Nüchiajaaya eekai niʼrülin wayumüin

1, 2. (1) ¿Jarat tü pütchi nümakat Jesuu eeʼiyataka neʼrüliin wayumüin na laülaashiikana naaʼu na judíokana? (2) ¿Kasa tü kapüleekalü ayaawataa nanain na tepichikana naashin Jesuu?

MÜSHI Jesuu namüin na laülaashiikana naaʼu na judíokana: ‹Eetaashi wane wayuu, kachonshi piamashii tooloyuu. Nümaka nümüin chi emülieekai: «Puʼuna piʼyataaiwa suluʼu taʼapainse». ‹Nnojo›, nümakalaka. Süchikijee, eeʼiranajaasü naaʼin je nuʼunakalaka. Müsia joo nünüiki nümüin chi epayaakai. «Meerüjaʼa», nümakalaka chi epayaakai. Moʼunüinka nia. Nüsakirakalaka Jesús na laülaayuu judíokana: ‹Nanainjee na piamashiikana achonlu, ¿jarai oonooka sümaa nünüiki chi nashikai?›. «Chi emülieekai», namaka nümüin› (Mateo 21:28-31).

² Sükajee tia, niiʼiyatüin Jesuu eʼrüliin wayumüin na laülaashiikana naaʼu na judíokana. Müshii naya maʼaka naaʼin chi epayaakai, nnojotsü naainjüin tü nüchekakat Maleiwa sümaa naapüin paala nanüiki. Nayaawateerü aaʼu na wayuukana, nütüjaain saaʼu Jesuu tü nakuwaʼipakat sümaa napüshi. Naashin Jesuu, kapüleesü ayaawataa saaʼu tü naaʼinrajatkat otta tü jülüjakat naaʼin na tepichikana. Eʼrüipuʼule wayumüin wanee jimaʼai, eesü süpüla laülaain naaʼin miyoʼupa nia otta kojutüin nia atumawaa. Tia, jülüjüinjatü waaʼin wekirajaapa nachiki na tepichi eʼrüliikana wayumüin.

NAAʼINRAKA EEKAI NIʼRÜLIN WAYUMÜIN

3. ¿Jamüsü nnojoluinjatka namamaatüin na wayuukana neʼrüliin wayumüin nachonnii?

³ Eesü waapüle nachiki na tepichi eʼrakana maʼin wayumüin namüin nashi jee nei. Eeshii weʼraajüle wayuu matüjüinka jaa maa achonnii. Akatsaʼa kapüleein ayaawataa saaʼu shiimainre neʼrüliin wayumüin na tepichikana otta jamüin eeka na eʼrakana wayumüin. ¿Kasa naaʼinrajatka na wayuukana neʼreere maʼin wayumüin nachonnii? Süpüla tia, waashajaa palajana süchiki tü naaʼinrakalü eekai niʼrülin wayumüin.

4-6. (1) ¿Kasa naainjaka chi eʼrüikai wayumüin? (2) ¿Kasa jülüjüinjatka naaʼin na wayuukana nnojoiwaire jaa nümüin chi jintüikai namüin?

⁴ Tü naaʼinrakalü eekai niʼrülin wayumüin shia matüjüin nia jaa maa otta mojutsai nümüin chi laülaakai naaʼu. Sutuma ‹suluʼuin naaʼin waneepia na tepichikana tü malaakat› (Proverbios 22:15, NM), nnojoishii jaa müin namüin nashi otta namüin na laülaakana naaʼu. Naainjüin maʼin tia jimaʼaliipa otta majayünnüüpa naya. Jiwaʼatüsü maʼin naaʼin sutuma shiiʼiranajaain natapaʼa. Sutuma miyoʼuinnapain nachonnii na wayuukana, kapüleesü namüin wanaawajiraain naaʼin namaa. Eesü nnojorüle nacheküin miyoʼuyuumaatüin nachonnii, akanasaʼa na tepichikana miyoʼumaateeshii naya.

