Wunuʼu chuwatüshi

ANTÜSHI Moisés eemüin tü uuchikat Horeb sünain achajawaa alama shiküin naʼanneetse. Niʼraka wanee wunuʼu chuwatüshi sümaa nnojoluin jotuin nia.

Nümaka Moisés: ‹¿Kasache wayuu tia? Anashi tarütkaai sünainmüin›. Nürütkaapa naapaka wanee pütchi müsü nümüin: ‹Nnojo pürütkaain maʼin. Paakata tü püsapaatsekat, wuleesü tü mmakat nutuma Maleiwa›. Nia Maleiwa aashajaaka nümüin nükajee wanee aapiee, makalaka nunjuluin nuʼupünaa Moisés.

Nümaka Maleiwa: ‹Müliashii teʼrüin na israeliitakana Egipto. Taluwataainjachi pia süpüla piyuʼluin naya chejee›. Kepiainjana naya nutuma suluʼu tü mmakat Canaán.

Nümaka Moisés: ‹¿Jaraikai taya süpüla taainjüin tia? Toʼunule, nasakireechi taya: «¿Jara aluwataaka pia?» ¿Jameerü tanüiki?›

Nümaka Maleiwa: ‹Meechi pia namüin, «nuluwataala taya JEʼWAA chi Nümaleiwasekai Abraham, Isaac otta Jacob»›. Nümaka Jeʼwaa: ‹Tüü shia tü tanüliakat waneepia›.

Nümaka Moisés ‹¿Jama nnojorüle nanoujuin piain aluwataain taya?›

Nüsakitka nia Maleiwa: ‹¿Kasa tü pajapuluʼukat?›

Nümaka Moisés: ‹Wanee wunuʼu›.

‹Pujuta mmoluʼumüin›, nujutapa shia wüijaaka shia. Niiʼiyataka Jeʼwaa nümüin wanee kasa pülasü: ‹Pikerotira pajapü suluʼu püsheʼin›. Niyuʼlapa shia, ¡kasuusü maʼin najapü, ittajaasü! Naainjaka wanee kasa pülasü Moisés nutuma Maleiwa. Nümaka Maleiwa: ‹Sutuma tü kasa pülasükat nanoujuinjatü na israeliitakana taluwataalain pia›.

Süchikijee tia, nüleʼejaka Moisés nipialuʼumüin nümaka nümüin Jetró: ‹Puuʼulaa toʼunai Egiptomüin süpüla tanalaain namüin tapüshi›. Niitaaka Moisés Egiptomüin.