Naaʼinraka Jehová süpüla naapüin wamüin tü wachuntakat nümüin

1, 2. ¿Kasa eeka süpüla jülüjain waaʼin?

¿EEIRIA jülüjain paaʼin nusoutule pümüin Jehová shiʼipajee tü puchuntakat nümüin? Jülüjale paaʼin tia, nnojoishi neʼe piain aaʼinrüin tia pümüiwaʼa. Wainma na wawalayuu aaʼinrakana tia, shialeekajaʼa sülatüle kasa mojusü namüin. Sülatüle wamüin kasa mojusü, eesü kapüleere wamüin wayaawatüin saaʼu nusoutule wamüin Jehová shiʼipajee tü wachuntakat nümüin.

² Sünain ekirajaayakat tüü, wekirajaajeerü anain jamüin watüjaaka saaʼu naapeerüin wamüin Jehová tü wachuntakat nümüin (1 Juan 5:15, TNM). Wekirajaajeerü anain eein süpüla nnojoluin müin nusoutakai aaʼin Jehová wamüin shiʼipajee tü wachuntakat nümüin otta süchiki tü naaʼinrakat süpüla nusoutuin wamüin.

EESHI NUSOUTULE WAMÜIN JEHOVÁ SÜKAJEE WANEE KASA NNOJOTKA WAʼATAPAJÜIN

3. ¿Jamüsü nuchuntaka Jehová wamüin woʼuraajüinjanain nümüin?

³ Aküjünüsü suluʼu tü Bibliakat alin maʼin waya nüpüla Jehová otta kojutuin maʼin waya nümüin (Ageo 2:7; 1 Juan 4:10). Müsüjeseʼe nuchuntuin wamüin woʼuraajüinjanain nümüin jee wachuntuinjanain kaalinwaa nümüin (1 Ped. 5:6, 7). Keeʼireesü naaʼin Jehová aleewain maʼin waya nümaa otta nükaalinjeein waya süpüla wachecherüin waaʼin soʼunnaa tü alatakat wamüin.

4. ¿Jamüsü watüjaaka saaʼu nusoutuin Jehová shiʼipajee tü nachuntakat namüin na aʼyataakana nümüin? (Piirakaa sümüin tü ayaakuaakat).

⁴ Suluʼu tü Bibliakat wainma nachikimaajatü na aʼyataapuʼukana nümüin Jehová oʼuraajakana nümüin jee nusoutakana amüin shiʼipajee tü nachuntakat nümüin. Eesüjaʼa shiale sotuin waaʼin tü nukuwaʼipakat David chi aluwataaikai saaʼu Israel. Jamüshijaʼa David, eejiraapuʼushi nia namaa na nüʼünüükana. Oʼuraajapuʼushi maʼin nia süpüla nuchuntuin kaalinwaa nümüin Jehová. Anuujeseʼe nünüiki soʼu wanee kaʼi: «Jehovákalee paapaja tanüiki, jalia maa taya. Kaalin taya püpüla, tatüjaa aaʼuchi kamaneein maʼin pia otta lotuin pukuwaʼipa» (Sal. 143:1). Asoutushi Jehová shiʼipajee tü nuchuntakat David nümüin jee nuʼtteʼerüin nia (1 Sam. 19:10, 18-20; 2 Sam. 5:17-25). «Pejeshi Jehová nanain napüshuaʼa na achajaakana nüchiki, na achuntakana kaalinwaa nümüin», müsü nünüiki David süka niʼitaain maʼin naaʼin nünain Jehová. Müshiʼiya wayakana, eesü süpüla weʼitaain maʼin waaʼin nünain Jehová (Sal. 145:18).

5. ¿Asoutushiche Jehová shiʼipajee tü nachuntakat na aʼyataakana nümüin sükajee tü kasa naʼatapajakat naaʼinrüin napüleerua? Püküja tü alatakat nümüin Pablo (piirakaa sümüin tü ayaakuaakat).

