Wanee eküülü jeketü

¿PÜTÜJAA aaʼu kasa nakotchojaka na wayuukana? Müsü aka saaʼin süpanachein wunuʼu, kasuusü, arülacheinsü otta ekünaajuui shia.

Alatüsü wanee kashi süchikijee noʼunuin na israeliitakana Egiptojee, chashii naya isashiipaʼa. Süka palitchon eküülü namaʼana mojuka nanüiki, namaka: ‹Anashiijee nuʼutule waaʼin Jeʼwaa chaaʼaya Egipto, eepuʼule wainmain eküülü›.

Nümaka Jeʼwaa namüin: ‹Eejeerü tatuma eküülü iipünaajee›. Waneemüin kaʼi, neʼraka na israeliitakana wanee kasa kasuusü, nasakiraaka: ‹¿Kasa wayuu tia?›

Nümaka Moisés namüin: ‹Tüü shia tü eküülü naapakat Jeʼwaa jümüin›. Tü seʼejekat müsü aka saaʼin pan kaʼakasü mapa, MANÁ sünülia natuma.

Nümaka Moisés namüin: ‹Jukotchoja tü jiküinjatkat›. Makalaka nakotchojowalin shia wattaʼa maalü. Jaʼipa Kaʼika, wüinjaasü tü maná apütaakat mmoluʼu.

Nümaka Moisés: ‹Nnojo jünaajaain maná süpüla jiküin waneemüin kaʼi›. Eeshii eeka naainjüin tia. ¿Kasa alataka sümüin tü nanaajaakat? Jokomasü otta keejuusü.

Nuluwataaka Jeʼwaa naya sünain nakotchojüin wainma maná soʼu tü aipiruakat kaʼi süka nnojoleerüin sujutuuin waneemüin kaʼi. Nanaajaapa shia nnojotsü jokomain otta keejuuin. ¡Shia wanee kasa pülasü naainjaka Maleiwa!

Eküshii waneepia maná na israeliitakana chaaʼaya isashiipaʼa.