Atunkushi wanee jintüi

PIIRAKAA sümüin tü ayaakuaakat, ¿kasa alataka? ¿Eʼikaashiche chi jintüi palasütakai? Chi ojuʼitaakai suluʼujee tü piichikat namaa na wayuukana nia Pablo. ¿Piʼrüin Timoteo? ¿Ojutuushiche chi jintüikai suluʼujee tü wentaanakat?

Aa, ojutuushi nia. Aashajaashi Pablo namüin na nikirajüinkana Jesús chaaʼaya Troas. Nütüjaa aaʼu nnojoluinjanain niʼrüin naya kakalia, oʼunajachi nia waneemüin kaʼi suluʼu wanee anua. Makalaka naashajaain süseʼeruʼumüin aika.

Eutico nünülia chi jintüikai. Joyotushi nia soʼuluʼu tü wentaanakat, nutunkaka otta nujutuuka iipünaajee. Nainkuuka aaʼin na wayuukana maʼaka piʼrüin suluʼu tü ayaakuaakat. Apataanüshi chi jintüikai mmoluʼujee sümaa ouktuin nia.

Niʼrapa Pablo ouktuin chi jintüikai, nuʼwachiraaka naaʼu sümaa nukoʼojooin nünain, nümaka: ‹Nnojo jüinkuuin aaʼin. ¡Anashi nia! ¡Shiimain tü nümakat Pablo! ¡Nüsoʼireʼerüin naaʼin chi jintüikai! Talataka na wayuukana sutuma tia.

Noʼotooka nachikuaʼa otta nekaaka. Ayatüshi aashajaain Pablo jaʼyuumüinreʼeya. ¡Watüjaa aaʼu nnojoluin nutunkuin Eutico nüchikuaʼa! Noʼotooko Pablo, Timoteo otta na nümaajanakana suluʼu tü anuakat. ¿Pütüjaa aaʼu jalainjana naya?

Apünüintuairü nukuwa Pablo sünain aküjaa pütchi sainküin mma. Apünüin juya nia Éfeso. Kakalia maʼin tü apünüinkat nukuwa suulia tü piantuakat.

Süchikijee noʼunuin Troasjee, antüsü tü anuakat Miletomüin. Süka pejein Éfeso yalejee, nüsaajiraka Pablo na laülaashiikana suluʼu tü outkajaalee chajatkat Éfeso süpüla naashajaain namaa. Nuʼunapa Pablo suluʼu tü anuakat mojuka naaʼin nüchiirua.

Mapa süntaka tü anuakat Cesareamüin. Nüntaka Pablo nipialuʼumüin Felipe wanee nikirajüin Jesús. Nüküjaka Agabo chi nünüikimaajachikai Maleiwa püreesainjachin Pablo nüntapa Jerusalénmüin. Ekeraajüsü tü nümakat Agabo. Apünüinpa Juya püreesain Pablo Cesarea, nuluwataanaka Romamüin süpüla süsalainjachin nia naainjala nutuma César, chi aluwataaikai Roma. Wekirajaa sünain tü alatakat wanaa sümaa nuʼunuin Romamüin.