¿Alerajüshiche pia wayuu?
Tü alerajaakat wayuu müsü aka saaʼin wanee ayuulii kalataarat sünain wayuu. Eesüjaʼa walerajüle wayuu sümaa nnojoluin waainjeein tia.
Eesü süpüla nülerajünüin wanee wayuu saaʼujee nuumain, nukuwaʼipa, niʼiruku, nünüikipala, saaʼujee tü nunoujakalü anain, washirüle nia jee maʼletsere nia. Eeshii na wayuu ayoujakana na waneinnua saaʼujee ayuulin naya, saaʼujee nayolojo, nakuwaʼipa, nouyase jee tü nekirajaakalü anain, naaʼinruʼu nayakana nnojoishii naya alerajüin wayuu.
¿Wanaawasüche wayuu pümüin? ¿Alerajataapa pia wayuu? Eesüjaʼa piyoujüle nukuwaʼipa wanee wayuu sutuma nülerajüin na waneinnua, eepejeʼe pülerajüle wayuu sümaa nnojoluin paainjeein tia. Suluʼusü waaʼin wapüshuaʼa tü alerajaakat wayuu. Naashin wanee sociólogo David Williams nünülia, mojule nümüin wanee wayuu nakuwaʼipa waneinnua wayuu, «nülerajüin naya sümaa nnojolin niyaawatüin saaʼu».
Jülüjataa waaʼin nukuwaʼipa wanee wayuu Yovitsa nünülia, kepiashi nia chayaa Europa. Müshi nia nachiki waneinnua wayuu kepiakana chayaa: «Mojulaashii naya napüshuaʼa taashin, nnojotpejeʼe tayaawatüin saaʼu talerajüin naya. ‹Shiimainpejeʼe tü jülüjakat taaʼin nachiki›, müshi taya suluʼu taaʼin».
Wainma mma eere kasalajanain atumawaa na wayuu alerajakana wayuu. Mayaainjeʼe müin tia, ayatüshiʼiya eein na wayuu alerajakana na waneinnua. Isasü nachiki na sülaülashiikana mma neeʼiratüin tü suluʼukat naaʼin wanee wayuu jee tü jülüjakat naaʼin. ¿Nnojoleetche mapa tü alerajaakat wayuu?
Sünain tü wane pütchi suluʼukat rewiisütakat tüü wekirajaajeerü anain jaʼraisü pütchi suluʼujeejatka tü Bibliakat atanatka naaʼin waneinnua wayuu suulia nalerajüin wayuu.