¿Jameerü pukuwaʼipa sutuma computador jee serulaat sümaa puʼwayuuse?

Mojule natuma sukuwaʼipa computador jee serulaat eesü süpüla sülatüin namüin tüü:

• Nnojoleerü asetaain kaʼi napüla süpüla kottiraain naya.

• Naaʼinmaajeerü naʼyataain sümaa nnojoluin choʼujaain shia.

• Nounjulajeerü süchiki kasa naaʼinraka waneʼewai nakua jee naaʼinreerü kasa mojushiijeetka namüin waneʼewai nakua.

PÜTÜJAAINJATKA AAʼU

NNOJOLEENA KOTTIRAAIN JIA

Anuu nünüiki Michael: «Müsü nnojotkai eein tamaa taʼwayuuse sutuma saaʼinmaain süserulaatse. ‹Nnojotsü alein taaʼin, eiwaʼalajatia taashajeʼerüin tü mensaajekat›, müsü shia tamüin». Anuu nünüiki Jonathan: «Eeshi süpüla yalain wanee wayuu sümaa nuʼwayuuse sümaa müin wattakai naaʼin suulia».

JÜLÜJA PAAʼIN TÜÜ: ¿Kiʼrasüche taaʼin sünain asoutaa sümüin wanee llamada jee sünain anajaa mensaaje yootopa taya sümaa taʼwayuuse? (ÉFESO 5:33).

JAAʼINMAAJEERÜ MAʼIN JIʼYATAAIN

Eeshii noʼutku wayuu siraakana kaʼi naaʼu sünain aʼyatawaa, akaʼaya chapa naya nepialuʼu ayatüshiʼiya asoutuin sümüin llamada, anaʼlaain sümüin correo jee aluwanaajüin mensaaje. Anuu nünüiki Lee: «Soʼu tü kaʼi sümaakalü oʼu taya taʼwayuuse, isasü tachiki tachecherüin taaʼin suulia tasoutuin sümüin wanee llamada jee mensaaje antaka taʼyataaleruʼujee». Anuu sünüiki Joy, aʼyataasü shia shipialuʼujee: «Eesü kapüleere maʼin tamüin teemeraainjatüin suulia taʼyataain, tachecherüinjatpejeʼe taaʼin suulia waneepiain taya sünain».

JÜLÜJA PAAʼIN TÜÜ: Yootojiraapa jia, ¿kapülasüche jaaʼin jünüiki? (LUCAS 8:18).

JUUNJULAJEERÜ SÜCHIKI KASA

Naashin wainma wayuu aʼülüjaajiraashii naya namaa naʼwayuuse sutuma naliʼrajüin sünainjee tü neʼitaakat suluʼupünaa redes sociales. Eeshii na aküjakana shiimain neʼitaain kasa sujuuna naʼwayuuse suluʼu redes sociales.

Sutuma tia, wainma wayuu jülüjakana aaʼin eein süpüla mojuin nakuwaʼipa sümaa naʼwayuuse sutuma redes sociales otta eesü süpüla kawalaʼatain shia natuma. Nnojotsü ponuin waaʼin tü namakat waneinnua abogado süchiki nooʼulaajiraain na wayuukana suulia naʼwayuuse sutuma tü naaʼinrakat suluʼupünaa redes sociales.

JÜLÜJA PAAʼIN TÜÜ: ¿Puunjulajüinche suulia puʼwayuuse tü mensaaje puluwataakat suluʼupünaa redes sociales? (PROVERBIOS 4:23).

PUUʼULAKA PAAʼINRÜIN TÜÜ

TÜ JAAʼINMAAINJATKAT MAʼIN

Nnojorüle anain niküin wanee wayuu, eeshi süpüla ayuulin nia. Akaataajaʼa wanee wayuu nnojoikai aaʼinmajüin nukuwaʼipa sümaa nuʼwayuuse, mojeerü nukuwaʼipa (Éfeso 5:28-30).

Jejeetta tü juuʼulaküinjatkat jee shiale jüshajüin tü eekat süpüla mojuin atuma jukuwaʼipa sutuma computador jee serulaat.

• Kottiraainjana waya sünain ekawaa uwatuayaakaijeʼe süpüla kaʼikat.

• Wachajaainjatü sukuwaʼipa süpüla nnojoluinjatüin waneepiain wamaʼana computador jee serulaat.

• Waaʼinra wanee kasa wayaaluʼu jaʼyeetka atuma waaʼu aijiraain waya.

• Wayokojooinjatü computador jee serulaat aipaʼawai jee wattaluʼuinjatü shia woulia.

• Wakatalawai 15 minuuto süpüla waashajaain sümaa nnojoluin computador jee serulaat wamaʼana.

• Waneeküinjatü jalapüshinjatüin wayokojooin internet.