Chuwatüsü suuʼulia wanee wunuʼu

Kepiashi Moisés chaa Madián soʼu 40 juya. Kaʼwayuuseshi otta kachonshi nia chayaa. Soʼu wanee kaʼi, chajachi nia arüleejüin naʼanneetse süʼütpaʼa tü uuchikat Sinaí, niʼraka wanee kasa chuwatüin. Chuwatüsü suuʼulia wanee wunuʼu, ¡nnojotpejeʼe jotuin shia! Wanaa sümaa nürütkaain Moisés sünainmüin, susoutaka wanee pütchi eejee suuʼulia tü wunuʼukot sünain maa: «¡Moisés! Nnojo pürütkaain. Paakata püsapaatse, süka wulein tü mma waraitakalü aaʼu pia». Nia Jehová asoutaka nümüin nükajee wanee aapiee.

Mmotkalaka Moisés, nuunjulaka nuʼupünaa. Sümaka tü pütchikat nümüin: «Teʼrüin müliain maʼin na israelitakana. Toʼtteʼerüinjana naya noulia na egipciokana, taapajatü namüin wanee mma anasü. Piainjachi kamaaka naya Egiptojee». ¿Ponusüche naaʼin Moisés tia saaʼin pümüin?

«¿Jameerü tanüiki nasakirüle taya sünain jaralin chi kaluwataalakai taya?», nümaka Moisés. Nusoutaka Maleiwa: «Püma namüin nuluwataalain pia Jehová, chi Nümaleiwasekai Abrahán, chi Nümaleiwasekai Isaac otta chi Nümaleiwasekai Jacob». Nusoutaka Moisés: «¿Jama nnojoliire jaa namüin tamüin?». Niiʼiyataka Jehová wanee shiyaawase süpüla nütüjaain saaʼu Moisés nükaalinjainjachin nia. «Pujuta türa waraarat pajapuluʼukat», nümaka Maleiwa. Shiasaʼa nujutapa shia, ¡wüijaaka tü waraaratkat! Naapaaka Moisés tü wüikat süka süsi, wunuʼujaaka shia süchikuaʼa. «Paainjapa tia suʼupala wayuu, ayaawatüneechi aaʼu taluwataalain pia», nümaka Jehová nümüin.

«Isasü tachiki tü tanüikinjatkat», nümaka Moisés nümüin Jehová. Nusoutaka Jehová: «Taküjeerü pümüin tü pünüikinjatkat otta tajüteechi pümaa Aarón, chi puwalakai, nükaalinjeechi pia». Süka nütüjaaitpain saaʼu Moisés nükaalinjainjachin nia Jehová, niitaaka nüchikuaʼa Egiptomüin sümaa nuʼwayuuse otta nüchonnii.