Tü paainjüinjatkat

¿PÜTÜJAA aaʼu kasa naashajeʼeraka na tepichikana? Shia tü karaloukta paashajeʼerakat... Aküjalaa suluʼujeejatü tü Wiwüliakat. Naashajeʼerüin tü aküjalaa paashajeʼerakat... «Tü paainjüinjatkat».

¿Pütüjaa aaʼu kasa nekirajaaka anain? Ekirajaashii sünain niainjachin Jeʼwaa otta Jesús ekirajaanüin anain palajana süpüla katüin woʼu waneepia. Müsü tü Wiwüliakat: ‹Süpüla katüin poʼu waneepia pikirajaa nünain chi Maleiwa shiimainkai otta Jesucristo chi Nüchonkai›.

¿Kasa waainjüinjatka süpüla wekirajaain nanain? Waashajeʼerüinjatü tü karalouktakat Aküjalaa suluʼujeejatü tü Wiwüliakat. Aashajaasü nüchiki Jeʼwaa, Jesús, tü kasa naainjakat otta tü naainjüinjatkat. Akatsaʼa eesü wanee karaloukta waashajeʼerüinjatka.

¿Piʼrüin tü karaloukta palasütakat mmoluu? Shia tü Wiwüliakat. Puchunta sümüin wanee wayuu saashajeʼerai pümüin tü pütchi suluʼujeejatkat tü Wiwüliakat ashajünaka sajaʼttiamüin tü aküjalaakat. Süküjüin wamüin tü Wiwüliakat tü waainjüinjatkat süpüla waʼyataain nümüin Jeʼwaa otta katüin woʼu waneepia. Makalaka waashajeʼerüinjatüin shia waneepia.

Nnojoishii waya atüjüinjanain müle nüchiki Jeʼwaa otta Jesús. Jaʼitairü watüjüin maʼin nachiki eesü süpüla nnojoluin katüin woʼu waneepia. ¿Pütüjaa aaʼu kasa tü wanee waainjüinjatkat?

Waainjüinjatü tü wekirajaakat anain. ¿Sotushi paaʼin Judas Iscariote? Napüshi nia na nüneekakana Jesús. Atüjüshi maʼin Judas nüchiki Jeʼwaa otta Jesús. ¿Kasa alataka nümüin mapa? Kanainjaasü naaʼin nukuwaʼipa nümüiwaʼa otta naapaka nikii Jesús saaʼu 30 nneerü pülaata. Nnojoleechi katüin oʼu Judas waneepia.

¿Sotushi paaʼin Guehazí, chi wekirajaakai anain suluʼu tü Aküjalaakat 69? Aküjüshi alawaa süpüla kamaʼanain nia nneerü otta kuluulu nnojotka nukoroloin. Süsalaka nia nutuma Jeʼwaa. Meena waya nnojorüle woonooin nümüin Jeʼwaa.

Akatsaʼa eeshii wayuu anamia aʼyataaka waneepia nümüin Jeʼwaa. Naya washateeka akuwaʼipa, ¿aashimüin? Washateein nukuwaʼipa Samuel. Soto paaʼin suluʼu tü Aküjalaakat 55 eein maʼaka 4 jee 5 nuuyase Samuel wanaa sümaa niʼyataain nümüin Jeʼwaa suluʼu tü aʼwaajüleekat. Makalaka nnojoluin choʼujaain miyoʼuin pia süpüla piʼyataain nümüin Maleiwa.

Meeshii waya maʼaka naaʼin Jesús. Saashin tü Aküjalaakat 87 chajachi Jesús jintüliiwaʼaya nia suluʼu tü aʼwaajüleekat sünain aashajawaa nüchiki Jeʼwaa namüin wanee wayuuinnua. Washata nukuwaʼipa. Waashajaa nüchiki Jeʼwaa otta Jesucristo namüin na wayuukana. Waainjüle tia, kateerü woʼu waneepia suluʼu tü jeketkat paraiisü yaaya saaʼu tü Mmakat.