⁵ Eeshijaʼa nusoutule wamüin Jehová shiʼipajee tü wachuntakat nümüin sükajee waneirua kasa nnojotka waʼatapajüin. Tia shia tü alatakat nümüin chi aluwataaushikai Pablo. Eejatü wanee kasa müsü «aka saaʼin keipüse sünainka niʼiruku». Müsüjeseʼe nuchuntuin maʼin nümüin Maleiwa apünüintua süpüla nüshaʼleʼerüin shia nuulia. ¿Asoutushiche Jehová shiʼipajee tü nuchuntakat nümüin? Jamüsaʼa shia, nnojotpejeʼe naaʼinrüin tia Jehová sükajee tü kasa naʼatapajakat Pablo naaʼinrüinjatüin nüpüleerua. Nnojotsü nüshaʼleʼerüin Jehová nuulia tü alatakat nümüin, shia naapaka nümüin katchinwaa aaʼin süpüla ayatüinjachin niʼyataain nümüin (2 Cor. 12:7-10).

6. ¿Jamüsü eeka süpüla jülüjain waaʼin nnojoluin nusoutuin wamüin Jehová shiʼipajee tü wachuntakat nümüin?

⁶ Eeshijaʼa nusoutule wamüin Jehová shiʼipajee tü wachuntakat nümüin sükajee waneirua kasa nnojotka waʼatapajüin. Aneetpejeʼe wamüin tü naaʼinrakat Jehová wapüleerua süka nütüjaain saaʼu tü choʼujaakat wamüin. Eesü süpüla sülanaʼaleein tü naapakat wamüin suulialeʼeya tü wachuntakat nümüin (Éf. 3:20, TNM). Makalaka anain maʼin jülüjale waaʼin nusoutapa wamüin Jehová süka eein süpüla anaʼleein maʼin shia suulia tü wachuntakat nümüin.

7. ¿Jamüsü anaka wanoutawaire tü wachuntakat nümüin Jehová? Püküja tü naaʼinrakat wanee wawala.

⁷ Eesüjaʼa süpüla wanouteʼerüin tü wachuntawaikat nümüin Jehová wayaawatapa saaʼu tü nüchekakat wapüleerua. Jülüjataa waaʼin tü alatakat nümüin chi wawalakai Martin Poetzinger. Süchikijee kasaalüin nia, amaanüshi nia suluʼumüin wanee campo de concentración natuma na kanüliakana nazi. Oʼuraajüshi nia nümüin Jehová süpüla nüjütünüin achiki, jama cheein nia sümaa tü nuʼwayuusekat jee nüküjeein pütchi nüchikuaʼa. Shiasaʼa sülatapa piama semaana, jülüjasü naaʼin nnojoluin nusoutuin Jehová nümüin. Niasaʼa chi wawalakai Martin, nuʼuraajaka nüchikuaʼa nümüin Jehová, müshi nia: «Pükaalinja taya Jehová süpüla tatüjaain saaʼu tü taaʼinrajatkat». Shiasaʼa jülüjalaʼa sümaka naaʼin choʼujaain nakaalinjünüin na wawalayuu eejanakana nümaa suluʼu tü campo de concentración münakat. Eeshii wawalayuu shapaakana maʼin aaʼin saaʼujee naʼwayuuse jee nachonnii. Niasaʼa chi wawalakai Martin nümaka nümüin Jehová: «Anayaawatsejeʼe Jehová saaʼujee puuʼulaain takaalinjain na wawalayuukana otta saaʼujee takatchinrüin naaʼin». Shiaʼaya naaʼinraka tia soʼunnaa tü mekietsat juya püreesaka oʼu nia.

8. ¿Kasa jülüjainjatka waaʼin woʼuraajapa?

⁸ Soto waaʼin nikeraajeerüin Jehová tü keeʼireetüjütkalia naaʼin soʼu tü kaʼi niʼitaatüjütkalia oʼu shia. Najaʼttireein tü kasa müliakalü atuma waya, maʼaka saaʼin tü ayuuliikat otta tü outaakat, nnojoleerü akutkujaain mmaka otta eein wawai. Naaʼinreerü Jehová süpüshuaʼa tü keeʼireekat naaʼin nuluwataapa waaʼu (Dan. 2:44; Alat. Map. 21:3, 4). Maaʼulu yaa, nuuʼulaain Jehová niain aluwataain Satanás saaʼu tü mmakat (Juan 12:31; Alat. Map. 12:9).b Nunouteʼerüleje Jehová tü kasa mojusü alatakat maaʼulu, meechi nükaalinjakai aaʼin chi Yolujaakai. Sümaʼinruʼu waʼatapajüin nikeraajüin Jehová süpüshuaʼa tü nüküjatüjütkalia achiki, nükaalinjeena waya. Wekirajaa joo süchiki soʼutku tü kasa naaʼinrakat Jehová wapüleerua.

