¿Kasa nanoujaka anain na aküjüliikana pütchi nüchiki Jeowa?
«Waapajee amüinrü pünüikü [...] watüjaa aaʼut sünain mojuin sünüikü wayuu maleekat sümüin tü jünoujakat anain» (Aluwataaushikana 28:22). Tü naaʼinrakat nekiipüʼü na judío chajanakana Roma soʼu nakalia na nikirajüinkana Jesús, anasü maʼin süpüla ashatünaa. Keeʼireesü naaʼin naapajüin nanüiki na anoujakana sünain tia suulialeʼeya aapajaa tü namakat na mojukana anüiki.
Müsia maaʼulu, mojusü pütchi nachiki na aküjüliikana pütchi nüchiki Jeowa. Nnojotsü süpüla waʼatapajüin anainjatüin nanüiki na wayuu mojukana anüiki wachiki. Sutuma tia, waküjeein pümüin süpüshi tü wanoujakat anain.
Tü Wiwüliakat, Jesucristo otta Maleiwa
Wanoujüin saapünüin tia pütchikat wamüin [tü Wiwüliakat] nutuma chi naaʼinkai Maleiwa› (2 Timoteo 3:16). Eeshii na aküjakana nnojoluin woʼunüin nüchiirua Cristo, akatsaʼa tia nnojotsü shiimain. Wanouja anainrü tü nüküjakat chi aluwataaushikai Pedro nüchiki Jesucristo: ‹Nia neʼe oʼtteʼeraka wayuu süka nnojoluin eein wayuu saaʼu tü mmakat oʼtteʼeraka waya› (Aluwataaushikana 4:12).
Akaisaʼa müshi Jesús: «Nüchon taya Maleiwa» otta «ajütünüshi taya nütüma chi Tashikai». Wayakana aküjüliikana pütchi nüchiki Jeowa wanouja anainrü laülaain Maleiwa nuulia Jesús (Juan 10:36; 6:57). Müshi Jesús: ‹Laülaa chi Tashikai toulia› (Juan 14:28; 8:28). Wanaawashi Jesús nümaa Maleiwa naashin na anoujakana sünain apünüinshin sümaa waneeshiain Maleiwa. Tia, nnojotsü wanoujüin anain. Shia wanoujaka anain akumajuushin Jesús otta aluwataashi Maleiwa naaʼu (Colosas 1:15; 1 Corinto 11:3).
Süchuntia nünülia Maleiwa wayuunaikiruʼu shia Jeowa. Müsü tü Wiwüliakat: «Eʼraajünüinjachi piain kanüliain [...] Jeowa, pia müleʼe Miyoʼushika saaʼu süpüshuaʼa tü mmakat» (Salmo LXXXII, 19 [83:18], Torres Amat). Sutuma tia, kojutüsü nümüin Jesús nünülia Maleiwa otta nikirajüin na nikirajüinkana sünain achuntaa: ‹Taata Maleiwa chakai iipünaa. Kasataalejese kojutüin pia [pünülia, NM] sütüma wayuu›. Otta müshi Jesús nümüin Maleiwa: «Teʼraajirüin tü pünüliakat namüin na wayuu paapakana tamüin» (Mateo 6:9; Juan 17:6, NM).
Maʼaka naainjapuʼuin shia Jesús, weʼraajirüin nünülia Maleiwa otta tü naaʼinrajatkat. Sutuma tia, waneeküin tü anülieekat: Na aküjüliikana pütchi nüchiki Jeowa süka washatüin nukuwaʼipa Jesús «chi lotokai akuaippa sünain aküjaa tü shiimainkat» (Alateetkat Mapeena 1:5; 3:14). Müsü Isaías 43:10, NM, nachiki na aʼyataakana nümüin Maleiwa: «Aküjülii jia pütchi tachiki —müsü nünüiki Jeowa—, otta müshia chi aʼyataaikai tamüin, chi taneekajalakai».
