¿Joujeerü sajaʼttinnaka tü kasakat süpüshuaʼa naashin Jesuu?

JÜLÜJA PAAʼIN TÜ NÜMAKAT JESUU SÜCHIKI TIA:

«Anakaja müleka yapale jia sünain eein jaaʼin [...] süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma» (MATEO 25:13).

«Anakaja müleka eere jaaʼin tapüla tayakai [...] süka taleʼejüinjachin tachikua jünainmüin soʼuweena wane kaʼi matüjaajuukat aaʼu jütüma» (MARCOS 13:33).

Nnojotsü sütüjaain aaʼu wayuu tü kaʼi sajaʼttinnüinjatkalü oʼu kasa süpüshuaʼa. Niʼitaapejeʼe chi Maleiwakai tü sükaliainjatkat tia (Mateo 24:36). ¿Maluʼutche tia nnojoluin süpüla watüjaain saaʼu sülüʼülüin tia kaʼikat? Nnojo. Nüküjain Jesuu namüin na nikirajüinkana waneirua kasa alatüinjatka nayaawatüinjatka anainjee sülüʼülüin tia kaʼikat.

TÜ SHIYAAWASEINJATKAT

Tia alatüinjatka shia shiyaawaseinjatka «tü sükaliajatkat sajaʼlajaain kasakat süpüshua». Naashin Jesuu, atkaajiraajeerü wayuu sainküin mmakat, aijeerü jamü jee akutkujaweerü tü mmakat (Mateo 24:3, 7, TNM). Akaʼaya nüküjain joouluinjatüin tü ayuuliikat (Lucas 21:11). ¿Piʼrüitche shikeraajüin tü nümakat Jesuu maaʼulu?

Watta maʼin saalii wayuu müliaka sutuma tü atkawaakat, sutuma tü jamükat, sutuma sukutkujaain mma jee sutuma tü ayuuliikat. Soʼu 2004 akutkujaasü tü mmakat pasanain sünain tü palaakat Índico jee shiyalejaaka sümüna tü palaakat, outusü 225.000 wayuu sutuma. Alatüsü suulia 6.9 miyoone wayuu outaka sainküin mmakat sutuma tü ayuuliikat COVID-19 soʼunnaa apünüin juya süchikijee suʼttüin tia. Nüküjain Jesuu sülatajatüin tia süpüla wayaawatüin saaʼu sülüʼülüin sükalia süpüla sajaʼttajatüin kasakat süpüshuaʼa.

TÜ SÜKALIAJATKAT SAJAʼTTÜINJATÜIN TÜ KASAKAT SÜPÜSHUAʼA

Süküjain tü Bibliakat tü alatajatkat süpülapünaa sajaʼttüin tü kasakat süpüshuaʼa (2 Pedro 3:3, 4). Süküjain Chiiruaajatkat Timoteo 3:1-5 jamüinjatüin sukuwaʼipa wayuu süpülapünaa sajaʼttüin kasakat süpüshuaʼa (paashajeʼera tü pütchikat «Süpülapünaachon sajaʼttinnüin kasakat süpüshuaʼa»). ¿Jamüsü sukuwaʼipa wayuu maaʼutpünaa? Kapülasü saaʼin sukuwaʼipa neʼe sümüiwaʼa, mojulaasü, kachiiruasü saaʼin tü washirüükat jee eʼrünnuu wayumüin sümüin wayuu. Tia shia wanee kasa wayaawataka atuma sülüʼülüin süpüla sajaʼttajatüin kasakat süpüshuaʼa.

Saashin tü Bibliakat motsoʼojeerü sümaʼa tü kaʼi sajaʼttajatkalü oʼu kasa süpüshuaʼa. Najaʼttireena Maleiwa na amojujakana tü Mmakat (Alateetkat Mapeena [Apocalipsis] 11:15-17; 11:18, TNM; 12:12).

ALÜʼÜTSÜ SÜPÜLA PAʼARAIISÜINJATÜIN TÜ MMAKAT

Kettaaitpa nutuma Maleiwa tü kaʼi najaʼttirajatkalü oʼu tü kasa mojusü naaʼinrakat na wayuukana (Mateo 24:36). Nnojotsü «nücheküin süpüleerua eeinjatüin wayuu eekai amüloulin» (2 Pedro 3:9). Nücheküinjeseʼe Maleiwa wapüleerua weʼraajüin nukuwaʼipa otta woonooin sümaa nünüiki. Naaʼinrüin tia süka keeʼireein naaʼin woʼttaainjanain najaʼttirapa kasakat süpüshuaʼa otta süpüla kepiainjanain waya suluʼu tü Mmakat paʼaraiisüpa shia.

Nukumajüin Jeʼwaa sukuwaʼipa süpüla nikirajüin na wayuukana süpüla natüjaain saaʼu tü naaʼinrajatkat süpüla kepiainjanain naya suluʼu tü mma jeketkat nuluwataapeena saaʼu. Nüküjain Jesuu süküjüneerüin süchiki nukuwaʼipa Maleiwa sünain aluwatawaa «sainküin mmakat süpüshua» (Mateo 24:14). Na aküjaliikana pütchi nüchiki Jeʼwaa nalatirüin wainmashaata oora sünain aküjaa pütchi jee sünain ekirajaa wayuu süchiki tü kasa anasü naaʼinrajatkat Maleiwa. Nüküjain Jesuu saainjünüinjatüin tia sainküinpünaa tü Mmakat süpülapünaa sajaʼttinnüin tü kasakat süpüshuaʼa.

Alüʼütsü süpüla sajaʼttinnüin sukuwaʼipa aluwatawaa sutuma wayuu. Eepejeʼe süpüla woʼttaain sajaʼttinnapa tü kasakat süpüshuaʼa jee kepiainjanain waya saaʼu tü Mmakat paʼaraiisüpa shia maʼaka nüküjain shia Maleiwa. Sünain tü wane pütchikat, waashajaajeerü achiki tü waaʼinrajatkat süpüla kepiainjanain waya suluʼu tü mma jeketkat.