TÜ WAAʼINRAJATKAT KOJUTUJAALE TÜ KASAKALÜIRUA

Jülüja paaʼin sunoutaajeerüin sukuwaʼipa kasa mapeena

¿Kojutuleeipache tü kasa oikaanakat eere kepiain pia jee süchoʼujain tü nneerü pükanajakat sünain piʼyataain? ¿Shapaasüche paaʼin sutuma isain püchiki paapüin sümüin püpüshi tü choʼujaakat namüin? Müle pukuwaʼipa eesüjaʼa shapaale paaʼin sutuma nnojoluin pütüjaain saaʼu jameerüin pukuwaʼipa mapeena. Choʼujaasüjeseʼe pümüin jülüjain paaʼin aneerüin sukuwaʼipa kasa mapeena.

¿JAMÜSÜ CHOʼUJAAKAʼA WAAʼINRÜIN TIA?

Watüjaa aaʼu aneerüin sukuwaʼipa kasa mapeena, nnojotpejeʼe maluʼuluin tia waʼatapajüinjatüin sunoutaain wanee kasa sümüiwaʼa sümaa nnojoluin kasain waaʼinrüin. Wachajaa sukuwaʼipa süpüla anain wakuwaʼipa jaʼitairü kasain alatüin wamüin. Anuu apünüinsü kasa nountaka na wayuukana sutuma jülüjain naaʼin aneerüin sukuwaʼipa kasa mapeena:

Nachecherüin naaʼin mayaainjeʼe neʼrüin müliaa.
Naaʼinramaatüin wanee kasa wanaapünaa sümaa tü choʼujaaka namüin.
Naneeküin kasa anainjatka atuma nakuwaʼipa jee suulia ayuuijaain naya.

TÜ EEKAT SÜPÜLA PAAʼINRÜIN

Palajana, jülüjeesü paaʼin tü pütchi suluʼukat tü Bibliakat aneetkalü atuma pukuwaʼipa maaʼulu yaa. Ashajünüsü suluʼu tü Bibliakat waneirua kasa eeka süpüla paaʼinrüin kojutujaale tü kasakalüirua.

«Jülüjale paaʼin tü paaʼinrajatkat otta piyaawatüle saaʼu, aneerü pukuwaʼipa» (Proverbios 2:11).

Tü wane kasa jülüjeekat paaʼin shia tü ashajünakat suluʼu tü Bibliakat süchiki tü alatajatkat mapeena. Jalouishaatasü tü ashajünakat suluʼu tü Bibliakat, anasüjeseʼe pütüjaale saaʼu tü ashajünakat suluʼu süchiki tü alateetkat mapeena. Saashin tü Bibliakat naapeerü Maleiwa wanee anaa wamüin otta aneerü wakuwaʼipa nutuma watta kaʼi otta nüküjain wamüin tü sukuwaʼipainjatkat nutuma (Jeremías 29:11). Aneerü wakuwaʼipa mapeena nuluwataapeena Maleiwa.

¿JAMEERÜ SUKUWAʼIPA ALUWATAWAA NUTUMA MALEIWA JEE KASA WEʼREETKA SUTUMA?

Aikaleʼennüsü sukuwaʼipa wanee aluwatawaa nutuma Maleiwa chaa iipünaa jee niainjachin aluwataaka saaʼu tü mmakat (Daniel 2:44; Mateo 6:10). Najaʼttireerü Maleiwa tü müliaakat, tü jamükat jee aneena waya nutuma. Anuu tü weʼreetkat saashin tü Bibliakat:

«Emireechi pia sünainjee piʼyataain. Talateerü paaʼin otta aneerü pukuwaʼipa» (Salmo 128:2).

«Nnojoleerü kasain nashapajaain achiirua [na nuluwataainjanakana aaʼu Maleiwa]» (Isaías 65:23).

«Jouleerü maʼin pünajüt saaʼu tü mmakat» (Salmo 72:16).

Watta maʼin naalii na wayuu anoujakana sünain tü ashajünakat suluʼu tü Bibliakat, jama natüjaain saaʼu matüjain aküjaa alawaa chi Maleiwakai (Tito 1:2). ¿Pütüjawee aaʼu sooʼomüin süchiki tü ashajünakat suluʼu tü Bibliakat? Katchinjeerü paaʼin sutuma tü kasa ashajünakat suluʼu tü Bibliakat, nnojoleerü shapaakuʼu müin paaʼin sutuma kojutujaain tü kasakalüirua jee shiale sutuma tü kasa alatajatkat mapeena.