⁵ Na eʼrüliikana wayumüin, nayouktüin tü nekirajakalü anain nashi jee nei. Nnojoishi eʼrülin wayumüin wanee jintüi nnojoiwaire noonooin. Eejeena na mamalainka amüin tü anoujaakat otta na ayouktakana shia. Sutuma tia, nnojoishii mamaatüinjanain na wayuukana neʼrüliin wayumüin nachonnii.

⁶ ¿Eʼrüshii wayumüin namüin nashi napüshuaʼa na tepichikana süka jimaʼaliin otta majayünnüüin naya? Nnojo. Palit neʼe na eʼrüliikana maʼin wayumüin. ¿Kasa eeka süpüla waküjüin nachiki na masütaajüka süchiirua neʼrüin wayumüin? ¿Jamüshii neʼraka wayumüin?

¿JAMÜSHII NEʼRAKA WAYUMÜIN?

7. ¿Kasa eeka süpüla naaʼinrüin na tepichikana sutuma tü naainjirakat Satanaa?

⁷ Eʼrüshii naya wayumüin sutuma tü kasa mojusü naainjirakat Satanaa. Müsü tü Wiwüliakat: ‹Tü wayuu manoujainsatkalüirua, nia aluwataaka saaʼu chi Yolujaakai› (1 Juan 5:19). Nayakana, yarüttüsü maʼin nakuwaʼipa. Tia, shia tü naaʼinmajüinjatkalü oulia nakuwaʼipa na anoujüshiikana (Juan 17:15). Yarüttüsü maʼin tü kasa naainjakat maaʼulu na nuluwataakana aaʼu Satanaa, mojulaashii naya otta awainmalaasü maʼin tü kasa mojusü naainjakat suulialeʼeya sümaiwa (2 Timoteo 3:1-5, 13). Nnojorüle nekirajünüin, naapinnüin otta naaʼinmajünüin na tepichikana, nanainpünaajeerü «tü akuwaʼipaa suluʼuitpakat naaʼin na wayuu eʼrüliikana wayumüin» (Éfeso 2:2, NM). Naainjüin tia na wayuu mojukana süpüla naʼaleewain. Müsü tü Wiwüliakat: «Eeka namaain wayuu eeka mekiin mojeerü nukuwaʼipa» (Proverbios 13:20, NM). Na aleewakana namaa na keejiakana amüin tü akuwaʼipaa mojusükat, alataajeerü shia nanainmüin. Ekirajünüinjana waneepia na tepichikana süpüla natüjaain saaʼu aneerüin nakuwaʼipa noonoole sümaa tü pütchi nümakat Maleiwa (Isaías 48:17, 18).

8. ¿Kasa tü neʼrakat wayumüin atuma na tepichikana?

⁸ Wanee kasa neʼraka atuma wayumüin na tepichikana, shia tü kasa mojusü naainjakat nashi jee nei. Nasüliire, nakaijüliire otta kataaʼaliire naya namüin naʼwayuuse, eesü süpüla sumojujaain tü jülüjakat naaʼin na tepichikana sünain tü nakuwaʼipainjatkat. Jaʼitainna na wayuu anakana akuwaʼipa, eeshii süpüla neʼrüin wayumüin nachonnii sutuma süntüin suluʼumüin nekii maaliin naya. Tü eʼraakat wayumüin, nnojotsü sünainjeejatüin tü kasa mojusü aainjünakat. Mayaapejeʼe noonooin na wayuukana sümaa tü pütchi nümakat Maleiwa otta naaʼinmajüin nachonnii suulia kasa mojusü, eeshii na tepichi ayouktajaakana sümaa tü ekirajünakalü anain naya. ¿Jamüsü sülataka tia? Eesü shiale sutuma kaainjaralüin wayuu süpüshuaʼa. Müshi Pablo: ‹Kaainjalashi Adán nuulia Maleiwa sükajee niyouktajaain sümaa nünüiki. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa› (Roma 5:12). Nülatirüin Adán sünainmüin wayuu süpüshuaʼa tü eʼraakat wayumüin. Eeshii tepichi eʼraka neʼe wayumüin maʼaka naainjüin shia Adán.

TÜ NAAINJAKALÜ ELÍ OTTA REHOBOAM

9. ¿Kasa neʼraka wayumüin atuma na tepichikana?

