Awoutisaajünüshi Jesús

PIIRAKAA sümüin tü moʼuwa antakat nünainmüin Jesús. 30 nuuyase wanaa sümaa tia. Chi nümaakai nia Juan. ¿Sotusü paaʼin nukutulaain chi süchonkai Elisabet süleʼeruʼu saapaiwaʼaya sünüiki María? Joʼuukai chia nia Juan. ¿Kasa naainjaka Juan otta Jesús suluʼu tü ayaakuaakat?

Nimetirüichipa Juan Jesús shiroku tü süchikat Jordán. Tia shia suwoutisaajia wanee wayuu. Naainjüin Juan tia namüin na wayuukana, makalaka Juan chi Owoutisaajüikai nümünüin. ¿Jamüshi nuwoutisaajaka Jesús?

Naainjüin tia süka nuchuntuin shia Jesús. Nuwoutisaajüin Juan na wayuukana süpüla neeʼiyatüin mojuin naaʼin sutuma naainjala. ¿Kaainjalashi Jesús? Nnojoishi kaainjalain süka Nüchon nia Maleiwa. Eesü wanee kasa nuchuntaka anainjee tia nümüin Juan. Wekirajaa sünain.

Süpülapünaa nüntüin Jesús eemüin Juan aʼyataashi nia sünain akumajaa kasa süka taapüla. Tia shia tü niʼyataakat anain José chi suʼwayuusekai María, nikirajüin Jesús sünain aainjaa tia. Akaisaʼa Maleiwa nnojoishi nuluwataain chi Nüchonkai Mmapaʼamüin süpüla tia. Niʼyateʼerüinjachi nia sünain wanee kasa anasü maʼin. Awoutisaajünüshi Jesús süpüla niiʼiyatüin nüntüin süpüla naainjüin tü keeʼireekat naaʼin chi Nüshikai. ¿Anasü nümüin Maleiwa tia?

Aa, süchikijee nujuʼitüin Jesús shirokujee tü wüinkat, müsü wanee pütchi sirumatuʼujee: ‹Anii chi Tachon aishikai tapüla. Talatüshi maʼin taya nümaa›. Eerulaasü tü sirumatuʼukat otta nüshakataka chi naaʼinkai Maleiwa nünainmüin maka naaʼin wanee moʼuwa.

Nuʼunaka Jesús isashiipaʼamüin soʼu 40 kaʼi süpüla kanainjatüin naaʼin wainma kasa. Nüntaka Satanás nünainmüin apünüintua, naainjireein nia kasa mojusü. Nnojotsü naainjüin Jesús tia.

Mapa nüleʼejaka Jesús otta nüneekaka na nikirajüinkana. Nanülia shia: Andrés, Pedro (chi Simón münakai), Felipe otta Natanael (chi Bartolomé münakai). Oʼunushii naya nümaa Jesús Canámüin eere kasaalüin wanee wayuuinnua. Chaaʼaya wiinojaasü nutuma Jesús tü wüinkat. Tia shia tü palajatkat kasa pülasü naainjaka.