Waraittüshi Jesús sooʼopünaa tü palaakat

Nuuntuin Jesús niiyajüin na ayuuishiikana otta nüsoʼireʼerüin saaʼin wayuu outusü. Jee müsia niimaleʼerüin wawai otta juya. Wanaa sümaa chajachin oʼuraajüin Jesús saaʼu tü uuchikat, niʼrüin wattajee sukumajaain wanee wawai shiroku tü palaa kanüliakat Galilea, müliashii maʼin na aluwataaushikana sutuma tü wawaikat. Nüshakataka Jesús saaʼujee tü uuchikat jee nuʼunaka nanainmüin na aluwataaushikana sümaa waraittüin nia sooʼopünaa tü palaakat. Neʼrapa wanee wayuu waraittüin sooʼopünaa tü palaakat, mmotshii maʼin naya. «Nnojo mmoluin jia, taya tayakai», nümaka Jesús namüin.

«Señotkalee, müleka shiimainreje piain weʼrüin, anashi peenaküle taya süpüla tantajachin pünainmüin», nümaka Pedro. Nusoutaka Jesús nümüin: «Anakajaʼa, jalaichi pümaala». Nüshakataka joo Pedro suluʼujee tü anuwakat sünain waraittüin sooʼopünaa tü palaakat nünainmüin Jesús. Mmotkalaka Pedro niʼrapa tü wawaikat. Nuʼttakalaka sünain nimerolo nimerolo nümüin shirokumüin tü palaakat. «Jalia taya Señotkalee», nümaka Pedro sümaa nuʼwaatüin. Niyurulaka nütüna Jesús sünain naapaain Pedro. «Pia matsüinkai anoula, ¿jamüshi nnojoika püchecherüin paaʼin sünain anoujaa tanain?», nümakalaka Jesús nümüin.

Noʼotoopa Jesús nümaa Pedro suluʼumüin tü anuwakat, eimalaasü tü wawaikat. Talatakajasaʼa maʼin naaʼin na aluwataaushikana soʼu tia. «Shiimainjaʼa sünain piain chi Nüchonkai Maleiwa», namaka.

Kojuyatua niimaleʼerüin Jesús wanee wawai otta tü palaakat. Soʼu wanee kaʼi, oʼunushi Jesús namaa na aluwataaushikana waneemüin saʼata tü palaakat, atunkushi Jesús suluʼu tü anuwakat sümaʼainruʼu suʼunuin shirokupünaa tü palaakat. Süntaka wanee wawai nanainmüin otta shipirajaweeka wüin tü anuwakat sutuma. «Ekirajüikalee, püchijiraa maala. Outushii taa waya», namaka na aluwataaushikana nümüin Jesús. Nüshaʼwalaaka Jesús jee nüchiajaaka tü wawaikat sünain müin nünüiki: «Jimata pia». Eimalaa müsia shia sutuma nünüiki. «Matsüinsat junoula», nümaka Jesús namüin. «¿Jaraikai wayuukai chii, kacheʼekai amüin wawai ooʼulaka tü palaakat?», namaka na aluwataaushikana. Nayaawata aaʼu na aluwataaushikana neʼitaainjatüin naaʼin nünain Jesús otta nnojoliinjanain mmoluin naya.