⁹ Neʼraka wayumüin na tepichikana, shia sutuma mojuin nachiajaaya natuma nashi jee nei (Colosas 3:21). Eeshii na apülajakana wainma kasa noulia otta mojusü natuma nachiajaaya. Eeshii na ooʼulaakana nachonnii sünain aainjaa tü keeʼireekat naaʼin otta nnojoishii nekirajüin naya süpüla anain nakuwaʼipa. Kapüleesü namüin na wayuukana anain natuma nachiajaaya nachonnii. Nnojotsü wanaawain nakuwaʼipa na tepichikana. Eeshii na choʼujaakana amüin achiajaanaa waneepia otta eeshii na nnojoliikana choʼujaain amüin shia. Wekirajaa süchiki nakuwaʼipa piamashii wayuu eeʼiyataka mojuin nooʼulaanüle na tepichikana naainjüin tü keeʼireekat naaʼin otta süpülajünüle wainma kasa noulia.

10. ¿Jamüsü mojuka nutuma Elí shipijia nüchonnii, mayaapejeʼe laülaain nia napüleerua na sacerdootekana?

¹⁰ Laülaapuʼushi Elí napüleerua na sacerdootekana soʼu 40 juya chayaa Israel. Ofní otta Finehás nanülia nüchonnii. Atüjüshi maʼin Elí süpüleerua tü Pütchi nuluwataakalü anain Maleiwa. Naainjüin waneepia tü kasa naainjakat wanee sacerdoote otta nikirajüin nüchonnii sünain tü nuluwataakalü anain Maleiwa. Akaisaʼa nia, nuuʼulaain na nüchonniikana sünain naainjüin tü keeʼireekat naaʼin namüiwaʼa. Sacerdooteshi Ofní otta Finehás, akanasaʼa naya, «nnojoishii kasain anain apüla», shia neʼe naainjaka tü kasa mojusü suchuntakat naaʼin otta tü amaʼüjirawaakalü akuwaʼipaa. Wanaa sümaa naainjüin kasa mojusü suluʼu tü aʼwaajüleekat, nnojoishii nuuʼuleʼerüin suulia sacerdootein, nüchiajaain neʼe naya. Sükajee tü naainjakat, kojutshii naya nutuma nuulialeʼeya Maleiwa. Sutuma tia, eʼrüshii wayumüin nümüin Jeʼwaa jee ouktüshii naya nümaʼaleʼeya Elí (1 Samuel 2:12-17, 22-25, 29; 3:13, 14; 4:11-22, NM).

11. ¿Kasa shiiʼiyataka wamüin tü naainjakalü Elí?

¹¹ Miyoʼuyuu nüchonnii Elí wanaa sümaa sülatüin tia namüin. Tia, shiiʼiyatüin mojuin nnojorüle wachiajaain wachonnii (puʼwanaajireʼera sümaa Proverbios 29:21). Eeshii wayuu ooʼulaaka nachonnii naainjüin tü keeʼireekat naaʼin süka alin naya napüla. Sutuma tia, nnojotsü naküjüin namüin tü nnojoluinjatkat naainjüin otta nnojotsü lotuin nachiajaaya natuma. Nnojoishii nachiajaain naya nnojorüle naainjüin tü nümakat Maleiwa. Sünainjee tia, eeshii süpüla nnojoliin noonooin namaa nashi otta namaa na laülaakana naaʼu (puʼwanaajireʼera sümaa Eclesiastés 8:11).

12. ¿Kasa tü nnojotkat naainjüin Rehoboam nuluwataapa?

¹² Wanee wayuu nnojoika anain atuma nuluwataaya nia Rehoboam, chi chiiruajachikai aluwataain saaʼu Israel. Nnojoishi anamiain nia. Aluwataashi naaʼu na wayuu müliakana maʼin aaʼin sutuma tü kasa naainjirakat Salomón, chi nüshikai. ¿Nümüliajüin Rehoboam na wayuukana? Nnojo. Suchuntünapa nümüin nüsünneʼerüinjatüin süpüshi tü kasa müliakat maʼin atuma saaʼin wayuu, nnojoishi jaa müin namüin na laülaayuu aashajaakana nümaa, nükooʼomüinjirüin maʼin shia. Sutuma yaletüin maʼin naaʼin, eʼrüshii wayumüin na polookana eʼirukuu chajanaka palaapünaa, piamaitpaka shiʼipapaʼa tü aluwataayakat (1 Reyes 12:1-21; 2 Crónicas 10:19).