Tü Nuluwataayakat Maleiwa
Nikirajüin Jesús na nikirajüinkana sünain achuntaa: «Kasataalejese püntüin maalü waʼakamüin sünain aluwatawaa». Aashajaapuʼushi maʼin Jesús süchiki aluwataayakat tia (Mateo 6:10; Lucas 4:43). Wayakana aküjüliikana pütchi nüchiki Jeowa wanoujüin sünain shiimain otta chain iipünaa Aluwataayakat tia. Aluwataajeerü saaʼu tü Mmakat otta chi Sülaülainjachikai nia Jesucristo. Müsü tü Wiwüliakat: ‹Nülüʼüjüin nütünakiinain tü shiyaawasekat nuluwataaya. Aluwataajeechi saaʼu wainma mma otta tü jimataakat aaʼin nnojoleerü ajaʼttüin› ((Isaías IX, 6, 7, TA).
Nnojoishi niain neʼe Jesucristo aluwataainjachin, eejeena kojuya wayuu chaaʼaya iipünaa sünain aluwatawaa. Müshi chi aluwataaushikai Pablo: «Wachecherüle waaʼin [...] aluwataweena waya wanaa nümaa» (2 Timoteo 2:12). Süküjüin tü Wiwüliakat jeʼrainjanain na asoʼiraainjanakana aaʼin süpüla aluwatawaa nümaa Cristo chaaʼaya iipünaa, eeshii ‹maa aka 144.000 wayuu süka nayain taashiinapain nütüma Maleiwa suulia naainjala saʼakajee wayuu süpüshua› (Alateetkat Mapeena 14:1, 3).
Sünain süpüshuaʼa aluwataaya eeinjatü wayuu suluwataainjatka aaʼu. Wanouja anainrü nnojoluin nayain neʼe aneekünüin na aluwataainjanakana, eeinjatü wainmashaata wayuu katüinjatka oʼu waneepia. Mapa, paraiisüpa tü Mmakat wainmeerü wayuu suluwataainjatka aaʼu Nuluwataaya Maleiwa. Wayuukana naainnua naya na oonookana nümüin Cristo otta na nümaajanakana. Müsüjeseʼe wanoujüin sünain nnojoluinjatüin sajaʼttüin tü Mmakat otta shikeraajeerüin tü sümakat tü Wiwüliakat: «Tü mmakat namüinjatü na lotokana akuwaʼipa otta kepiainjana waneepia saaʼu» (Salmo 37:29; 104:5, NM).
¿Jameerü sukuwaʼipa süntia Nuluwataaya Maleiwa? ¿Shiache sükajee nanoujüin na wayuukana napüshuaʼa sünain Nuluwataaya Maleiwa? Nnojo, saashin tü Wiwüliakat najaʼttirüinjatü Maleiwa tü kasakalüirua süpüleerua tü Nuluwataayakat, müsü shia: «Niʼitaajeerü chi Maleiwa sirumatuʼujeʼewaikai wanee aluwataaya nnojoluinjatka ajaʼttinnüin [...]. Sajaʼttireerü süpüshuaʼa tü aluwataayakalüirua otta shiainjatü eeka waneepia» (Daniel 2:44, NM).
¿Joujeerü suʼttaka Nuluwataaya Maleiwa sünain aluwatawaa? Süka weʼrüin shikeraajüin maaʼulu tü ashajünakat sümaiwa suluʼu tü Wiwüliakat, watüjaa aaʼu sülüʼülüin Nuluwataaya Maleiwa. Wounejaain pia süpüla paashajeʼerüin tü alatüinjatkat «sülüʼütpa sükalia sajaʼttüinjatüin tü kasakat süpüshua». Tia, suluʼusü Mateo 24:3-14; Lucas 21:7-13, 29-31 otta 2 Timoteo 3:1-5.