TÜ NAAʼINRAKAT JEHOVÁ SÜPÜLA NUSOUTUIN WAMÜIN

9. ¿Jamüsü sukuwaʼipa nutuma Jehová süpüla nükaalinjain waya waneeküinjatpa wanee kasa?

⁹ Naapüin wamüin kekiwaa. Nüküjain wamüin Jehová naapeerüin wamüin kekiwaa süpüla anainjatüin tü kasa waneekakat. Choʼujaʼaleesia wamüin tia waneeküinjanale waneirua kasa, maʼaka saaʼin kasaalüinjanale waya jee nnojoliinjanale kasaalüin waya (Sant. 1:5). Jülüjataa waaʼin tü alatakat sümüin María, wanee wawala maʼwayuusekat.c Pürekutsoot shia otta aʼyataasü shia nümüin Jehová sümaa talatüin saaʼin. Soʼu wanee kaʼi shiʼraajaka wanee wawala. Anuu sünüiki: «Aleewashii maʼin waya, müliakalaka taya niiʼiree jee müliakalaka nia teeʼireʼeya. Tayaawata aaʼu taneeküinjatüin tü taaʼinrajatkat. Süpüla tia choʼujaasü nuʼunirüinjatüin takuwaʼipa Jehová. Toʼuraajaka nümüin süpüla tatüjaain saaʼu tü taaʼinrajatkat. Tatüjaapejeʼe saaʼu tayainjatüin aneeküin tü taaʼinrajatkat». Shiyaawata aaʼu María nusoutuin Jehová sümüin jee naapüin kekiwaa sümüin. ¿Jamüsü sütüjaaka saaʼu naaʼinrüin Jehová tia süpüleerua? Ekirajaasü shia sünain tü karaloʼuta wamaʼanakat. Süntaka sünain waneirua pütchi shiyaawataka akajee tü saaʼinrajatkat. Aküjat pütchi nüchiki Jehová tü shiikat, süküjaka waneirua pütchi sümüin süpüla shiyaawatüin saaʼu tü keeʼireekat saaʼin. Anasiaʼaya sutuma María tü süneekakat.

10. Saashin Filipos 4:13, ¿kasa naaʼinreetka Jehová süpüla nükaalinjain na aʼyataakana nümüin? Püküja tü naaʼinrakat Jehová nüpüleerua wanee wawala. (Piirakaa sümüin tü ayaakuaakat).

¹⁰ Katchinjeerü waaʼin nutuma süpüla wachecherüin waaʼin soʼunnaa müliaa. Shia naaʼinraka Jehová tia nüpüleerua chi aluwataaushikai Pablo (paashajeʼera Filipos 4:13, TNM). Jülüjataa waaʼin tü naaʼinrakat Jehová süpüla nükaalinjain wanee wawala kanüliakai Benjamin. Jimaʼaiwaʼaya nia, wainma juya nülatitka sümaa nüpüshi suluʼu wanee campo de refugiados chaa África. Anuu nünüiki: «Oʼuraajapuʼushi taya waneepia nümüin Jehová süpüla katchinjatüin taaʼin jee süpüla taaʼinrüinjatüin tü kasa anakat. Asoutushi nia tamüin, naapüin tamüin jimataa aaʼin otta yalayalaa aaʼin süpüla taküjain pütchi otta müsia naapüin tamüin tü karaloʼuta katchinjatkalü atuma tanoula. Taashajeʼerapa süchiki tü naaʼinrakat Jehová napüleerua waneinnua wawalayuu jee tü naaʼinrakat süpüla nüchecherüin naaʼin soʼunnaa tü alatakat namüin, sütütülüinña taaʼin süpüla ayatüin taʼyataain nümüin Jehová süka süpüshuaʼa taaʼin».

11, 12. ¿Jamüshi süpüla nusoutuin Jehová wamüin nakajee na wawalayuukana? (Piirakaa sümüin tü ayaakuaakat).

