Watüjaainjatü aaʼu tia
¿Jamüsü anaka watüjaale saaʼu shiimainre eein wanee Kakumalakai kasa süpüshuaʼa? Süka keeʼireejeerüin waaʼin watüjaain saaʼu shiimainre nümaʼanajeejatüin Maleiwa tü Bibliakat. Punoujale sünain tü sümakat tü Bibliakat piʼreerü tü kasa anasü waashajaainjatkalü achiki.
Talateerü maʼin paaʼin
TÜ SÜMAKAT TÜ BIBLIAKAT: Anasü tü kasa naaʼinrakat Maleiwa. «Niaʼa aʼititka tü juyakat jaaʼu, otta nia aapaka tü aʼttieekat jümüin juyapü. Je niaʼaya aapaka jümüin tü jikakat waneepia süpüla [...] talatüinjatüin jaaʼin» (Aluwataaushikana [Hechos] 14:17).
¿JAMALUʼULU TIA? Talatüsü paaʼin sümaa tü nukumajalakat Maleiwa. Talataleejeeria maʼin paaʼin sümaa tia pütüjaapa saaʼu süküjain tü Bibliakat sünain jülüjain pia naaʼin.
Aneerü pukuwaʼipa
TÜ SÜMAKAT TÜ BIBLIAKAT: «Piyaawateetkalaka saaʼu tü anakat, tü lotokat, tü nnojotkat kachekalaʼatalüin atuma wayuu, süpüshuaʼa tü anakat süpüla paaʼinrüin» (Proverbios 2:9).
¿JAMALUʼULU TIA? Süka niain Maleiwa Kakumalain pia, nütüjaa aaʼu tü talatüinjatkalü atuma paaʼin. Pikirajaale sünain tü Bibliakat puusüteerü anain pütchi aneetka atuma pukuwaʼipa.
Süküjeerü pümüin tü püsakirakalü anain
TÜ SÜMAKAT TÜ BIBLIAKAT: «Pütüjaajeerü saaʼu tü nütüjaakalü aaʼu Maleiwa» (Proverbios 2:5).
¿JAMALUʼULU TIA? Piyaawatüle saaʼu shiimain eein chi Kakumalakai kasa, pütüjaweerü saaʼu tü paaʼinrajatkat süpüla talatüin paaʼin, jamüin joutka müliaa otta kasain alatüin sümüin wayuu outapa shia. Pansaajeerü maʼin pümüin tia sükajee tü sümakat tü Bibliakat.
Paʼatapajeerü kasa anasü
TÜ SÜMAKAT TÜ BIBLIAKAT: «Anuu tü pütchi niweetirakat Jehová: ‹Tatüjaa aaʼu tü taainjüinjatkat jüpüleerua, nnojoleena jia müliain aaʼin. Taapeerü wanee anaa jümüin otta aneerü jukuwaʼipa tatuma watta kaʼi›» (Jeremías 29:11).
¿JAMALUʼULU TIA? Nüküjain Maleiwa najaʼttireerüin tü mojulawaakat, tü müliaakat jee tü outaakat. Piʼitaale paaʼin sünain tü nümakat yalayaleerü paaʼin soʼunnaa müliaa.