David otta Goliat

ATKAAINJANA nachikuaʼa na filisteokana namaa na israeliitakana. Nusurulaatseshii Saúl 3 nuwalayuu David. Soʼu wanee kaʼi nümaka Jesé nümüin David: ‹Pünalaa namüin na puwalayuukana otta pülüʼüja neküin›.

Nüntapa David nüchajaaka na nuwalayuukana. Nüntaka chi miyoʼushaatakai Goliat nimeʼerainpalaka na israeliitakana, nümaka: ‹Jüneeka wanee wayuu süpüla nütkaain tamaa, nükanajüle otta nuʼutule taaʼin jüchepchieena waya. Takanajüle otta toʼutule naaʼin wachepchieena jia›. Müshi nia soʼu 40 kaʼi, wattaʼa maalü jee aipaʼa.

Nüsakiraka David na surulaatkana: ‹¿Kaseerü aapünaka nümüin chi eekai nuʼutuin naaʼin Goliat?›

Nümaka wanee surulaat: ‹Washireechi nutuma Saúl otta naapeerü wanee nüchon nuʼwayuusein›.

Mmotshii na israeliitakana neema Goliat süka miyoʼushaatain nia, 3 meetüro najaʼapüin, eeshi wanee surulaat nülüʼüjüin tü kachuweera nunjulaayakat.

Süküjünaka nümüin Saúl nütkaweein David nümaa Goliat. Nümaka Saúl nümüin David: ‹Jintüi pia süpüla atkawaa otta Goliat kakaliaichi surulaalüin›. Nümaka David: ‹Toʼuta aaʼinchi wanee jeesü otta wanee wasashi süka neküinjatüin naʼanneetse chi tashikai. Meechi Goliat tatuma. Nükaaliinjeechi taya Jeʼwaa›. Nümaka Saúl: ‹Puʼuna maala nümaa Jeʼwaa›.

Nuʼunaka David eemüin wanee süchi nükotchojaka 5 ipa, niʼitaaka shia suluʼu naʼawalia. Nülüʼüjaka wanee junaaya süpüla nütkaain nümaa Goliat. Mapüleesalü saaʼin nümüin Goliat nuʼutuin naaʼin David.

Nümaka Goliat: ‹Jalaichi yaamüin, shikai pia wüchii tatuma otta mürüt›. Nümaka David nümüin: ‹Antüshi pia tanainmüin sümaa chajaruuta otta jatü. Tayakai antüshi pünainmüin süka nünülia Jeʼwaa. Nükaaliinjeechi taya Jeʼwaa süpüla toʼutuin paaʼin›.

Nuwataaka David nooʼomüin Goliat. Nütchinmaaka nujutuin tü junaayakat nünainmüin. ¡Shikerotaka tü ipakat suluʼu nikii Goliat, ouktaka nia! Neʼrapa tia na filisteokana napantajaaka. Noʼunaka na israeliitakana nachiirua nakanajaka naya.