Jimateerü saaʼin wayuu Nuluwataapa Maleiwa

Kakaliainna waya aʼatapajüin Nuluwataainjachin Maleiwa saaʼu tü mmakat, jimateerü waaʼin jee paaʼinweena waya nuluwataapa. Saashin Salmo 72:7, eejeerü «jimataa aaʼin» saaʼu tü Mmakat. ¿Joujeeiche Nuluwataaka Maleiwa saaʼu tü Mmakat? ¿Kasa naaʼinrajatka süpüla nuuntuin tia? ¿Jamüsü aneetka pukuwaʼipa Nuluwataapa Maleiwa?

¿JOUJEEICHE NULUWATAAKA MALEIWA SAAʼU TÜ MMAKAT?

Süküjain tü Wiwüliakat wainmainjatüin kasa alataka süpülapünaa Nuluwataain Maleiwa saaʼu tü Mmakat. Süküjain eejeerüin atkawaa sainküin mma, jamü, ayuulii, sukutkujaain mma otta mojulaweerü maʼin wayuu (Mateo 24:3, 7, 12; Lucas 21:11; Alateetkat Mapeena 6:1-8).

Anuu sooʼomüin tü sümakat tü Wiwüliakat: «Sülüʼütpa sükalia sajaʼttüinjatüin tü kasakat süpüshua. Shiimüin sünain müliainjatüin maʼi wayuu süpüshua soʼu kaʼikat tia. Eejeerü wainma wayuu eekai kapülain naaʼin nakuaippa neʼe namüiwa, eekai kachiiruain naaʼin tü washirüükat, [...] eekai moonooloin sümaa nanüiki nashi je nei, eekai matüjain aapaa analuʼut, je eekai mojutüin Maleiwa natüma. Eejeerü wainma wayuu eekai maalin wayuu napüla, eekai mamülialain amüin wayuu, eekai mojuin nanüiki sujuuna wayuu, eekai maaʼin naaʼin sümaa jashiee, je eekai nayouktüin tü anasükat. [...] eekai yaletayaain nakuaippa suʼupala wayuu, je eekai shaitteein waneepia saaʼu maalin Maleiwa napüla» (2 Timoteo 3:1-4). Kakaliairü mojulaain wayuu, mojulaʼaleepejeʼe shia maaʼulu.

Ekeraajüsü tü sümakat tü Wiwüliakat soʼujee 1914. Naashin na wayuu ashajakana süchiki tü kasa alatüitpakat jee naashin na poliitikokana, amojujaasü maʼin sukuwaʼipa wayuu soʼujee juyakat tia. Müsia neʼe sukuwaʼipa tia naashin Peter Munch, wanee wayuu chejeʼewai Dinamarca ashajüi süchiki kasa alatüirü. Müsü nünüiki: «Amojujaasü maʼin sukuwaʼipa wayuu soʼujeʼereʼeya tü atkawaa eejatkat soʼu 1914. Süchikijee anain maʼin wayuu, amojujaashaatasü sukuwaʼipa, keemasü maʼin tü alatakat otta üttajiraasü saaʼin wayuu sümaa nnojoluin jimatüin saaʼin».

Eeinjatpejeʼe kasa anasü. Jimateerü saaʼin wayuu süchikijee müliaa. Tia kasa aküjünüitpakalü achiki, shiyaawase Nuluwataajeechin Maleiwa saaʼu tü Mmakat soʼu palitchon kaʼi. Naashin Jesuu, aküjüneerü sümüin wayuu «tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua» (Mateo 24:14).

Tü pütchi anasükat shia süpüshi tü kasa nekirajakalü anain na aküjaliikana pütchi nüchiki Jeʼwaa. Müsüjeseʼe shiain weitajüin maʼin tü rewiisütakat Aapiria Wayuu. Aküjasü süchiki Nuluwataaya Jeʼwaa. Aküjünüsü suluʼu tü kasa anasü eeinjatkat saaʼu tü Mmakat Nuluwataapa Maleiwa otta tü naaʼinrajatkat süpüleerua wayuu.

¿KASA NAAʼINRAJATKA SÜPÜLA NULUWATAAIN SAAʼU TÜ MMAKAT?

Waashajaa süchiki pienchisü pütchi.

1. Niainjachi Maleiwa Aluwataakai neʼe nümüiwaʼa. Nnojoishi eeinjachin wanee poliitiko nümaa.

2. Achecheraajeena na poliitikokana sünain aluwatawaa, peʼipaajeena nümaa Maleiwa (Salmo 2:2-9).

3. Najaʼttireena Maleiwa na aluwataaliikana süka nachecheraajeenain süchiirua aluwatawaa (Daniel 2:44; Alateetkat Mapeena 19:17-21). Armagedón sünülia tia atkawaakat saashin tü Wiwüliakat (Alateetkat Mapeena 16:14, 16).

4. Na oonookana nümaa Maleiwa nayeena oʼttaaka süchikijee Armagedón otta jimateerü naaʼin. Eeshiijaʼa watteenale naalii naya wayuukana saashin tü Wiwüliakat (Alateetkat Mapeena 7:9, 10, 13, 14).

¿JAMÜSÜ ANEETKA PUKUWAʼIPA NULUWATAAPA MALEIWA?

Süpüla Nuluwataainjachin Maleiwa waaʼu, weʼraajüinjachi nia. Anuu tü nümakat Jesuu soʼu nuʼuraajüin nümüin Maleiwa: «Kateerü noʼu waneepia chi wayuu ekirajaakai waneepia püchiki piakai chi Maleiwa shiimainshikai otta nüchiki Jesukürisüto, chi püjünalakai» (Juan 17:3, TNM).

Wainma kasa anasü weʼreetka weʼraajüle Maleiwa. Waashajaa süchiki tia. Tü palajatkat kasa shia kooʼomüin wanoula nünain Maleiwa. Sükajee nnojoluin wanoujaʼayatüin neʼe süpaʼa mma, wayaawata aaʼu shiimain Nuluwataajeechin Maleiwa saaʼu tü Mmakat (Hebreokana 11:1). Tü wane shia aijeechin Maleiwa wapüla otta aijeerüin wayuu wapüla. Aire maʼin wapüla Maleiwa, waaʼinreerü süpüshuaʼa tü nuluwataakalü anain waya otta aire wapüla wayuu shieerü waaʼinraka tü nümakat Jesuu soʼu nümüin: «Anasü müleka jaaʼinrüle tü anasükat sümüin wayuu, maa aka jücheküin saaʼinreein tü anasükat jümüin» (Lucas 6:31).

Aneesü wakuwaʼipa nutuma Maleiwa süka Nukumajalain waya. Nücheküin wapüleerua ayatüin waya süchiirua «tü kataa oʼuu aapüneetkat wamüin» (1 Timoteo 6:19, TNM). Nnojotsü anain wakuwaʼipa maaʼulu. Watta maʼin naalii na wayuu müliakana aaʼin waneepia. ¿Jameerü wakuwaʼipa paʼaraiisüpa tü Mmakat? Anuu tü naaʼinreetkat Maleiwa wapüleerua.