Nüchiki Jesús chi Mesíaskai

Maʼwaisü nünüiki Juan wanaa sümaa nüküjain pütchi: «Chi taküjakai achiki jümüin, anteechi tachiiruajee sümaa kojuteechin nia toulia». Wanaa sümaa 30 nuuyase Jesús, oʼunushi nia Galileajee eemüin tü süchikat Jordán. Yalajachi Juan nüpüla sünain awoutisaajaa tü wayuukalüirua. Nüntaka Jesús nünainmüin Juan süpüla nuwoutisaajüin nia. «Taya tayakai cheʼojaaka amüin awoutisaajünaa putuma, piakalaka neʼe antüin tanainmüin süpüla tawoutisaajüin pia», nümaka Juan nümüin Jesús. Nusoutaka Jesús: «Shia keeʼireeka naaʼin Jehová puwoutisaajüin taya». Nekerotoko shirokumüin tü süchikat Jordán otta nimetinnaka Jesús nutuma Juan shiroku tü wüinkat süpüla nuwoutisaajüin nia.

Nüshaʼwalaapa Jesús süchikijee nimetinnüin shiroku tü wüinkat, oʼuraajüshi nia nümüin Jehová. Wanaa maʼin sümaa tia, eerulaasü tü sirumatuʼukat. Niʼraka Jesús tü nüpülainkat Maleiwa sünain ashakataa naaʼumüin sünain müin aka saaʼin wanee moʼuwa. Saapünaka joo nünüiki Jehová iipünaajee sünain maa: «Anii chi Tachonkai aishikai tapüla. Talatüshi maʼin taya nümaa».

Soʼujee kaʼikat tia, naapüin Jehová tü nüpülainkat nümüin Jesús otta niaichipa Cristokai otta chi Mesíaskai. Yapashi Jesús süpüla nikeraajüin tü aʼyatawaa naapakat Jehová nümüin saaʼu tü Mmakat.

Süchikijee nuwoutisaajünüin Jesús, oʼunushi nia isashiipaʼamüin otta chajachi nia soʼu 40 kaʼi. Nüleʼejapa, oʼunushi nia sünain anaʼlawaa nümüin Juan. «Jiirakaa, iseeichi chi wayuu aneekünakai nutuma Maleiwa süpüla nülaʼajaainjatüin saainjala wayuu», müshi Juan niʼrapa Jesús nüpanapa. Müsü nünüiki Juan süpüla shiyaawatüin saaʼu tü wayuukalüirua niain Jesús chi Mesíaskai. ¿Pütüjaa aaʼu kasain alatüin nümüin Jesús wanaa sümaa chajachin nia isashiipaʼa? Wekirajaa sünain tia.