13. ¿Kasa shikirajaka anain na kachonshiikana tü naainjakat Rehoboam?

¹³ Eesü tü shikirajakalü anain na kachonshiikana tü naainjakat Rehoboam. ‹Achuntajana naya nümüin Jeʼwaa› otta jülüjüinjatü naaʼin shipijia nachonnii süka tü pütchi sümakat tü Wiwüliakat (Salmo 105:4, NM). Müsü Eclesiastés 7:7, NM: «Eeshi süpüla nnojolin naaʼinruʼuin wanee wayuu kekiishi maʼin nüpüleeruaanüle aaʼin». Anale maʼin süneekia nekirajia na tepichikana, laülaajeerü naaʼin otta aneerü nakuwaʼipa. Nnojorüle süpülajünüin wainma kasa noulia otta nnojorüle ichein maʼin na kachonshiikana süchiirua tü namakat, nnojoleerü mmoluin naaʼin nachonnii seema aashajawaa otta nounteerü naaʼinrüin wanee kasa namüiwaʼa. Nooʼulaanüle sünain aainjaa waneeirua kasa anaka süpüla naainjüin sümaa süküjünaleein tü nnojoluinjatkat naainjüin, nnojoleena eʼrüin maʼin wayumüin.

WOOʼULAA NAAʼINRÜIN WANEEIRUA KASA

14, 15. ¿Kasa nnojoluinjatka naainjüin na wayuukana namüin nachonnii?

¹⁴ Mayaapejeʼe nacheküin na wayuukana miyoʼuyuuin nachonnii, eesü shapaale naaʼin süka nakatalaajeenain noulia mapa. Sülatüle tia, nnojotsü ponuinjatüin naaʼin nnojorüle noonooin namaa. ¿Kasapülajatü anaka natuma na anoujüshiikana shipijia nachonnii? Süpülajatü laülaainjatüin naaʼin nachonnii, naainjüinjatüin tü namakat otta pansaainjatüin naaʼin (puʼwanaajireʼera sümaa 1 Corinto 13:11; Éfeso 4:13, 14).

¹⁵ Nnojoishii macheʼeinjanain na wayuukana sünain naʼalijirüin nachonnii suulia naaʼinrüin waneeirua kasa anaka süpüla naainjüin. Choʼujaasü namüin na tepichikana naneeküin tü nakuwaʼipainjatkat. Eeshii jimaʼalii otta majayünnüü laülaaka aaʼin tepichijaiwaʼaya naya. Müsü tü Wiwüliakat nüchiki Josías, wanee jimaʼai aluwataai: «Jintüliiwaʼaya nia [maʼaka 15 nuuyase], nüchajaa achikichi chi Nümaleiwasekai David». Jimaʼaikai chii, naainjüin tü nümakat (2 Crónicas 34:1-3, NM).

16. ¿Kasa nayaawatüinjatka aaʼu na tepichikana nooʼulaanüle sünain aaʼinraa waneeirua kasa?

¹⁶ Nooʼulaanüle na tepichikana naaʼinrüin waneeirua kasa, nayaawateerü aaʼu tü kasa alatakat namüin sünainjee tü kasa naneekakat otta tü kasa naainjakat. «Kasa eeka nüpünajüin chi wayuukai shieerü nütpajaka mapa», pütchikat tüü, nanainpünaasü shia na jimaʼaliikana, na majayünnüükana otta na miyoʼuyuukana (Galacia 6:7, NM). Nnojoishii süpüla naaʼinmajünüin maʼin waneepia na tepichikana. ¿Jamüinjatü nünüiki wanee wayuu naainjeerü kasa mojusü chi nüchonkai? Kekiire maʼin nia, «nnojo» müinjachi. Jaʼitairü nüküjüin jamüin «nnojo» nümaka, nnojoishi «aa» müinjachin süchikijee «nnojo» nümüin (puʼwanaajireʼera sümaa Mateo 5:37). «Nnojo» nümapa, nnojoishi jashichinjachin otta anainjatü süküjia nutuma süka ‹suʼunüin tü jashieekat wasouktüle süka pütchi analuʼut› (Proverbios 15:1, NM).

