Ekirajaaya 10

Sukuwaʼipa wayuu mojuka maʼin nümüin Maleiwa

Tü kasa mojukat nümüin Maleiwa, ¿anasü saaʼin pümüin? (1)

¿Kasa aainjirawaa akuwaʼipaa mojuka nümüin Maleiwa? (2)

¿Anainjatü namüin na oʼunushiikana nüchiirua Cristo tü alawaakat? (3) ¿Tü ashaittaakat saaʼu nneerü? (3)

¿Tü aʼluwajaakat? (3) ¿Tü atkawaakat?  (4)

¿Tü naaʼinrakat na outshiikana? (5) ¿Tü epeʼruwaakat? (6)

¿Kasa waainjüinjatka süpüla nnojoluinjatüin waaʼinrüin tü kasa mojusükat? (7)

1. Na aʼyataashiikana nümüin Maleiwa anasü namüin tü kasa anasükat akatsaʼa mojuinjatü maʼin namüin tü kasa mojusükat (Roma 12:9). Sutuma tia nnojoluinjatü naainjüin tü kasa mojukat maʼin nümüin Maleiwa. ¿Jarat shia?

2. Aainjirawaa akuwaʼipaa yarüttüsü: Tü aainjirawaakat akuwaʼipaa süpülapünaa kasaalüü sümaa wayuu nnojotka aʼwayuuseein, sümaa mürüt, sümaa apüshii, wanee toolo nümaa wanee toolo mojusü maʼin nümüin Maleiwa (Levítico 18:6; Roma 1:26, 27; 1 Corinto 6:9, 10). Kepiajiraale wayuu sümaa nnojoluin kasaalüin naya acheküshii nakatajiraain, nnojorüle naainjeein tia kasaalüinjana (Hebreokana 13:4).

3. Alawaa, ashaittaa saaʼu nneerü otta aʼluwajaa: Jeowa nnojoishi süpüla nüküjüin alawaa (Tito 1:2). Aneere waya nümüin nnojoluinjana waya aküjüin alawaa (Alateetkat Mapeena 22:15; Colosas 3:9, 10). Tü ashaittaakat saaʼu nneerü washireesü wayuu sutuma. Sutuma tia na oʼunushiikana nüchiirua Cristo nnojoishii ashaittüin loteriia, winko otta ayoujireʼerüin ama saaʼu nneerü (Éfeso 5:3-5). Nnojoishii aʼluwajüin, ayaʼlajüin kasa eeka suʼluwajuushin otta alüʼüjüin kasa eeka nnojoluin nakoroloin (Marcos 10:19; Éfeso 4:28).

4. Jashiee maʼin otta atkawaa: Tü jashieekat maʼin eesü süpüla eein atkawaa sutuma (Génesis 4:5-8). Nnojoishii süpüla naʼaleewainjanain Maleiwa na katkaaraliikana (Salmo 11:5; Proverbios 22:24, 25). Nnojotsü anain waainjüle kasa mojusü namüin na aainjakana kasa mojusü wamüin otta pasalaweere waya (1 Pedro 3:9; Roma 12:17-21).

5. Tü naaʼinrakat na outshiikana: Eeshii eeka nounejüin tü yolujaakalüirua süpüla sükaaliinjüin naya sünain eiyajaa eeka ayuulin. Otta waneeinua neiyajüin naʼünüü süpüla ayuuliinjanain ooʼulaka ouktuinjanain naya. Chi aainjirakai kasakalüirua tüü nia Satanás. Makalaka na oʼunushiikana nüchiirua Cristo nnojoluinjatü naainjüin tia (Deuteronomio 18:9-13). Süpüla nnojoluinjanain weiyajünüin nümaainjana waya Jeowa (Proverbios 18:10).

6. Epeʼruwaa: Asaa yootchon wiino, seruweesa otta asüüshi eeka müin aka saaʼin tia nnojotsü mojuin (Salmo 104:15; 1 Timoteo 5:23). Akatsaʼa tü mojukat nümüin Maleiwa shia tü epeʼruwaakat otta sülataleere tü asüüshikat (1 Corinto 5:11-13; 1 Timoteo 3:8). Sutuma tü asawaakat eeshi süpüla ayuulin pia otta müliain püpüshi. Otta müsia, eesü süpüla paainjüin waneeirua kasa mojusü sutuma (Proverbios 23:20, 21, 29-35).

7. Na wayuu aainjakana tü kasa mojukat nümüin Maleiwa ‹nnojoleena ekeroluin suluʼumüin tü nuluwataayakat› (Galacia 5:19-21). Maʼaka shiimainre alin püpüla Maleiwa otta talateere nia putuma nnojoluinjatü paainjüin tü kasa mojusükat (1 Juan 5:3). Piyoukta tü kasa mojukat nümüin Maleiwa (Roma 12:9). Aleewa pia namaa na wayuu aainjakana tü nümakat Jeowa (Proverbios 13:20). Na wawalayuu laülaashiikana eeshii süpüla nakaaliinjüin waya (Santiago 5:14). Otta müsia paashajaa nümaa Maleiwa süpüla nükaaliinjüin pia (Filipos 4:6, 7).

[Ayaakua suluʼuka süpana 20, 21]

Mojusü maʼin nümüin Maleiwa tü epeʼruwaakat, tü aʼluwajaakat, tü ahaittaakat saaʼu nneerü otta tü atkawaakat