Nnojotka natüjaain aaʼu na científicokana

Mayaainjeʼe nekirajaain maʼin anain na científicokana tü kasa neʼrakat chaa iipünaa, wainmayülia kasa nnojotka natüjaain aaʼu.

¿Eesüche süpüla naküjain na científicokana jamakuwaʼipalüin sukumajaain tü kasakalüirua? Nnojo, isasü nachiki. Wainma na jülüjakana aaʼin eein süpüla naküjain wamüin na científico ekirajaakana sünain tü kasa chakalü iipünaa jamakuwaʼipalüin sukumajaain tü kasakalüirua. Jülüja waaʼin tü nümakat Marcelo Gleiser, ekirajüshi nia suluʼu Universidad chajatka Dartmouth jee anoujashi sünain nnojoluin süpüla watüjaain saaʼu eein chi kakumajalakai tü kasakalüirua, müshi nia: «Mayaainjeʼe wainmairüin kasa watüjaaitpaka aaʼu süchiki sukuwaʼipa tü kasa chakalü iipünaa, nnojotsü watüjaain aaʼu jamakuwaʼipalüin sukumajaain tia».

¿Eesüche süpüla süküjünüin jamakuwaʼipalüin katüin soʼu kasa yaa mmapaʼa? Anuu sünüiki tü rewiisütakat Science News: «Kapüleesü shiyaawatünüin maʼin aaʼu jamakuwaʼipalüin katüin soʼu kasa yaa mmapaʼa, jama nnojoluitpain eein tü palajatkalüirua ipa jee shiipüse kasa eeka süpüla shikirajaanüin anain tia». Sünainjee tü nümakat Marcelo Gleiser otta tü sümakat tü rewiisütakat Science News, wayaawata aaʼu isain nachiki na científicokana naküjain jamakuwaʼipalüin sukumajaain tü kasa chakalü iipünaa jee tü yaakat mmapaʼa.

Eesüjaʼa püsakireʼerüle paaʼin sünain tüü: «Sukumajuushire tü kasa katakalü oʼu yaa mmapaʼa, ¿jarai kakumalakai shia? Shiimainre eein wanee Kakumalakai kasa eekai anamiain jee kekiin, ¿jamüsü nuuʼulaaka eein müliaa? ¿Jamüsü nuuʼulaaka eein watta saalii iküleesia? ¿Jamüshii nuuʼulaaka naainjain kasa mojusü na anoujayaashiikana?».

Isasü nachiki na científicokana naküjain tia wamüin. Wainmapejeʼe na wayuu atüjaakana saaʼu tia pütchikat sükajee tü sümakat tü Bibliakat.

Eeshii waneinnua científico ekirajaakana sünain tü sümakat tü Bibliakat. ¿Pütüjawee aaʼu kasain nayaawatüin atuma shiimain eein chi Kakumalakai tü kasakalüirua? Püchajaa suluʼu jw.org tü videokalüirua eekat suluʼu «Tü münakat süchiki jamakuwaʼipalüin kasakalüirua süpüshuaʼa».

Anoujashii waneinnua científico

Gueorgui Koidán, nia wanee químico

Aʼyataashi taya sünain epeipajaa molécula, müsü aka saaʼin ashaitaa ajedrez, atüjaanüinjatü aaʼu jalainjatüin eʼitaanüin wanee kasa. Motule paaʼin paaʼinrüin wanee kasa, amojujaasü tü moléculakat. Müsü kapüleekai saaʼin taʼyataain, mapüleepejeʼe shia suulia tü aʼyataakat süleʼeruʼu wanee célula süpüla sukumajüin molécula. Müsüjeseʼe tanoujain sünain eein chi Kakumalakai kasa süpüshuaʼa.

Toʼttapa sünain ekirajawaa sünain tü Bibliakat tayaawata aaʼu nnojoluin müin aka saaʼin tü wane karaloʼutairua. Eetaairü maʼaka 2.000 juya ashajünüin shia, mayaainjeʼe müin tia, jalouisü maʼin wamüin tü sümakat. Shiimain aneerüin wakuwaʼipa waaʼinrüle tü sümakat süchiki tü wakuwaʼipainjatkat namaa na wapüshikana, na waʼyataajiraakana amaa otta na kepiakana waʼütpünaa. Sutuma müin tia, tanouja anainrü nümaʼanajeejatüin tia pütchikalüirua wanee eekai kekiin maʼin.

Yan-Der Hsuuw, nia wanee embriólogo

Wanaa sümaa nukumajaain wanee joʼuu süleʼeruʼu nii, aʼyataajiraasü süpüshuaʼa tü célulakat süpüla sukumajaain nüsüla chi joʼuukai, niʼiruku, niipüse, nüsha otta waneirua kasa. Nnojotsü wayaawatüin maʼin saaʼu jamakuwaʼipalüin süpüshuaʼa tia. Saaʼin tamüin, eeshi chi Kakumalakai tü kasa katakalü oʼu jee kekiishi maʼin nia.

Süküjain tü Bibliakat suluʼu Salmo 139:15, 16, jamakuwaʼipalüin nukumajaain wanee joʼuu süleʼeruʼu nii. Saaʼin tamüin shia neʼe tü natüjaakalü aaʼu na científicokana jekenainka. ¿Jamakuwaʼipat süpüla süküjain tü Bibliakat nukumajaain wanee joʼuu süleʼeruʼu nii mayaainjeʼe kakaliairüin süshajünüin? Niajaʼa aküjaka chi Kakumalakai tü kasakalüirua nümüin chi ashajakai tia salmokot.

Pünaʼla suluʼu jw.org tü videokot Rocío Picado Herrero: Una profesora de Química explica por qué cree en Dios (Alijunaikiruʼusü). Eesü sooʼomüin suluʼu jw.org.