17. ¿Kasa choʼujaaka naainjüin na kachonshiikana?

¹⁷ Choʼujaasü nnojoluinjatüin neeʼiratüin na wayuukana nachiajaaya nachonnii, jaʼitairü nnojoluin nacheküin tü aluwataanakalü anain naya otta süpülajünüin kasa noulia. Mojusü naaʼin shiiʼiratünüle tü nachiajaayakat wanaapünaa sümaa nukuwaʼipa chi nashikai. Choʼujaasü sütalateʼennüin naaʼin otta nakaaliinjünüin süpüla nnojoliin japüleʼein naya otta süpüla nountüin naaʼinrüin wanee kasa namüiwaʼa. Müle shia, pansaajeerü naaʼin miyoʼuyuupa naya. Anasü namüin shiʼitaanüle aaʼinyüü nanain anale nakuwaʼipa (puʼwanaajireʼera sümaa Isaías 35:3, 4; Lucas 16:10, NM; 19:17).

18. Püküja wanee kasa aküjünaka nachiki na jimaʼaliikana.

¹⁸ Aneerü nakuwaʼipa nachonnii na wayuukana, nnojoliire naʼülüjiraain waneepia, waneepiale naya namaa otta aijiraale naya (Éfeso 4:31, 32; Santiago 3:17, 18). Wainma tepichi anouktaaka akuwaʼipa otta aainjaka kasa anasü miyoʼuyuupa naya, mayaapejeʼe nasüliin, katkaaraliin otta naainjüin waneeirua kasa mojusü nashi jee nei. Aire wapüla wachonnii, jülüjüle waaʼin naya, mayaapejeʼe wapülajüin kasa noulia otta wachiajaain naya wanaapünaa sümaa tü nümakat Jeʼwaa, eesü süpüla anain nakuwaʼipa mapa (puʼwanaajireʼera sümaa Proverbios 27:11).

KAAINJARALE NAYA

19. Mayaapejeʼe nekirajüin nachonnii na wayuukana, ¿kasa naaʼinrajatka na tepichikana?

¹⁹ Anasü nakuwaʼipa na tepichikana anale nekirajia. Müsü Proverbios 22:6, NM: «Pikiraja püchon wanaajiraa sümaa tü wopu kaluʼuinjachika nia; laülaapa nia nnojoleechi ojunujaain suulia». ¿Kasa eeka süpüla waküjüin nachiki na tepichi aainjakana kasa mojusü sümaa wayuuin anashii nashi jee nei? ¿Eesü süpüla sülatüin tia? Aa. Tü pütchi sümakat proverbio wayaawatüinjatü shia sutuma tü sümakat waneeirua wersiikulo, aashajaaka süchiki ‹naapajüinjatüin› na tepichikana otta noonooinjanain sümaa nanüiki nashi jee nei (Proverbios 1:8, NM). Oonooinjana na wayuukana otta nachonnii sümaa tü sümakat tü Wiwüliakat süpüla anajiraain naya. Nnojorüle naainjüin shia, mojujiraajeena naya.

20. ¿Kasa naaʼinrajatka na wayuukana naainjüle kasa mojusü nachonnii sümaa nnojoluin naaʼinjeein shia?

²⁰ ¿Kasa naaʼinrajatka na wayuukana kaainjarale nachonnii? Nakaaliinjüinjana naya. Jülüjüle naaʼin eein tü kasa isakat nachiki, nachechereerü naaʼin suulia naashichijaain namüin. Müshi Pablo namüin na anoujüshii laülaakana aaʼin: «Kaainjarale wane juwala, anashii müleka jimeʼejüle naaʼin süpüla nujuittinnüinjachin suulia tü kaainjalaakat. Je wanaa sümaa jükaaliijain nia, ayata jia kamaneein nümüin» (Galacia 6:1). Eesü süpüla naainjüin tia na wayuukana naainjüle kasa mojusü nachonnii sümaa nnojoluin naaʼinjeein shia. Naküjüinjatü namüin jamüin mojuka tü kasa naainjakat otta kasain naaʼinrüinjatüin süpüla nnojoluin naainjüin shia süchikuaʼa. Naküjüinjatü namüin shiain aʼürülaanüin tü kasa mojusü naainjakat, nnojoishii nayain na tepichikana (puʼwanaajireʼera sümaa Judas 22, 23).

