3 Kojutujiraa Jia

¿KASA SÜNAINPÜNAAKA?

Chi wayuu kojutukai amüin nuʼwayuuse, jülüjasü naaʼin jamüin saaʼin jaʼitainna nnojoliin paaʼinwajiraain naya sünain wanee kasa. Müsü wanee karaloʼuta süchiki tia: «Chi wayuu makai akuwaʼipa, nnojoishii ichekuʼu müin süchiirua tü nümakat. Yootushi nia sümaa nuʼwayuuse süchiki tü mojujiraakalü anainjee naya. Kapülasü naaʼin tü sümakat nuʼwayuuse nümüin otta nachajaain maʼin sukuwaʼipa süpüla anajiraain naya» (Diez claves para transformar tu matrimonio).

TÜ SÜMAKAT TÜ WIWÜLIAKAT: «Aire wapüla wayuu nnojoleerü kapülain waaʼin wakuwaʼipa wamüiwaʼa» (1 Corinto 13:4, 5, TNM).

«Süka kojutuin tamüin tü taʼwayuusekat kapülasü taaʼin sukuwaʼipa otta nnojotsü taaʼinrüin wanee kasa mojeetka atuma saaʼin jee mojujiraajeenaka anainjee waya» (Micah).

¿JAMÜSÜ CHOʼUJAAKA JAAʼINRÜIN TIA?

Chi wayuu mojutkai amüin nuʼwayuuse, eesü airuʼurule nünüiki sümüin, niyoujule shia otta kanüikeepale nia suʼupalapünaa. Naashin na ekirajaakana süchiirua sukuwaʼipa kaʼwayuusee, sülatüle tia namüin na kaʼwayuuseshiikana eeshiijaʼa nooʼulaajiraajeenale sünainjee.

«Airuʼurule pünüiki sümüin puʼwayuuse, kanüikeepale pia suʼupalapünaa otta pimeeʼerainparale shia, mojeerü saaʼin putuma, mojuteechi pia sümüin otta amojujaajeerü pukuwaʼipa sümaa» (Brian).

¿KASA EEKA SÜPÜLA PAAʼINRÜIN?

PÜSAKIREʼERA PAAʼIN

Jülüja paaʼin jamawaliin jünüiki yootopa jia otta jamüin pukuwaʼipa nümüin puʼwayuuse soʼu tü semaana alatakat. Süchikijee, pusouta shiʼipajee pütchikat tüüirua:

• ¿Jeʼratua tayoujuin taʼwayuuse otta jeʼratua anain tanüiki nümüin?

• ¿Kasache teeʼiyataka akajee kojutuin nia tamüin?

YOOTO JIA SÜCHIKI TÜÜ

• ¿Kasa piiʼiyataka akajee kojutuin taya pümüin?

• ¿Kasa piiʼiyataka akajee mojutuin taya pümüin?

PUUʼULAKA PAAʼINRÜIN TÜÜ

• Jüshaja suluʼu wanee karaloʼuta apünüinsü kasa eeʼiyatüneeka akajee jujutü jümüin. Kettaapa jutuma, eesü süpüla paapüin sümüin puʼwayuuse tü püshajakat otta saapüinjatü pümüin tü süshajalakat. Jiʼyataa maʼin süchiirua jaaʼinrüinjatüin tü jüshajakat.

• Püshaja suluʼu wanee karaloʼuta tü kasa kamalainkat pümüin sünainjee nukuwaʼipa puʼwayuuse jee püküja nümüin kojutuin pümüin müin nukuwaʼipa.

«Teeʼiyatüin nujutü chi taʼwayuusekai nümüin sükajee tü kasa taaʼinrakat nüpüleerua. Taaʼinrüin tia süka talateein naaʼin tatuma. Nnojotsü choʼujaain wainmainjatüin kasa paaʼinraka süpüla piiʼiyatüin nujutü puʼwayuuse pümüin, eesü süpüla paaʼinrüin tia sükajee neʼe tü kasa paaʼinrakat jee tü pümakat nümüin» (Megan).

Jaʼitashi müin kojutukai naaʼin puʼwayuuse pümüin, tü anaʼleekat maʼin shia niyaawatüle saaʼu kojutuin nia pümüin.

TÜ SÜMAKAT TÜ WIWÜLIAKAT: «Anakaja müleka kachiiruale jaaʼin tü nüchekakat jüpüleerua, maa aka kamaneein jia sümüin wayuu süpüshua, maa aka jümüliajüin eekai müliain, maa aka nnojolüin pülayaain jaaʼin suulia wayuu je maa aka nnojolüin juuʼulaain suulia akaaliijaa shia mayaashiije nnojolüin jaaʼa müin jümüin» (Colosas 3:12).