¹¹ Nükaalinjain waya nakajee na wawalayuukana. Wanee ai süpülapünaa outuin Jesús, oʼuraajüshi maʼin nia. Nuchuntuin maʼin nümüin Jehová suulia naküjain na waneinnua nüchiki mojutuin Maleiwa nutuma. Tü naaʼinrakat Jehová süpüla nükaalinjain nia shia nüjütüin nünainmüin wanee aapiee süpüla nükatchinrüin naaʼin, müshi aka naaʼin wanee nuwala nümüin Jesús chia aapieekai (Luc. 22:42, 43). Müsia maaʼulu, nükaalinjainña waya Jehová. Eeshi süpüla niyamaajüin waya wanee wawala jee nülapalaale waaʼu süpüla nütütülüin waaʼin. Jamüshiijaʼa waya eesü süpüla wachajaain sukuwaʼipa süpüla watütülüin naaʼin na wawalayuukana sükajee wanüiki (Prov. 12:25).

¹² Jülüjataa waaʼin tü alatakat sümüin tü wawalakat Míriam. Maʼaka jeʼra semaana süchikijee outuin chi suʼwayuusekai, sümüiwaʼasü maʼin saaʼin otta mojusü maʼin saaʼin. Wanaa sümaa tia, aʼyalajüsü maʼin shia otta yooteesü shia sümaa wayuu süpüla sütütünnüin maʼin saaʼin. Anuu sünüiki: «Sutuma isain tachiki tayamaajüin wanee wawala, oʼuraajüsü taya nümüin Jehová. Wanaa sümaa yalain taya toʼuraajüin jee taʼyalajüin, aʼyalajüsü tü teleeponokot. Nia ayamaajaka taya wanee taʼaleewain, laülaashi nia napüleerua na wawalayuukana». Chia wawalakai sümaa tü nuʼwayuusekat, namülialüin saaʼin Míriam. Shiyaawata aaʼu niain Jehová aluwataaka chia wawalakai sünainmüin.

13. Püküja wanee kasa naaʼinraka Jehová nüpüleerua Nehemías nükajee wanee wayuu nnojoikai aʼyataain nümüin.

¹³ Nükaalinjain waya nakajee wayuu nnojoliikana aʼyataain nümüin (Prov. 21:1). Eeshi süpüla nusoutuin wamüin Jehová shiʼipajee tü wachuntakat nümüin nakajee wayuu nnojoliikana anoujain wanaa wamaa. Jamüshijaʼa Nehemías, akaalinjünüshi nia nutuma Jehová nükajee Artajerjes, chi aluwataakai saaʼu Persia, süpüla nüleʼejüinjachin Jerusalénmüin jee nukumajüinjatüin süchikuaʼa tü pueulokot (Neh. 2:3-6). Müsia neʼe tü naaʼinrakat Jehová wapüleerua maaʼulu yaa, eeshii süpüla nükaalinjain waya nakajee na nnojoliikana aʼyataain nümüin.

14. ¿Jamüsü sütütüleʼeraka paaʼin tü alatakat sümüin Soo Hing? (Piirakaa sümüin tü ayaakuaakat).

¹⁴ Shiyaawata aaʼu wanee wawala kanüliakat Soo Hing nükaalinjain shia Jehová nükajee wanee tottoolu. Nnojoishi anain chi süchonkai suluʼu nikii otta pasiruwaashi nia. Soo Hing nümaa chi suʼwayuusekai nooʼulaain tü naʼyataainkat süpüla naaʼinmajüin chi nachonkai. Müliashii naya mapa sutuma manneetsein. «Isasü maʼin wachiki wachecherüin waaʼin soʼunnaa tü alatakat wamüin, matchinsat taaʼin sutuma tia», müsü sünüiki Soo Hing. Süküjaka nümüin Jehová tü alatakat sümüin süpüla nükaalinjain shia. Nütüjaapa saaʼu chi tottootkai tü alatakat namüin, nüchajaain sukuwaʼipa süpüla nakaalinjünüin natuma na sülaülashiikana mma otta nükaalinjain naya süpüla nousütüin sünain wanee piichi eekai jaʼyain. Anuu tü sümakat Soo Hing süchiki tü alatakat: «Wayaawata aaʼu niain Jehová akaalinjain waya soʼu tia. Naapüinña wanüiki Jehová woʼuraajapa nümüin» (Sal. 65:2).

KANOULAINJANA WAYA SÜPÜLA WAYAAWATÜIN SAAʼU NÜKAALINJAIN WAYA JEHOVÁ

15. ¿Kasa saaʼinraka wanee wawala süpüla shiyaawatüin saaʼu nusoutule Jehová sümüin?