21. ¿Kasa naaʼinrajatka na anoujüshiikana kaainjarale nachonnii?

²¹ ¿Jama naainjüle wanee kasa eeka mojuin maʼin? Choʼujaasü nakaaliinjünüin natuma na laülaashiikana otta anain suʼuniria nakuwaʼipa. Kaainjarale wanee anoujüshi, aashajaana amaachi süpüla nuuʼulaain suulia otta nuchuntüin kaaliinwaa namüin na laülaashiikana (Santiago 5:14-16). Süchikijee nuuʼulaain suulia naainjala, akaaliinjünüshi nia natuma na laülaashiikana süpüla sunouktaain nukuwaʼipa nümaa Maleiwa. Kaainjarale na tepichikana akaaliinjünüinjana natuma nashi jee nei, mayaapejeʼe eein süpüla naashajaain namaa na laülaashiikana. Kaainjarale nachonnii na anoujüshiikana, nnojotsü nounjulajüinjatüin shia noulia na laülaashiikana.

22. ¿Kasa nashatajatka na wayuukana nünainjee Jeʼwaa kaainjarale nachonnii?

²² Mojusü maʼin naaʼin na wayuukana kaainjarale nachonnii. Eeshii süpüla jashichin naya otta neimmolojuin nachonnii süka shapaain maʼin naaʼin. Naainjüle tia, ülüʼütteerü naaʼin nachonnii. Jülüja waaʼin sünainpünaainjatüin nakuwaʼipa mapeena tü wamakat namüin. Kaainjarale na anoujüshii namaiwajanakana, motusü naaʼin Jeʼwaa tü naainjalakat nouyantaapa suulia. Müshi nia namüin: «Jalainna wakumajiraain wakuwaʼipa. Jaʼitairü ishoin tü jaainjalakat kasuujeerü shia maʼaka saaʼin yeelo, jaʼitairü ishoin maʼin shia maʼaka saaʼin kuluulu carmesí, kasuujeerü tatuma maʼaka saaʼin laana» (Isaías 1:18, NM). Nashatüinjatü tia na kachonshiikana.

23. ¿Kasa naaʼinrajatka otta nnojoluinjatka naaʼinrüin na wayuukana kaainjarale nachonnii?

²³ Waashajaa namaa na wachonnii eʼrakana wayumüin süpüla neeʼiratüinjatüin nakuwaʼipa. Eeshii süpüla wachuntüin kaaliinwaa namüin na wayuu alatakana amüin tia otta namüin na laülaashiikana suluʼu tü outkajaaleekat (Proverbios 11:14). Wayaawatüinjatü wanüiki jee nnojoluinjatü waaʼinrüin wanee kasa akayaleʼeraka wachonnii woulia. Nnojoishii jashichinjanain waya otta ülüʼüttüin maʼin waaʼin (Colosas 3:8). Ayata wakaaliinjüin naya waneepia (1 Corinto 13:4, 7). Mayaapejeʼe walerajüinjatüin tü kasa mojusükat, nnojoishii müliainjanain maʼin watuma wachonnii jee ülüʼüttüinjatüin waaʼin nanain. Tü waainjüinjatkat maʼin shia waʼyataainjanain süchiirua anain wakuwaʼipa otta ayatüin ichein wanoula.

MACHEʼERE NAYA SÜNAIN EʼRAA WAYUMÜIN

24. ¿Kasa eeka süpüla naainjüin nachonnii na anoujüshiikana? ¿Jaralii na jülüjüinjanaka maʼin naaʼin na kachonshiikana?

