EKIRAJAAYA 02
Süküjain tü Bibliakat süchiki tü kasa anasü eeinjatkat mapeena
Alatüsü kasa mojusü sümüin wayuu mojuka atuma saaʼin, shapaaka atuma saaʼin jee müliaka atuma saaʼin. ¿Alatüitche pümüin wanee kasa mojusü müliaka atuma paaʼin? Eesüjaʼa müliale paaʼin sutuma ayuulii jee nünaajaale wanee püpüshi. Eesüjaʼa jülüjale paaʼin sunoutaajeerüin soʼu wanee kaʼi tü kasa mojusü alatakat. Anoutaajeerü saashin tü Bibliakat otta anasü waaʼin sutuma.
1. ¿Kasa anasü eejeetka mapeena saashin tü Bibliakat?
Süküjain wamüin tü Bibliakat jamüin sülataka kasa mojusü sümüin wayuu. Süküjainya wamüin sunoutaajeerüin soʼu palitchon kaʼi tü kasa mojusü alatakat. Sünainjee tü sümakat tü Bibliakat aneerü paaʼin süka pütüjaain saaʼu «sunoutaajeerüin pukuwaʼipa mapeena» (paashajeʼera Jeremías 29:11, 12). Katchinsü waaʼin sutuma tü sümakat tü Bibliakat jaʼitairü kasain alatüin wamüin, talatüsü waaʼin maaʼulu otta talateerü waaʼin waneepia.
2. ¿Jamüsü sünüiki tü Bibliakat süchiki tü kasa anasü eejeetkat mapeena?
Saashin tü Bibliakat «müiria nnojolüin ouktaa, mojuu aaʼin, aʼyalajaa, je saalii ayuulii» (paashajeʼera Alateetkat Mapeena [Apocalipsis] 21:4). Müiria nnojoluin eein tü kasa mojusü alatakat, maʼaka saaʼin maʼletsee, saainjünüin kasa mojusü sümüin wayuu, ayuulii jee outuin wayuu. Süküjain tü Bibliakat kateerüin soʼu wayuu waneepia anapa maʼin tü Mmakat.
3. ¿Kasa paaʼinrajatka süpüla pütüjaain saaʼu shiimainre shikeraajeerüin tü sümakat tü Bibliakat?
Wainma na wayuu keeʼireekana aaʼin sunoutaain tü kasa alatakat, nnojotpejeʼe natüjaain saaʼu müleka shiimainre sunoutajeerüin. Akaajasaʼa tü sümakat tü Bibliakat shiimain shikeraajeerüin. Wekirajaʼawaire sünain «tü karaloʼuta nüchikimaajatkat Maleiwa», wanoujeerü sünain shikeraajeerüin tü sümakat (Aluwataaushikana [Hechos] 17:11). Pikirajaale sünain tü Bibliakat, piyaawateerü aaʼu müleka eere süpüla punoujain sünain tü sümakat.
WEKIRAJAA SOOʼOMÜIN
Wekirajaa sünain waneirua kasa ekeraajeetka mapeena saashin tü Bibliakat. Wekirajaa süchiki sükatchinrüin saaʼin wayuu tia pütchikat.
4. Süküjain tü Bibliakat kateerüin woʼu waneepia otta aneerüin wakuwaʼipa
Ashajünüsü waneirua pütchi yala wünaapünaa ekeraajeetka saashin tü Bibliakat. ¿Jarat tü anakat saaʼin pümüin süpüla shikeraajeerüin? ¿Jamüsü anaka saaʼin pümüin süpüla shikeraajüin tia?
Jaashajeʼera tü wetsiikulo yalakat wünaapünaa jee yooto jia süchiki tüü:
¿Akatchinraasüche naaʼin wanee wayuu sutuma türa pütchikalüirua? ¿Akatchinraajeetche naaʼin püpüshi jee paʼaleewainyuu sutuma türa pütchikalüirua?
¿Jamüsüjeʼe paaʼin shikeraajüle süpüshuaʼa türa pütchikat?
