Nümaashi Pablo Timoteo

CHI jimaʼai nümaakai Pablo nia Timoteo. Kepiashi nia Listra. Eunice sünülia tü niikat otta Loida sünülia tü noushukot.

Apünüintuaichi antüin Pablo Listramüin. Alatüsü wanee juya süchikijee nüntüin nümaa Bernabé sünain aküjaa pütchi. Aleʼejüshi Pablo jooluʼu nümaa Silas chi naʼaleewainkai.

¿Pütüjaa aaʼu jamüsü nünüiki Pablo nümüin Timoteo? Müshi nia: ‹¿Oʼuneeshi pia wamaa? Pükaaliinja waya sünain aküjaa pütchi sümüin wayuu sainküin mma›.

Nümaka Timoteo: ‹Aa, oʼuneeshi taya›. Mapa nüpütaka nüpüshi otta nuʼunaka nümaa Pablo otta Silas. Süpülapünaa wekirajaain sünain tü naainjakat, wekirajaa sünain tü alatakat nümüin Pablo. Alatüsü 17 juya süchikijee naashajaain Jesús nümaa suluʼu tü wopu chainjatkat Damascomüin.

Soto paaʼin nüntüin Pablo Damascomüin süpüla naainjüin kasa mojusü namüin na nikirajüinkana Jesús. Aluʼusaʼa jooluʼu anoujushi nia. Mapa nuʼutuneeka aaʼin Pablo. Nüshakatinnaka suluʼu wanee canasta süchikijee süsepü tü pueulokat natuma na nuwalayuukana.

Antüshi Pablo Antioquíamüin süpüla nüküjüin pütchi. Na nümaajanakana Cristo münüshii na nikirajüinkana Jesús suluʼujee tia mmakat. Mapa nuluwataanaka Pablo otta Bernabé Antioquíajee süpüla naküjüin pütchi sümüin wayuu wattapünaa. Wanee mma eere nantüin shia Listra, eere kepiain Timoteo.

Aleʼejüshi Pablo Listramüin waneemüin juya süchikijee chajachinkain nia. Nuʼunapa Timoteo nümaa Pablo otta Silas, ¿Pütüjaa aaʼu jalainjana naya? Piirakaa sümüin tü shiyaakuakat mma otta wekirajaa sünain.

Oʼunushii naya Iconiomüin palajana, mapa Antioquíamüin. Noʼunaka Troasmüin, mapa Filiposmüin, Tesalónicamüin otta Bereamüin. ¿Piʼrüin Atenas suluʼu tü shiyaakuakat mma? Aküjüshi pütchi Pablo chaaʼaya. Süchikijee naküjaka pütchi Corinto wanee juya shiatapünaamüin. Mapa nantaka Éfesomüin. Naleʼejaka Cesareamüin suluʼu anua otta noʼunaka Antioquíamüin, eere makatüin nia.

Oʼunushi wattamüin Timoteo sümaa nükaaliinjüin Pablo sünain aküjaa pütchi süpüla eeinjanain wayuu anoujushii. Miyoʼupa pia, ¿meerü pukuwaʼipa maʼaka naaʼin Timoteo?