena suluʼu tü mmakat paʼaraiisüpa shia, otta 3) tü paʼaraiisü anashaatasü chakat iipünaa. Eejeerü süpüshuaʼa tüü suluʼu tü mma eejeetkat mapeena.
w90-S 15/11 22
¿Kasa eeka süpüla wachuntuin nümüin Maleiwa?
Eeshii süpüla wachuntuin napüleerua na wawalayuukana sünain anoujaa. Jamüshijaʼa Pablo nuchuntuin namüin na nuwalayuukana süpüla noʼuraajüin nüpüleerua süpüla nnojoluinjachin mmoluin nia sünain aküjaa tü pütchi anasükat (Éfeso 6:17-20). ¿Kasa waaʼinrajatkat watüjaale saaʼu wainmain tü kasa suchuntaakat naaʼin wanee wawala? Achuntuinjanain waya nümüin Maleiwa süpüla nnojoluin kaainjalain chia wawalakai otta süpüla nuʼtteʼerüin nia nuulia Satanaa (2 Corinto 13:7; Mateo 6:13). Otta müshia ayuuire wanee wawala, eesü süpüla wachuntüin nümüin Maleiwa süpüla katsüin naaʼin otta eejiraain nia sümaa tü ayuuliikat (Salmo 41:1-3).
MAAYOʼU 27–JUUNIOʼU 2
KOROLO KOJUTUSÜ SULUʼUKA TÜ WIWÜLIAKAT | GALACIA 1-3
«Tachiajaain Pedro»
Püchajaa süchiki kaaʼürüi suluʼu tü Wiwüliakat
(Galacia 2:20, TNM) Müshi takachennakai aaʼin wanaa nümaa Kürisüto sünain tü wunuʼu lotusükat. Nnojoluichipa taya katüin oʼu süpüla taaʼinrüin tü tachekakat, shiaitpa süpüla taaʼinrüin tü nüchekakat Kürisüto tapüleerua. Shiimain sünain katüin toʼu süka tanoujain nünain chi nüchonkai Maleiwa, süka alin taya nüpüla otta naapajiraain nikii taaʼu.
(Galacia 3:1, TNM) Tawalayuu chakana Galacia, shiimain sünain maaʼin jaaʼin, ¿jarai chi aʼwanajeʼerakai jukuwaʼipa? Pansaasü tü taküjakat jümüin süchiki nukuwaʼipa Jesuu sünain nükachennüin sünain wanee wunuʼu lotusü.
it-1-S 984
Karaloʼuta nutuma Pablo namüin na chajanakana Galacia
«Tawalayuu chakana Galacia, shiimain sünain maaʼin jaaʼin», müsü nünüiki Pablo. Sükajee tia, nnojotsü shiiʼiyatüin shiain jülüjain naaʼin Pablo nakuwaʼipa na wayuu kepiakana palaajeeruʼu sünain tü mmakat Galacia, na galo münakana (Gal 3:1, TNM). Naya nüchiaaka Pablo na anoujashii oonookana sümaa nanüiki waneinnua anoujashii ekirajakana sünain nakuwaʼipa na judíokana. Judío naya makana akuwaʼipa, ayateeshii naya sünain aainjaa tü sümakat tü Pütchi Aapünakat nümüin Moisés suulia naainjain tü Pütchi jeket apansaajünakat (2:15–3:14; 4:9, 10). Na anoujashii chakana Galacia (1:2) naya nüshajakana amüin Pablo. Paliraashii naya anoujashiikana, eejana eeka judíoin otta na nnojoliikana judíoin, na eekana noyoʼteʼerüin nata otta na nnojoliikana oʼyoteʼerüin nata, eeshii süpüla nooʼuliwoʼuin naya na celta münaka (Alu 13:14, 43; 16:1; Gal 5:2). Na anoujashii chejeʼewaliikana Galacia münüshi naya süka kepiain naya suluʼu tia mmakat. Nüshajala Pablo tia pütchikat namüin na anoujashii kepiakana uuchijeeruʼu sünain tia mmakat, süka niʼraajüin naya, nnojoishii nayain nüshajüin amüin na wayuu kepiakana palaapünaa sünain tü mmakat Galacia süka nnojolin niʼraajüin naya jee eeshi süpüla nnojoluin nia chapünaa.