NNOJOLEERÜ JARALÜIN... |
TALATEERÜ NAAʼIN NA WAYUUKANA SUTUMA... |
|---|---|
|
|
|
|
|
|
|
|
|
|
5. Anoutaajeerü wakuwaʼipa watüjaale saaʼu tü kasa eeinjatkat saashin tü Bibliakat
Wainma na wayuu yüülakana aaʼin otta na jashichikana sutuma tü kasa mojusü alatakat saaʼu tü mmakat. Eeshiʼiya na achajaakana sukuwaʼipa süpüla nanouteʼerüin tü kasa alatakat. Wainmapejeʼe na wayuu anoutaakana akuwaʼipa sutuma natüjaain saaʼu tü kasa eeinjatkat saashin tü Bibliakat. Jünaja tü VIDEOKOT otta yooto jia süchiki tüü:
Suluʼu tü video wanajakat, ¿kasa tü nnojotkalü anain sümüin Rafika?
Mayaainjeʼe nnojoluin sunoutaain tü kasa nnojotkalü anain sümüin, ¿kasa saaʼinraka sutuma tü sümakat tü Bibliakat?
Watüjaale saaʼu tü kasa eeinjatkat saashin tü Bibliakat, katsüinjeerü waaʼin sülatüle kasa mojusü wamüin. Jaashajeʼera Proverbios 17:22; Roma 12:12 otta yooto jia süchiki tüü:
¿Anoutaajeetche pukuwaʼipa sutuma pütüjaain saaʼu tü kasa anasü eeinjatkat saashin tü Bibliakat? ¿Jamüsü sunoutaajeetka pukuwaʼipa sutuma tia?
EESHII WAYUU EEKAI NAMÜIN: «Alawaa neʼe tü sümakat tü Bibliakat».
¿Jamüsü anaka pikirajaale sünain tü Bibliakat süpüla pütüjaain saaʼu shiimain tü sümakat?
WATÜJAAITPAKA AAʼU
Wainma tü kasa eejeetkat mapeena saashin tü Bibliakat. Talatüsü waaʼin maaʼulu sutuma tia otta akatchinraasü waaʼin jaʼitasü kasain alatüin wamüin.
Pusouta shiʼipajee
¿Jamüsü choʼujaaka sümüin wayuu sütüjaain saaʼu tü kasa eeinjatkat saashin tü Bibliakat?
¿Jamüsü sünüiki tü Bibliakat süchiki tü kasa eeinjatkat mapeena?
¿Jamüsü aneetka pukuwaʼipa sutuma pütüjaain saaʼu tü kasa eeinjatkat saashin tü Bibliakat?
PÜNAʼLA SOOʼOMÜIN
Akatchinraajeerü paaʼin pütüjaale saaʼu tü kasa anasü eeinjatkat mapeena.
«¿Jalasü ashajünüin süchiki tü kasa anasü eeinjatkat mapeena?» (¡Eeja Waaʼin!, aaʼuriiroʼu 22, 2004)
Eeshii na wayuu anakana aaʼin sutuma natüjaain saaʼu tü kasa anasü eeinjatkat mapeena, anasü naaʼin jaʼitasü mepin tü ayuulii nanainkat.
«¿Aneetche paaʼin sutuma tü sümakat tü Bibliakat mepire ayuulii pünain?» (Pütchi suluʼuka jw.org)
Soʼunnaa pünajüin videokot tüü, maa chakai paaʼin sümaa püpüshi suluʼu tü mma anasü eejeetkat saashin tü Bibliakat.
Anoutaasü nukuwaʼipa wanee wayuu sünainjee nütüjaain saaʼu tü kasa anasü eeinjatkat saashin tü Bibliakat. Wayuukai chia nunouteʼereepuʼuin sukuwaʼipa tü mmapaʼakat.
«Nnojoluitpa tanouteʼereein sukuwaʼipa mmapaʼakat» (Pütchi suluʼuka Aapiria Wayuu, 2013)