Pütüjaainjatü aaʼu shiimainreje shia

Tü mojukalü aaʼujee shia

Alerajünüsü wayuu sutuma tü alawaa aküjünakat nachiki. Anuu waneirua kasa jülüjaka saaʼin wayuu:

Eeshii wayuu jülüjaka aaʼin isain nachiki na jieyuukana naaʼinrüin waneirua aʼyatawaa.
Sümaiwa paala aküjünüsü süchiki ayuulin na wayuukana sutuma nejitüin na judíokana weneena saʼaka tü wüinkat. Alawaapejeʼe tia. Jamüsüjaʼa soʼu naluwataain na kanüliakana nazi chayaa Alemania, aküjünüsü alawaa nachiki na judíokana sünain nayain amojujaain sukuwaʼipa tü mmapaʼakat chayaa. Sutumajee tia alerajünüshii naya jee ayatüshiʼiya alerajünüin naya maaʼulu yaa.
Wainma na jülüjakana aaʼin mojuin naaʼin waneepia na wayuu moʼupaʼakana, masaʼakana jee matünakana.

Na wayuu jülüjakana aaʼin waneirua kasa makalü aka saaʼin tü waküjaitpakalü achiki, ayatüshiʼiya naya nalerajüin wayuu jee mojutusat wayuu namüin nnojorüle wanaawain naaʼin namaa.

Tü sümakat tü Bibliakat

«Nnojotsü anain nnojorüle kasain nütüjaain aaʼu wanee wayuu» (PROVERBIOS 19:2).

¿Jamaluʼulu shia? Nnojorüle watüjaain saaʼu shiimainre wanee kasa, mojeerü tü kasa waneekakat. Wanoujale neʼe tü namakat na waneinnua jee nnojorüle wasakirüin süchiirua wanee kasa, wayoujeerü nakuwaʼipa na waneinnua.

¿Alerajünüsüche wayuu sutuma tü sümakat tü Bibliakat?

Eeshii na wayuu jülüjakana aaʼin eein na alerajakana wayuu sutuma nanoujain sünain tü sümakat tü Bibliakat. ¿Kasa süküjaka tü Bibliakat süchiki tia?

Akumajünüshii waya nünainjee waneeshia wayuu. «Nünainjee waneeshia wayuu, nukumajüin Maleiwa napüshuaʼa na wayuukana» (Aluwataaushikana 17:26).
Nnojotsü koʼuin nukuwaʼipa Maleiwa sümüin wayuu. «[Nnojotsü] koʼuin nukuwaʼipa Maleiwa sümüin wayuu. Anashiisü nakuwaʼipa nümüin na wayuu kojutukana amüin nia otta na aainjakana kasa anasü jaʼitasü naatain noumain» (Aluwataaushikana 10:34, 35).
Niʼrüin Maleiwa tü suluʼukat waaʼin. «Shia jülüjaka saaʼin wayuu tü shiʼrakat, akaajasaʼa Jehová shia jülüjaka naaʼin tü suluʼukat saaʼin wayuu» (1 Samuel 16:7).a

a Jehová nünülia Maleiwa saashin tü Bibliakat.

Anasü piʼraajüle nakuwaʼipa na wayuukana

Piʼrajüle sukuwaʼipa wayuu, nnojoleerü punoujain tü alawaa aküjünakat nachiki. Piyaawatüle saaʼu alawaain tü aküjünakat nachiki waneinnua wayuu, nnojoleerü punoujamaatüin sünain tü alawaa aküjünakat nachiki.

Tü nukuwaʼipapuʼukat: Yovitsa (Europa)

Jintüliiwaʼaya Yovitsa, naapapuʼuin süchiki tü kasa mojusü aküjakat nachiki na wayuu kepiakana pejepünaa nünain otta aapajüshi nia notiisia nachiki naya wayuukana. Anuu nünüiki: «Mojusü nashoʼu tamüin otta üttüsü taaʼin nanain. Anayaasü taaʼinruʼu tü taaʼinrakat.

»Wanaa sümaa surulaalüin taya surulaatpuʼushii tamaa noʼutku naya wayuukana, müsüjeseʼe teʼraajüin maʼin nakuwaʼipa, tekirajaain sünain tü nanüikipalakat otta taapajüin tü muusika naapajakat. Anashi taya namaa. Sutuma tia aʼwanajaasü shiʼipaʼaya tü jülüjakat taaʼin nachiki. Sutuma aneein tü jülüjakat taaʼin nachiki nnojoishi taya aapajüin notiisia, nnojotsü teʼrajüin peliikula jee programa eere mojuin pütchi nachiki. Walerajüle wayuu ütteerü maʼin waaʼin nanain».

Tü eekat süpüla paaʼinrüin

Nnojotsü anain piyoujule nukuwaʼipa wanee wayuu sutuma nnojoluin anain tü naaʼinrakat na wayuu kaʼakakana nia.
Jülüjeesü paaʼin isain püchiki pütüjaain saaʼu kasa süpüshuaʼa nachiki na wayuukana.
Jülüja paaʼin shiimainre tü aküjünakat nüchiki wanee wayuu.