Aipürai tepichi Jesús

PIIRAKAA nümüin Jesús nutuʼushi chi jintüikai. Aipürai tepichi nia. Na naashajaakana amaa naya na aluwataaushiikana. ¿Pütüjaa aaʼu jamüsü nünüiki namüin?

Antüshi Jesús namaa na aluwataaushiikana. Aʼülüjiraashii wopuluʼu na aluwataaushiikana. Nantapa nümaka Jesús: ‹¿Jamüshii jüʼülüjiraaka wopuluʼu?› Nütüjaa aaʼu Jesús tia. Nüsakirüin naya süpüla naküjüin shia nümüin.

Koʼutushii naya nuulia süka naʼülüjiraain süchiki jaralin miyoʼuin naʼakajee. Eeshii eeka kojuteein noulia na waneeinua. ¿Kasa naainjaka Jesús süpüla nüküjüin namüin mojuin tia?

Neenajüin Jesús wanee jintüi otta niʼitaaka nia pasanain nanain. Nümaka: ‹Nnojorüle jiiʼiranajaain jukuwaʼipa maʼaka nukuwaʼipa chi jintüikai, nnojoleena ekeroluin jia suluʼu nuluwataaya Maleiwa. Wayuu eeka müin aka chi jintüikai nia chi miyoʼukai suluʼu nuluwataaya Maleiwa›. ¿Jamüsü maka nünüiki Jesús?

Nnojotsü kanain naaʼin na tepichikana miyoʼuin otta kojutuin naya noulia waneeinua. Nashatüinjatü na aluwataaushiikana nakuwaʼipa na tepichikana. Nnojoishii atkaainjanain sükajee miyoʼuweein otta kojuteein naya noulia na waneeinua.

Kojuyatua niiʼiyatüin Jesús alin nüpüla na tepichikana. Sülatapa wainma kashi nantirüin nachonnii na wayuukana nümüin Jesús. Nachiajaaka na aluwataaushiikana na wayuukana. Nümaka Jesús: ‹Juuʼulaa nantai tanainmüin na tepichikana. Nuluwataaya Maleiwa namüinjatü wayuu eeka müin aka nakuwaʼipa tepichi›. Nujuupataka naya otta nüküjaka pütchi analuʼut namüin. ¡Aipürai maʼin tepichi Jesús!