¿Jameerü pukuwaʼipa sutuma computador jee serulaat pikirajaapa?

Ekirajaashii waya waneepia maʼaka saaʼin wekirajaain suluʼu koleejia, waʼyataaleruʼu jee sünain waneirua kasa. Jalouisü wapüla computador jee serulaat süpüla waaʼinrüin tia. Maaʼulu yaa, mapüleeitpa maʼin wapüleerua tü kasa wekirajaainjatkalü anain, jama eeitpain wamaʼana computador jee serulaat.

Anuu tü alateetkat namüin na wayuu waneepiakana sünain computador jee serulaat:

Kapüleejeerü namüin jülüjain naaʼin tü naashajeʼerakat.
Iseerü nachiki naaʼinmaain waneesia kasa naʼyataaka anain.
Nnojoleerü naaʼin sünain aaʼinraa wanee kasa namüiwaʼapa naya.

PÜTÜJAAINJATKA AAʼU

Wainma kasa saaʼinraka wanee wayuu sümaʼinruʼu suluwataain mensaaje, saashajaain suluʼupünaa videoconferencia, shikirajaain süka computador jee saashajeʼerüin wanee karaloʼuta.

WATTEERÜ PAAʼIN SUULIA TÜ PAASHAJEʼERAKAT

Eeshii wayuu kajaalapükana sünain aashajeʼeraa pütchi sümaa nnojoluin jülüjain naaʼin shia.

Pütüjaamaateerüle saaʼu wanee kasa, eeshi süpüla kajaalapüin pia sünain aashajeʼeraa. Nnojotpejeʼe anain tia piyaawateere saaʼu wanee kasa.

JÜLÜJA PAAʼIN TÜÜ: ¿Akulajaasüche paaʼin sünain aashajeʼeraa wainma pütchi? ¿Atüjeeiche pia paashajeʼerüle wainma pütchi? (PROVERBIOS 18:15).

ISEERÜ PÜCHIKI PAAʼINMAAIN WANEESIA KASA

Eeshii wayuu anakana amüin naaʼinrüle piamasü kasa uatuwoʼushi, maʼaka saaʼin naluwataain mensaaje namüin naʼaleewainyuu sümaʼinruʼu nekirajaain. Paaʼinrüle tia nnojoleerü anain sukuwaʼipa tü kasa paaʼinrakat, jama isain süchiki wayuu saaʼinrüin piamasü kasa uatuwoʼushi.

Eesü süpüla kamalain wamüin waaʼinrüin wainma kasa uatuwoʼushi, anapejeʼe maʼin waaʼinmaale waneesia süpüla anain maʼin shia. Anuu sünüiki wanee majayüt kanüliasü Grace: «Paaʼinmaale waneesia kasa paaʼinrüinjatka, nnojoleerü puʼtchejaain maʼin sümaa tia otta nnojoleerü shapaain maʼin paaʼin».

JÜLÜJA PAAʼIN TÜÜ: Paaʼinrüle wainma kasa sujuunaluʼu pikirajaain, ¿piyaawateetche saaʼu tü paashajeʼerakat? (PROVERBIOS 17:24).

NNOJOLEERÜ PAAʼIN SÜNAIN AAʼINRAA KASA PÜMÜIWAʼAPA

Eeshii waneinnua wayuu mamalainka amüin namüiwaʼain sümaa nnojoluin kasain naaʼinrüin, müshiijeseʼe waneepiain naya suluʼupünaa computador jee serulaat. Anuu sünüiki Olivia: «Akulajaasü taaʼin nnojorüle teirakaain sümüin taserulaatse, tataablein jee tanajüin telewisoot».

Choʼujaasü wamüin woʼunuin eere yüütüülin süpüla jülüjain waaʼin tü wekirajaakalü anain. Waaʼinrüle tia makateerü shia suluʼu wekii.

JÜLÜJA PAAʼIN TÜÜ: ¿Pajayatüinche tü kaʼi pümüiwaʼakalü oʼu süpüla jülüjain paaʼin wanee kasa? (1 TIMOTEO 4:15).

PUUʼULAKA PAAʼINRÜIN TÜÜ

SUKUWAʼIPAINJATKA PUTUMA

¿Jalouijeetche pümüin computador jee serulaat süpüla pikirajaain? ¿Paaʼinmaajeetche tü pikirajaakalü anain sutuma?

TÜ SÜMAKAT TÜ BIBLIAKAT: «Kojuta pümüin tü kekiwaakat otta piyaawata saaʼu tü paaʼinrüinjatkat» (PROVERBIOS 3:21).

PÜSAKIRA PAAʼIN SÜNAIN TÜÜ:

¿Isasüche tachiki tayaawatüin saaʼu wainma pütchi soʼu taashajeʼerüin suluʼu serulaat jee computador? ¿Jamüsü kapüleeka tamüin tia?
¿Kasa taaʼinrajatka süpüla tayaawatüin saaʼu tü taashajeʼerakat?

Puuʼulaka paaʼinrüin tüü: Süpüla kiʼrainjachin pia sünain aashajeʼeraa wainma pütchi, anashi puʼttüle sünain aashajeʼeraa maʼaka jeʼrasü pütchi neʼe. Paashajeʼera sümaa jiattain pünüiki süpüla jülüjain shia paaʼin.

¿Kasa taaʼinrajatka süpüla tasakireʼerüin taaʼin sünain tü taashajeʼerakat suulia tawataain sünain?

Puuʼulaka paaʼinrüin tüü: Süpülapünaa kettaain putuma tü paashajeʼerakat, pükatala poloo minuuto süpüla jülüjain paaʼin tü paashajeʼerüitpakat.

¿Kasache taaʼinrawaika atuma wainma kasa nnojotka jülüjain atuma taaʼin tü taashajeʼerakat?
¿Kasa taaʼinrajatka süpüla taaʼinmaain waneesia kasa taaʼinraka?

Puuʼulaka paaʼinrüin tüü: Paashajeʼerüinjachipa wattaluʼu putuma tü kasa eekat süpüla shikeʼejüin aaʼin pia.

TÜ SÜMAKAT TÜ BIBLIAKAT: «Püchajaa sukuwaʼipa süpüla kekiinjachin maʼin pia jee süpüla piyaawatüinjatüin saaʼu wanee kasa» (PROVERBIOS 4:5).