Piichi aʼwaajülee

¿PÜTÜJAA aaʼu kasapülajatü tü piichikat? Aʼwaajüleeinjatü Jeʼwaa, naainjüin shia na israeliitakana soʼu wanee juya süchikijee noʼunuin Egiptojee. ¿Pütüjaa aaʼu jarai chi kaainjiralakai?

Nia Jeʼwaa. Wanaa sümaa chajachin Moisés saaʼu tü uuchikat Sinaí nüküjüin Jeʼwaa nümüin jamüinjatüin sukumajia tü piichi aʼwaajüleekat. Atsajünawalinjatü süpüla nalüʼüjüin shia na israeliitakana nakolojoopa.

Piirakaa sümüin sütaüjiachon tü piichikat eesü wanee jurasükeerü suluʼu otta saaʼu eeshii piamashii aapiee aainjuushi süka ooro. Nüshajüin Maleiwa süchikuaʼa tü poloosükat pütchi süka yülüin nutuma Moisés tü piamasükat ipa, sünaajaanaka suluʼu tü jurasükeetkat sümaa wanee iita kaluʼusü maná. ¿Sotusü paaʼin kasa wayuu tia?

Aneekünüshi Aarón chi nuwalakai Moisés nutuma Jeʼwaa süpüla laülaainjachin napüleerua na sacerdotekana otta süpüla nikirajüin na israeliitakana nüchiki Jeʼwaa. Otta müshia na nüchonniikana sacerdoteshii.

Piirakaa sümüin tü sütaüjia miyoʼukat maʼin. ¿Piʼrüin tü kaajachon kamüsainkat? Shia eere naʼajüin na sacerdotekana wanee wunuʼu jemeta eejuulu. Piirakaa sümüin tü rampara akaratshisükat sütüna otta wanee meesa eere shiʼitaanüin 12 pan.

Suluʼu tü paatiakat eesü wanee irala kaluʼusü wüin noʼlojia na sacerdotekana. Eesü yala tü aʼajüleekat mürüt eere saʼajünüin mürüt nümüin Jeʼwaa. Tü piichi aʼwaajüleekat pasanainsü sünain nepiapala na israeliitakana.