Nikirüin Jesús watta saalii wayuu

Maʼaka jeʼra kaʼi süpülapünaa tü Pascua süpülajatkat tü juyakat 32 soʼu wakalia, aleʼejüshii na aluwataaushikana süchikijee naküjain pütchi wattapünaa. Mapüsashii naya soʼu tia, nümaaka naya Jesús saʼakajee tü wayuukalüirua süpüla neemeraain, peje sünain wanee pueulo kanüliasü Betsaida. Wanaa sümaa nantüin sotpaʼamüin tü palaakat, niʼrüin Jesús watta saalii wayuu sünain aʼatapajaa naya. Mayaapejeʼe neemeraweein Jesús namaa na aluwataaushikana, ayatüshi kamaneein nia sümüin tü wayuukalüirua. Niiyajüin na ayuuishiikana otta nikirajüin naya sünain watta saalii kasa. Nikirajüin naya süchiki tü Nuluwataayakat Maleiwa, siraasü kaʼikat naaʼu sünain ekirajaa. «Ekirajüikalee, anasü müleka püjütüle tü wayuukalüirua suʼunaiwa suluʼumüin tü pueulokalüirua süpüla nachajaain tü neküinjatkat», namaka nümüin Jesús na aluwataaushikana motsopa kaʼikat.

Nusoutaka Jesús namüin: «Ketshia yaain naya, jaapa jiakana neküin». Namaka na aluwataaushikana: «¿Ayaʼlajüinjana waya neküin na wattakana aalii wayuu?». Nusoutaka Felipe, wanee napüshi na aluwataaushikana: «Jaʼitakajeʼe neʼe woʼunuin wayaʼlajüin neküin, isasia neʼe wachiki wayaʼlajüin neküin napüshuaʼa. Watta maʼin saalii tü wayuukalüirua».

Nüsakiraka Jesús naya: «¿Jeʼra eküülü eeka?». Nusoutaka Andrés: «Jaʼraisü pan jee piamasü neʼe jimechein eekat wamaʼana». «Icheʼera tamüin. Anakajaʼa müleka süikalaale tü wayuukalüirua saaʼu tü alamakat sünain jaʼraiwalin shikii otta poloowalin shikii», nümaka Jesús namüin. Naapaaka joo Jesús tü pankat jee jimecheinkat sümaa niirakaain iipünaamüin sünain naapüin analuʼut nümüin Maleiwa saaʼu. Naapaka Jesús namüin na aluwataaushikana süpüla neitajüin shia sümüin tü wayuukalüirua. Eküshii napüshuaʼaleʼeya jee emirashii naya. Eejana maʼaka 5.000 tooloyuu otta jieyuu mayaawajuusat sümaa watta saalii tepichi. Nakotchojaka mapa na aluwataaushikana napütaala na wayuukana, eejatü maʼaka 12 kattoʼui. ¿Aashin anashaatain maʼin tü kasa pülasü naaʼinrakat Jesús?

Eʼitaaneeshi Jesús süpüla nuluwataainjachin saaʼu tü wayuukalüirua süka ponuin maʼin saaʼin tü kasa pülasü naaʼinrakat. Nnojoishi niʼitaain nia Jehová sünain aluwatawaa soʼu tia. Nütüjaa aaʼu Jesús naʼatapajüinjachin waneʼereeya nüikaleʼennapa sünain aluwatawaa saaʼu Nuluwataaya Maleiwa. Nüjütüin Jesús tü wayuukalüirua otta nüjütaka na aluwataaushikana süpüla noʼunuin waneemüin saʼata tü palaakat Galilea. Oʼuna müshiijaʼa na aluwataaushikana suluʼu wanee anuwa otta müshia Jesús, oʼunushi nümüiwaʼa saaʼumüin wanee uuchi. ¿Jamüshi nuʼunakaʼa Jesús nümüiwaʼa? Shia süka nuʼuraajeein maʼin nümüin chi Nüshikai. Oʼuraajawaishi waneepia Jesús jaʼitaichi kupaain maʼin nia.