1 Kojuta jümüin sukuwaʼipa kaʼwayuusee

¿KASA SÜNAINPÜNAAKA?

Na kojutukana amüin sukuwaʼipa kaʼwayuusee, jülüjasü naaʼin waneepiainjanain naya sümaa naʼwayuuse otta anasü naaʼin sutuma tia. Jülüjasü naaʼin nnojoleenain nooʼulaajiraain jaʼitasü kasain alatüin namüin.

Eeshii na nnojoliikana ooʼulaain suulia naʼwayuuse saaʼujee sütaʼünnüin nakuwaʼipa sutuma napüshi jee naʼaleewainyuu. Shiapejeʼe anain aluʼu ayatüleʼeya naya sümaa naʼwayuuse saaʼujee aijiraain jee kojutujiraain naya.

TÜ SÜMAKAT TÜ WIWÜLIAKAT: «Jiakana tooloyuukana, nnojo juuʼulaain suulia juʼwayuuse» (1 Corinto 7:11).

«Kojutule pümüin sukuwaʼipa kaʼwayuusee, nnojoleechi pia ashichijaamatüin saaʼujee wanee kasa eekai eein. Moteerü paaʼin saainjala puʼwayuuse otta nnojoleerü kapüleein pümüin puchuntüin sümüin motuinjatüin saaʼin paainjala. Sülatüle kasa mojusü jümüin, nnojoleerü jülüjain jaaʼin juuʼulaajiraainjanain saaʼujee tia» (Micah).

¿JAMÜSÜ CHOʼUJAAKA JAAʼINRÜIN TIA?

Mojutule tü sukuwaʼipakat kaʼwayuusee namüin na wayuu kaʼwayuuseshiikana, mojujiraapa naya eesüjaʼa jülüjeerüle naaʼin nnojoluin wanaawain nakuwaʼipa sümaa naʼwayuuse otta eesüjaʼa nachajaweerüle sukuwaʼipa süpüla nooʼulaajiraain.

«Wainma na wayuu kasaatkana sümaa jülüjain naaʼin eein süpüla nooʼulaajiraain mapa suulia naʼwayuuse, müle tü jülüjakat paaʼin, shia sutuma nnojoluin kojutuin pümüin sukuwaʼipa kaʼwayuusee» (Jean).

¿KASA EEKA SÜPÜLA PAAʼINRÜIN?

PÜSAKIREʼERA PAAʼIN

¿Kasache paaʼinraka püʼülüjiraapa sümaa puʼwayuuse?

• ¿Mojusüche paaʼin saaʼujee kasaalüin pia sümaa?

• ¿Jülüjasüche paaʼin jamüinje pukuwaʼipa maaʼulu naatale tü kasaatkalü amaa pia?

• «Tooʼulaweerü pia jee tachajaweerü wanee wayuu naatajatü eekai kojutuin amüin taya», ¿maʼwaishiche pia sümüin?

«Aa, maʼwaishi taya», pümüle shiʼipajee wanee jee piama asakiraa, choʼujaasü püchajaain maʼin sukuwaʼipa süpüla kojutuinjatüin pümüin sukuwaʼipa kaʼwayuusee.

YOOTO JIA SÜCHIKI TÜÜ

• ¿Mojutuitpache wamüin sukuwaʼipa kaʼwayuusee? Müle shia, ¿kasa mojutka anainjee shia wamüin?

• ¿Kasa waaʼinrajatka süpüla kojutuleʼeinya wamüin sukuwaʼipa kaʼwayuusee?

PUUʼULAKA PAAʼINRÜIN TÜÜ

• Püshajawai karaloʼuta nümüin puʼwayuuse eere püküjain nümüin alin nia püpüla.

• Pümaʼana niyaakua puʼwayuuse piʼyataaleruʼu.

• Peenaja nia waneepia, chale nia niʼyataaleruʼu jee jalapünaale nia.

TÜ SÜMAKAT TÜ WIWÜLIAKAT: «Saʼaniraapa nukuaippa wane wayuu toolo sumaa wane jierü nütüma Maleiwa, nnojotsü anain süpüla sükatajiraanüin sütüma wayuu» (Mateo 19:6).