Oʼunushi Damascomüin

¿PÜTÜJAA aaʼu jarai chi palasütakai? Nia Saulo, chi aaʼinmajakai nasheʼin na aʼinaʼalakana Esteban. ¡Piirakaa sümüin tü mmakat chuwatuuisü! ¿Kasa alataka?

Süchikijee ouktuin Esteban, nüchajaain Saulo na nikirajüinkana Jesús süpüla naainjüin kasa mojusü namüin. Antüshi nia nepialuʼumüin süpüla nüpüreesajirüin naya. Kojuya na nikirajüinkana Jesús oʼunaka suluʼumüin wanee mma naata otta aküjüshii naya pütchi chaaʼaya. Oʼunushi Saulo nachiirua, süchikijee tia nuʼunaka Damascomüin.

Wopuluʼupa nia chuwatuuijaaka tü mmakat. Pasanainka nia sünain sümaa nujuttuin maʼaka piʼrüin suluʼu tü ayaakuaakat. Naapaka wanee pütchi: ‹¡Saulo, Saulo! ¿Jamüshi müliaka taya putuma?› Na nümaajanakana neʼrüin tü alatakat otta naapüin tü pütchikat, akatsaʼa nnojotsü natüjaain saaʼu.

Nümaka Saulo: ‹¿Jarai pia, Laülaashikalee?

Sümaka tü pütchikat: ‹Taya Jesús, chi müliakai putuma›. Müsü nünüiki Jesús süka müin naainjakai Saulo nümüin tü naainjakat namüin na nikirajüinkana.

Nümaka Saulo: ‹¿Kasa taainjüinjatka Laülaashikalee?›

Nümaka Jesús: ‹Pütamaa otta puʼuna Damascomüin taküjeerü pümüin chaaʼaya tü paainjüinjatkat›. Nütamaapa Saulo otta neerulapa tü noʼukot. ¡Moʼupaʼasai nia! Najattünaka Damascomüin.

Nümaka Jesús nümüin wanee nikirajüin chaaʼaya Damasco: ‹Ananías, puʼuna eemüin tü kaaye kanüliakat Lotusü. Nipialuʼu Judas, püsakira nünain wanee wayuu kanüliashi Saulo. Taneeküin nia süpüla niʼyataain tamüin›.

Nuʼunaka Ananías. Niʼrapa Saulo nümaka sümaa niʼitaain najapü naaʼu: ‹Nuluwataain taya chi Senyotkai süpüla koʼuin pia püchikuaʼa otta katchinjachin chi Naaʼinkai Maleiwa paaʼu›. Ojutuusü noʼuluʼujee Saulo wanee müsü aka saaʼin soi jime. Koʼuka nia nüchikuaʼa.

Aküjüshi maʼin pütchi Saulo namüin wainma wayuu. Chi aluwataaushikai Pablo nümünaka, ekirajaweena waya wainma kasa nüchiki. Wekirajaa palajana sünain tü naainjakat Pedro nutuma Maleiwa.