Nüʼlapüin Faraón

ALATÜSÜ piama juya, ayatüshi püreesain José. Nnojoishi nia sotuin naaʼin chi aapajüikai nüsüin Faraón. Mapa nüʼlapüjaaka Faraón otta nütüjawee aaʼu jamaluʼuluin tü nüʼlapüinkat. ¿Piʼrüin nia suluʼu tü ayaakuaakat? Jayuupa neenajüin Faraón na ooʼulaküliikana, nüküjaka namüin tü nüʼlapüinkat. Akatsaʼa isain nachiki jamaluʼuluin shia.

Sotoka José naaʼin chi aapajüikai nüsüin Faraón. Nümaka nümüin Faraón: ‹Wanaa sümaa püreesain taya eejachi wanee wayuu atüjüshi süpülee jamaluʼuluin wanee lapü›. Nüsaajinnaka José nutuma Faraón.

Nüküjaka Faraón tü nüʼlapüinkat nümüin José: ‹Teʼrüin akaratshisü paaʼa kaüsüsü otta teʼraka akaratshisü paaʼa aürütsü. Na paaʼa aürütkana neküin na paaʼa kaüsüshiikana.

‹Suluʼu tü wanee taʼlapüinkat teʼrüin akaratshisü trigo kachonsü maʼin. Mapa teʼraka akaratshisü trigo jutsü maʼin. Tü trigo jutsükat shiküin tü trigo kachonkat maʼin›.

Nümaka José nümüin Faraón: ‹Tü piamasükat püʼlapüin waneesia neʼe. Tü akaratshisükat paaʼa kaüsüsü otta tü akaratshisükat trigo kachonka maʼin shia akaratshisü juya otta na akaratshishii paaʼa aürütkana sümaa tü akaratshisükat trigo jutka maʼin akaratshi juya. Eejeerü akaratshisü juya wainmeetka oʼu eküülü Egipto. Eejeerü akaratshisü juya palitchonjeetka oʼu eküülü›.

Nümaka José nümüin Faraón: ‹Püneekaja wanee wayuu eeka kekiin otta puluwataa nia sünain akotchojoo eküülü soʼu tü akaratshisükat juya wainmeetka oʼu eküülü suulia ouktajüin wayuu sutuma jamü soʼu tü akaratshisükat juya palitchonjeetka oʼu eküülü›.

Anasü tia nümüin Faraón. Nüneekaka José süpüla nükotchojüin otta nünaajüin tü eküütkat. Kojutushi maʼin José sutuma wayuu nüchikijee Faraón.

Mekiisat juya süchikijee tia, niʼraka José wanee wayuuinnua. ¿Pütüjaa aaʼu jaralii naya? ¡Naya na polooshiikana nuwalayuu! Aluwataanüshii naya Egiptomüin nutuma Jacob süka sajaʼtteein tü eküütkat Canaán. Niyaawatüin José na nuwalayuukana, nayakana nnojoishi nayaawatüin. ¿Jamüshi nnojoika nayaawatüin nia? Süka miyoʼuchipain José otta naata nüsheʼin.

Sotusü naaʼin José nüsapainkain na nuwalayuukana nüʼlapüinruʼu. ¿Sotusü paaʼin tü nüʼlapüinkat José? Sutuma tia niyaawatüin José niain Maleiwa aluwataaka nia Egiptomüin. ¿Kasache naainjaka José? Wekirajaa sünain.