Paʼaleewajaa namaa waneinnua wayuu
Tü mojukalü aaʼujee shia
Nnojorüle waʼaleewajaain namaa na wayuu nnojoliikana anain amaa waaʼin, eesüjaʼa walerajerüle wayuu sutuma tia. Waʼaleewajaale neʼe sümaa wayuu wanaawaka aaʼin wamaa, anteerü suluʼu waaʼin shiain neʼe anaka tü jülüjakat waaʼin jee tü wakuwaʼipakat.
Tü sümakat tü Bibliakat
«Shia anaka aluʼu kooʼomüinre saalin wayuu jüpüla» (2 CORINTO 6:13).
¿Jamaluʼulu shia? Süküjain tü Bibliakat kooʼomüinjatüin saalin wayuu püpüla. Aʼaleewale pia namaa na wayuu wanaawakana aaʼin pümaa, nnojoleerü pükooʼomüinrüin saalin wayuu püpüla, müshijeseʼe paʼaleewajainjachin sümaa wayuu jaʼitairü naatain sukuwaʼipa puulia.
¿Jamüsü anaka paʼaleewajaale sümaa waneirua wayuu?
Piʼraajüle wanee wayuu piyaawateerü aaʼu jamüin maka sukuwaʼipa wanee kasa nutuma. Sükooʼomüinraapa naalin püpüla nnojoleerü jülüjain paaʼin naatain nukuwaʼipa puulia, kojuteechi nia pümüin jee kapüleerü paaʼin nukuwaʼipa.
Jülüjataa paaʼin tü alatakat sümüin Nazaré, süpüla suuʼulaain suulia alerajaa na wayuu naatakana oumain. Müsü shia: «Wanaa sümaa talatirüin kaʼi namaa jee taʼyataajiraain namaa, tayaawata aaʼu naatain maaʼin nakuwaʼipa suulia tü aküjünapuʼukat nachiki. Paʼaleewajaale namaa na wayuu naatakana akuwaʼipa, aijeena naya püpüla jee kojuteena naya pümüin otta nnojoleena naya piyoujüin».
Tü eekat süpüla paaʼinrüin
Püchajaa sukuwaʼipa süpüla yootuin pia namaa na wayuu naatakana oumain, eʼiruku jee anüikii puulia. Anasü paaʼinrüle tüü:
Puchunta namüin nakuentajüin pümüin süchiki nakuwaʼipa.
Puunejaa naya pipialuʼumüin sünain wanee ekawaa.
Paapaja nanüiki jee jülüjaa paaʼin tü kojutukat maʼin namüin.
Püchajaale sukuwaʼipa süpüla piyaawatüin saaʼu tü alatakat namüin, aʼwanajaajeerü tü jülüjakat paaʼin nachiki jee nnojoleena naya pülerajüin.