Aküjashii maʼin pütchi wattapünaa na anoujashiikana

Jüüjüüshii na aluwataaushikana sümüin tü nümakat Jesús süpüla süküjünüinjatüin tü pütchikat sainküin mmakat süpüshuaʼa. Soʼu juyakat 47 soʼu wakalia, aluwataanüshi Pablo nümaa Bernabé natuma na anoujashii chajanakana Antioquía süpüla noʼunuin wattapünaa sünain aküjaa pütchi. Aküjashii maʼin pütchi naya sümaa talatüin naaʼin suluʼupünaa tü mmakat Asia Menor, maʼaka saaʼin chaa Derbe, Listra otta Iconio.

Aküjashi pütchi Pablo nümaa Bernabé sümüin wayuu maʼleekalia, sümüin wayuu eeka washirüin, eeka maʼletsein, jimaʼalii, majayünnüü otta sümüin wayuu laülaayuu. Wainma na aapaakana sümaa tü pütchi nüchikimaajatkat Jesús. Jee Pablo nümaa Bernabé naküjainña pütchi nümüin wanee wayuu aluwataakai saaʼu Chipre, Sergio Paulo nünülia. Eejachi wanee ouutshi ayoutaka tü naainjakat Pablo otta Bernabé. «Mojusü tü paaʼinrakat noʼuluʼu Jehová», nümaka Pablo nümüin. Nüküjaiwaʼaya Pablo tia, moʼupaʼajaasai chia ouutshikai. Niʼrapa tia Sergio Paulo ekerotushi nia sünain anoujaa.

Aküjashi pütchi Pablo nümaa Bernabé sainküin mma, sainküin miichi, metkaaruluʼu, suluʼupünaa wopu otta suluʼupünaa tü ekirajüleekat na judíokana. Soʼu wanee kaʼi, kasaʼashi wanee wayuu nüchikuaʼa natuma chaa Listra. «Ashakatüshii na wamaleiwasekana wanainmüin. Anashii waʼwaajüle naya», müshii na wayuukana neʼrapa tü kasa pülasü naaʼinrakat. «¡Nia neʼe juʼwaajüinjachika Maleiwa nümüiwaʼa. Wayuʼulaa neʼe wayakana!», nümaka Pablo nümaa Bernabé namüin na wayuukana. Nantapaaka wanee wayuuinnua mapa naʼwanajeʼeraka saaʼin tü wayuukalüirua nooʼomüin Pablo. Neʼinaʼalaka Pablo süka ipa sümaa najarattüin nia anuuipaʼamüin suluʼujee tü pueulokot, outayaashi nia naaʼinruʼu. Katapejeʼe noʼu Pablo. Nantamaataka wanee anoujashii sünain akaalinjaa Pablo otta namaaka nia nüchikuaʼa pueulopaʼamüin. Aleʼejüshi Pablo mapa, Antioquíamüin.

Soʼu juyaka 49 soʼu wakalia, oʼunushi Pablo sünain anaʼlawaa namüin na anoujashii chajanakana Asia Menor. Oʼunushi Pablo sünain aküjaa pütchi suluʼupünaa tü mmakat Europa, maʼaka saaʼin Atenas, Éfeso, Filipos, Tesalónica otta suluʼupünaa waneirua mma. Sünain tia oʼunajawaakat, nümaajachi Silas, Lucas otta wanee jimaʼai kanüliakai Timoteo. Aʼyataajiraashii naya süpüla eeinjatüin jeketü outkajaalee otta nakaalinjain na anoujashiikana süpüla ichein nanoula. Jamüshijaʼa Pablo makatüshi nia soʼu wanee juya shiatapünaamüin chaa Corinto süpüla nükaalinjain na anoujashiikana. Aküjashi maʼin pütchi Pablo, ekirajüshi wayuu otta ashajüshi nia karaloʼuta namüin na anoujashiikana. Aʼyataʼawaishi nia sünain aainjaa tü loona ojotonnokat süpüla miichin. Aleʼejüshi Pablo mapa nüchikuaʼa Antioquíamüin.

Jee mapa, soʼu juyakat 52 soʼu wakalia, oʼunushi Pablo nüchikuaʼa suluʼupünaa tü mmakat Asia Menor. Apünüintuairü nukua soʼu tia. Chakuwaishi nia palaamüin süpüla nüntüin Filiposmüin. Süchikijee tia, antüshi nia Corintomüin. Jee müshia Pablo makatüshi maʼaka jeʼra juya chaa Éfeso sünain ekirajaa, sünain eiyajaa wayuu eekai ayuulin otta sünain akaalinjaa na anoujashiikana. Ekirajawaishi nia suluʼu wanee miichi ekirajülee. Wainma wayuu aapaakana sümaa tü pütchikat sümaa nanouteʼerüin nakuwaʼipa. Süchikijee nuʼunuin Pablo wattapünaa maʼin sünain aküjaa pütchi nüchiki Maleiwa, ouyantüshi nia Jerusalénmüin.