²⁴ Eeshii tepichi macheʼeka süchiirua eʼraa wayumüin otta nayouktaleein tü ekirajünakalü anain naya. Müle naya, ayatüinjana na wayuukana nakaaliinjüin otta nanoukteʼerüin nakuwaʼipa na wanee nachonniikana. Nnojoishii jülüjüinjanain maʼin naaʼin na macheʼekana sünain eʼraa wayumüin, naya jülüjüinjanaka naaʼin na apütaakana. Suulialeʼeya nounjulajüin süchiki tü naainjakat, eesü süpüla naküjüin shia namüin na wanee nachonniikana sümaa namülialüin naaʼin (puʼwanaajireʼera sümaa Proverbios 20:18).

25. (1) ¿Kasa naaʼinrajatka na anoujüshiikana neʼrüle maʼin wayumüin nachonnii? (2) ¿Kasa naaʼinrajatka naka na wanee nachonniikana?

²⁵ Müshi Juan nachiki na anoujüshii eʼrakana maʼin wayumüin: ‹Nnojo kamaneein jia namüin› (2 Juan 10) Naaʼinrajatü tia na anoujüshiikana eere wanee nachon miyoʼu macheʼeka sünain eʼraa wayumüin. Jaʼitairü kapüleein maʼin shia namüin otta mojuin naaʼin sutuma. Choʼujaasü naainjüin shia süpüla naaʼinmajüin waneepia naʼwayuuse jee na wanee nachonniikana. Sutuma tia, ayatüinjatü naküjüin namüin tü kasa naaʼinrajatkat. Aashajaainjana naya namaa otta jülüjüinjatü naaʼin jamüin nakuwaʼipa suluʼu tü koleejiakat otta suluʼu tü outkajaaleekat. Naküjüinjatü namüin nnojoliin naʼürülain na eʼrakana maʼin wayumüin, shia nayouktaka tü kasa mojusü naaʼinrakat. Wanaa sümaa naainjüin kasa mojusü piamashii nüchonnii Jacob, nnojoishii nüʼürülain naya, shia niyouktaka tü kasa mojusü naaʼinrakat (Génesis 34:1-31; 49:5-7).

26. ¿Kaseerü amülialaaka atuma naaʼin na anoujüshii kachonka wanee jintüi eʼrüi maʼin wayumüin?

²⁶ Eeshii wayale kasirüin saaʼin wamüin tü alatakat namüin na wachonnii eʼrakana maʼin wayumüin. Waainjüle kasa eeka eein süpüla wanoukteʼerüin nakuwaʼipa, woʼuraajüle paala nümüin Jeʼwaa otta waainjüle tü nümakat, nnojotsü antajatüin suluʼumüin waaʼin wasirüin tü alatakat. Amülialaajeerü waaʼin sutuma watüjaain saaʼu waʼyataain maʼin paala sünain wepijüin otta wekirajüin naya, mayaapejeʼe nnojoluin lotuin maʼin wakuwaʼipa (puʼwanaajireʼera sümaa Aluwataaushikana 20:26). Mojusü maʼin waaʼin neʼrüle maʼin wayumüin wachonnii; sülatüle tia wamüin, weʼitaa maʼin waaʼin sünain nütüjaain saaʼu Maleiwa tü alatakat wamüin otta nnojoleena waya nüpütüin waneepiale waya nümaa (Salmo 27:10). Sutuma tia, ana watuma naaʼin otta nanoula na wanee wachonniikana.

27. ¿Kasa eeka süpüla naainjüin na ojuʼitakana suulia anoujaa?

²⁷ Jülüjüinjatü waaʼin naleʼejeenain soʼu wanee kaʼi na wachonnii eʼrakana maʼin wayumüin. Eesü süpüla süntüin suluʼumüin naaʼin tü ekirajünakalü anain paala otta naleʼejüin nachikuaʼa sünain anoujaa (Eclesiastés 11:6). Wainma wayuu ojuʼitaka achonnii suulia anoujaa otta mapa aleʼejüshii nachikuaʼa, maʼaka naaʼin nüchon chi wayuu naashajaakai achiki Jesuu (Lucas 15:11-32). Eesü süpüla naainjüin tia na wachonniikana.