¹⁵ Nnojoishi aaʼinrawalin Jehová kasa pülasü süpüla nusoutuin shiʼipajee tü wachuntakat nümüin. Nükaalinjapejeʼe waya süpüla waneepiainjanain waya nümaa, makalaka anain maʼin jülüjale waaʼin tü naaʼinrakat Jehová süpüla nükaalinjain waya. Anuu tü saaʼinrakat wanee wawala jülüjapuʼuka aaʼin nnojoluin nusoutuin Jehová sümüin, Yoko sünülia: süshajüin suluʼu karaloʼuta tü suchuntakat nümüin Jehová, shiasaʼa mapa shiʼrajaain süchikuaʼa tü süshajakat. Suluʼujee tia shiyaawata aaʼu wainmain tü nusoutakat Jehová sümüin otta müsia nusoutuin sümüin waneirua kasa suchuntaka nümüin eekai motuirüin saaʼin. Anasü jülüjawaire waaʼin nusoutule wamüin Jehová tü wachuntakat nümüin (Sal. 66:19, 20).

16. ¿Jamüshii kanoulainjanaka maʼin waya wachuntapa wanee kasa nümüin Jehová? (Hebreokana 11:6).

¹⁶ Nnojoishii neʼe kanoulainjanain waya süpüla woʼuraajüin nümüin Jehová, kanoulainjana wayaya süpüla wacheküin tü nusoutakalü akajee wamüin (paashajeʼera Hebreokana 11:6, TNM). Jülüjataa waaʼin nukuwaʼipa Mike sümaa Chrissy tü nuʼwayuusekat. Aʼyataweeshii naya nümüin Jehová suluʼu Weteet. Anuu nünüiki Mike: «Wainmatua wepirajüin tü karaloʼuta napülajatkat na aʼyataweekana suluʼu Weteet. Wachuntawalin nümüin Jehová süpüla wounejaanüin, nnojoliipejeʼe waya ounejaanayaain». Mayaainjeʼe nnojoluin nusoutuin Jehová sümüin tü nachuntakat nümüin, nayaawata aaʼu nuʼunireerüin nakuwaʼipa Jehová eeinjanale naʼyataain nümüin. Sümaʼinruʼu naʼatapajüin saapünüinjatüin tü aʼyatawaa keeʼireekat naaʼin, ayatüshiʼiya naya sünain aaʼinraa waneirua aʼyatawaa nümüin Jehová. Pürekutsootshii rekulaat naya, aküjashii naya pütchi eere choʼujaain maʼin wawalayuu otta akaalinjashii naya sünain akumajaa piichi eere nuʼwaajünüinjachin Maleiwa. Maaʼulu yaa, alapalaashi nia sümaa tü nuʼwayuusekat naaʼu na wawalayuukana. «Eesü nnojorüle naapüin wamüin Jehová tü keeʼireekat waaʼin, watüjaapejeʼe saaʼu anaʼleejeerüin maʼin tü kasa naapakat wamüin suulialeʼeya tü wachuntakat nümüin», müsü nünüiki Mike.

17, 18. ¿Kasa watüjaaka maʼin aaʼu saashin Salmo 86:6, 7?

¹⁷ (Paashajeʼera Salmo 86:6, 7). Nütüjaa maʼin aaʼu David naapajüin Jehová nünüiki sümaa nusoutuin shiʼipajee tü nuchuntakat nümüin. Watüjaa aaʼu meerüin wakuwaʼipa nutuma Jehová. Sünainjee nakuwaʼipa na wayuu wekirajaainnapakana achiki, wayaawata aaʼu naapüin wamüin Jehová kekiwaa sümaa katchinwaa aaʼin soʼunnaa tü alatakat wamüin, wayaawatüinña aaʼu eein süpüla nükaalinjain waya nakajee na wawalayuukana otta nakajee na nnojoliikana aʼyataain nümüin.

¹⁸ Watüjaa aaʼu nusoutuin wamüin Jehová shiʼipajee tü wachuntakat nümüin, eeshia süpüla nusoutuin wamüin sükajee waneirua kasa nnojotka waʼatapajüin. Naapeerü wamüin tü kasa choʼujaakat wamüin soʼu tü kaʼi anashiikalü oʼu nümüin. Ayataʼaya woʼuraajüin nümüin Jehová, nnojo motuin waaʼin naaʼinmajüin waya maaʼulu otta naapeerüin tü suchuntaakat naaʼin na wayuukana paʼaraiisüpa tü Mmakat (Sal. 145:16).