Aküjashi Juan süchiki nüntajachin Jesús

Juan nia chi nüchonkai Zacarías sümüin Elisabet. Nüneeküin nia Jehová süpüla nünüikimaainjachin nia. Nuluwataain nia süpüla nüküjain sümüin wayuu sünain nülüʼülüin süpüla antaa chi Mesíaskai. Aküjashi pütchi Juan chaa isashiipaʼa, nnojoishi nia aküjain pütchi suluʼu tü ekirajüleekat jee pueulopaʼa. Watta saalii wayuu antaka Jerusalénjee otta Judeajee nünainmüin Juan sünain aapajaa nünüiki. Nüküjain Juan sümüin wayuu talateechin Maleiwa namaa nooʼulaale suulia aainjaa kasa mojusü. Wainma na wayuu ayaawajaakana suulia naainjala otta nuwoutisaajüin naya Juan shiroku tü süchikat Jordán.

Nnojoishi washirüin Juan. Kasheʼinshi süta camello, eküshi nia kaashapa otta mapa. Wainma wayuu eʼraajeeka maʼin nukuwaʼipa Juan. Akaʼaya na fariseokana namaa na saduceokana, chejeeshii naya eejee Juan. Anuu nünüiki Juan namüin: «Junouteʼera jukuwaʼipa otta jiyaawajaa suulia jaainjala. Yaletüsü jaaʼin süka nüchonniin jia Abrahán jaajüin, nnojoliipejeʼe nüchonniin jia Maleiwa saaʼujee tia».

Wainma na wayuu makana anüiki nümüin Juan: «¿Kasa waaʼinrajatka süpüla anain wakuwaʼipa noʼuluʼu Maleiwa?». Nusoutaka Juan namüin: «Piamale jüsheʼin, jaapa waneesia nümüin chi eekai choʼujaain amüin shia». ¿Pütüjawee aaʼu jamüin maka nünüiki Juan namüin? Shia süka keeʼireein naaʼin natüjaain saaʼu alinjatüin wayuu napüla süpüla anain nakuwaʼipa noʼuluʼu Maleiwa.

«Jaaʼinra kasa anasü otta nnojo juʼluwajüin sünneetse wayuu», müshi Juan namüin na akotchojüliikana nneerü. «Nnojo jüküjain alawaa otta nnojo juikiraain saaʼu nneerü», nümaka joo namüin na surulaatkana.

Oʼunushii na sacerdotekana otta na levitakana nünainmüin Juan. «Sütüjawee aaʼu wayuu süpüshuaʼa jaralin pia», müshii naya nümüin. Nusoutaka Juan: «Tayakai ekirajüshi wayuu yaa isashiipaʼa süpüla sürütkaain nünainmüin Jehová maʼaka tü nüküjakalü achiki paala Isaías chi nünüikimaajachikai Maleiwa».

Kamalainsü sümüin wayuu tü nikirajakalü anain Juan, müsüjeseʼe sütüjaweein saaʼu müleka niale chi Mesíaskai. Anuu nünüiki Juan namüin: «Anteechi wanee wayuu anaʼleekai toulia. Nnojoishi jaralin taya süpüla taakatüin nuulia nüsapaatse. Tayakai, tawoutisaajüin jia süka wüin. Aluʼusaʼa niakai, naapeerü jümüin tü nüpülainkat Maleiwa».