Rut otta Noemí

PUUSÜTEERÜ suluʼu tü Wiwüliakat wanee karaloukta Rut sünülia. Tia karalouktakat aashajaasü nachiki wanee wayuu kepiashii wanaa sümaa kekiipuʼujanain na israeliitakana. Rut chejeʼewalü Moab; nnojotsü israeliitain. Shiʼraajapa Jeʼwaa aishi maʼin süpüla. Noemí shia wanee laülaa akaaliinjaka Rut süpüla shiʼraajüin Jeʼwaa.

Israeliita Noemí, akolojoosü shia nümaa suʼwayuuse otta piamashii süchonnii suluʼumüin tü mmakat Moab süka palitchon eküülü Israel. Soʼu wanee kaʼi ouktushi chi suʼwayuusekai. Mapa kasaatka na süchonniikana namaa wayuu kepiashii Moab, Rut otta Orpá nanülia. 10 juya süchikijee tia ouktaka na süchonniikana Noemí. ¡Müliasü maʼin saaʼin! ¿Kaseerü saainjaka Noemí?

Soʼu wanee kaʼi süleʼejaka Noemí eemüin na süpüshikana. Oʼunusü Rut otta Orpá sümaa. Wattapa naya sümaka Noemí namüin: ‹Jüleʼejaa jüchikuaʼa, makata jia sümaa jii›.

Süpütaaka Noemí napüla, sutuʼlaka naya. Naʼyalajaka süka alin maʼin shia napüla. Namaka: ‹¡Nnojo! Oʼunajana waya pümaa eemüin püpüshi›. Sümaka Noemí namüin: ‹Aleʼejüinjana jia jüchikuaʼa tachonnii. Aneerü jukuwaʼipa namaa na jüpüshikana›. Süleʼejaaka Orpá süchikuaʼa. Akatsaʼa Rut nnojotsü aleʼejaain.

Sümaka Noemí sümüin: ‹Oʼunuipa Orpá, puʼuna sümaa›. Sümaka Rut: ‹¡Nnojo pümüin tamüin! Oʼunajatü taya pümaa. Eemüinre puʼunuin oʼuneerü taya, eere kepiain pia kepieerü taya. Tü puumainkat toumainjeerü otta chi Pümaleiwasekai Tamaleiwaseechi. Eere pia ouktuin oukteerü taya otta ojoitüneerü taya yala›. Süka müin sünüiki, suuʼulaaka shia Noemí.

Mapa nantaka Israelmüin. Shiʼyataaka Rut sünain atpajaa cebada. Nuuʼulaaka shia wanee wayuu kanüliashi Booz sünain sütpajüin nüpünajüin. ¿Pütüjaa aaʼu jarat tü niikat Booz? Shia Rahab, kepiapuʼuka Jericó.

Soʼu wanee kaʼi nümaka Booz sümüin Rut: ‹Taapa achikirü kamaneein maʼin pia sümüin Noemí. Tatüjaa aaʼu püpütüin püshi, püi otta puumain süpüla kepiainjatüin pia suluʼu wanee mma nnojotka piʼraajüin. ¡Kasataalejese anain pukuwaʼipa nutuma Jeʼwaa!›

Sümaka Rut: ‹Anamia maʼin pia tamüin, anasü taaʼin sutuma pünüiki›. Talatüshi Booz sümaa Rut, mapa kasaatka naya. ¡Talataka maʼin Noemí sutuma tia! Talataleesia maʼin shia wanaa sümaa jemein chi palajaikai nachon, kanüliaka Obed chi nutuushikai David. Ekirajaweena waya nüchiki David mapeena.