Kapüla paaʼin nakuwaʼipa na waneinnua
Tü mojukalü aaʼujee shia
Jülüjale paaʼin naatain nakuwaʼipa na waneinnua shieerü piʼraka tü mojukat sünain nakuwaʼipa. Eeshiijaʼa pülerajeenale naya süka naatain nakuwaʼipa puulia, müle pukuwaʼipa kapüleejeerü pümüin pümülialüin saaʼin wayuu otta jaʼyeerü paaʼu pülerajüin wayuu.
Tü sümakat tü Bibliakat
«Talata jaaʼin namaa na talatakana aaʼin, jiʼyalaja namaa na aʼyalajakana» (ROMA 12:15).
¿Jamaluʼulu shia? Wayaawata aaʼu sükajee tü wetsiikulokot wamülialüinjatüin saaʼin wayuu otta jülüjainjatüin waaʼin jamüin naaʼin na waneinnua.
Anasü pümüliajüle naaʼin na waneinnua
Kapürale paaʼin nakuwaʼipa na waneinnua, piyaawateerü aaʼu eein tü kasa wanaawaka atuma pia namaa. Eesüjaʼa piyaawatüle saaʼu wanaawain naaʼin wanee wayuu pümaa. Jülüjale paaʼin jamüin naaʼin na waneinnua piyaawateerü aaʼu wanaawain sukuwaʼipa wayuu. Püchajaale maʼin sukuwaʼipa süpüla pütüjaain saaʼu tü kasa wanaawakalü anainjee pia namaa, nnojoleerü piyoujüin nakuwaʼipa na wayuukana.
Kapürale paaʼin nakuwaʼipa na waneinnua, kojuteena naya pümüin. Anne-Marie chejeʼewat Senegal, nnojoishii kojutuin sümüin waneinnua wayuu saaʼujee mojuin pütchi nachiki. Aainjüsü shia wanee kasa süpüla sümülialüin saaʼin wayuu. Anuu tü sümakat: «Wanaa sümaa teʼrüin müliain maʼin naya wayuukana jülüjasü taaʼin jameerüin takuwaʼipa müle tü alatakat tamüin. Tayaawataka saaʼu nnojolin eein wanee wayuu alanaʼaleekai akuwaʼipa noulia na waneinnua». Wachajaale maʼin sukuwaʼipa süpüla watüjaain saaʼu jamüin naaʼin na waneinnua, nnojoleerü mojuin wanüiki nachiki jee nnojoleena wayoujüin naya.
Tü eekat süpüla paaʼinrüin
Pülerajüle wanee wayu püchajaa sukuwaʼipa süpüla pütüjaain saaʼu eein tü kasa wanaawakat amaa nia pümaa. Jülüjataa paaʼin tüü: ¿Jamüsüche naaʼin naaʼinrapa waneirua kasa maʼaka saaʼin tüü?
Jülüjale waaʼin jamüin naaʼin na waneinnua wayaawateerü saaʼu wanaawain nakuwaʼipa na wayuukana.
Nikaapa sümaa nüpüshi.
Süchikijee niʼyataain maʼin.
Yalapa nia namaa na naʼaleewainyuukana.
Naapajapa tü muusika kamalainkat nümüin.
Jülüjataa paaʼin piale alatüin amüin tia. Püsakireʼera paaʼin:
¿Jameetche taaʼin mojutule taya sümüin wayuu?
¿Jameetche taaʼin mojule nanüiki na waneinnua tachiki?
Naʼakale taya na wayuu mojutukana amüinñüü, ¿keeʼireejeetche taaʼin kojutuin taya atumawaa?