Nüchiki David nümaa Saúl

Süchikijee nuʼutunuin aaʼin Goliat nutuma David, niʼitaain nia Saúl süpüla nekiipüʼüin na surulaatkana. Kojuyatua nükanajüin David na nüʼünüükana jee eʼraajünüshi maʼin nia. Soʼu wanee kaʼi nüleʼejapa David süchikijee atkawaa, ayonnajüsü jieyuu otta eeʼirajüsü nümüin. «Wainma na nuʼutakana aaʼin Saúl, akaisaʼa David wainmaleʼeya na nuʼutakana aaʼin», müshii naya. Achunjashi Saúl nümüin David müshijeseʼe nuʼuteein aaʼin nia.

Atüjashi maʼin David aʼyalajiraa arpa. Soʼu wanee kaʼi, aʼyalajitshi arpa David nümüin Saúl, nujutaka Saúl wanee jatü nooʼomüin süpüla nütküin nia. Akaisaʼa David nülatirüin tü jatükat, shia neʼe nütkaka süsepü tü piichikat nüchikumüin. Süchikijee tia, wainmatua nüchajaain sukuwaʼipa Saúl süpüla nuʼutuin naaʼin David. Mapa, nuʼluwataaka David jee nuunjulaaka anoouishii.

Nümaaka Saúl 3.000 surulaat süpüla nütaʼülüinjachin David. Nikerotoko Saúl suluʼu wanee koʼushii eejachire David otta na wayuu nümaajanakana. «Puʼuta naaʼin», namaka nümüin David. Akaisaʼa David arütkaashi neʼe nünainmüin Saúl jee nüchotooko shiʼipa nüsheʼin nujuuna. Mojusü maʼin naaʼin David mapa saalinjee tü naaʼinrakat jee saalinjee mojutuin nümüin chi nüneekalakai Jehová süpüla aluwatawaa. Nnojoishii nuuʼulaain David na nümaajanakana noʼutuin naaʼin Saúl. Nujuʼitapa Saúl suluʼujee tü koʼushiikat, nuʼwaataka David kaʼyatajee: «Ajayataashi pia teʼipomüin, nnojoika toʼutuin paaʼin». ¿Ayateeiche Saúl sünain nuʼuteein naaʼin David?

Ayatüsia nüchajaain Saúl sukuwaʼipa süpüla nuʼutuin naaʼin David. Soʼu wanee ai, niʼrüin David nutunkuin Saúl otta na nusurulaatsekana. Akaʼaya Abner chi aaʼinmajakai Saúl, atunkushi maʼin. Nürolojoko David otta Abisai nünainmüin Saúl. «Paapa nikii tamüin, toʼutaiwa naaʼin», nümaka Abisai nümüin David. Nusoutaka David: «Nnojo, puuʼulaa nia najapuluʼu Jehová. Paapaa tü jaronkot sümaa tü jatükat. Jooʼuya maa».

Nuʼunaka David süraloʼumüin wanee namüna pejeka nünain Saúl otta na nusurulaatsekana. Nuʼwaataka David: «Abner, ¿jamüshi nnojoikaʼa paaʼinmajüin chi aluwataaikai? ¿Jalasü piʼrüin tü jaronkot otta tü najatüinkat Saúl?». Niyaawataka Saúl nümüraluʼu David. «Puʼuteereje taaʼin, puʼutayüije aaʼin taya. Tatüjaaitpa aaʼu piainjachin aluwataain saaʼu Israel nutuma Jehová», nümaka nümüin David. Nüleʼejaka Saúl nüchikuaʼa nipialuʼumüin. Nnojoishi aʼürülaanüin anain David natuma napüshuaʼa na nüpüshikana Saúl.