Sükajee ‹alin wapüla Maleiwa süka süpüshua waaʼin jee alin wapüla wayuu süpüshua maa aka alin waya wapülajiraa›, paaʼinwajiraashii waya jaʼitairü naatain woumain, weʼiruku otta wainmale kasa wamaʼana (Marcos 12:30, 31). Eʼraajünüshii waya sutuma aijiraain namaa na wawalayuukana sainküinpünaa tü mmakat (Juan 13:35; 1 Juan 3:10-12). Sutuma tia, nnojoliishii waya sünainpünaain poliitika. Washateein nakuwaʼipa na oʼunakana nüchiirua Jesús, müsü pütchi nachiki: «Nnojoliishii süpüshin naya tü manoujainsatkalüirua, maa aka tayakai sünain nnojolin süpüshinya» (Juan 17:16). Wattaluʼuwaa noulia na manoujüinsaliikana, sünainpünaasü ayouktaa tü akuwaʼipaa yarüttüsü mojukat saashin tü Wiwüliakat maʼaka saaʼin: Aküjaa alawaa, aʼluwajaa, aʼluwajirawaa akuwaʼipaa, amaʼüjirawaa sümaa wayuu nnojotka aʼwayuuseein, aainjirawaa akuwaʼipaa nutuma wanee toolo nümaa wanee toolo, mojuu atuma sukuwaʼipa tü ishakat, kamaleiwaseyawaa otta waneeirua (1 Corinto 6:9-11; Éfeso 5:3-5; Aluwataaushikana 15:28, 29).
Tü waʼatapajakat
Wayakana aküjüliikana pütchi nüchiki Jeowa watüjaa aaʼu nnojoluin shiain neʼe wakuwaʼipainjatüin tüü. Wanouja anain nüjütünüin Jesús nutuma Jeowa süpüla naakajirüin waya süka tü nüshakat. Sutuma tia, anasü wakuwaʼipa noʼuluʼu Maleiwa otta kateerü woʼu waneepia suluʼu wanee mma anasü. Maʼaka nüküjüin chi aluwataaushikai Pablo: «Anajiraainapa waya jooluʼu nümaa Maleiwa sünainjee tü nüshakat Jesús amülakat» (Roma 5:9; Mateo 20:28). Kojutüsü wamüin tü naaʼinrakat Maleiwa otta chi Nüchonkai sükajee naakajirüin waya süpüla katüinjatüin woʼu mapeena.
Nuluwataapa Maleiwa asoʼiraainjana aaʼin na ouktüshiikana. Wanouja anainrü tü sümakat tü Wiwüliakat ouktapa wanee wayuu, nnojoluichipa eein nia otta «soʼu kaʼikat tia nnojoluitpa kasain jülüjüin naaʼin» (Salmo 146:3, 4, NM; Ezequiel 18:4; Eclesiastés 9:5). Süpüla katüinjatüin noʼu na wayuukana nachikuaʼa, sotuinjana naaʼin Jeowa otta nüsoʼireʼerüinjana aaʼin (Juan 5:28, 29).
Wanouja anainrü wainmeerüin wayuu kataka oʼu suluʼu wanee mma anasü sajaʼttirapa Nuluwataaya Maleiwa naluwataaya na wayuukana, maʼaka katüin noʼu Noé sümaa nüpüshi süchikijee tü juya miyoʼushaatakat (Mateo 24:36-39; 2 Pedro 3:5-7, 13). Akatsaʼa, süpüla katüinjatüin woʼu choʼujaasü waaʼinrüinjatüin tü nuluwataakat anain waya Jeowa. Müsü tü Wiwüliakat: «Tü nakuaippakat na manoujainsaliikana [...], yüüʼülaa meerü soʼuweena wane kaʼi. Aluʼujasa chi wayuu aaʼinrakai tü nuluwataakat anain Maleiwa, ayateechi nümaa süpüla kaʼikat süpüshua» (1 Juan 2:17; Salmo 37:11; Alateetkat Mapeena 7:9, 13-15; 21:1-5).
Nnojotsü süpüla süküjünüin süpüshuaʼa tü wanoujakat anain suluʼu karalouktakat tüü. Sutuma tia, wounejaain pia süpüla püchuntüin sooʼomüin karaloukta süpüla pikirajaain.
[Komentaario suluʼuka süpana 4]
Waneeküin tü anülieekat na aküjüliikana pütchi nüchiki Jeowa süka washatüin nukuwaʼipa Jesús