Rut sümaa Noemí

Israelita Noemí, okolojoosü shia Moabmüin nümaa chi suʼwayuusekai otta na piamashiikana süchonnii süka alin jamü chaa Israel. Outaka mapa chi suʼwayuusekai Noemí. Kaʼwayuuseshii na süchonniikana jieyuu chejeʼewalii Moab, Rut otta Orpá nanülia. Outaka mapa na süchonniikana Noemí.

Saapa achikit Noemí nnojoluitpain alin jamü chaa Israel. Süleʼejaka süchikuaʼa Israelmüin, oʼunusü Rut otta Orpá sümaa. Chapa naya wopuluʼu, sümaka Noemí namüin: «Kamaneeshii maʼin jia tamüin otta anasü jukuwaʼipa namaaiwaʼaya jia na tachonniikana. Kasataalejeseʼe kasaalüin jia jüchikuaʼa. Jüleʼejaa jüchikuaʼa Moabmüin». «Aishaatasü pia wapüla, yaainjana neʼe waya pümaa», namaka sümüin Noemí. Ayatüsü Noemí sünain sümüin namüin naleʼejüinjanain noumainpaʼamüin. Shiaka oʼunuin Orpá, akatsaʼa Rut, makatüsü sümaa Noemí. «Aleʼejüsü Orpá süchikuaʼa suumainpaʼamüin, eemüin na sümaleiwasekana, puʼuna sümaa jee püleʼejaa püchikuaʼa sümaʼanamüin püi», sümaka Noemí sümüin Rut. Susoutaka Rut sümüin: «Nnojo puchuntuin tamüin tapütüinjatüin pia, tü puumainkat toumainjeerü, chi Pümaleiwasekai Tamaleiwaseechi». ¿Jamüsüche saaʼin Noemí sutuma sünüiki Rut?

Antüshii naya Israelmüin sükalioʼu sütpajünüin cebada. Oʼunusü Rut soʼu wanee kaʼi sünain atpajaa süpütaain nüʼttia wanee wayuu kanüliashi Boaz, wayuukai chia süchon Rahab. Naapa achikit Boaz kamaneein maʼin Rut sümüin tü saʼütkat otta makatüin shia sümaa. Nuluwataaka Boaz na aʼyataaliikana nümüin süpüla napütüinjatüin wainma cebada süpüla sütpajüin Rut.

«¿Jalajatü pia atpajüin soʼukaitpa? ¿Jalajatü pia aʼyataain?», sümaka Noemí sümüin Rut. Susoutaka Rut: «Chajatü taya okotchojuin cebada suluʼu niyüüjase wanee wayuu kanüliakai Boaz». Sümaka Noemí sümüin: «Wapüshi chia wayuukai, ayata piʼyataain chayaa sümaa tü wane jieyuukalüirua, aneerü pia yala».

Chajatü okotchojuin Rut cebada suluʼu niyüüjase Boaz, waneʼereeya sajaʼttüin süchon tü aʼttieekat. Niʼrüin Boaz anain maʼin sukuwaʼipa otta tütüin maʼin shia sünain aʼyatawaa. Suluʼu nakuwaʼipa na israelitakana namaiwa, outule wanee wayuu eekai kaʼwayuusein sümaa machooin nuʼwayuuse, eeshi süpüla niisalüin wanee kasa nünain müliashii. Müshijeseʼe kasaalüin Boaz sümaa Rut. Kachonkalaka Rut nümüin Boaz, Obed nünülia natuma. Obed nia chi nutuushikai David. Talatüshii maʼin na saʼaleewainkana Noemí. Anuu nanüiki sümüin: «Kamaneeshi maʼin Jehová pümüin. Naapüin pümüin Rut, kamaneesü maʼin shia pümüin, jooluʼu kalüinsü pia nutuma. Waʼwaaja Jehová saaʼujee tia».